৮. কিমিলত্থেরগাথাৰণ্ণনা

অভিসত্তোৰ নিপততীতি আযস্মতো কিমিলত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি করোন্তো ককুসন্ধস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো পরিনিব্বুতে সত্থরি তস্স ধাতুযো উদ্দিস্স সল়লমালাহি মণ্ডপাকারেন পূজং অকাসি. সো তেন পুঞ্ঞকম্মেন তাৰতিংসে নিব্বত্তিত্ৰা অপরাপরং দেৰমনুস্সেসু সংসরন্তো ইমস্মিং বুদ্ধুপ্পাদে কপিলৰত্থুনগরে সাকিযরাজকুলে নিব্বত্তি, কিমিলোতিস্স নামং অহোসি. সো ৰযপ্পত্তো ভোগসম্পত্তিযা সম্পন্নো ৰিহরতি. তস্স ঞাণপরিপাকং দিস্ৰা সংৰেগজননত্থং অনুপিযাযং ৰিহরন্তো সত্থা পঠমযোব্বনে ঠিতং দস্সনীযং ইত্থিরূপং অভিনিম্মিনিত্ৰা পুরতো দস্সেত্ৰা পুন অনুক্কমেন যথা জরারোগৰিপত্তীহি অভিভূতা দিস্সতি, তথা অকাসি. তং দিস্ৰা কিমিলকুমারো অতিৰিয সংৰেগং পকাসেন্তো –

১১৮. ‘‘অভিসত্তোৰ নিপততি ৰযো, রূপং অঞ্ঞমিৰ তথেৰ সন্তং;

তস্সেৰ সতো অৰিপ্পৰসতো, অঞ্ঞস্সেৰ সরামি অত্তান’’ন্তি. –

গাথং অভাসি.

তত্থ অভিসত্তোৰাতি ‘‘ত্ৰং সীঘং গচ্ছ মা তিট্ঠা’’তি দেৰেহি অনুসিট্ঠো আণত্তো ৰিয. ‘‘অভিসট্ঠো ৰা’’তিপি পাঠো, ‘‘ত্ৰং লহুং গচ্ছা’’তি কেনচি অভিলাসাপিতো ৰিযাতি অত্থো. নিপততীতি অতিপততি অভিধাৰতি ন তিট্ঠতি, খণে খণে খযৰযং পাপুণাতীতি অত্থো. ৰযোতি বাল্যযোব্বনাদিকো সরীরস্স অৰত্থাৰিসেসো. ইধ পনস্স যোব্বঞ্ঞং অধিপ্পেতং, তং হিস্স অভিপতন্তং খীযন্তং হুত্ৰা উপট্ঠিতং. রূপন্তি রূপসম্পদাতি ৰদতি. রূপন্তি পন সরীরং ‘‘অট্ঠিঞ্চ পটিচ্চ ন্হারুঞ্চ পটিচ্চ মংসঞ্চ পটিচ্চ আকাসো পরিৰারিতো রূপংত্ৰেৰ সঙ্খং গচ্ছতী’’তিআদীসু (ম. নি. ১.৩০৬) ৰিয. অঞ্ঞমিৰ তথেৰ সন্তন্তি ইদং রূপং যাদিসং, সযং তথেৰ তেনেৰাকারেন সন্তং ৰিজ্জমানং অঞ্ঞং ৰিয ময্হং উপট্ঠাতীতি অধিপ্পাযো. ‘‘তদেৰ সন্ত’’ন্তি চ কেচি পঠন্তি. তস্সেৰ সতোতি তস্সেৰ মে অনঞ্ঞস্স সতো সমানস্স. অৰিপ্পৰসতোতি ন ৰিপ্পৰসন্তস্স, চিরৰিপ্পৰাসেন হি সতো অনঞ্ঞম্পি অঞ্ঞং ৰিয উপট্ঠাতি ইদম্পি ইধ নত্থীতি অধিপ্পাযো. অঞ্ঞস্সেৰ সরামি অত্তানন্তি ইমং মম অত্তভাৰং অঞ্ঞস্স সত্তস্স ৰিয সরামি উপধারেমি সঞ্জানামীতি অত্থো. তস্সেৰং অনিচ্চতং মনসি করোন্তস্স দল়্হতরো সংৰেগো উদপাদি, সো সংৰেগজাতো সত্থারং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ২.৫৬.৪২-৪৮) –

‘‘নিব্বুতে ককুসন্ধম্হি, ব্রাহ্মণম্হি ৰুসীমতি;

গহেত্ৰা সল়লং মালং, মণ্ডপং কারযিং অহং.

‘‘তাৰতিংসং গতো সন্তো, লভিম্হ ব্যম্হমুত্তমং;

অঞ্ঞে দেৰেতিরোচামি, পুঞ্ঞকম্মস্সিদং ফলং.

‘‘দিৰা ৰা যদি ৰা রত্তিং, চঙ্কমন্তো ঠিতো চহং;

ছন্নো সল়লপুপ্ফেহি, পুঞ্ঞকম্মস্সিদং ফলং.

‘‘ইমস্মিংযেৰ কপ্পম্হি, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰাপি থেরো অত্তনো পুরিমুপ্পন্নং অনিচ্চতামনসিকারং ৰিভাৰেন্তো তমেৰ গাথং পচ্চুদাহাসি. তেনেতং ইমস্স থেরস্স অঞ্ঞাব্যাকরণম্পি অহোসি.

কিমিলত্থেরগাথাৰণ্ণনা নিট্ঠিতা.