৬. পারাপরিযত্থেরগাথাৰণ্ণনা

ছফস্সাযতনে হিত্ৰাতি আযস্মতো পারাপরিযত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে পুঞ্ঞানি উপচিনন্তো পিযদস্সিস্স ভগৰতো কালে নেসাদযোনিযং নিব্বত্তিত্ৰা তস্স ৰিঞ্ঞুতং পত্তস্স ৰিচরণট্ঠানে অঞ্ঞতরস্মিং ৰনসণ্ডে পিযদস্সী ভগৰা তং অনুগ্গণ্হিতুং নিরোধসমাপত্তিং সমাপজ্জিত্ৰা নিসীদি. সো চ মিগে পরিযেসন্তো তং ঠানং গতো সত্থারং দিস্ৰা পসন্নমানসো ভগৰন্তং অন্তো কত্ৰা কতং সাখামণ্ডপং পদুমপুপ্ফেহি কূটাগারাকারেন সঞ্ছাদেত্ৰা উল়ারং পীতিসোমনস্সং পটিসংৰেদেন্তো সত্তাহং নমস্সমানো অট্ঠাসি. দিৰসে দিৰসে চ মিলাতমিলাতানি অপনেত্ৰা অভিনৰেহি ছাদেসি. সত্থা সত্তাহস্স অচ্চযেন নিরোধতো ৰুট্ঠহিত্ৰা ভিক্খুসঙ্ঘং অনুস্সরি. তাৰদেৰ অসীতিসহস্সমত্তা ভিক্খূ সত্থারং পরিৰারেসুং. ‘‘মধুরধম্মকথং সুণিস্সামা’’তি দেৰতা সন্নিপতিংসু, মহা সমাগমো অহোসি. সত্থা অনুমোদনং করোন্তো তস্স দেৰমনুস্সেসু ভাৰিনিং সম্পত্তিং ইমস্মিং বুদ্ধুপ্পাদে সাৰকবোধিঞ্চ ব্যাকরিত্ৰা পক্কামি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে রাজগহে ব্রাহ্মণকুলে নিব্বত্তিত্ৰা ৰিঞ্ঞুতং পত্তো তিণ্ণং ৰেদানং পারগূ হুত্ৰা পরাপরগোত্ততায পারাপরিযোতি লদ্ধসমঞ্ঞো বহূ ব্রাহ্মণে মন্তে ৰাচেন্তো সত্থু রাজগহগমনে বুদ্ধানুভাৰং দিস্ৰা পটিলদ্ধসদ্ধো পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.৪০.৩৫৩-৩৮৫) –

‘‘পিযদস্সী নাম ভগৰা, সযম্ভূ লোকনাযকো;

ৰিৰেককামো সম্বুদ্ধো, সমাধিকুসলো মুনি.

‘‘ৰনসণ্ডং সমোগ্গয্হ, পিযদস্সী মহামুনি;

পংসুকূলং পত্থরিত্ৰা, নিসীদি পুরিসুত্তমো.

‘‘মিগলুদ্দো পুরে আসিং, অরঞ্ঞে কাননে অহং;

পসদং মিগমেসন্তো, আহিণ্ডামি অহং তদা.

‘‘তত্থদ্দসাসিং সম্বুদ্ধং, ওঘতিণ্ণমনাসৰং;

পুপ্ফিতং সালরাজংৰ, সতরংসিংৰ উগ্গতং.

‘‘দিস্ৰানহং দেৰদেৰং, পিযদস্সিং মহাযসং;

জাতস্সরং সমোগ্গয্হ, পদুমং আহরিং তদা.

‘‘আহরিত্ৰান পদুমং, সতপত্তং মনোরমং;

কূটাগারং করিত্ৰান, ছাদযিং পদুমেনহং.

‘‘অনুকম্পকো কারুণিকো, পিযদস্সী মহামুনি;

সত্তরত্তিন্দিৰং বুদ্ধো, কূটাগারে ৰসী জিনো.

‘‘পুরাণং ছড্ডযিত্ৰান, নৰেন ছাদযিং অহং;

অঞ্জলিং পগ্গহেত্ৰান, অট্ঠাসিং তাৰদে অহং.

‘‘ৰুট্ঠহিত্ৰা সমাধিম্হা, পিযদস্সী মহামুনি;

দিসং অনুৰিলোকেন্তো, নিসীদি লোকনাযকো.

‘‘তদা সুদস্সনো নাম, উপট্ঠাকো মহিদ্ধিকো;

চিত্তমঞ্ঞায বুদ্ধস্স, পিযদস্সিস্স সত্থুনো.

‘‘অসীতিযা সহস্সেহি, ভিক্খূহি পরিৰারিতো;

ৰনন্তে সুখমাসীনং, উপেসি লোকনাযকং.

‘‘যাৰতা ৰনসণ্ডম্হি, অধিৰত্থা চ দেৰতা;

বুদ্ধস্স চিত্তমঞ্ঞায, সব্বে সন্নিপতুং তদা.

‘‘সমাগতেসু যক্খেসু, কুম্ভণ্ডে সহরক্খসে;

ভিক্খুসঙ্ঘে চ সম্পত্তে, গাথা পব্যাহরী জিনো.

‘‘থোমং সত্তাহং পূজেসি, আৰাসঞ্চ অকাসি মে;

তমহং কিত্তযিস্সামি, সুণাথ মম ভাসতো.

‘‘সুদুদ্দসং সুনিপুণং, গম্ভীরং সুপ্পকাসিতং;

ঞাণেন কিত্তযিস্সামি, সুণাথ মম ভাসতো.

‘‘চতুদ্দসানি কপ্পানি, দেৰরজ্জং করিস্সতি;

কূটাগারং মহন্তস্স, পদ্মপুপ্ফেহি ছাদিতং.

‘‘আকাসে ধারযিস্সতি, পুপ্ফকম্মস্সিদং ফলং;

চতুব্বীসে কপ্পসতে, ৰোকিণ্ণং সংসরিস্সতি.

‘‘তত্থ পুপ্ফমযং ব্যম্হং, আকাসে ধারযিস্সতি;

যথা পদুমপত্তম্হি, তোযং ন উপলিম্পতি.

‘‘তথেৰীমস্স ঞাণম্হি, কিলেসা নোপলিম্পরে;

মনসা ৰিনিৰট্টেত্ৰা, পঞ্চ নীৰরণে অযং.

‘‘চিত্তং জনেত্ৰা নেক্খম্মে, অগারা পব্বজিস্সতি;

ততো পুপ্ফমযে ব্যম্হে, ধারেন্তে নিক্খমিস্সতি.

‘‘রুক্খমূলে ৰসন্তস্স, নিপকস্স সতীমতো;

তত্থ পুপ্ফমযং ব্যম্হং, মত্থকে ধারযিস্সতি.

‘‘চীৰরং পিণ্ডপাতঞ্চ, পচ্চযং সযনাসনং;

দত্ৰান ভিক্খুসঙ্ঘস্স, নিব্বাযিস্সতিনাসৰো.

‘‘কূটাগারেন চরতা, পব্বজ্জং অভিনিক্খমিং;

রুক্খমূলে ৰসন্তম্পি, কূটাগারং ধরীযতি.

‘‘চীৰরে পিণ্ডপাতে চ, চেতনা মে ন ৰিজ্জতি;

পুঞ্ঞকম্মেন সংযুত্তো, লভামি পরিনিট্ঠিতং.

‘‘গণনাতো অসঙ্খেয্যা, কপ্পকোটী বহূ মম;

রিত্তকা তে অতিক্কন্তা, পমুত্তা লোকনাযকা.

‘‘অট্ঠারসে কপ্পসতে, পিযদস্সী ৰিনাযকো;

তমহং পযিরুপাসিত্ৰা, ইমং যোনিং উপাগতো.

‘‘ইধ পস্সামি সম্বুদ্ধং, অনোমং নাম চক্খুমং;

তমহং উপগন্ত্ৰান, পব্বজিং অনগারিযং.

‘‘দুক্খস্সন্তকরো বুদ্ধো, মগ্গং মে দেসযী জিনো;

তস্স ধম্মং সুণিত্ৰান, পত্তোম্হি অচলং পদং.

‘‘তোসযিত্ৰান সম্বুদ্ধং, গোতমং সক্যপুঙ্গৰং;

সব্বাসৰে পরিঞ্ঞায, ৰিহরামি অনাসৰো.

‘‘অট্ঠারসে কপ্পসতে, যং বুদ্ধমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনো পটিপত্তিং পচ্চৰেক্খিত্ৰা সঞ্জাতসোমনস্সো উদানৰসেন –

১১৬. ‘‘ছফস্সাযতনে হিত্ৰা, গুত্তদ্ৰারো সুসংৰুতো;

অঘমূলং ৰমিত্ৰান, পত্তো মে আসৰক্খযো’’তি. – গাথং অভাসি;

তত্থ ছফস্সাযতনে হিত্ৰাতি চক্খুসম্ফস্সাদীনং ছন্নং সম্ফস্সানং উপ্পত্তিট্ঠানতায ‘‘ফস্সাযতনানী’’তি লদ্ধনামানি চক্খাদীনি ছ অজ্ঝত্তিকাযতনানি তপ্পটিবদ্ধসংকিলেসপ্পহানৰসেন পহায. গুত্তদ্ৰারো সুসংৰুতোতি ততো এৰ চক্খুদ্ৰারাদীনং গুত্তত্তা, তত্থ পৰত্তনকানং অভিজ্ঝাদীনং পাপধম্মানং পৰেসননিৰারণেন সতিকৰাটেন সুট্টু পিহিতত্তা গুত্তদ্ৰারো সুসংৰুতো. অথ ৰা মনচ্ছট্ঠানং ছন্নং দ্ৰারানং ৰুত্তনযেন রক্খিতত্তা গুত্তদ্ৰারো, কাযাদীহি সুট্ঠু সঞ্ঞতত্তা সুসংৰুতোতি এৰমেত্থ অত্থো ৰেদিতব্বো. অঘমূলং ৰমিত্ৰানাতি অঘস্স ৰট্টদুক্খস্স মূলভূতং অৰিজ্জাভৰতণ্হাসঙ্খাতং দোসং, সব্বং ৰা কিলেসদোসং অরিযমগ্গসঙ্খাতৰমনযোগপানেন উগ্গিরিত্ৰা সন্তানতো বহি কত্ৰা, বহিকরণহেতু ৰা. পত্তো মে আসৰক্খযোতি কামাসৰাদযো আসৰা এত্থ খীযন্তি, তেসং ৰা খযেন পত্তব্বোতি আসৰক্খযো, নিব্বানং অরহত্তঞ্চ. সো আসৰক্খযো পত্তো অধিগতোতি উদানৰসেন অঞ্ঞং ব্যাকাসি.

পারাপরিযত্থেরগাথাৰণ্ণনা নিট্ঠিতা.