৯. ৰজ্জিপুত্তত্থেরগাথাৰণ্ণনা

রুক্খমূলগহনং পসক্কিযাতি আযস্মতো ৰজ্জিপুত্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো ইতো চতুনৰুতে কপ্পে একং পচ্চেকসম্বুদ্ধং ভিক্খায গচ্ছন্তং দিস্ৰা পসন্নমানসো কদলিফলানি অদাসি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে ৰেসালিযং লিচ্ছৰিরাজপুত্তো হুত্ৰা নিব্বত্তি, ৰজ্জিরাজপুত্তত্তা ৰজ্জিপুত্তোত্ৰেৰ চস্স সমঞ্ঞা অহোসি. সো দহরো হুত্ৰা হত্থিসিক্খাদিসিক্খনকালেপি হেতুসম্পন্নতায নিস্সরণজ্ঝাসযোৰ হুত্ৰা ৰিচরন্তো সত্থু ধম্মদেসনাকালে ৰিহারং গন্ত্ৰা পরিসপরিযন্তে নিসিন্নো ধম্মং সুত্ৰা পটিলদ্ধসদ্ধো সত্থু সন্তিকে পব্বজিত্ৰা ৰিপস্সনায কম্মং করোন্তো নচিরস্সেৰ ছল়ভিঞ্ঞো অহোসি. তেন ৰুত্তং অপদানে (অপ. থের ২.৫১.৫৭-৬২) –

‘‘সহস্সরংসী ভগৰা, সযম্ভূ অপরাজিতো;

ৰিৰেকা ৰুট্ঠহিত্ৰান, গোচরাযাভিনিক্খমি.

‘‘ফলহত্থো অহং দিস্ৰা, উপগচ্ছিং নরাসভং;

পসন্নচিত্তো সুমনো, অৰটং অদদিং ফলং.

‘‘চতুন্নৰুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা অপরভাগে অচিরপরিনিব্বুতে সত্থরি ধম্মং সঙ্গাযিতুং সঙ্কেতং কত্ৰা মহাথেরেসু তত্থ তত্থ ৰিহরন্তেসু একদিৰসং আযস্মন্তং আনন্দং সেখংযেৰ সমানং মহতিযা পরিসায পরিৰুতং ধম্মং দেসেন্তং দিস্ৰা তস্স উপরিমগ্গাধিগমায উস্সাহং জনেন্তো –

১১৯. ‘‘রুক্খমূলগহনং পসক্কিয, নিব্বানং হদযস্মিং ওপিয;

ঝায গোতম মা চ পমাদো, কিং তে বিল়িবিল়িকা করিস্সতী’’তি. –

গাথং অভাসি.

তত্থ রুক্খমূলগহনন্তি রুক্খমূলভূতং গহনং, গহনঞ্হি অত্থি, ন রুক্খমূলং, রুক্খমূলঞ্চ অত্থি, ন গহনং, তেসু রুক্খমূলগ্গহণেন ঠানস্স ছাযাসম্পন্নতায ৰাতাতপপরিস্সযাভাৰং দস্সেতি. গহনগ্গহণেন নিৰাতভাৰেন ৰাতপরিস্সযাভাৰং জনসম্বাধাভাৰঞ্চ দস্সেতি, তদুভযেন চ ভাৰনাযোগ্যতং. পসক্কিযাতি উপগন্ত্ৰা. নিব্বানং হদযস্মিং ওপিযাতি ‘‘এৰং মযা পটিপজ্জিত্ৰা নিব্বানং অধিগন্তব্ব’’ন্তি নিব্বুতিং হদযে ঠপেত্ৰা চিত্তে করিত্ৰা. ঝাযাতি লক্খণূপনিজ্ঝানেন ঝায, ৰিপস্সনাভাৰনাসহিতং মগ্গভাৰনং ভাৰেহি. গোতমাতি ধম্মভণ্ডাগারিকং গোত্তেন আলপতি. মা চ পমাদোতি অধিকুসলেসু ধম্মেসু মা পমাদং আপজ্জি. ইদানি যাদিসো থেরস্স পমাদো, তং পটিক্খেপৰসেন দস্সেন্তো ‘‘কিং তে বিল়িবিল়িকা করিস্সতী’’তি আহ. তত্থ বিল়িবিল়িকাতি ৰিল়িৰিল়িকিরিযা, বিল়িবিল়ীতি সদ্দপৰত্তি যথা নিরত্থকা, এৰং বিল়িবিল়িকাসদিসা জনপঞ্ঞত্তি কিং তে করিস্সতি কীদিসং অত্থং তুয্হং সাধেতি, তস্মা জনপঞ্ঞত্তিং পহায সদত্থপসুতো হোহীতি ওৰাদং অদাসি.

তং সুত্ৰা অঞ্ঞেহি ৰুত্তৰিসগন্ধৰাযনৰচনেন সংৰেগজাতো বহুদেৰ রত্তিং চঙ্কমেন ৰীতিনামেন্তো ৰিপস্সনং উস্সুক্কাপেত্ৰা সেনাসনং পৰিসিত্ৰা মঞ্চকে নিপন্নমত্তোৰ অরহত্তং পাপুণি.

ৰজ্জিপুত্তত্থেরগাথাৰণ্ণনা নিট্ঠিতা.