৭. রাজপুত্তপেতৰত্থুৰণ্ণনা

পুব্বে কতানং কম্মানন্তি ইদং সত্থা জেতৰনে ৰিহরন্তো রাজপুত্তপেতং আরব্ভ কথেসি. তত্থ যো সো অতীতে কিতৰস্স নাম রঞ্ঞো পুত্তো অতীতে পচ্চেকবুদ্ধে অপরজ্ঝিত্ৰা বহূনি ৰস্সসহস্সানি নিরযে পচ্চিত্ৰা তস্সেৰ কম্মস্স ৰিপাকাৰসেসেন পেতেসু উপ্পন্নো. সো ইধ ‘‘রাজপুত্তপেতো’’তি অধিপ্পেতো. তস্স ৰত্থু হেট্ঠা সাণৰাসিপেতৰত্থুম্হি ৰিত্থারতো আগতমেৰ, তস্মা তত্থ ৰুত্তনযেনেৰ গহেতব্বং. সত্থা হি তদা থেরেন অত্তনো ঞাতিপেতানং পৰত্তিযা কথিতায ‘‘ন কেৰলং তৰ ঞাতকাযেৰ, অথ খো ত্ৰম্পি ইতো অনন্তরাতীতে অত্তভাৰে পেতো হুত্ৰা মহাদুক্খং অনুভৰী’’তি ৰত্ৰা তেন যাচিতো –

৭৫৩. ‘‘পুব্বে কতানং কম্মানং, ৰিপাকো মথযে মনং;

রূপে সদ্দে রসে গন্ধে, ফোট্ঠব্বে চ মনোরমে.

৭৫৪. ‘‘ইচ্চং গীতং রতিং খিড্ডং, অনুভুত্ৰা অনপ্পকং;

উয্যানে পরিচরিত্ৰা, পৰিসন্তো গিরিব্বজং.

৭৫৫. ‘‘ইসিং সুনেত্তমদ্দক্খি, অত্তদন্তং সমাহিতং;

অপ্পিচ্ছং হিরিসম্পন্নং, উঞ্ছে পত্তগতে রতং.

৭৫৬. ‘‘হত্থিক্খন্ধতো ওরুয্হ, লদ্ধা ভন্তেতি চাব্রৰি;

তস্স পত্তং গহেত্ৰান, উচ্চং পগ্গয্হ খত্তিযো.

৭৫৭. ‘‘থণ্ডিলে পত্তং ভিন্দিত্ৰা, হসমানো অপক্কমি;

রঞ্ঞো কিতৰস্সাহং পুত্তো, কিং মং ভিক্খু করিস্সসি.

৭৫৮. ‘‘তস্স কম্মস্স ফরুসস্স, ৰিপাকো কটুকো অহু;

যং রাজপুত্তো ৰেদেসি, নিরযম্হি সমপ্পিতো.

৭৫৯. ‘‘ছল়েৰ চতুরাসীতি, ৰস্সানি নহুতানি চ;

ভুসং দুক্খং নিগচ্ছিত্থো, নিরযে কতকিব্বিসো.

৭৬০. ‘‘উত্তানোপি চ পচ্চিত্থ, নিকুজ্জো ৰামদক্খিণো;

উদ্ধংপাদো ঠিতো চেৰ, চিরং বালো অপচ্চথ.

৭৬১. ‘‘বহূনি ৰস্সসহস্সানি, পূগানি নহুতানি চ;

ভুসং দুক্খং নিগচ্ছিত্থো, নিরযে কতকিব্বিসো.

৭৬২. ‘‘এতাদিসং খো কটুকং, অপ্পদুট্ঠপ্পদোসিনং;

পচ্চন্তি পাপকম্মন্তা, ইসিমাসজ্জ সুব্বতং.

৭৬৩. ‘‘সো তত্থ বহুৰস্সানি, ৰেদযিত্ৰা বহুং দুখং;

খুপ্পিপাসহতো নাম, পেতো আসি ততো চুতো.

৭৬৪. ‘‘এতমাদীনৰং ঞত্ৰা, ইস্সরমদসম্ভৰং;

পহায ইস্সরমদং, নিৰাতমনুৰত্তযে.

৭৬৫. ‘‘দিট্ঠেৰ ধম্মে পাসংসো, যো বুদ্ধেসু সগারৰো;

কাযস্স ভেদা সপ্পঞ্ঞো, সগ্গং সো উপপজ্জতী’’তি. –

ইদং পেতৰত্থুং কথেসি.

৭৫৩. তত্থ পুব্বে কতানং কম্মানং, ৰিপাকো মথযে মনন্তি পুরিমাসু জাতীসু কতানং অকুসলকম্মানং ফলং উল়ারং হুত্ৰা উপ্পজ্জমানং অন্ধবালানং চিত্তং মথযেয্য অভিভৰেয্য, পরেসং অনত্থকরণমুখেন অত্তনো অত্থং উপ্পাদেয্যাতি অধিপ্পাযো.

ইদানি তং চিত্তমথনং ৰিসযেন সদ্ধিং দস্সেতুং ‘‘রূপে সদ্দে’’তিআদি ৰুত্তং. তত্থ রূপেতি রূপহেতু, যথিচ্ছিতস্স মনাপিযস্স রূপারম্মণস্স পটিলাভনিমিত্তন্তি অত্থো. সদ্দেতিআদীসুপি এসেৰ নযো.

৭৫৪. এৰং সাধারণতো ৰুত্তমত্থং অসাধারণতো নিযমেত্ৰা দস্সেন্তো ‘‘নচ্চং গীত’’ন্তিআদিমাহ. তত্থ রতিন্তি কামরতিং. খিড্ডন্তি সহাযকাদীহি কেল়িং. গিরিব্বজন্তি রাজগহং.

৭৫৫. ইসিন্তি অসেক্খানং সীলক্খন্ধাদীনং এসনট্ঠেন ইসিং. সুনেত্তন্তি এৰংনামকং পচ্চেকবুদ্ধং. অত্তদন্তন্তি উত্তমেন দমথেন দমিতচিত্তং. সমাহিতন্তি অরহত্তফলসমাধিনা সমাহিতং. উঞ্ছে পত্তগতে রতন্তি উঞ্ছেন ভিক্খাচারেন লদ্ধে পত্তগতে পত্তপরিযাপন্নে আহারে রতং সন্তুট্ঠং.

৭৫৬. লদ্ধা, ভন্তেতি চাব্রৰীতি ‘‘অপি, ভন্তে, ভিক্খা লদ্ধা’’তি ৰিস্সাসজননত্থং কথেসি. উচ্চং পগ্গয্হাতি উচ্চতরং কত্ৰা পত্তং উক্খিপিত্ৰা.

৭৫৭. থণ্ডিলে পত্তং ভিন্দিত্ৰাতি খরকঠিনে ভূমিপ্পদেসে খিপন্তো পত্তং ভিন্দিত্ৰা. অপক্কমীতি থোকং অপসক্কি. অপসক্কন্তো চ ‘‘অকারণেনেৰ অন্ধবালো মহন্তং অনত্থং অত্তনো অকাসী’’তি করুণাযনৰসেন ওলোকেন্তং পচ্চেকবুদ্ধং রাজপুত্তো আহ ‘‘রঞ্ঞো কিতৰস্সাহং পুত্তো, কিং মং ভিক্খু করিস্সসী’’তি.

৭৫৮. ফরুসস্সাতি দারুণস্স. কটুকোতি অনিট্ঠো. যন্তি যং ৰিপাকং. সমপ্পিতোতি অল্লীনো.

৭৫৯. ছল়েৰ চতুরাসীতি, ৰস্সানি নহুতানি চাতি উত্তানো নিপন্নো চতুরাসীতিৰস্সসহস্সানি, নিকুজ্জো, ৰামপস্সেন, দক্খিণপস্সেন, উদ্ধংপাদো, ওলম্বিকো, যথাঠিতো চাতি এৰং ছ চতুরাসীতিসহস্সানি ৰস্সানি হোন্তি. তেনাহ –

৭৬০. ‘‘উত্তানোপি চ পচ্চিত্থ, নিকুজ্জো ৰামদক্খিণো;

উদ্ধংপাদো ঠিতো চেৰ, চিরং বালো অপচ্চথা’’তি.

তানি পন ৰস্সানি যস্মা অনেকানি নহুতানি হোন্তি, তস্মা ৰুত্তং ‘‘নহুতানী’’তি. ভুসং দুক্খং নিগচ্ছিত্থোতি অতিৰিয দুক্খং পাপুণি.

৭৬১. পূগানীতি ৰস্সসমূহে, ইধ পুরিমগাথায চ অচ্চন্তসংযোগে উপযোগৰচনং দট্ঠব্বং.

৭৬২. এতাদিসন্তি এৰরূপং. কটুকন্তি অতিদুক্খং, ভাৰনপংসকনিদ্দেসোযং ‘‘একমন্তং নিসীদী’’তিআদীসু ৰিয. অপ্পদুট্ঠপ্পদোসিনং ইসিং সুব্বতং আসজ্জ আসাদেত্ৰা পাপকম্মন্তা পুগ্গলা এৰরূপং কটুকং অতিৰিয দুক্খং পচ্চন্তীতি যোজনা.

৭৬৩. সোতি সো রাজপুত্তপেতো. তত্থাতি নিরযে. ৰেদযিত্ৰাতি অনুভৰিত্ৰা. নামাতি ব্যত্তপাকটভাৰেন. ততো চুতোতি নিরযতো চুতো. সেসং ৰুত্তনযমেৰ.

এৰং ভগৰা রাজপুত্তপেতকথায তত্থ সন্নিপতিতং মহাজনং সংৰেজেত্ৰা উপরি সচ্চানি পকাসেসি. সচ্চপরিযোসানে বহূ সোতাপত্তিফলাদীনি সম্পাপুণিংসূতি.

রাজপুত্তপেতৰত্থুৰণ্ণনা নিট্ঠিতা.