৩. বন্ধুরত্থেরগাথাৰণ্ণনা

নাহং এতেন অত্থিকোতি আযস্মতো বন্ধুরত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো সিদ্ধত্থস্স ভগৰতো কালে অঞ্ঞতরস্স রঞ্ঞো অন্তেপুরে গোপকো হুত্ৰা একদিৰসং ভগৰন্তং সপরিসং রাজঙ্গণেন গচ্ছন্তং দিস্ৰা পসন্নচিত্তো কণৰেরপুপ্ফানি গহেত্ৰা সসঙ্ঘং লোকনাযকং পূজেসি. সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং সুগতীসুযেৰ সংসরন্তো ইমস্মিং বুদ্ধুপ্পাদে সীলৰতীনগরে সেট্ঠিপুত্তো হুত্ৰা নিব্বত্তি, বন্ধুরোতিস্স নামং অহোসি. সো ৰিঞ্ঞুতং পত্তো কেনচিদেৰ করণীযেন সাৰত্থিযং গতো উপাসকেহি সদ্ধিং ৰিহারং গতো সত্থু ধম্মদেসনং সুত্ৰা পটিলদ্ধসদ্ধো পব্বজিত্ৰা ঞাণস্স পরিপাকত্তা ৰিপস্সনং পট্ঠপেত্ৰা নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.১৭.৭-১২) –

‘‘সিদ্ধত্থো নাম ভগৰা, লোকজেট্ঠো নরাসভো;

পুরক্খতো সাৰকেহি, নগরং পটিপজ্জথ.

‘‘রঞ্ঞো অন্তেপুরে আসিং, গোপকো অভিসম্মতো;

পাসাদে উপৰিট্ঠোহং, অদ্দসং লোকনাযকং.

‘‘কণৰেরং গহেত্ৰান, ভিক্খুসঙ্ঘে সমোকিরিং;

বুদ্ধস্স ৰিসুং কত্ৰান, ততো ভিয্যো সমোকিরিং.

‘‘চতুন্নৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

‘‘সত্তাসীতিম্হিতো কপ্পে, চতুরাসুং মহিদ্ধিকা;

সত্তরতনসম্পন্না, চক্কৰত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা কতঞ্ঞুভাৰে ঠত্ৰা অত্তনো উপকারস্স রঞ্ঞো পচ্চুপকারং কাতুং সীলৰতীনগরং গন্ত্ৰা রঞ্ঞো ধম্মং দেসেন্তো সচ্চানি পকাসেসি. রাজা সচ্চপরিযোসানে সোতাপন্নো হুত্ৰা অত্তনো নগরে সুদস্সনং নাম মহন্তং ৰিহারং কারেত্ৰা থেরস্স নিয্যাতেসি. মহালাভসক্কারো অহোসি. থেরো ৰিহারং সব্বঞ্চ লাভসক্কারং সঙ্ঘস্স নিয্যাতেত্ৰা সযং পুরিমনিযামেনেৰ পিণ্ডায চরিত্ৰা যাপেন্তো কতিপাহং তত্থ ৰসিত্ৰা সাৰত্থিং গন্তুকামো অহোসি. ভিক্খূ, ‘‘ভন্তে, তুম্হে ইধেৰ ৰসথ, সচে পচ্চযেহি ৰেকল্লং, মযং তং পরিপূরেস্সামা’’তি আহংসু. থেরো, ‘‘ন ময্হং, আৰুসো, উল়ারেহি পচ্চযেহি অত্থো অত্থি, ইতরীতরেহি পচ্চযেহি যাপেমি, ধম্মরসেনেৰম্হি তিত্তো’’তি দস্সেন্তো –

১০৩. ‘‘নাহং এতেন অত্থিকো, সুখিতো ধম্মরসেন তপ্পিতো;

পিত্ৰা রসগ্গমুত্তমং, ন চ কাহামি ৰিসেন সন্থৰ’’ন্তি. –

গাথং অভাসি.

তত্থ নাহং এতেন অত্থিকোতি যেন মং তুম্হে তপ্পেতুকামা ‘‘পরিপূরেস্সামা’’তি ৰদথ, এতেন আমিসলাভেন পচ্চযামিসরসেন নাহং অত্থিকো, ময্হং এতেন অত্থো নত্থি, সন্তুট্ঠি পরমং সুখন্তি ইতরীতরেহেৰ পচ্চযেহি যাপেমীতি অত্থো. ইদানি তেন অনত্থিকভাৰে পধানকারণং দস্সেন্তো আহ ‘‘সুখিতো ধম্মরসেন তপ্পিতো’’তি. সত্ততিংসবোধিপক্খিযধম্মরসেন চেৰ নৰৰিধলোকুত্তরধম্মরসেন চ তপ্পিতো পীণিতো সুখিতো উত্তমেন সুখেন সুহিতোতি অত্থো. পিত্ৰা রসগ্গমুত্তমন্তি সব্বরসেসু অগ্গং সেট্ঠং ততোযেৰ উত্তমং যথাৰুত্তং ধম্মরসং পিৰিত্ৰা ঠিতো, তেনাহ – ‘‘সব্বরসং ধম্মরসো জিনাতী’’তি (ধ. প. ৩৫৪). ন চ কাহামি ৰিসেন সন্থৰন্তি এৰরূপং রসুত্তমং ধম্মরসং পিৰিত্ৰা ঠিতো ৰিসেন ৰিসসদিসেন ৰিসরসেন সন্থৰং সংসগ্গং ন করিস্সামি, তথাকরণস্স কারণং নত্থীতি অত্থো.

বন্ধুরত্থেরগাথাৰণ্ণনা নিট্ঠিতা.