৮. অজ্জুনত্থেরগাথাৰণ্ণনা

অসক্খিং ৰত অত্তানন্তি আযস্মতো অজ্জুনত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো ৰিপস্সিস্স ভগৰতো কালে সীহযোনিযং নিব্বত্তো একদিৰসং অরঞ্ঞে অঞ্ঞতরস্মিং রুক্খমূলে নিসিন্নং সত্থারং দিস্ৰা ‘‘অযং খো ইমস্মিং কালে সব্বসেট্ঠো পুরিসসীহো’’তি পসন্নমানসো সুপুপ্ফিতসালসাখং ভঞ্জিত্ৰা সত্থারং পূজেসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে সাৰত্থিযং সেট্ঠিকুলে নিব্বত্তি. অজ্জুনোতিস্স নামং অহোসি. সো ৰিঞ্ঞুতং পত্তো নিগণ্ঠেহি কতপরিচযো হুত্ৰা ‘‘এৰাহং অমতং অধিগমিস্সামী’’তি ৰিৰট্টজ্ঝাসযতায দহরকালেযেৰ নিগণ্ঠেসু পব্বজিত্ৰা তত্থ সারং অলভন্তো সত্থু যমকপাটিহারিযং দিস্ৰা পটিলদ্ধসদ্ধো সাসনে পব্বজিত্ৰা ৰিপস্সনং আরভিত্ৰা নচিরস্সেৰ অরহা অহোসি. তেন ৰুত্তং অপদানে (অপ. থের ১.১৪.৬০-৬৫) –

‘‘মিগরাজা তদা আসিং, অভিজাতো সুকেসরী;

গিরিদুগ্গং গৰেসন্তো, অদ্দসং লোকনাযকং.

‘‘অযং নু খো মহাৰীরো, নিব্বাপেতি মহাজনং;

যংনূনাহং উপাসেয্যং, দেৰদেৰং নরাসভং.

‘‘সাখং সালস্স ভঞ্জিত্ৰা, সকোসং পুপ্ফমাহরিং;

উপগন্ত্ৰান সম্বুদ্ধং, অদাসিং পুপ্ফমুত্তমং.

‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, পুপ্ফদানস্সিদং ফলং.

‘‘ইতো চ নৰমে কপ্পে, ৰিরোচনসনামকা;

তযো আসিংসু রাজানো, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অনুত্তরসুখাধিগমসম্ভূতেন পীতিৰেগেন উদানং উদানেন্তো –

৮৮. ‘‘অসক্খিং ৰত অত্তানং, উদ্ধাতুং উদকা থলং;

ৰুয্হমানো মহোঘেৰ, সচ্চানি পটিৰিজ্ঝহ’’ন্তি. – গাথং অভাসি;

তত্থ অসক্খিন্তি সক্কোসিং. ৰতাতি ৰিম্হযে নিপাতো. অতিৰিম্হযনীযঞ্হেতং যদিদং সচ্চপটিৰেধো. তেনাহ –

‘‘তং কিংমঞ্ঞথ, ভিক্খৰে, কতমং নু খো দুক্করতরং ৰা দুরভিসম্ভৰতরং ৰা, যং সত্তধা ভিন্নস্স ৰালস্স কোটিযা কোটিং পটিৰিজ্ঝেয্যা’’তিআদি (সং. নি. ৫.১১১৫)?

অত্তানন্তি নিযকজ্ঝত্তং সন্ধায ৰদতি. যো হি পরো ন হোতি সো অত্তাতি. উদ্ধাতুন্তি উদ্ধরিতুং, ‘‘উদ্ধট’’ন্তিপি পাঠো. উদকাতি সংসারমহোঘসঙ্খাতা উদকা. থলন্তি নিব্বানথলং. ৰুয্হমানো মহোঘেৰাতি মহণ্ণৰে ৰুয্হমানো ৰিয. ইদং ৰুত্তং হোতি – যথা নাম গম্ভীরৰিত্থতে অপ্পতিট্ঠে মহতি উদকোঘে ৰেগসা ৰুয্হমানো পুরিসো কেনচি অত্থকামেন উপনীতং ফিযারিত্তসম্পন্নং দল়্হনাৰং লভিত্ৰা সুখেনেৰ ততো অত্তানং উদ্ধরিতুং সক্কুণেয্য পারং পাপুণেয্য, এৰমেৰাহং সংসারমহোঘে কিলেসাভিসঙ্খারৰেগেন ৰুয্হমানো সত্থারা উপনীতং সমথৰিপস্সনুপেতং অরিযমগ্গনাৰং লভিত্ৰা ততো অত্তানং উদ্ধরিতুং নিব্বানথলং পত্তুং অহো অসক্খিন্তি. যথা পন অসক্খি, তং দস্সেতুং ‘‘সচ্চানি পটিৰিজ্ঝহ’’ন্তি আহ. যস্মা অহং দুক্খাদীনি চত্তারি অরিযসচ্চানি পরিঞ্ঞাপহানসচ্ছিকিরিযাভাৰনাপটিৰেধেন পটিৰিজ্ঝিং অরিযমগ্গঞাণেন অঞ্ঞাসিং, তস্মা অসক্খিং ৰত অত্তানং উদ্ধাতুং উদকা থলন্তি যোজনা.

অজ্জুনত্থেরগাথাৰণ্ণনা নিট্ঠিতা.