৯. (পঠম) দেৰসভত্থেরগাথাৰণ্ণনা

উত্তিণ্ণা পঙ্কপলিপাতি আযস্মতো দেৰসভত্থেরস্স গাথা. কা উপ্পত্তি? সোপি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো সিখিস্স ভগৰতো কালে পারাৰতযোনিযং নিব্বত্তো একদিৰসং সত্থারং দিস্ৰা পসন্নমানসো পিযালফলং উপনেসি. সত্থা তস্স পসাদসংৰড্ঢনত্থং তং পরিভুঞ্জি. সো তেন অতিৰিয পসন্নচিত্তো হুত্ৰা কালেন কালং উপসঙ্কমিত্ৰা ৰন্দিত্ৰা চিত্তং পসাদেতি. সো তেন পুঞ্ঞকম্মেন দেৰলোকে নিব্বত্তো অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে অঞ্ঞতরস্স মণ্ডলিকরঞ্ঞো পুত্তো হুত্ৰা নিব্বত্তো তরুণকালেযেৰ রজ্জে পতিট্ঠিতো রজ্জসুখমনুভৰন্তো ৰুদ্ধো সত্থারং উপসঙ্কমি, তস্স সত্থা ধম্মং দেসেসি. সো ধম্মং সুত্ৰা পটিলদ্ধসদ্ধো সংৰেগজাতো রজ্জং পহায পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.১৪.৬৬-৭২) –

‘‘পারাৰতো তদা আসিং, পরং অনুপরোধকো;

পব্ভারে সেয্যং কপ্পেমি, অৰিদূরে সিখিসত্থুনো.

‘‘সাযং পাতঞ্চ পস্সামি, বুদ্ধং লোকগ্গনাযকং;

দেয্যধম্মো চ মে নত্থি, দ্ৰিপদিন্দস্স তাদিনো.

‘‘পিযালফলমাদায, অগমং বুদ্ধসন্তিকং;

পটিগ্গহেসি ভগৰা, লোকজেট্ঠো নরাসভো.

‘‘ততো পরং উপাদায, পরিচারিং ৰিনাযকং;

তেন চিত্তপ্পসাদেন, তত্থ কালঙ্কতো অহং.

‘‘একত্তিংসে ইতো কপ্পে, যং ফলং অদদিং অহং;

দুগ্গতিং নাভিজানামি, ফলদানস্সিদং ফলং.

‘‘ইতো পন্নরসে কপ্পে, তযো আসুং পিযালিনো;

সত্তরতনসম্পন্না, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা পহীনকিলেসপচ্চৰেক্খণৰসেন উপ্পন্নসোমনস্সো উদানং উদানেন্তো –

৮৯. ‘‘উত্তিণ্ণা পঙ্কপলিপা, পাতালা পরিৰজ্জিতা;

মুত্তো ওঘা চ গন্থা চ, সব্বে মানা ৰিসংহতা’’তি. – গাথং অভাসি;

তত্থ উত্তিণ্ণাতি উত্তরিতা অতিক্কন্তা. পঙ্কপলিপাতি পঙ্কা চ পলিপা চ. পঙ্কো ৰুচ্চতি পকতিকদ্দমো. ‘‘পলিপো’’তি গম্ভীরপুথুলো মহাকদ্দমো. ইধ পন পঙ্কো ৰিযাতি পঙ্কো, কামরাগো অসুচিভাৰাপাদনেন চিত্তস্স মক্খনতো. পলিপো ৰিযাতি পলিপো, পুত্তদারাদিৰিসযো বহলো ছন্দরাগো ৰুত্তনযেন সম্মক্খনতো দুরুত্তরণতো চ. তে মযা অনাগামিমগ্গেন সব্বসো অতিক্কন্তাতি আহ ‘‘উত্তিণ্ণা পঙ্কপলিপা’’তি. পাতালাতি পাতাযালন্তি পাতালা, মহাসমুদ্দে নিন্নতরপদেসা. কেচি পন নাগভৰনং ‘‘পাতাল’’ন্তি ৰদন্তি. ইধ পন অগাহদুরৰগ্গাহদুরুত্তরণট্ঠেন পাতালা ৰিযাতি পাতালা, দিট্ঠিযো. তে চ মযা পঠমমগ্গাধিগমেনেৰ সব্বথা ৰজ্জিতা সমুচ্ছিন্নাতি আহ ‘‘পাতালা পরিৰজ্জিতা’’তি মুত্তো ওঘা চ গন্থা চাতি কামোঘাদিওঘতো অভিজ্ঝাকাযগন্থাদিগন্থতো চ তেন তেন মগ্গেন মুত্তো পরিমুত্তো, পুন অনভিকিরণঅগন্থনৰসেন অতিক্কন্তোতি অত্থো. সব্বে মানা ৰিসংহতাতি নৰৰিধাপি মানা অগ্গমগ্গাধিগমেন ৰিসেসতো সঙ্ঘাতং ৰিনাসং আপাদিতা সমুচ্ছিন্না ‘‘মানৰিধা হতা’’তি কেচি পঠন্তি, মানকোট্ঠাসাতি অত্থো. ‘‘মানৰিসা’’তি অপরে, তেসং পন মানৰিসস্স দুক্খস্স ফলতো মানৰিসাতি অত্থো দট্ঠব্বো.

(পঠম) দেৰসভত্থেরগাথাৰণ্ণনা নিট্ঠিতা.