৫. মালুক্যপুত্তত্থেরগাথাৰণ্ণনা

রূপং দিস্ৰা সতি মুট্ঠাতিআদিকা আযস্মতো মালুক্যপুত্তস্স গাথা. ইমস্স আযস্মতো ৰত্থু হেট্ঠা ছক্কনিপাতে (থেরগা. ৩৯৯ আদযো) ৰুত্তমেৰ. তা পন গাথা থেরেন অরহত্তে পতিট্ঠিতেন ঞাতীনং ধম্মদেসনাৰসেন ভাসিতা. ইধ পন পুথুজ্জনকালে ‘‘সাধু মে, ভন্তে, ভগৰা সংখিত্তেন ধম্মং দেসেতূ’’তি যাচিতেন সত্থারা ‘‘তং কিং মঞ্ঞসি, মালুক্যপুত্ত, যে তে চক্খুৰিঞ্ঞেয্যা রূপা অদিট্ঠা অদিট্ঠপুব্বা, ন চ পস্সসি, ন চ তে হোতি পস্সেয্যন্তি, অত্থি তে তত্থ ছন্দো ৰা রাগো ৰা পেমং ৰা’’তি? ‘‘নো হেতং, ভন্তে’’. ‘‘যে তে সোতৰিঞ্ঞেয্যা সদ্দা…পে… ঘান…জিৰ্হা…কায…মনোৰিঞ্ঞেয্যা ধম্মা অৰিঞ্ঞাতা অৰিঞ্ঞাতপুব্বা, ন চ ৰিজানাসি, ন চ তে হোতি ৰিজানেয্যন্তি, অত্থি তে তত্থ ছন্দো ৰা রাগো ৰা পেমং ৰা’’তি? ‘‘নো হেতং, ভন্তে’’. ‘‘এত্থ চ তে, মালুক্যপুত্ত, দিট্ঠসুতমুতৰিঞ্ঞাতব্বেসু ধম্মেসু দিট্ঠে দিট্ঠমত্তং ভৰিস্সতি, সুতে সুতমত্তং, মুতে মুতমত্তং, ৰিঞ্ঞাতে ৰিঞ্ঞাতমত্তং ভৰিস্সতি. যতো খো তে, মালুক্যপুত্ত, দিট্ঠসুতমুতৰিঞ্ঞাতব্বেসু ধম্মেসু দিট্ঠে দিট্ঠমত্তং, সুতে সুতমত্তং, মুতে মুতমত্তং, ৰিঞ্ঞাতে ৰিঞ্ঞাতমত্তং ভৰিস্সতি, ততো ত্ৰং, মালুক্যপুত্ত, ন তেন. যতো ত্ৰং, মালুক্যপুত্ত, ন তেন, ততো ত্ৰং, মালুক্যপুত্ত, ন তত্থ. যতো ত্ৰং, মালুক্যপুত্ত, ন তত্থ, ততো ত্ৰং, মালুক্যপুত্ত, নেৰিধ ন হুরং ন উভযমন্তরেন, এসেৰন্তো দুক্খস্সা’’তি (সং. নি. ৪.৯৫). সংখিত্তেন ধম্মে দেসিতে তস্স ধম্মস্স সাধুকং উগ্গহিতভাৰং পকাসেন্তেন –

৭৯৪. ‘‘রূপং দিস্ৰা সতি মুট্ঠা, পিযং নিমিত্তং মনসি করোতো;