৯. নন্দত্থেরগাথাৰণ্ণনা

অযোনিসো মনসিকারাতি আযস্মতো নন্দত্থেরস্স গাথা. কা উপ্পত্তি? অযং কির পদুমুত্তরস্স ভগৰতো কালে হংসৰতীনগরে কুলগেহে নিব্বত্তিত্ৰা ৰিঞ্ঞুতং পত্তো ভগৰতো সন্তিকে ধম্মং সুণন্তো সত্থারং একং ভিক্খুং ইন্দ্রিযেসু গুত্তদ্ৰারানং অগ্গট্ঠানে ঠপেন্তং দিস্ৰা সযম্পি তং ঠানন্তরং পত্থেন্তো ভগৰতো ভিক্খুসঙ্ঘস্স চ পূজাসক্কারবহুলং মহাদানং পৰত্তেত্ৰা, ‘‘অহম্পি অনাগতে তুম্হাদিসস্স বুদ্ধস্স এৰরূপো সাৰকো ভৰেয্য’’ন্তি পণিধানং কত্ৰা ততো পট্ঠায দেৰমনুস্সেসু সংসরন্তো অত্থদস্সিস্স ভগৰতো কালে ৰিনতায নাম নদিযা মহন্তো কচ্ছপো হুত্ৰা নিব্বত্তো একদিৰসং সত্থারং নদিযা পারং গন্তুং তীরে ঠিতং দিস্ৰা সযং ভগৰন্তং তারেতুকামো সত্থু পাদমূলে নিপজ্জি. সত্থা তস্স অজ্ঝাসযং ওলোকেত্ৰা পিট্ঠিং অভিরুহি. সো হট্ঠতুট্ঠো ৰেগেন সোতং ছিন্দন্তো সীঘতরং পরতীরমেৰ পাপেসি. ভগৰা তস্স অনুমোদনং ৰদন্তো ভাৰিনিং সম্পত্তিং কথেত্ৰা পক্কামি.

সো তেন পুঞ্ঞকম্মেন সুগতীসুযেৰ সংসরন্তো ইমস্মিং বুদ্ধুপ্পাদে কপিলৰত্থুস্মিং সুদ্ধোদনমহারাজস্স পুত্তো হুত্ৰা মহাপজাপতিযা গোতমিযা কুচ্ছিম্হি নিব্বত্তি. তস্স নামগ্গহণদিৰসে ঞাতিসঙ্ঘং নন্দেন্তো জাতোতি নন্দোত্ৰেৰ নামং অকংসু. তস্স ৰযপ্পত্তকালে সত্থা পৰত্তৰরধম্মচক্কো লোকানুগ্গহং করোন্তো কপিলৰত্থুং গন্ত্ৰা ঞাতিসমাগমে পোক্খরৰস্সং অট্ঠুপ্পত্তিং কত্ৰা ৰেস্সন্তরজাতকং (জা. ২.২২.১৬৫৫ আদযো) কথেত্ৰা দুতিযদিৰসে পিণ্ডায পৰিট্ঠো ‘‘উত্তিট্ঠে নপ্পমজ্জেয্যা’’তি (ধ. প. ১৬৮) গাথায পিতরং সোতাপত্তিফলে পতিট্ঠাপেত্ৰা নিৰেসনং গন্ত্ৰা ‘‘ধম্মং চরে সুচরিত’’ন্তি (ধ. প. ১৬৯) গাথায মহাপজাপতিং সোতাপত্তিফলে রাজানং সকদাগামিফলে পতিট্ঠাপেত্ৰা ততিযে দিৰসে নন্দকুমারস্স অভিসেকনিৰেসনপ্পৰেসনৰিৰাহমঙ্গলেসু ৰত্তমানেসু পিণ্ডায পৰিসিত্ৰা নন্দকুমারস্স হত্থে পত্তং দত্ৰা মঙ্গলং ৰত্ৰা তস্স হত্থতো পত্তং অগহেত্ৰাৰ ৰিহারং গতো তং পত্তহত্থং ৰিহারং আগতং অনিচ্ছমানংযেৰ পব্বাজেত্ৰা তথা পব্বজিতত্তাযেৰ অনভিরতিযা পীল়িতং ঞত্ৰা উপাযেন তস্স তং অনভিরতিং ৰিনোদেসি. সো যোনিসো পটিসঙ্খায ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৪৯.১৪৮-১৬৩) –

‘‘অত্থদস্সী তু ভগৰা, সযম্ভূ লোকনাযকো;

ৰিনতানদিযা তীরং, উপাগচ্ছি তথাগতো.

‘‘উদকা অভিনিক্খম্ম, কচ্ছপো ৰারিগোচরো;

বুদ্ধং তারেতুকামোহং, উপেসিং লোকনাযকং.

‘‘অভিরূহতু মং বুদ্ধো, অত্থদস্সী মহামুনি;

অহং তং তারযিস্সামি, দুক্খস্সন্তকরো তুৰং.

‘‘মম সঙ্কপ্পমঞ্ঞায, অত্থদস্সী মহাযসো;

অভিরূহিত্ৰা মে পিট্ঠিং, অট্ঠাসি লোকনাযকো.

‘‘যতো সরামি অত্তানং, যতো পত্তোস্মি ৰিঞ্ঞুতং;

সুখং মে তাদিসং নত্থি, ফুট্ঠে পাদতলে যথা.

‘‘উত্তরিত্ৰান সম্বুদ্ধো, অত্থদস্সী মহাযসো;

নদিতীরম্হি ঠত্ৰান, ইমা গাথা অভাসথ.

‘‘যাৰতা ৰত্ততে চিত্তং, গঙ্গাসোতং তরামহং;

অযঞ্চ কচ্ছপো রাজা, তারেসি মম পঞ্ঞৰা.

‘‘ইমিনা বুদ্ধতরণেন, মেত্তচিত্তৰতায চ;

অট্ঠারসে কপ্পসতে, দেৰলোকে রমিস্সতি.

‘‘দেৰলোকা ইধাগন্ত্ৰা, সুক্কমূলেন চোদিতো;

একাসনে নিসীদিত্ৰা, কঙ্খাসোতং তরিস্সতি.

‘‘যথাপি ভদ্দকে খেত্তে, বীজং অপ্পম্পি রোপিতং;

সম্মাধারং পৰেচ্ছন্তে, ফলং তোসেতি কস্সকং.

‘‘তথেৰিদং বুদ্ধখেত্তং, সম্মাসম্বুদ্ধদেসিতং;

সম্মাধারং পৰেচ্ছন্তে, ফলং মং তোসযিস্সতি.

‘‘পধানপহিতত্তোম্হি, উপসন্তো নিরূপধি;

সব্বাসৰে পরিঞ্ঞায, ৰিহরামি অনাসৰো.

‘‘অট্ঠারসে কপ্পসতে, যং কম্মমকরিং তদা;

দুগ্গতিং নাভিজানামি, তরণায ইদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা ৰিমুত্তিসুখং অনুভৰন্তো ‘‘অহো সত্থু উপাযকোসল্লং, যেনাহং ভৰপঙ্কতো উদ্ধরিত্ৰা নিব্বানথলে পতিট্ঠাপিতো’’তি অত্তনো পহীনসংকিলেসং পটিলদ্ধঞ্চ সুখং পচ্চৰেক্খিত্ৰা সঞ্জাতসোমনস্সো উদানৰসেন –

১৫৭. ‘‘অযোনিসো মনসিকারা, মণ্ডনং অনুযুঞ্জিসং;

উদ্ধতো চপলো চাসিং, কামরাগেন অট্টিতো.

১৫৮. ‘‘উপাযকুসলেনাহং, বুদ্ধেনাদিচ্চবন্ধুনা;

যোনিসো পটিপজ্জিত্ৰা, ভৰে চিত্তং উদব্বহি’’ন্তি. – গাথাদ্ৰযং অভাসি;

তত্থ অযোনিসো মনসিকারাতি অনুপাযমনসিকারতো অসুভং কাযং সুভতো মনসি করিত্ৰা সুভতো মনসিকারহেতু, অসুভং কাযং সুভসঞ্ঞাযাতি অত্থো. মণ্ডনন্তি হত্থূপগাদিআভরণেহি চেৰ মালাগন্ধাদীহি চ অত্তভাৰস্স অলঙ্করণং. অনুযুঞ্জিসন্তি অনুযুঞ্জিং, সরীরস্স ৰিভূসনপ্পসুতো অহোসিন্তি অত্থো. উদ্ধতোতি জাতিগোত্তরূপযোব্বনমদাদীহি উদ্ধতো অৰূপসন্তচিত্তো. চপলোতি ৰনমক্কটো ৰিয অনৰট্ঠিতচিত্ততায লোলো, কাযমণ্ডনৰত্থমণ্ডনাদিচাপল্যে যুত্ততায ৰা চপলো চ. আসিন্তি অহোসিং. কামরাগেনাতি ৰত্থুকামেসু ছন্দরাগেন অট্টিতো পীল়িতো ৰিবাধিতো আসিন্তি যোজনা.

উপাযকুসলেনাতি ৰিনেয্যানং দমনূপাযচ্ছেকেন কোৰিদেন বুদ্ধেন ভগৰতা হেতুভূতেন. হেতুঅত্থে হি এতং করণৰচনং. পলুট্ঠমক্কটীদেৰচ্ছরাদস্সনেন হি উপক্কিতৰাদচোদনায অত্তনো কামরাগাপনযনং সন্ধায ৰদতি. ভগৰা হি আযস্মন্তং নন্দত্থেরং পঠমং জনপদকল্যাণিং উপাদায ‘‘যথাযং মক্কটী, এৰং ককুটপাদিনিযো উপাদায জনপদকল্যাণী’’তি মহতিযা আণিযা খুদ্দকং আণিং নীহরন্তো ছড্ডকো ৰিয, সিনেহপানেন সরীরং কিলেদেত্ৰা ৰমনৰিরেচনেহি দোসং নীহরন্তো ভিসক্কো ৰিয চ ককুটপাদিনিদস্সনেন জনপদকল্যাণিযং ৰিরত্তচিত্তং কারেত্ৰা পুন উপক্কিতৰাদেন ককুটপাদিনীসুপি চিত্তং ৰিরাজেত্ৰা সম্মদেৰ সমথৰিপস্সনানুযোগেন অরিযমগ্গে পতিট্ঠাপেসি. তেন ৰুত্তং ‘‘যোনিসো পটিপজ্জিত্ৰা, ভৰে চিত্তং উদব্বহি’’ন্তি. উপাযেন ঞাযেন সম্মদেৰ সমথৰিপস্সনায ৰিসুদ্ধিপটিপদং পটিপজ্জিত্ৰা ভৰে সংসারপঙ্কে নিমুগ্গঞ্চ মে চিত্তং অরিযমগ্গেন হত্থেন উত্তারিং, নিব্বানথলে পতিট্ঠাপেসিন্তি অত্থো.

ইমং উদানং উদানেত্ৰা থেরো পুনদিৰসে ভগৰন্তং উপসঙ্কমিত্ৰা এৰমাহ – ‘‘যং মে, ভন্তে, ভগৰা পাটিভোগো পঞ্চন্নং অচ্ছরাসতানং পটিলাভায ককুটপাদানং, মুঞ্চামহং, ভন্তে, ভগৰন্তং এতস্মা পটিস্সৰা’’তি (উদা. ২২). ভগৰাপি, ‘‘যদেৰ খো তে, নন্দ, অনুপাদায আসৰেহি চিত্তং ৰিমুত্তং, অথাহং মুত্তো এতস্মা পটিস্সৰা’’তি (উদা. ২২) আহ. অথস্স ভগৰা সৰিসেসং ইন্দ্রিযেসু গুত্তদ্ৰারতং ঞত্ৰা তং গুণং ৰিভাৰেন্তো, ‘‘এতদগ্গং, ভিক্খৰে, মম সাৰকানং ভিক্খূনং ইন্দ্রিযেসু গুত্তদ্ৰারানং যদিদং নন্দো’’তি (অ. নি. ১.২১৯, ২৩০) ইন্দ্রিযেসু গুত্তদ্ৰারভাৰেন অগ্গট্ঠানে ঠপেসি. থেরো হি ‘‘যমেৰাহং ইন্দ্রিযানং অসংৰরং নিস্সায ইমং ৰিপ্পকারং পত্তো, তমেৰাহং সুট্ঠু নিগ্গহেস্সামী’’তি উস্সাহজাতো বলৰহিরোত্তপ্পো তত্থ চ কতাধিকারত্তা ইন্দ্রিযসংৰরে উক্কংসপারমিং অগমাসীতি.

নন্দত্থেরগাথাৰণ্ণনা নিট্ঠিতা.