৮. কিমিলত্থেরগাথাৰণ্ণনা

পাচীনৰংসদাযম্হীতিআদিকা আযস্মতো কিমিলত্থেরস্স গাথা. কা উপ্পত্তি? তস্স পুব্বযোগো সংৰেগুপ্পত্তি পব্বজ্জা চ এককনিপাতে ‘‘অভিসত্তো’’তি গাথায সংৰণ্ণনাযং ৰুত্তাযেৰ. তায চ গাথায থেরেন অত্তনো ৰিসেসাধিগমস্স কারণং দস্সিতং. ইধ পন অধিগতৰিসেসস্স অত্তনো আযস্মতা চ অনুরুদ্ধেন আযস্মতা চ নন্দিযেন সহ সমগ্গৰাসো দস্সিতোতি ৰেদিতব্বং. সমগ্গৰাসং পন ৰসন্তা তে যথা চ ৰসিংসু, তং দস্সেন্তো –

১৫৫. ‘‘পাচীনৰংসদাযম্হি, সক্যপুত্তা সহাযকা;

পহাযানপ্পকে ভোগে, উঞ্ছে পত্তাগতে রতা.

১৫৬. ‘‘আরদ্ধৰীরিযা পহিতত্তা, নিচ্চং দল়্হপরক্কমা;

রমন্তি ধম্মরতিযা, হিত্ৰান লোকিযং রতি’’ন্তি. – গাথাদ্ৰযং অভাসি;

তত্থ পাচীনৰংসদাযম্হীতি পাচীনৰংসনামকে রক্খিতগোপিতে সহপরিচ্ছেদে ৰনে. তঞ্হি ৰনং গামস্স পাচীনদিসাযং ঠিতত্তা ৰংসগুম্বপরিক্খিত্তত্তা চ ‘‘পাচীনৰংসদাযো’’তি ৰুত্তো, ৰংসৰনভাৰেন ৰাতি. সক্যপুত্তাতি অনুরুদ্ধত্থেরাদযো সক্যরাজকুমারা. সহাযকাতি সংৰেগুপ্পত্তিপব্বজ্জাসমণধম্মকরণসংৰাসেহি সহ অযনতো পৰত্তনতো সহাযকা. পহাযানপ্পকে ভোগেতি উল়ারেন পুঞ্ঞানুভাৰেন অধিগতে কুলপরম্পরাগতে চ মহন্তে ভোগক্খন্ধে ছড্ডেত্ৰা. ‘‘সহাযানপ্পকে’’তিপি পাল়ি. উঞ্ছে পত্তাগতে রতাতি উঞ্ছাচরিযায আভতত্তা উঞ্ছে পত্তে আগতত্তা পত্তাগতে পত্তপরিযাপন্নে রতা অভিরতা, সঙ্ঘভত্তাদিঅতিরেকলাভং পটিক্খিপিত্ৰা জঙ্ঘবলং নিস্সায ভিক্খাচরিযায লদ্ধেন মিস্সকভত্তেনেৰ সন্তুট্ঠাতি অত্থো.

আরদ্ধৰীরিযাতি উত্তমত্থস্স অধিগমায আদিতোৰ পগেৰ সম্পাদিতৰীরিযা. পহিতত্তাতি নিন্নপোণপব্ভারভাৰেন কালেন কালং সমাপজ্জনেন চ নিব্বানং পতিপেসিতচিত্তা. নিচ্চং দল়্হপরক্কমাতি ৰত্তপটিপত্তীসু দিট্ঠধম্মসুখৰিহারানুযোগেন সব্বকালং অসিথিলপরক্কমা. রমন্তি ধম্মরতিযা, হিত্ৰান লোকিযং রতিন্তি লোকে ৰিদিততায লোকপরিযাপন্নতায চ লোকিযং রূপারম্মণাদিরতিং পহায মগ্গপঞ্ঞায পজহিত্ৰা লোকুত্তরধম্মরতিযা অগ্গফলনিব্বানাভিরতিযা চ রমন্তি অভিরমন্তীতি.

কিমিলত্থেরগাথাৰণ্ণনা নিট্ঠিতা.