৮. গূথখাদকপেতৰত্থুৰণ্ণনা

গূথকূপতো উগ্গন্ত্ৰাতি ইদং সত্থরি জেতৰনে ৰিহরন্তে একং গূথখাদকপেতং আরম্ভ ৰুত্তং. সাৰত্থিযা কির অৰিদূরে অঞ্ঞতরস্মিং গামকে একো কুটুম্বিকো অত্তনো কুলূপকং ভিক্খুং উদ্দিস্স ৰিহারং কারেসি. তত্থ নানাজনপদতো ভিক্খূ আগন্ত্ৰা পটিৰসিংসু. তে দিস্ৰা মনুস্সা পসন্নচিত্তা পণীতেন পচ্চযেন উপট্ঠহিংসু. কুলূপকো ভিক্খু তং অসহমানো ইস্সাপকতো হুত্ৰা তেসং ভিক্খূনং দোসং ৰদন্তো কুটুম্বিকং উজ্ঝাপেসি. কুটুম্বিকো তে ভিক্খূ কুলূপকঞ্চ পরিভৰন্তো পরিভাসি. অথ কুলূপকো কালং কত্ৰা তস্মিংযেৰ ৰিহারে ৰচ্চকুটিযং পেতো হুত্ৰা নিব্বত্তি, কুটুম্বিকো পন কালং কত্ৰা তস্সেৰ উপরি পেতো হুত্ৰা নিব্বত্তি. অথাযস্মা মহামোগ্গল্লানো তং দিস্ৰা পুচ্ছন্তো –

৭৬৬. ‘‘গূথকূপতো উগ্গন্ত্ৰা, কো ন দীনো পতিট্ঠসি;

নিস্সংসযং পাপকম্মন্তো, কিং নু সদ্দহসে তুৰ’’ন্তি. –

গাথমাহ. তং সুত্ৰা পেতো –

৭৬৭. ‘‘অহং ভদন্তে পেতোম্হি, দুগ্গতো যমলোকিকো;

পাপকম্মং করিত্ৰান, পেতলোকং ইতো গতো’’তি. –

গাথায অত্তানং আচিক্খি. অথ নং থেরো –

৭৬৮. ‘‘কিং নু কাযেন ৰাচায, মনসা দুক্কটং কতং;

কিস্সকম্মৰিপাকেন, ইদং দুক্খং নিগচ্ছসী’’তি. –

গাথায তেন কতকম্মং পুচ্ছি. সো পেতো –

৭৬৯. ‘‘অহু আৰাসিকো ময্হং, ইস্সুকী কুলমচ্ছরী;

অজ্ঝাসিতো ময্হং ঘরে, কদরিযো পরিভাসকো.

৭৭০. ‘‘তস্সাহং ৰচনং সুত্ৰা, ভিক্খৰো পরিভাসিসং;

তস্সকম্মৰিপাকেন, পেতলোকং ইতো গতো’’তি. –

দ্ৰীহি গাথাহি অত্তনা কতকম্মং কথেসি.

৭৬৯. তত্থ অহু আৰাসিকো ময্হন্তি ময্হং আৰাসে মযা কতৰিহারে একো ভিক্খু আৰাসিকো নিবদ্ধৰসনকো অহোসি. অজ্ঝাসিতো ময্হং ঘরেতি কুলূপকভাৰেন মম গেহে তণ্হাভিনিৰেসৰসেন অভিনিৰিট্ঠো.

৭৭০. তস্সাতি তস্স কুলূপকভিক্খুস্স. ভিক্খৰোতি ভিক্খূ. পরিভাসিসন্তি অক্কোসিং. পেতলোকং ইতো গতোতি ইমিনা আকারেন পেতযোনিং উপগতো পেতভূতো.

তং সুত্ৰা থেরো ইতরস্স গতিং পুচ্ছন্তো –

৭৭১. ‘‘অমিত্তো মিত্তৰণ্ণেন, যো তে আসি কুলূপকো;

কাযস্স ভেদা দুপ্পঞ্ঞো, কিং নু পেচ্চ গতিং গতো’’তি. –

গাথমাহ. তত্থ মিত্তৰণ্ণেনাতি মিত্তপটিরূপেন মিত্তপটিরূপতায.

পুন পেতো থেরস্স তমত্থং আচিক্খন্তো –

৭৭২. ‘‘তস্সেৰাহং পাপকম্মস্স, সীসে তিট্ঠামি মত্থকে;

সো চ পরৰিসযং পত্তো, মমেৰ পরিচারকো.

৭৭৩. ‘‘যং ভদন্তে হদন্তঞ্ঞে, এতং মে হোতি ভোজনং;

অহঞ্চ খো যং হদামি, এতং সো উপজীৰতী’’তি. – গাথাদ্ৰযমাহ;

৭৭২. তত্থ তস্সেৰাতি তস্সেৰ ময্হং পুব্বে কুলূপকভিক্খুভূতস্স পেতস্স. পাপকম্মস্সাতি পাপসমাচারস্স. সীসে তিট্ঠামি মত্থকেতি সীসে তিট্ঠামি, তিট্ঠন্তো চ মত্থকে এৰ তিট্ঠামি, ন সীসপ্পমাণে আকাসেতি অত্থো. পরৰিসযং পত্তোতি মনুস্সলোকং উপাদায পরৰিসযভূতং পেত্তিৰিসযং পত্তো. মমেৰাতি ময্হং এৰ পরিচারকো অহোসীতি ৰচনসেসো.

৭৭৩. যং ভদন্তে হদন্তঞ্ঞেতি ভদন্তে, অয্য মহামোগ্গলান, তস্সং ৰচ্চকুটিযং যং অঞ্ঞে উহদন্তি ৰচ্চং ওস্সজন্তি. এতং মে হোতি ভোজনন্তি এতং ৰচ্চং ময্হং দিৰসে দিৰসে ভোজনং হোতি. যং হদামীতি তং পন ৰচ্চং খাদিত্ৰা যম্পহং ৰচ্চং করোমি. এতং সো উপজীৰতীতি এতং মম ৰচ্চং সো কুলূপকপেতো দিৰসে দিৰসে খাদনৰসেন উপজীৰতি, অত্তভাৰং যাপেতীতি অত্থো.

তেসু কুটুম্বিকো পেসলে ভিক্খূ ‘‘এৰং আহারপরিভোগতো ৰরং তুম্হাকং গূথখাদন’’ন্তি অক্কোসি. কুলূপকো পন কুটুম্বিকম্পি তথাৰচনে সমাদপেত্ৰা সযং তথা অক্কোসি, তেনস্স ততোপি পটিকুট্ঠতরা জীৰিকা অহোসি. আযস্মা মহামোগ্গল্লানো তং পৰত্তিং ভগৰতো আরোচেসি. ভগৰা তমত্থং অট্ঠুপ্পত্তিং কত্ৰা উপৰাদে আদীনৰং দস্সেত্ৰা সম্পত্তপরিসায ধম্মং দেসেসি. সা দেসনা মহাজনস্স সাত্থিকা অহোসীতি.

গূথখাদকপেতৰত্থুৰণ্ণনা নিট্ঠিতা.