১০. পারাপরিযত্থেরগাথাৰণ্ণনা

সমণস্স অহু চিন্তাতিআদিকা আযস্মতো পারাপরিযত্থেরস্স গাথা. ইমস্স ৰত্থু হেট্ঠা আগতমেৰ. তা চ গাথা সত্থরি ধরন্তে অত্তনো পুথুজ্জনকালে মনচ্ছট্ঠানং ইন্দ্রিযানং নিগ্গণ্হনচিন্তায পকাসনৰসেন ভাসিতা. ইমা পন অপরভাগে সত্থরি পরিনিব্বুতে অত্তনো চ পরিনিব্বানে উপট্ঠিতে তদা আযতিঞ্চ ভিক্খূনং উদ্ধম্মপটিপত্তিযা পকাসনৰসেন ভাসিতা. তত্থ –

৯২০. ‘‘সমণস্স অহু চিন্তা, পুপ্ফিতম্হি মহাৰনে;

একগ্গস্স নিসিন্নস্স, পৰিৰিত্তস্স ঝাযিনো’’তি. –

অযং গাথা সঙ্গীতিকারেহি ঠপিতা. তস্সত্থো হেট্ঠা ৰুত্তনযোৰ. অযং পন সম্বন্ধো – সত্থরি অগ্গসাৰকেসু একচ্চেসু মহাথেরেসু চ পরিনিব্বুতেসু অতীতসত্থুকে পাৰচনে সুব্বচেসু সিক্খাকামেসু ভিক্খূসু দুল্লভেসু, দুব্বচেসু মিচ্ছাপটিপত্তিবহুলেসু ভিক্খূসু চ জাতেসু সুপুপ্ফিতে মহন্তে সালৰনে নিসিন্নস্স পৰিৰিত্তস্স একগ্গস্স ঝাযনসীলস্স, সমিতপাপতায সমণস্স, পারাপরিযত্থেরস্স পটিপত্তিং নিস্সায চিন্তা ৰীমংসা অহোসীতি ইতরা –

৯২১. ‘‘অঞ্ঞথা লোকনাথম্হি, তিট্ঠন্তে পুরিসুত্তমে;

ইরিযং আসি ভিক্খূনং, অঞ্ঞথা দানি দিস্সতি.

৯২২. ‘‘সীতৰাতপরিত্তাণং, হিরিকোপীনছাদনং;

মত্তট্ঠিযং অভুঞ্জিংসু, সন্তুট্ঠা ইতরীতরে.

৯২৩. ‘‘পণীতং যদি ৰা লূখং, অপ্পং ৰা যদি ৰা বহুং;

যাপনত্থং অভুঞ্জিংসু, অগিদ্ধা নাধিমুচ্ছিতা.

৯২৪. ‘‘জীৰিতানং পরিক্খারে, ভেসজ্জে অথ পচ্চযে;

ন বাল়্হং উস্সুকা আসুং, যথা তে আসৰক্খযে.

৯২৫. ‘‘অরঞ্ঞে রুক্খমূলেসু, কন্দরাসু গুহাসু চ;

ৰিৰেকমনুব্রূহন্তা, ৰিহংসু তপ্পরাযণা.

৯২৬. ‘‘নীচা নিৰিট্ঠা সুভরা, মুদূ অথদ্ধমানসা;

অব্যাসেকা অমুখরা, অত্থচিন্তাৰসানুগা.

৯২৭. ‘‘ততো পাসাদিকং আসি, গতং ভুত্তং নিসেৰিতং;

সিনিদ্ধা তেলধারাৰ, অহোসি ইরিযাপথো.

৯২৮. ‘‘সব্বাসৰপরিক্খীণা, মহাঝাযী মহাহিতা;

নিব্বুতা দানি তে থেরা, পরিত্তা দানি তাদিসা.

৯২৯. ‘‘কুসলানঞ্চ ধম্মানং, পঞ্ঞায চ পরিক্খযা;

সব্বাকারৰরূপেতং, লুজ্জতে জিনসাসনং.

৯৩০. ‘‘পাপকানঞ্চ ধম্মানং, কিলেসানঞ্চ যো উতু;

উপট্ঠিতা ৰিৰেকায, যে চ সদ্ধম্মসেসকা.

৯৩১. ‘‘তে কিলেসা পৰড্ঢন্তা, আৰিসন্তি বহুং জনং;

কীল়ন্তি মঞ্ঞে বালেহি, উম্মত্তেহিৰ রক্খসা.

৯৩২. ‘‘কিলেসেহাভিভূতা তে, তেন তেন ৰিধাৰিতা;

নরা কিলেসৰত্থূসু, সসঙ্গামেৰ ঘোসিতে.

৯৩৩. ‘‘পরিচ্চজিত্ৰা সদ্ধম্মং, অঞ্ঞমঞ্ঞেহি ভণ্ডরে;

দিট্ঠিগতানি অন্ৰেন্তা, ইদং সেয্যোতি মঞ্ঞরে.

৯৩৪. ‘‘ধনঞ্চ পুত্তং ভরিযঞ্চ, ছড্ডযিত্ৰান নিগ্গতা;

কটচ্ছুভিক্খহেতূপি, অকিচ্ছানি নিসেৰরে.

৯৩৫. ‘‘উদরাৰদেহকং ভুত্ৰা, সযন্তুত্তানসেয্যকা;

কথা ৰড্ঢেন্তি পটিবুদ্ধা, যা কথা সত্থুগরহিতা.

৯৩৬. ‘‘সব্বকারুকসিপ্পানি, চিত্তিং কত্ৰান সিক্খরে;

অৰূপসন্তা অজ্ঝত্তং, সামঞ্ঞত্থোতিঅচ্ছতি.

৯৩৭. ‘‘মত্তিকং তেলচুণ্ণঞ্চ, উদকাসনভোজনং;

গিহীনং উপনামেন্তি, আকঙ্খন্তা বহুত্তরং.

৯৩৮. ‘‘দন্তপোনং কপিত্থঞ্চ, পুপ্ফং খাদনিযানি চ;

পিণ্ডপাতে চ সম্পন্নে, অম্বে আমলকানি চ.

৯৩৯. ‘‘ভেসজ্জেসু যথা ৰেজ্জা, কিচ্চাকিচ্চে যথা গিহী;

গণিকাৰ ৰিভূসাযং, ইস্সরে খত্তিযা যথা.

৯৪০. ‘‘নেকতিকা ৰঞ্চনিকা, কূটসক্খী অপাটুকা;

বহূহি পরিকপ্পেহি, আমিসং পরিভুঞ্জরে.

৯৪১. ‘‘লেসকপ্পে পরিযাযে, পরিকপ্পেনুধাৰিতা;

জীৰিকত্থা উপাযেন, সঙ্কড্ঢন্তি বহুং ধনং.

৯৪২. ‘‘উপট্ঠাপেন্তি পরিসং, কম্মতো নো চ ধম্মতো;

ধম্মং পরেসং দেসেন্তি, লাভতো নো চ অত্থতো.

৯৪৩. ‘‘সঙ্ঘলাভস্স ভণ্ডন্তি, সঙ্ঘতো পরিবাহিরা;

পরলাভোপজীৰন্তা, অহিরীকা ন লজ্জরে.

৯৪৪. ‘‘নানুযুত্তা তথা একে, মুণ্ডা সঙ্ঘাটিপারুতা;

সম্ভাৰনংযেৰিচ্ছন্তি, লাভসক্কারমুচ্ছিতা.

৯৪৫. ‘‘এৰং নানপ্পযাতম্হি, ন দানি সুকরং তথা;

অফুসিতং ৰা ফুসিতুং, ফুসিতং ৰানুরক্খিতুং.

৯৪৬. ‘‘যথা কণ্টকট্ঠানম্হি, চরেয্য অনুপাহনো;

সতিং উপট্ঠপেত্ৰান, এৰং গামে মুনী চরে.

৯৪৭. ‘‘সরিত্ৰা পুব্বকে যোগী, তেসং ৰত্তমনুস্সরং;

কিঞ্চাপি পচ্ছিমো কালো, ফুসেয্য অমতং পদং.

৯৪৮. ‘‘ইদং ৰত্ৰা সালৰনে, সমণো ভাৰিতিন্দ্রিযো;

ব্রাহ্মণো পরিনিব্বাযী, ইসি খীণপুনব্ভৰো’’তি. –

ইমা গাথা থেরেনেৰ ভাসিতা.

তত্থ ইরিযং আসি ভিক্খূনন্তি পুরিসুত্তমে লোকনাথম্হি সম্মাসম্বুদ্ধে তিট্ঠন্তে ধরন্তে এতরহি পটিপত্তিভাৰতো. অঞ্ঞথা অঞ্ঞেন পকারেন ভিক্খূনং ইরিযং চরিতং অহোসি যথানুসিট্ঠং পটিপত্তিভাৰতো. অঞ্ঞথা দানি দিস্সতীতি ইদানি পন ততো অঞ্ঞথা ভিক্খূনং ইরিযং দিস্সতি অযাথাৰপটিপত্তিভাৰতোতি অধিপ্পাযো.

ইদানি সত্থরি ধরন্তে যেনাকারেন ভিক্খূনং পটিপত্তি অহোসি, তং তাৰ দস্সেতুং ‘‘সীতৰাতপরিত্তাণ’’ন্তিআদি ৰুত্তং. তত্থ মত্তট্ঠিযন্তি তং মত্তং পযোজনং. যাৰদেৰ সীতৰাতপরিত্তাণং, যাৰদেৰ হিরীকোপীনপটিচ্ছাদনং কত্ৰা চীৰরং পরিভুঞ্জিংসু. কথং? সন্তুট্ঠা ইতরীতরে যস্মিং তস্মিং হীনে পণীতে ৰা যথালদ্ধে পচ্চযে সন্তোসং আপন্না.

পণীতন্তি উল়ারং সপ্পিআদিনা সংসট্ঠং, তদভাৰেন লূখং. অপ্পন্তি, চতুপঞ্চালোপমত্তম্পি. বহুং যাপনত্থং অভুঞ্জিংসূতি পণীতং বহুং ভুঞ্জন্তাপি যাপনমত্তমেৰ আহারং ভুঞ্জিংসু. ততো এৰ অগিদ্ধা গেধং অনাপন্না. নাধিমুচ্ছিতা ন অজ্ঝোসিতা অক্খব্ভঞ্জনং ৰিয সাকটিকা, ৰণলেপনং ৰিয ৰণিনো অভুঞ্জিংসু.

জীৰিতানং পরিক্খারে, ভেসজ্জে অথ পচ্চযেপি জীৰিতানং পৰত্তিযা পরিক্খারভূতে ভেসজ্জসঙ্খাতে পচ্চযে গিলানপচ্চযে. যথা তেতি যথা তে পুরিমকা ভিক্খূ আসৰক্খযে উস্সুকা যুত্তা আসুং, তথা তে রোগাভিভূতাপি গিলানপচ্চযে বাল়্হং অতিৰিয উস্সুকা নাহেসুন্তি অত্থো.

তপ্পরাযণাতি ৰিৰেকপরাযণা ৰিৰেকপোণা. এৰং চতূহি গাথাহি চতুপচ্চযসন্তোসং ভাৰনাভিরতিঞ্চ দস্সেন্তেন তেসং অরিযৰংসপটিপদা দস্সিতা.

নীচাতি ‘‘মযং পংসুকূলিকা পিণ্ডপাতিকা’’তি অত্তুক্কংসনপরৰম্ভনানি অকত্ৰা নীচৰুত্তিনো, নিৰাতৰুত্তিনোতি অত্থো. নিৰিট্ঠাতি সাসনে নিৰিট্ঠসদ্ধা. সুভরাতি অপ্পিচ্ছতাদিভাৰেন সুপোসা. মুদূতি ৰত্তপটিপত্তিযং সকলে চ ব্রহ্মচরিযে মুদূ, সুপরিকম্মকতসুৰণ্ণং ৰিয ৰিনিযোগক্খমা. মুদূতি ৰা অভাকুটিকা উত্তানমুখা পুপ্ফিতমুখেন পটিসন্থারৰুত্তিনো, সুতিত্থং ৰিয সুখাৰহাতি ৰুত্তং হোতি. অথদ্ধমানসাতি অকথিনচিত্তা তেন সুব্বচভাৰমাহ. অব্যাসেকাতি সতিৰিপ্পৰাসাভাৰতো কিলেসব্যাসেকরহিতা, অন্তরন্তরা তণ্হাদিট্ঠিমানাদীহি অৰোকিণ্ণাতি অত্থো. অমুখরাতি ন মুখরা, ন মুখেন খরা ৰচীপাগব্ভিযরহিতাতি ৰা অত্থো. অত্থচিন্তাৰসানুগাতি হিতচিন্তাৰসানুগাহিতচিন্তাৰসিকা, অত্তনো পরেসঞ্চ হিতচিন্তমেৰ অনুপরিৰত্তনকা.

ততোতি তস্মা নীচৰুত্তাদিহেতু. পাসাদিকন্তি পসাদজনিকং পটিপত্তিং পস্সন্তানং সুণন্তানঞ্চ পসাদাৰহং. গতন্তি অভিক্কন্তপটিক্কন্তপরিৰত্তনাদিগমনং. গতন্তি ৰা কাযৰাচাপৰত্তি. ভুত্তন্তি চতুপচ্চযপরিভোগো. নিসেৰিতন্তি গোচরনিসেৰনং. সিনিদ্ধা তেলধারাৰাতি যথা অনিৰত্তিতা কুসলজনাভিসিঞ্চিতা সৰন্তী তেলধারা অৰিচ্ছিন্না সিনিদ্ধা মট্ঠা দস্সনীযা পাসাদিকা হোতি, এৰং তেসং আকপ্পসম্পন্নানং ইরিযাপথো অচ্ছিদ্দো সণ্হো মট্ঠো দস্সনীযো পাসাদিকো অহোসি.

মহাঝাযীতি মহন্তেহি ঝানেহি ঝাযনসীলা, মহন্তং ৰা নিব্বানং ঝাযন্তীতি মহাঝাযী. ততো এৰ মহাহিতা, মহন্তেহি হিতেহি সমন্নাগতাতি অত্থো. তে থেরাতি তে যথাৰুত্তপ্পকারা পটিপত্তিপরাযণা থেরা ইদানি পরিনিব্বুতাতি অত্থো. পরিত্তা দানি তাদিসাতি ইদানি পচ্ছিমে কালে তাদিসা তথারূপা থেরা পরিত্তা অপ্পকা কতিপযা এৰাতি ৰুত্তং হোতি.

কুসলানঞ্চ ধম্মানন্তি ৰিৰট্টস্স উপনিস্সযভূতানং ৰিমোক্খসম্ভারানং অনৰজ্জধম্মানং. পঞ্ঞায চাতি তথারূপায পঞ্ঞায চ. পরিক্খযাতি অভাৰতো অনুপ্পত্তিতো. কামঞ্চেত্থ পঞ্ঞাপি সিযা অনৰজ্জধম্মা, বহুকারভাৰদস্সনত্থং পনস্সা ৰিসুং গহণং যথা পুঞ্ঞঞাণসম্ভারাতি. সব্বাকারৰরূপেতন্তি আদিকল্যাণতাদীহি সব্বেহি আকারৰরেহি পকারৰিসেসেহি উপেতং যুত্তং জিনস্স ভগৰতো সাসনং লুজ্জতি ৰিনস্সতীতি অত্থো.

পাপকানঞ্চ ধম্মানং, কিলেসানঞ্চ যো উতূতি কাযদুচ্চরিতাদীনং পাপধম্মানং লোভাদীনঞ্চ কিলেসানং যো উতু যো কালো, সো অযং ৰত্ততীতি ৰচনসেসো. উপট্ঠিতা ৰিৰেকায, যে চ সদ্ধম্মসেসকাতি যে পন এৰরূপে কালে কাযচিত্তউপধিৰিৰেকত্থায উপট্ঠিতা আরদ্ধৰীরিযা, তে চ সেসপটিপত্তিসদ্ধম্মকা হোন্তি. অযঞ্হেত্থ অধিপ্পাযো – সুৰিসুদ্ধসীলাচারাপি সমানা ইদানি একচ্চে ভিক্খূ ইরিযাপথসণ্ঠাপনং, সমথৰিপস্সনাভাৰনাৰিধানং, মহাপলিবোধূপচ্ছেদো, খুদ্দকপলিবোধূপচ্ছেদোতি এৰমাদিপুব্বকিচ্চং সম্পাদেত্ৰা ভাৰনমনুযুঞ্জন্তি. তে সেসপটিপত্তিসদ্ধম্মকা, পটিপত্তিং মত্থকং পাপেতুং ন সক্কোন্তীতি.

তে কিলেসা পৰড্ঢন্তাতি যে ভগৰতো ওরসপুত্তেহি চ তদা পরিক্খযং পরিযাদানং গমিতা কিলেসা, তে এতরহি লদ্ধোকাসা ভিক্খূসু ৰুদ্ধিং ৰিরূল়্হিং ৰেপুল্লং আপজ্জন্তা. আৰিসন্তি বহুং জনন্তি কল্যাণমিত্তরহিতং অযোনিসোমনসিকারবহুলং অন্ধবালজনং অভিভৰিত্ৰা অৰসং করোন্তা আৰিসন্তি সন্তানং অনুপৰিসন্তি. এৰংভূতা চ তে কীল়ন্তি মঞ্ঞে বালেহি, উম্মত্তেহিৰ রক্খসা, যথা নাম কেল়িসীলা রক্খসা ভিসক্করহিতে উম্মত্তে আৰিসিত্ৰা তে অনযব্যসনং আপাদেন্তা তেহি কীল়ন্তি, এৰং তে কিলেসা সম্মাসম্বুদ্ধভিসক্করহিতে অন্ধবালে ভিক্খূ আৰিসিত্ৰা তেসং দিট্ঠধম্মিকাদিভেদং অনত্থং উপ্পাদেন্তা তেহি সদ্ধিং কীল়ন্তি মঞ্ঞে, কীল়ন্তা ৰিয হোন্তীতি অত্থো.

তেন তেনাতি তেন তেন আরম্মণভাগেন. ৰিধাৰিতাতি ৰিরূপং ধাৰিতা অসারুপ্পৰসেন পটিপজ্জন্তা. কিলেসৰত্থূসূতি পঠমং উপ্পন্নং কিলেসা পচ্ছা উপ্পজ্জনকানং কারণভাৰতো কিলেসাৰ কিলেসৰত্থূনি, তেসু কিলেসৰত্থূসু সমূহিতেসু. সসঙ্গামেৰ ঘোসিতেতি হিরঞ্ঞসুৰণ্ণমণিমুত্তাদিকং ধনং ৰিপ্পকিরিত্ৰা ‘‘যং যং হিরঞ্ঞসুৰণ্ণাদি যস্স যস্স হত্থগতং, তং তং তস্স তস্সেৰ হোতূ’’তি এৰং কামঘোসনা সসঙ্গামঘোসনা নাম. তত্থাযমত্থো – কিলেসৰত্থূসু ‘‘যো যো কিলেসো যং যং সত্তং গণ্হাতি অভিভৰতি, সো সো তস্স তস্স হোতূ’’তি কিলেসসেনাপতিনা মারেন সসঙ্গামে ঘোসিতে ৰিয. তেহি তেহি কিলেসেহি অভিভূতা তে বালপুথুজ্জনা তেন তেন আরম্মণভাগেন ৰিধাৰিতা ৰোসিতাতি.

তে এৰং ৰিধাৰিতা কিং করোন্তীতি আহ ‘‘পরিচ্চজিত্ৰা সদ্ধম্মং, অঞ্ঞমঞ্ঞেহি ভণ্ডরে’’তি. তস্সত্থো – পটিপত্তিসদ্ধম্মং ছড্ডেত্ৰা আমিসকিঞ্জক্খহেতু অঞ্ঞমঞ্ঞেহি ভণ্ডরে কলহং করোন্তীতি. দিট্ঠিগতানীতি ‘‘ৰিঞ্ঞাণমত্তমেৰ অত্থি, নত্থেৰ রূপধম্মা’’তি, ‘‘যথা পুগ্গলো নাম পরমত্থতো নত্থি, এৰং সভাৰধম্মাপি পরমত্থতো নত্থি, ৰোহারমত্তমেৰা’’তি চ এৰমাদীনি দিট্ঠিগতানি মিচ্ছাগাহে অন্ৰেন্তা অনুগচ্ছন্তা ইদং সেয্যো ইদমেৰ সেট্ঠং, অঞ্ঞং মিচ্ছাতি মঞ্ঞন্তি.

নিগ্গতাতি গেহতো নিক্খন্তা. কটচ্ছুভিক্খহেতূপীতি কটচ্ছুমত্তভিক্খানিমিত্তম্পি. তং দদন্তস্স গহট্ঠস্স অননুলোমিকসংসগ্গৰসেন অকিচ্চানি পব্বজিতেন অকত্তব্বানি কম্মানি নিসেৰরে করোন্তি.

উদরাৰদেহকং ভুত্ৰাতি ‘‘ঊনূদরো মিতাহারো’’তি (থেরগা. ৯৮২; মি. প. ৬.৫.১০) ৰুত্তৰচনং অচিন্তেত্ৰা উদরপূরং ভুঞ্জিত্ৰা. সযন্তুত্তানসেয্যকাতি ‘‘দক্খিণেন পস্সেন সীহসেয্যং কপ্পেতি পাদে পাদং অচ্চাধায সতো সম্পজানো’’তি (অ. নি. ৮.৯; ৰিভ. ৫১৯) ৰুত্তৰিধানং অননুস্সরিত্ৰা উত্তানসেয্যকা সযন্তি. যা কথা সত্থুগরহিতাতি রাজকথাদিতিরচ্ছানকথং সন্ধায ৰদতি.

সব্বকারুকসিপ্পানীতি সব্বেহি ৰেস্সাদীহি কারুকেহি কত্তব্বানি ভত্ততালৰণ্টকরণাদীনি হত্থসিপ্পানি. চিত্তিং কত্ৰানাতি সক্কচ্চং সাদরং কত্ৰা. অৰূপসন্তা অজ্ঝত্তন্তি কিলেসৰূপসমাভাৰতো গদ্দুহনমত্তম্পি সমাধানাভাৰতো চ অজ্ঝত্তং অৰূপসন্তা, অৰূপসন্তচিত্তাতি অত্থো. সামঞ্ঞত্থোতি সমণধম্মো. অতিঅচ্ছতীতি তেসং আজীৰকিচ্চপসুততায একদেসম্পি অফুসনতো ৰিসুংযেৰ নিসীদতি, অনল্লীযতীতি ৰুত্তং হোতি.

মত্তিকন্তি পাকতিকং ৰা পঞ্চৰণ্ণং ৰা গিহীনং ৰিনিযোগক্খমং মত্তিকং. তেলচুণ্ণঞ্চাতি পাকতিকং, অভিসঙ্খতং ৰা তেলঞ্চ চুণ্ণঞ্চ. উদকাসনভোজনন্তি উদকঞ্চ আসনঞ্চ ভোজনঞ্চ. আকঙ্খন্তা বহুত্তরন্তি বহুং পিণ্ডপাতাদিউত্তরুত্তরং আকঙ্খন্তা ‘‘অম্হেহি মত্তিকাদীসু দিন্নেসু মনুস্সা দল়্হভত্তিকা হুত্ৰা বহুং উত্তরুত্তরং চতুপচ্চযজাতং দস্সন্তী’’তি অধিপ্পাযেন গিহীনং উপনামেন্তীতি অত্থো.

দন্তে পুনন্তি সোধেন্তি এতেনাতি দন্তপোনং, দন্তকট্ঠং. কপিত্থন্তি কপিত্থফলং. পুপ্ফন্তি সুমনচম্পকাদিপুপ্ফং. খাদনীযানীতি অট্ঠারসৰিধেপি খজ্জকৰিসেসে. পিণ্ডপাতে চ সম্পন্নেতি ৰণ্ণাদিসম্পযুত্তে ওদনৰিসেসে. ‘‘অম্বে আমলকানি চা’’তি চ-সদ্দেন মাতুলুঙ্গতালনাল়িকেরাদিফলানি অৰুত্তানি সঙ্গণ্হাতি. সব্বত্থ গিহীনং উপনামেন্তি আকঙ্খন্তা বহুত্তরন্তি যোজনা.

ভেসজ্জেসু যথা ৰেজ্জাতি গিহীনং ভেসজ্জপ্পযোগেসু যথা ৰেজ্জা, তথা ভিক্খূ পটিপজ্জন্তীতি অধিপ্পাযো. কিচ্চাকিচ্চে যথা গিহীতি গহট্ঠানং খুদ্দকে চেৰ মহন্তে চ কিচ্চে কত্তব্বে গিহী ৰিয. গণিকাৰ ৰিভূসাযন্তি অত্তনো সরীরস্স ৰিভূসনে রূপূপজীৰিনিযো ৰিয. ইস্সরে খত্তিযা যথাতি ইস্সরে ইস্সরিযপৰত্তনে যথা খত্তিযা, এৰং কুলপতী হুত্ৰা ৰত্তন্তীতি অত্থো.

নেকতিকাতি নিকতিযং নিযুত্তা, অমণিংযেৰ মণিং, অসুৰণ্ণংযেৰ সুৰণ্ণং কত্ৰা পটিরূপসাচিযোগনিরতা. ৰঞ্চনিকাতি কূটমানাদীহি ৰিপ্পলম্বকা. কূটসক্খীতি অযাথাৰসক্খিনো. অপাটুকাতি ৰামকা, অসংযতৰুত্তীতি অত্থো. বহূহি পরিকপ্পেহীতি যথাৰুত্তেহি অঞ্ঞেহি চ বহূহি মিচ্ছাজীৰপ্পকারেহি.

লেসকপ্পেতি কপ্পিযলেসে কপ্পিযপটিরূপে. পরিযাযেতি, পচ্চযেসু পরিযাযস্স যোগে. পরিকপ্পেতি ৰড্ঢিআদিৰিকপ্পনে, সব্বত্থ ৰিসযে ভুম্মং. অনুধাৰিতাতি মহিচ্ছতাদীহি পাপধম্মেহি অনুধাৰিতা ৰোসিতা. জীৰিকত্থা জীৰিকপ্পযোজনা আজীৰহেতুকা. উপাযেনাতি পরিকথাদিনা উপাযেন পচ্চযুপ্পাদননযেন. সঙ্কড্ঢন্তীতি সংহরন্তি.

উপট্ঠাপেন্তি পরিসন্তি পরিসায অত্তানং উপট্ঠপেন্তি, যথা পরিসা অত্তানং উপট্ঠপেন্তি, এৰং পরিসং সঙ্গণ্হন্তীতি অত্থো. কম্মতোতি কম্মহেতু. তে হি অত্তনো কত্তব্বৰেয্যাৰচ্চনিমিত্তং উপট্ঠপেন্তি. নো চ ধম্মতোতি ধম্মনিমিত্তং নো চ উপট্ঠপেন্তি. যো সত্থারা উল্লুম্পনসভাৰসণ্ঠিতায পরিসায সঙ্গহো অনুঞ্ঞাতো, তেন ন সঙ্গণ্হন্তীতি অত্থো. লাভতোতি লাভহেতু, ‘‘অয্যো বহুস্সুতো, ভাণকো, ‘ধম্মকথিকো’তি এৰং সম্ভাৰেন্তো মহাজনো ময্হং লাভসক্কারে উপনযিস্সতী’’তি ইচ্ছাচারে ঠত্ৰা লাভনিমিত্তং পরেসং ধম্মং দেসেন্তি. নো চ অত্থতোতি যো সো ৰিমুত্তাযতনসীসে ঠত্ৰা সদ্ধম্মং কথেন্তেন পত্তব্বো অত্থো, ন তংদিট্ঠধম্মিকাদিভেদহিতনিমিত্তং ধম্মং দেসেন্তীতি অত্থো.

সঙ্ঘলাভস্স ভণ্ডন্তীতি সঙ্ঘলাভহেতু ভণ্ডন্তি ‘‘ময্হং পাপুণাতি, ন তুয্হ’’ন্তিআদিনা কলহং করোন্তি. সঙ্ঘতো পরিবাহিরাতি, অরিযসঙ্ঘতো বহিভূতা অরিযসঙ্ঘে তদভাৰতো. পরলাভোপজীৰন্তাতি সাসনে লাভস্স অন্ধবালপুথুজ্জনেহি পরে সীলাদিগুণসম্পন্নে সেক্খে উদ্দিস্স উপ্পন্নত্তা তং পরলাভং, পরতো ৰা দাযকতো লদ্ধব্বলাভং উপজীৰন্তা ভণ্ডনকারকা ভিক্খূ পাপজিগুচ্ছায অভাৰতো অহিরিকা সমানা চ ‘‘মযং পরলাভং ভুঞ্জাম, পরপটিবদ্ধজীৰিকা’’তিপি ন লজ্জরে ন হিরীযন্তি.

নানুযুত্তাতি সমণকরণেহি ধম্মেহি অননুযুত্তা. তথাতি যথা পুব্বে ৰুত্তা বন্ধনকারকাদযো, তথা. একেতি একচ্চে. মুণ্ডা সঙ্ঘাটিপারুতাতি কেৰলং মুণ্ডিতকেসতায মুণ্ডা পিলোতিকখণ্ডেহি সঙ্ঘটিতট্ঠেন ‘‘সঙ্ঘাটী’’তি লদ্ধনামেন চীৰরেন পারুতসরীরা. সম্ভাৰনংযেৰিচ্ছন্তি, লাভসক্কারমুচ্ছিতাতি লাভসক্কারাসায মুচ্ছিতা অজ্ঝোসিতা হুত্ৰা, ‘‘পেসলো ধুতৰাদো বহুস্সুতো’’তি ৰা মধুরৰচনমনুযুত্তা ‘‘অরিযো’’তি চ কেৰলং সম্ভাৰনং বহুমানংযেৰ ইচ্ছন্তি এসন্তি, ন তন্নিমিত্তে গুণেতি অত্থো.

এৰন্তি ‘‘কুসলানঞ্চ ধম্মানং পঞ্ঞায চ পরিক্খযা’’তি ৰুত্তনযেন. নানপ্পযাতম্হীতি নানপ্পকারে ভেদনধম্মে পযাতে সমকতে, নানপ্পকারেন ৰা সংকিলেসধম্মে পযাতুং পৰত্তিতুং আরদ্ধে. ন দানি সুকরং তথাতি ইদানি ইমস্মিং দুল্লভকল্যাণমিত্তে দুল্লভসপ্পাযসদ্ধম্মস্সৰনে চ কালে যথা সত্থরি ধরন্তে অফুসিতং অফুট্ঠং, অনধিগতং ঝানৰিপস্সনং ফুসিতুং অধিগন্তুং, ফুসিতং ৰা হানভাগিযং ঠিতিভাগিযমেৰ ৰা অহুত্ৰা যথা ৰিসেসভাগিযং হোতি, তথা অনুরক্খিতুং পালেতুং সুকরং, তথা ন সুকরং, তথা সম্পাদেতুং ন সক্কাতি অত্থো.

ইদানি অত্তনো পরিনিব্বানকালস্স আসন্নত্তা সংখিত্তেন ওৰাদেন সব্রহ্মচারিং ওৰদন্তো ‘‘যথা কণ্টকট্ঠানম্হী’’তিআদিমাহ. তস্সত্থো – যথা পুরিসো কেনচিদেৰ পযোজনেন কণ্টকনিচিতে পদেসে অনুপাহনো ৰিচরন্তো ‘‘মা মং কণ্টকো ৰিজ্ঝী’’তি সতিং উপট্ঠপেত্ৰাৰ ৰিচরতি, এৰং কিলেসকণ্টকনিচিতে গোচরগামে পযোজনেন চরন্তো মুনি সতিং উপট্ঠপেত্ৰান সতিসম্পজঞ্ঞযুত্তো অপ্পমত্তোৰ চরেয্য কম্মট্ঠানং অৰিজহন্তোতি ৰুত্তং হোতি.

সরিত্ৰা পুব্বকে যোগী, তেসং ৰত্তমনুস্সরন্তি পুরিমকে যোগে ভাৰনায যুত্ততায যোগী আরদ্ধৰিপস্সকে সরিত্ৰা তেসং ৰত্তং আগমানুসারেন সম্মাপটিপত্তিভাৰনাৰিধিং অনুস্সরন্তো ধুরনিক্খেপং অকত্ৰা যথাপটিপজ্জন্তো. কিঞ্চাপি পচ্ছিমো কালোতি যদিপাযং অতীতসত্থুকো চরিমো কালো, তথাপি যথাধম্মমেৰ পটিপজ্জন্তো ৰিপস্সনং উস্সুক্কাপেন্তো ফুসেয্য অমতং পদং নিব্বানং অধিগচ্ছেয্য.

ইদং ৰত্ৰাতি, যথাদস্সিতং সংকিলেসৰোদানেসু ইমং পটিপত্তিৰিধিং কথেত্ৰা. অযঞ্চ ওসানগাথা সঙ্গীতিকারেহি থেরস্স পরিনিব্বানং পকাসেতুং ৰুত্তাতি ৰেদিতব্বা.

পারাপরিযত্থেরগাথাৰণ্ণনা নিট্ঠিতা.

ৰীসতিনিপাতৰণ্ণনা নিট্ঠিতা.