১০. (দুতিয) দেৰসভত্থেরগাথাৰণ্ণনা

সম্মপ্পধানসম্পন্নোতি আযস্মতো দেৰসভত্থেরস্স গাথা. কা উপ্পত্তি? অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযং কুসলং উপচিনন্তো সিখিস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো একদিৰসং সিখিং ভগৰন্তং দিস্ৰা পসন্নমানসো বন্ধুজীৰকপুপ্ফেহি পূজং অকাসি. সো তেন পুঞ্ঞকম্মেন দেৰমনুস্সেসু সংসরন্তো ইমস্মিং বুদ্ধুপ্পাদে কপিলৰত্থুস্মিং সক্যরাজকুলে নিব্বত্তি, তস্স দেৰসভোতি নামং অহোসি. সো ৰযপ্পত্তো চুম্বটকলহৰূপসমনত্থং সত্থরি আগতে বুদ্ধানুভাৰং দিস্ৰা পসন্নমানসো সরণেসু পতিট্ঠিতো পুন নিগ্রোধারামে সত্থরি ৰিহরন্তে সত্থারং উপসঙ্কমিত্ৰা পটিলদ্ধসদ্ধো পব্বজিত্ৰা কতপুব্বকিচ্চো ৰিপস্সনায কম্মং করোন্তো নচিরস্সেৰ অরহত্তং পাপুণি. তেন ৰুত্তং অপদানে (অপ. থের ১.১৬.১-৬) –

‘‘চন্দংৰ ৰিমলং সুদ্ধং, ৰিপ্পসন্নমনাৰিলং;

নন্দীভৰপরিক্খীণং, তিণ্ণং লোকে ৰিসত্তিকং.

‘‘নিব্বাপযন্তং জনতং, তিণ্ণং তারযতং ৰরং;

মুনিং ৰনম্হি ঝাযন্তং, একগ্গং সুসমাহিতং.

‘‘বন্ধুজীৰকপুপ্ফানি, লগেত্ৰা সুত্তকেনহং;

বুদ্ধস্স অভিরোপযিং, সিখিনো লোকবন্ধুনো.

‘‘একতিংসে ইতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

‘‘ইতো সত্তমকে কপ্পে, মনুজিন্দো মহাযসো;

সমন্তচক্খুনামাসি, চক্কৰত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অরহত্তং পন পত্ৰা অত্তনা অধিগতং ৰিমুত্তিসুখং নিস্সায উপ্পন্নপীতিসোমনস্সো উদানৰসেন –

১০০. ‘‘সম্মপ্পধানসম্পন্নো, সতিপট্ঠানগোচরো;

ৰিমুত্তিকুসুমসঞ্ছন্নো, পরিনিব্বিস্সত্যনাসৰো’’তি. – গাথং অভাসি;

তত্থ সম্মপ্পধানসম্পন্নোতি সম্পন্নচতুব্বিধসম্মপ্পধানো, তেহি কত্তব্বকিচ্চং সম্পাদেত্ৰা ঠিতোতি অত্থো. সতিপট্ঠানগোচরোতি কাযানুপস্সনাদযো সতিপট্ঠানা গোচরো পৰত্তিট্ঠানং এতস্সাতি সতিপট্ঠানগোচরো, চতূসু সতিপট্ঠানেসু পতিট্ঠিতচিত্তোতি অত্থো. গুণসোভেন পরমসুগন্ধা ৰিমুত্তিযেৰ কুসুমানি, তেহি সব্বসো সম্মদেৰ সঞ্ছন্নো ৰিভূসিতো অলঙ্কতোতি ৰিমুত্তিকুসুমসঞ্ছন্নো. পরিনিব্বিস্সত্যনাসৰোতি এৰং সম্মা পটিপজ্জন্তো ভিক্খু নচিরস্সেৰ অনাসৰো হুত্ৰা পরিনিব্বিস্সতি সউপাদিসেসায অনুপাদিসেসায চ নিব্বানধাতুযাতি অত্থো. ইদমেৰ চ থেরস্স অঞ্ঞাব্যাকরণং অহোসি.

(দুতিয) দেৰসভত্থেরগাথাৰণ্ণনা নিট্ঠিতা.

দসমৰগ্গৰণ্ণনা নিট্ঠিতা.