৭. যসত্থেরগাথাৰণ্ণনা

সুৰিলিত্তো সুৰসনোতি আযস্মতো যসত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সুমেধস্স ভগৰতো কালে মহানুভাৰো নাগরাজা হুত্ৰা বুদ্ধপ্পমুখং ভিক্খুসঙ্ঘং অত্তনো ভৰনং নেত্ৰা মহাদানং পৰত্তেসি. ভগৰন্তং মহগ্ঘেন তিচীৰরেন অচ্ছাদেসি, একমেকঞ্চ ভিক্খুং মহগ্ঘেনেৰ পচ্চেকদুস্সযুগেন সব্বেন সমণপরিক্খারেন অচ্ছাদেসি. সো তেন পুঞ্ঞকম্মেন দেৰমনুস্সেসু সংসরন্তো সিদ্ধত্থস্স ভগৰতো কালে সেট্ঠিপুত্তো হুত্ৰা মহাবোধিমণ্ডং সত্তহি রতনেহি পূজেসি. কস্সপস্স ভগৰতো কালে সাসনে পব্বজিত্ৰা সমণধম্মং অকাসি. এৰং সুগতীসুযেৰ সংসরন্তো ইমস্মিং অম্হাকং ভগৰতো কালে বারাণসিযং মহাৰিভৰস্স সেট্ঠিনো পুত্তো হুত্ৰা নিব্বত্তি, যসো নাম নামেন পরমসুখুমালো. ‘‘তস্স তযো পাসাদা’’তি সব্বং খন্ধকে (মহাৰ. ২৫) আগতনযেন ৰেদিতব্বং.

সো পুব্বহেতুনা চোদিযমানো রত্তিভাগে নিদ্দাভিভূতস্স পরিজনস্স ৰিপ্পকারং দিস্ৰা সঞ্জাতসংৰেগো সুৰণ্ণপাদুকারূল়্হোৰ গেহতো নিগ্গতো দেৰতাৰিৰটেন নগরদ্ৰারেন নিক্খমিত্ৰা ইসিপতনসমীপং গতো ‘‘উপদ্দুতং ৰত, ভো, উপস্সট্ঠং ৰত, ভো’’তি আহ. তেন সমযেন ভগৰতা ইসিপতনে ৰিহরন্তেন তস্সেৰ অনুগ্গণ্হনত্থং অব্ভোকাসে চঙ্কমন্তেন ‘‘এহি, যস, ইদং অনুপদ্দুতং, ইদং অনুপস্সট্ঠ’’ন্তি ৰুত্তো, ‘‘অনুপদ্দুতং অনুপস্সট্ঠং কির অত্থী’’তি সোমনস্সজাতো সুৰণ্ণপাদুকা ওরুয্হ ভগৰন্তং উপসঙ্কমিত্ৰা একমন্তং নিসিন্নো সত্থারা অনুপুব্বিকথং কথেত্ৰা সচ্চদেসনায কতায সচ্চপরিযোসানে সোতাপন্নো হুত্ৰা গৰেসনত্থং আগতস্স পিতু ভগৰতা সচ্চদেসনায করিযমানায অরহত্তং সচ্ছাকাসি. তেন ৰুত্তং অপদানে (অপ. থের ১.৪০.৪৫৬-৪৮৩) –

‘‘মহাসমুদ্দং ওগ্গয্হ, ভৰনং মে সুনিম্মিতং;

সুনিম্মিতা পোক্খরণী, চক্কৰাকপকূজিতা.

‘‘মন্দালকেহি সঞ্ছন্না, পদুমুপ্পলকেহি চ;

নদী চ সন্দতে তত্থ, সুপতিত্থা মনোরমা.

‘‘মচ্ছকচ্ছপসঞ্ছন্না, নানাদিজসমোত্থতা;

মযূরকোঞ্চাভিরুদা, কোকিলাদীহি ৰগ্গুহি.

‘‘পারেৰতা রৰিহংসা চ, চক্কৰাকা নদীচরা;

দিন্দিভা সাল়িকা চেত্থ, পম্মকা জীৰজীৰকা.

‘‘হংসা কোঞ্চাপি নদিতা, কোসিযা পিঙ্গলা বহূ;

সত্তরতনসম্পন্না, মণিমুত্তিকৰালুকা.

‘‘সব্বসোণ্ণমযা রুক্খা, নানাগন্ধসমেরিতা;

উজ্জোতেন্তি দিৰারত্তিং, ভৰনং সব্বকালিকং.

‘‘সট্ঠিতূরিযসহস্সানি, সাযং পাতো পৰজ্জরে;

সোল়সিত্থিসহস্সানি, পরিৰারেন্তি মং সদা.

‘‘অভিনিক্খম্ম ভৰনা, সুমেধং লোকনাযকং;

পসন্নচিত্তো সুমনো, ৰন্দযিং তং মহাযসং.

‘‘সম্বুদ্ধং অভিৰাদেত্ৰা, সসঙ্ঘং তং নিমন্তযিং;

অধিৰাসেসি সো ধীরো, সুমেধো লোকনাযকো.

‘‘মম ধম্মকথং কত্ৰা, উয্যোজেসি মহামুনি;

সম্বুদ্ধং অভিৰাদেত্ৰা, ভৰনং মে উপাগমিং.

‘‘আমন্তযিং পরিজনং, সব্বে সন্নিপতাথ ৰো;

পুব্বণ্হসমযং বুদ্ধো, ভৰনং আগমিস্সতি.

‘‘লাভা অম্হং সুলদ্ধং নো, যে ৰসাম তৰন্তিকে;

মযম্পি বুদ্ধসেট্ঠস্স, পূজং কস্সাম সত্থুনো.

‘‘অন্নং পানং পট্ঠপেত্ৰা, কালং আরোচযিং অহং;

ৰসীসতসহস্সেহি, উপেসি লোকনাযকো.

‘‘পঞ্চঙ্গিকেহি তূরিযেহি, পচ্চুগ্গমনমকাসহং;

সব্বসোণ্ণমযে পীঠে, নিসীদি পুরিসুত্তমো.

‘‘উপরিচ্ছদনং আসি, সব্বসোণ্ণমযং তদা;

বীজনিযো পৰাযন্তি, ভিক্খুসঙ্ঘস্স অন্তরে.

‘‘পহূতেনন্নপানেন, ভিক্খুসঙ্ঘমতপ্পযিং;

পচ্চেকদুস্সযুগল়ে, ভিক্খুসঙ্ঘস্সদাসহং.

‘‘যং ৰদন্তি সুমেধোতি, লোকাহুতিপটিগ্গহং;

ভিক্খুসঙ্ঘে নিসীদিত্ৰা, ইমা গাথা অভাসথ.

‘‘যো মে অন্নেন পানেন, সব্বে ইমে চ তপ্পযিং;

তমহং কিত্তযিস্সামি, সুণাথ মম ভাসতো.

‘‘অট্ঠারসে কপ্পসতে, দেৰলোকে রমিস্সতি;

সহস্সক্খত্তুং রাজা চ, চক্কৰত্তী ভৰিস্সতি.

‘‘উপপজ্জতি যং যোনিং, দেৰত্তং অথ মানুসং;

সব্বদা সব্বসোৰণ্ণং, ছদনং ধারযিস্সতি.

‘‘তিংসকপ্পসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘তস্স ধম্মেসু দাযাদো, ওরসো ধম্মনিম্মিতো;

সব্বাসৰে পরিঞ্ঞায, নিব্বাযিস্সতিনাসৰো.

‘‘ভিক্খুসঙ্ঘে নিসীদিত্ৰা, সীহনাদং নদিস্সতি;

চিতকে ছত্তং ধারেন্তি, হেট্ঠা ছত্তম্হি ডয্হথ.

‘‘সামঞ্ঞং মে অনুপ্পত্তং, কিলেসা ঝাপিতা মযা;

মণ্ডপে রুক্খমূলে ৰা, সন্তাপো মে ন ৰিজ্জতি.

‘‘তিংসকপ্পসহস্সম্হি, যং দানমদদিং তদা;

দুগ্গতিং নাভিজানামি, সব্বদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অথ ভগৰা আযস্মন্তং যসং দক্খিণং বাহুং পসারেত্ৰা ‘‘এহি ভিক্খূ’’তি আহ. ৰচনসমনন্তরমেৰ দ্ৰঙ্গুলমত্তকেসমস্সু অট্ঠপরিক্খারধরো ৰস্সসট্ঠিকত্থেরো ৰিয অহোসি. সো অত্তনো পটিপত্তিং পচ্চৰেক্খিত্ৰা উদানেন্তো এহিভিক্খুভাৰপ্পত্তিতো পুরিমাৰত্থৰসেন –

১১৭. ‘‘সুৰিলিত্তো সুৰসনো, সব্বাভরণভূসিতো;

তিস্সো ৰিজ্জা অজ্ঝগমিং, কতং বুদ্ধস্স সাসন’’ন্তি. – গাথং অভাসি;

তত্থ সুৰিলিত্তোতি সুন্দরেন কুঙ্কুমচন্দনানুলেপনেন ৰিলিত্তগত্তো. সুৰসনোতি সুট্ঠু মহগ্ঘকাসিকৰত্থৰসনো. সব্বাভরণভূসিতোতি সীসূপগাদীহি সব্বেহি আভরণেহি অলঙ্কতো. অজ্ঝগমিন্তি অধিগচ্ছিং. সেসং ৰুত্তনযমেৰ.

যসত্থেরগাথাৰণ্ণনা নিট্ঠিতা.