২. ভদ্দজিত্থেরগাথাৰণ্ণনা

পনাদো নাম সো রাজাতি আযস্মতো ভদ্দজিত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে ব্রাহ্মণকুলে নিব্বত্তিত্ৰা ৰিঞ্ঞুতং পত্তো ব্রাহ্মণানং ৰিজ্জাসিপ্পেসু পারং গন্ত্ৰা কামে পহায তাপসপব্বজ্জং পব্বজিত্ৰা অরঞ্ঞাযতনে অস্সমং কারেত্ৰা ৰসন্তো একদিৰসং সত্থারং আকাসেন গচ্ছন্তং দিস্ৰা পসন্নমানসো অঞ্জলিং পগ্গয্হ অট্ঠাসি. সত্থা তস্স অজ্ঝাসযং ঞত্ৰা আকাসতো ওতরি. ওতিণ্ণস্স পন ভগৰতো মধুঞ্চ ভিসমুল়ালঞ্চ সপ্পিঞ্চ খীরঞ্চ উপনামেসি, তস্স তং ভগৰা অনুকম্পং উপাদায পটিগ্গহেত্ৰা অনুমোদনং ৰত্ৰা পক্কামি. সো তেন পুঞ্ঞকম্মেন তুসিতে নিব্বত্তো তত্থ যাৰতাযুকং ঠত্ৰা ততো অপরাপরং সুগতীসুযেৰ সংসরন্তো ৰিপস্সিস্স ভগৰতো কালে মহদ্ধনো সেট্ঠি হুত্ৰা অট্ঠসট্ঠিভিক্খুসহস্সং ভোজেত্ৰা তিচীৰরেন অচ্ছাদেসি.

এৰং বহুং কুসলং কত্ৰা দেৰলোকে নিব্বত্তিত্ৰা তত্থ যাৰতাযুকং ঠত্ৰা ততো চৰিত্ৰা মনুস্সেসু উপ্পন্নো বুদ্ধসুঞ্ঞে লোকে পঞ্চ পচ্চেকবুদ্ধসতানি চতূহি পচ্চযেহি উপট্ঠহিত্ৰা ততো চুতো রাজকুলে নিব্বত্তিত্ৰা রজ্জং অনুসাসন্তো পুত্তং পচ্চেকবোধিং অধিগন্ত্ৰা ঠিতং উপট্ঠহিত্ৰা তস্স পরিনিব্বুতস্স ধাতুযো গহেত্ৰা চেতিযং কত্ৰা পূজেসি. এৰং তত্থ তত্থ তানি পুঞ্ঞানি কত্ৰা ইমস্মিং বুদ্ধুপ্পাদে ভদ্দিযনগরে অসীতিকোটিৰিভৰস্স ভদ্দিযসেট্ঠিস্স একপুত্তকো হুত্ৰা নিব্বত্তি, ভদ্দজীতিস্স নামং অহোসি. তস্স কির ইস্সরিযভোগপরিৰারাদিসম্পত্তি চরিমভৰে বোধিসত্তস্স ৰিয অহোসি.

তদা সত্থা সাৰত্থিযং ৰস্সং ৰসিত্ৰা ভদ্দজিকুমারং সঙ্গণ্হিতুং মহতা ভিক্খুসঙ্ঘেন সদ্ধিং ভদ্দিযনগরং গন্ত্ৰা জাতিযাৰনে ৰসি তস্স ঞাণপরিপাকং আগমযমানো. সোপি উপরি পাসাদে নিসিন্নো সীহপঞ্জরং ৰিৰরিত্ৰা ওলোকেন্তো ভগৰতো সন্তিকে ধম্মং সোতুং গচ্ছন্তং মহাজনং দিস্ৰা ‘‘কত্থাযং মহাজনো গচ্ছতী’’তি পুচ্ছিত্ৰা তং কারণং সুত্ৰা সযম্পি মহতা পরিৰারেন সত্থু সন্তিকং গন্ত্ৰা ধম্মং সুণন্তো সব্বাভরণপটিমণ্ডিতোৰ সব্বকিলেসে খেপেত্ৰা অরহত্তং পাপুণি. তেন ৰুত্তং অপদানে (অপ. থের ২.৫৬.৯৮-১১৬) –

‘‘ওগ্গয্হ যং পোক্খরণিং, নানাকুঞ্জরসেৰিতং;

উদ্ধরামি ভিসং তত্থ, ঘাসহেতু অহং তদা.

‘‘ভগৰা তম্হি সমযে, পদুমুত্তরসৰ্হযো;

রত্তম্বরধরো বুদ্ধো, গচ্ছতে অনিলঞ্জসে.

‘‘ধুনন্তো পংসুকূলানি, সদ্দং অস্সোসহং তদা;

উদ্ধং নিজ্ঝাযমানোহং, অদ্দসং লোকনাযকং.

‘‘তত্থেৰ ঠিতকো সন্তো, আযাচিং লোকনাযকং;

মধুং ভিসেহি সহিতং, খীরং সপ্পিং মুল়ালিকং.

‘‘পটিগ্গণ্হাতু মে বুদ্ধো, অনুকম্পায চক্খুমা;

ততো কারুণিকো সত্থা, ওরোহিত্ৰা মহাযসো.

‘‘পটিগ্গণ্হি মমং ভিক্খং, অনুকম্পায চক্খুমা;

পটিগ্গহেত্ৰা সম্বুদ্ধো, অকা মে অনুমোদনং.

‘‘সুখী হোতু মহাপুঞ্ঞ, গতি তুয্হং সমিজ্ঝতু;

ইমিনা ভিসদানেন, লভস্সু ৰিপুলং সুখং.

‘‘ইদং ৰত্ৰান সম্বুদ্ধো, জলজুত্তমনামকো;

ভিক্খমাদায সম্বুদ্ধো, আকাসেনাগমা জিনো.

‘‘ততো ভিসং গহেত্ৰান, আগচ্ছিং মম অস্সমং;

ভিসং রুক্খে লগ্গেত্ৰান, মম দানং অনুস্সরিং.

‘‘মহাৰাতো উট্ঠহিত্ৰা, সঞ্চালেসি ৰনং তদা;

আকাসো অভিনাদিত্থ, অসনী চ ফলী তদা.

‘‘ততো মে অসনীপাতো, মত্থকে নিপতী তদা;

সোহং নিসিন্নকো সন্তো, তত্থ কালঙ্কতো অহং.

‘‘পুঞ্ঞকম্মেন সঞ্ঞুত্তো, তুসিতং উপপজ্জহং;

কল়েৰরং মে পতিতং, দেৰলোকে রমামহং.

‘‘ছল়সীতিসহস্সানি, নারিযো সমলঙ্কতা;

সাযং পাতং উপট্ঠন্তি, ভিসদানস্সিদং ফলং.

‘‘মনুস্সযোনিমাগন্ত্ৰা, সুখিতো হোমহং তদা;

ভোগে মে ঊনতা নত্থি, ভিসদানস্সিদং ফলং.

‘‘অনুকম্পিতকো তেন, দেৰদেৰেন তাদিনা;

সব্বাসৰা পরিক্খীণা, নত্থি দানি পুনব্ভৰো.

‘‘সতসহস্সিতো কপ্পে, যং ভিসং অদদিং তদা;

দুগ্গতিং নাভিজানামি, ভিসদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তে পন তেন অধিগতে সত্থা ভদ্দিযসেট্ঠিং আমন্তেসি – ‘‘তৰ পুত্তো অলঙ্কতপটিযত্তো ধম্মং সুণন্তো অরহত্তে পতিট্ঠাসি, তেনস্স ইদানেৰ পব্বজিতুং যুত্তং, নো চে পব্বজতি, পরিনিব্বাযিস্সতী’’তি. সেট্ঠি ‘‘ন ময্হং পুত্তস্স দহরস্সেৰ সতো পরিনিব্বানেন কিচ্চং অত্থি, পব্বাজেথ ন’’ন্তি আহ. তং সত্থা পব্বাজেত্ৰা উপসম্পাদেত্ৰা তত্থ সত্তাহং ৰসিত্ৰা কোটিগামং পাপুণি, সো চ গামো গঙ্গাতীরে. কোটিগামৰাসিনো বুদ্ধপ্পমুখস্স ভিক্খুসঙ্ঘস্স মহাদানং পৰত্তেসুং. ভদ্দজিত্থেরো সত্থারা অনুমোদনায আরদ্ধমত্তায বহিগামং গন্ত্ৰা ‘‘গঙ্গাতীরে মগ্গসমীপে সত্থু আগতকালে ৰুট্ঠহিস্সামী’’তি সমাপত্তিং সমাপজ্জিত্ৰা নিসীদি. মহাথেরেসু আগচ্ছন্তেসুপি অৰুট্ঠহিত্ৰা সত্থু আগতকালেযেৰ ৰুট্ঠহি. পুথুজ্জনভিক্খূ, ‘‘অযং অধুনা পব্বজিতো মহাথেরেসু আগচ্ছন্তেসু মানত্থদ্ধো হুত্ৰা ন ৰুট্ঠাসী’’তি উজ্ঝাযিংসু. কোটিগামৰাসিনো সত্থু ভিক্খুসঙ্ঘস্স চ বহূ নাৰাসঙ্ঘাটে বন্ধিংসু, সত্থা ‘‘হন্দস্স আনুভাৰং পকাসেমী’’তি নাৰাসঙ্ঘাটে ঠত্ৰা, ‘‘কহং, ভদ্দজী’’তি পুচ্ছি. ভদ্দজিত্থেরো ‘‘এসোহং, ভন্তে’’তি সত্থারং উপসঙ্কমিত্ৰা অঞ্জলিং কত্ৰা অট্ঠাসি. সত্থা, ‘‘এহি, ভদ্দজি, অম্হেহি সদ্ধিং একনাৰং অভিরুহা’’তি. সো উপ্পতিত্ৰা সত্থু ঠিতনাৰাযং অট্ঠাসি. সত্থা গঙ্গামজ্ঝং গতকালে, ‘‘ভদ্দজি, তযা মহাপনাদরাজকালে অজ্ঝাৰুট্ঠরতনপাসাদো কহ’’ন্তি আহ. ‘‘ইমস্মিং ঠানে নিমুগ্গো’’তি. ‘‘তেন হি, ভদ্দজি, সব্রহ্মচারীনং কঙ্খং ছিন্দা’’তি. তস্মিং খণে থেরো সত্থারং ৰন্দিত্ৰা ইদ্ধিবলেন গন্ত্ৰা পাসাদথূপিকং পাদঙ্গুলন্তরেন সন্নিরুম্ভিত্ৰা পঞ্চৰীসতিযোজনং পাসাদং গহেত্ৰা আকাসে উপ্পতি, উপ্পতন্তো চ পঞ্ঞাস যোজনানি পাসাদং উদকতো উক্খিপি. অথস্স পুরিমভৰে ঞাতকা পাসাদগতেন লোভেন মচ্ছকচ্ছপমণ্ডূকা হুত্ৰা তস্মিং পাসাদে উট্ঠহন্তে পরিৰত্তিত্ৰা উদকে পতিংসু. সত্থা তে পতন্তে দিস্ৰা ‘‘ঞাতকা তে, ভদ্দজি, কিলমন্তী’’তি আহ. থেরো সত্থু ৰচনেন পাসাদং ৰিস্সজ্জেসি. পাসাদো যথাঠানে এৰ পতিট্ঠহি. সত্থা পারঙ্গতো ভিক্খূহি ‘‘কদা, ভন্তে, ভদ্দজিত্থেরেন অযং পাসাদো অজ্ঝাৰুট্ঠো’’তি পুট্ঠো মহাপনাদজাতকং (জা. ১.৩.৪০-৪১) কথেত্ৰা মহাজনং ধম্মামতং পাযেসি. থেরো পন অত্তনো অজ্ঝাৰুট্ঠপুব্বং সুৰণ্ণপাসাদং দস্সেত্ৰা –

১৬৩. ‘‘পনাদো নাম সো রাজা, যস্স যূপো সুৰণ্ণযো;

তিরিযং সোল়সুব্বেধো, উব্ভমাহু সহস্সধা.

১৬৪. ‘‘সহস্সকণ্ডো সতগেণ্ডু, ধজালু হরিতামযো;

অনচ্চুং তত্থ গন্ধব্বা, ছ সহস্সানি সত্তধা’’তি. –

দ্ৰীহি গাথাহি ৰণ্ণেন্তো অঞ্ঞং ব্যাকাসি.

তত্থ পনাদো নাম সো রাজাতি অতীতে পনাদো নাম সো রাজা অহোসীতি অত্তভাৰঅন্তরহিততায অত্তানং পরং ৰিয নিদ্দিসতি. সো এৰ হি রজ্জে ঠিতকালতো পট্ঠায সদা উস্সাহসম্পত্তিআদিনা মহতা রাজানুভাৰেন মহতা চ কিত্তিসদ্দেন সমন্নাগতত্তা ‘‘রাজা মহাপনাদো’’তি পঞ্ঞাযিত্থ. যস্স যূপো সুৰণ্ণযোতি যস্স রঞ্ঞো অযং যূপো পাসাদো সুৰণ্ণমযো. তিরিযং সোল়সুব্বেধোতি ৰিত্থারতো সোল়সকণ্ডপাতপ্পমাণো. সো পন অড্ঢযোজনমত্তো হোতি. উব্ভামাহু সহস্সধাতি উব্ভং উচ্চং এৰমস্স পাসাদস্স সহস্সধা সহস্সকণ্ডপ্পমাণমাহু. সো পন যোজনতো পঞ্চৰীসতিযোজনপ্পমাণো হোতি. কেচি পনেত্থ গাথাসুখত্থং ‘‘আহূ’’তি দীঘং কতং. আহু অহোসীতি অত্থং ৰদন্তি.

সহস্সকণ্ডোতি সহস্সভূমিকো. সতগেণ্ডূতি অনেকসতনিয্যূহকো. ধজালূতি তত্থ তত্থ নিয্যূহসিখরাদীসু পতিট্ঠাপিতেহি যট্ঠিধজপটাকধজাদিধজেহি সম্পন্নো. হরিতামযোতি চামীকরসুৰণ্ণমযো. কেচি পন ‘‘হরিতজাতিমণিসরিক্খকো’’তি ৰদন্তি. গন্ধব্বাতি নটা. ছ সহস্সানি সত্তধাতি ছমত্তানি গন্ধব্বসহস্সানি সত্তধা তস্স পাসাদস্স সত্তসু ঠানেসু রঞ্ঞো অভিরমাপনত্থং নচ্চিংসূতি অত্থো. তে এৰং নচ্চন্তাপি রাজানং হাসেতুং নাসক্খিংসু. অথ সক্কো দেৰরাজা দেৰনটে পেসেত্ৰা সমজ্জং কারেসি, তদা রাজা হসীতি.

ভদ্দজিত্থেরগাথাৰণ্ণনা নিট্ঠিতা.