১০. ইসিদত্তত্থেরগাথাৰণ্ণনা

পঞ্চক্খন্ধা পরিঞ্ঞাতাতি আযস্মতো ইসিদত্তত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং পুঞ্ঞং উপচিনন্তো ৰিপস্সিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং ভগৰন্তং রথিযং গচ্ছন্তং দিস্ৰা পসন্নমানসো মধুরং আমোদফলং অদাসি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং পুঞ্ঞানি কত্ৰা দেৰমনুস্সেসু সংসরন্তো ইমস্মিং বুদ্ধুপ্পাদে অৰন্তিরট্ঠে ৰড্ঢগামে অঞ্ঞতরস্স সত্থৰাহস্স পুত্তো হুত্ৰা নিব্বত্তি, ইসিদত্তোতিস্স নামং অহোসি. সো ৰযপ্পত্তো মচ্ছিকাসণ্ডে চিত্তস্স গহপতিনো অদিট্ঠসহাযো হুত্ৰা তেন বুদ্ধগুণে লিখিত্ৰা পেসিতসাসনং পটিলভিত্ৰা সাসনে সঞ্জাতপ্পসাদো থেরস্স মহাকচ্চানস্স সন্তিকে পব্বজিত্ৰা ৰিপস্সনং আরভিত্ৰা নচিরস্সেৰ ছল়ভিঞ্ঞো অহোসি. তেন ৰুত্তং অপদানে (অপ. থের ২.৫১.৮০-৮৪) –

‘‘সুৰণ্ণৰণ্ণং সম্বুদ্ধং, আহুতীনং পটিগ্গহং;

রথিযং পটিপজ্জন্তং, আমোদমদদিং ফলং.

‘‘একনৰুতিতো কপ্পে, যং ফলং অদদিং তদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

ছল়ভিঞ্ঞো পন হুত্ৰা ‘‘বুদ্ধুপট্ঠানং গমিস্সামী’’তি থেরং আপুচ্ছিত্ৰা অনুক্কমেন মজ্ঝিমদেসং গন্ত্ৰা সত্থারং উপসঙ্কমিত্ৰা ৰন্দিত্ৰা একমন্তং নিসিন্নো, ‘‘কচ্চি, ভিক্খু, খমনীযং, কচ্চি যাপনীয’’ন্তিআদিনা সত্থারা কতপটিসন্থারো পটিৰচনমুখেন, ‘‘ভগৰা তুম্হাকং সাসনং উপগতকালতো পট্ঠায ময্হং সব্বদুক্খং অপগতং, সব্বো পরিস্সযো ৰূপসন্তো’’তি পৰেদনৰসেন অঞ্ঞং ব্যাকরোন্তো –

১২০. ‘‘পঞ্চক্খন্ধা পরিঞ্ঞাতা, তিট্ঠন্তি ছিন্নমূলকা;

দুক্খক্খযো অনুপ্পত্তো, পত্তো মে আসৰক্খযো’’তি. – গাথং অভাসি;

তত্থ পঞ্চক্খন্ধা পরিঞ্ঞাতাতি পঞ্চপি মে উপাদানক্খন্ধা ৰিপস্সনাপঞ্ঞাসহিতায মগ্গপঞ্ঞায ‘‘ইদং দুক্খং, এত্তকং দুক্খং, ন ইতো ভিয্যো’’তি সব্বসো পরিচ্ছিজ্জ ঞাতা, ন তেসু কিঞ্চিপি পরিঞ্ঞাতব্বং অত্থীতি অধিপ্পাযো. তিট্ঠন্তি ছিন্নমূলকাতি সব্বসো পরিঞ্ঞাতত্তা এৰ তেসং অৰিজ্জাতণ্হাদিকস্স মূলস্স সমুচ্ছিন্নত্তা অরিযমগ্গেন পহীনত্তা যাৰচরিমচিত্তনিরোধা তে তিট্ঠন্তি. দুক্খক্খযো অনুপ্পত্তোতি ছিন্নমূলকত্তাযেৰ চ নেসং ৰট্টদুক্খস্স খযো পরিক্খযো অনুপ্পত্তো, নিব্বানং অধিগতং. পত্তো মে আসৰক্খযোতি কামাসৰাদীনং সব্বেসং আসৰানং খযন্তে অভিগন্তব্বতায ‘‘আসৰক্খযো’’তি লদ্ধনামং অরহত্তং পত্তং পটিলদ্ধন্তি অত্থো. কেচি পন অন্তিমাযং সমুস্সযো’’তি পঠন্তি. নিব্বানস্স অধিগতত্তাযেৰ অযং মম সমুস্সযো অত্তভাৰো অন্তিমো সব্বপচ্ছিমকো, নত্থি দানি পুনব্ভৰোতি অত্থো. যং পন তত্থ তত্থ অৰুত্তং, তং হেট্ঠা ৰুত্তনযত্তা উত্তানংযেৰাতি.

ইসিদত্তত্থেরগাথাৰণ্ণনা নিট্ঠিতা.

দ্ৰাদসমৰগ্গৰণ্ণনা নিট্ঠিতা.

নিট্ঠিতা চ পরমত্থদীপনিযং থেরগাথাৰণ্ণনাযং

ৰীসাধিকসতত্থেরগাথাপটিমণ্ডিতস্স এককনিপাতস্স

অত্থৰণ্ণনা.