৪. ৰল্লিযত্থেরগাথাৰণ্ণনা

যং কিচ্চং দল়্হৰীরিযেনাতিআদিকা আযস্মতো ৰল্লিযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো সুমেধস্স ভগৰতো কালে ব্রাহ্মণকুলে নিব্বত্তিত্ৰা ৰিঞ্ঞুতং পত্তো ৰিজ্জাসিপ্পেসু নিপ্ফত্তিং গতো অসীতিকোটিৰিভৰং পহায তাপসপব্বজ্জং পব্বজিত্ৰা পব্বতপাদে অরঞ্ঞাযতনে একিস্সা নদিযা তীরে অস্সমং কারেত্ৰা ৰিহরন্তো অত্তনো অনুগ্গণ্হনত্থং উপগতং সত্থারং দিস্ৰা পসন্নমানসো অজিনচম্মং পত্থরিত্ৰা অদাসি. তত্থ নিসিন্নং ভগৰন্তং পুপ্ফেহি চ চন্দনেন চ পূজেত্ৰা অম্বফলানি দত্ৰা পঞ্চপতিট্ঠিতেন ৰন্দি. তস্স ভগৰা নিসিন্নাসনসম্পত্তিং পকাসেন্তো অনুমোদনং ৰত্ৰা পক্কামি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে ৰেসালিযং ব্রাহ্মণকুলে নিব্বত্তিত্ৰা ‘‘কণ্হমিত্তো’’তি লদ্ধনামো ৰযপ্পত্তো সত্থু ৰেসালিগমনে বুদ্ধানুভাৰং দিস্ৰা পটিলদ্ধসদ্ধো মহাকচ্চানত্থেরস্স সন্তিকে পব্বজি. সো মন্দপঞ্ঞো দন্ধপরক্কমো চ হুত্ৰা চিরং কালং ৰিঞ্ঞুং সব্রহ্মচারিং নিস্সাযেৰ ৰসতি. ভিক্খূ ‘‘যথা নাম ৰল্লি রুক্খাদীসু কিঞ্চি অনিস্সায ৰড্ঢিতুং ন সক্কোতি, এৰমযম্পি কঞ্চি পণ্ডিতং অনিস্সায ৰড্ঢিতুং ন সক্কোতী’’তি ৰল্লিযোত্ৰেৰ সমুদাচরিংসু. অপরভাগে পন ৰেণুদত্তত্থেরং উপসঙ্কমিত্ৰা তস্স ওৰাদে ঠত্ৰা সতো সম্পজানো হুত্ৰা ৰিহরন্তো ঞাণস্স পরিপাকং গতত্তা পটিপত্তিক্কমং থেরং পুচ্ছন্তো –

১৬৭. ‘‘যং কিচ্চং দল়্হৰীরিযেন, যং কিচ্চং বোদ্ধুমিচ্ছতা;

করিস্সং নাৰরজ্ঝিস্সং, পস্স ৰীরিযং পরক্কমং.

১৬৮. ‘‘ত্ৰঞ্চ মে মগ্গমক্খাহি, অঞ্জসং অমতোগধং;

অহং মোনেন মোনিস্সং, গঙ্গাসোতোৰ সাগর’’ন্তি. – গাথাদ্ৰযং অভাসি;

তত্থ যং কিচ্চং দল়্হৰীরিযেনাতি দল়্হেন ৰীরিযেন থিরেন পরক্কমেন, দল়্হৰীরিযেন ৰা পুরিসধোরয্হেন যং কিচ্চং কাতব্বং পটিপজ্জিতব্বং. যং কিচ্চং বোদ্ধুমিচ্ছতাতি চত্তারি অরিযসচ্চানি নিব্বানমেৰ ৰা বোদ্ধুং বুজ্ঝিতুং ইচ্ছন্তেন পটিৰিজ্ঝিতুকামেন যং কিচ্চং করণীযং. করিস্সং নাৰরজ্ঝিস্সন্তি তমহং দানি করিস্সং ন ৰিরাধেস্সং, যথানুসিট্ঠং পটিপজ্জিস্সামি. পস্স ৰীরিযং পরক্কমন্তি যথা পটিপজ্জমানে ধম্মে ৰিধিনা ঈরণতো ‘‘ৰীরিযং’’, পরং পরং ঠানং অক্কমনতো ‘‘পরক্কমো’’তি চ লদ্ধনামং সম্মাৰাযামং পস্স ন সদ্ধমেৰাতি অত্তনো কত্তুকামতং দস্সেতি.

ত্ৰঞ্চাতি কম্মট্ঠানদাযকং কল্যাণমিত্তং আলপতি. মেতি ময্হং. মগ্গমক্খাহীতি অরিযমগ্গং কথেহি, লোকুত্তরমগ্গসম্পাপকং চতুসচ্চকম্মট্ঠানং কথেহীতি অত্থো. অঞ্জসন্তি উজুকং মজ্ঝিমপটিপদাভাৰেন অন্তদ্ৰযস্স অনুপগমনতো. অমতে নিব্বানে সম্পাপকভাৰেন পতিট্ঠিতত্তা অমতোগধং. মোনেনাতি ঞাণেন মগ্গপঞ্ঞায. মোনিস্সন্তি জানিস্সং নিব্বানং পটিৰিজ্ঝিস্সং পাপুণিস্সং. গঙ্গাসোতোৰ সাগরন্তি যথা গঙ্গায সোতো সাগরং সমুদ্দং অৰিরজ্ঝন্তো একংসতো ওগাহতি, এৰং ‘‘অহং কম্মট্ঠানং অনুযুঞ্জন্তো মগ্গঞাণেন নিব্বানং অধিগমিস্সামি, তস্মা তং কম্মট্ঠানং মে আচিক্খথা’’তি থেরং কম্মট্ঠানং যাচি.

তং সুত্ৰা ৰেণুদত্তত্থেরো তস্স কম্মট্ঠানং অদাসি. সোপি কম্মট্ঠানং অনুযুঞ্জন্তো নচিরস্সেৰ ৰিপস্সনং উস্সুক্কাপেত্ৰা অরহত্তং পাপুণি. তেন ৰুত্তং অপদানে (অপ. থের ২.৪৯.৭৫-১০৫) –

‘‘পঞ্চ কামগুণে হিত্ৰা, পিযরূপে মনোরমে;

অসীতি কোটিযো হিত্ৰা, পব্বজিং অনগারিযং.

‘‘পব্বজিত্ৰান কাযেন, পাপকম্মং ৰিৰজ্জযিং;

ৰচীদুচ্চরিতং হিত্ৰা, নদীকূলে ৰসামহং.

‘‘এককং মং ৰিহরন্তং, বুদ্ধসেট্ঠো উপাগমি;

নাহং জানামি বুদ্ধোতি, অকাসিং পটিসন্থারং.

‘‘করিত্ৰা পটিসন্থারং, নামগোত্তমপুচ্ছহং;

দেৰতানুসি গন্ধব্বো, অদু সক্কো পুরিন্দদো.

‘‘কো ৰা ত্ৰং কস্স ৰা পুত্তো, মহাব্রহ্মা ইধাগতো;

ৰিরোচেসি দিসা সব্বা, উদযং সূরিযো যথা.

‘‘সহস্সারানি চক্কানি, পাদে দিস্সন্তি মারিস;

কো ৰা ত্ৰং কস্স ৰা পুত্তো, কথং জানেমু তং মযং.

‘‘নামগোত্তং পৰেদেহি, সংসযং অপনেহি মে;

নম্হি দেৰা ন গন্ধব্বো, নম্হি সক্কো পুরিন্দদো.

‘‘ব্রহ্মভাৰো চ মে নত্থি, এতেসং উত্তমো অহং;

অতীতো ৰিসযং তেসং, দালযিং কামবন্ধনং.

‘‘সব্বে কিলেসে ঝাপেত্ৰা, পত্তো সম্বোধিমুত্তমং;

তস্স ৰাচং সুণিত্ৰাহং, ইদং ৰচনমব্রৰিং.

‘‘যদি বুদ্ধোসি সব্বঞ্ঞূ, নিসীদ ত্ৰং মহামুনে;

তমহং পূজযিস্সামি, দুক্খস্সন্তকরো তুৰং.

‘‘পত্থরিত্ৰাজিনচম্মং, অদাসি সত্থুনো অহং;

নিসীদি তত্থ ভগৰা, সীহোৰ গিরিগব্ভরে.

‘‘খিপ্পং পব্বতমারুয্হ, অম্বস্স ফলমগ্গহিং;

সালকল্যাণিকং পুপ্ফং, চন্দনঞ্চ মহারহং.

‘‘খিপ্পং পগ্গয্হ তং সব্বং, উপেত্ৰা লোকনাযকং;

ফলং বুদ্ধস্স দত্ৰান, সালপুপ্ফমপূজযিং.

‘‘চন্দনং অনুলিম্পিত্ৰা, অৰন্দিং সত্থুনো অহং;

পসন্নচিত্তো সুমনো, ৰিপুলায চ পীতিযা.

‘‘অজিনম্হি নিসীদিত্ৰা, সুমেধো লোকনাযকো;

মম কম্মং পকিত্তেসি, হাসযন্তো মমং তদা.

‘‘ইমিনা ফলদানেন, গন্ধমালেহি চূভযং;

পঞ্চৰীসে কপ্পসতে, দেৰলোকে রমিস্সতি.

‘‘অনূনমনসঙ্কপ্পো, ৰসৰত্তী ভৰিস্সতি;

ছব্বীসতিকপ্পসতে, মনুস্সত্তং গমিস্সতি.

‘‘ভৰিস্সতি চক্কৰত্তী, চাতুরন্তো মহিদ্ধিকো;

ৰেভারং নাম নগরং, ৰিস্সকম্মেন মাপিতং.

‘‘হেস্সতি সব্বসোৰণ্ণং, নানারতনভূসিতং;

এতেনেৰ উপাযেন, সংসরিস্সতি সো ভৰে.

‘‘সব্বত্থ পূজিতো হুত্ৰা, দেৰত্তে অথ মানুসে;

পচ্ছিমে ভৰে সম্পত্তে, ব্রহ্মবন্ধু ভৰিস্সতি.

‘‘অগারা অভিনিক্খম্ম, অনগারী ভৰিস্সতি;

অভিঞ্ঞাপারগূ হুত্ৰা, নিব্বাযিস্সতিনাসৰো.

‘‘ইদং ৰত্ৰান সম্বুদ্ধো, সুমেধো লোকনাযকো;

মম নিজ্ঝাযমানস্স, পক্কামি অনিলঞ্জসে.

‘‘তেন কম্মেন সুকতেন, চেতনাপণিধীহি চ;

জহিত্ৰা মানুসং দেহং, তাৰতিংসমগচ্ছহং.

‘‘তুসিততো চৰিত্ৰান, নিব্বত্তিং মাতুকুচ্ছিযং;

ভোগে মে ঊনতা নত্থি, যম্হি গব্ভে ৰসামহং.

‘‘মাতুকুচ্ছিগতে মযি, অন্নপানঞ্চ ভোজনং;

মাতুযা মম ছন্দেন, নিব্বত্ততি যদিচ্ছকং.

‘‘জাতিযা পঞ্চৰস্সেন, পব্বজিং অনগারিযং;

ওরোপিতম্হি কেসম্হি, অরহত্তমপাপুণিং.

‘‘পুব্বকম্মং গৰেসন্তো, ওরেন নাদ্দসং অহং;

তিংসকপ্পসহস্সম্হি, মম কম্মমনুস্সরিং.

‘‘নমো তে পুরিসাজঞ্ঞ, নমো তে পুরিসুত্তম;

তৰ সাসনমাগম্ম, পত্তোম্হি অচলং পদং.

‘‘তিংসকপ্পসহস্সম্হি, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অঞ্ঞং ব্যাকরোন্তো থেরো ইমাযেৰ গাথা অভাসীতি.

ৰল্লিযত্থেরগাথাৰণ্ণনা নিট্ঠিতা.