৬. কুমারপেতৰত্থুৰণ্ণনা

সাৰত্থি নাম নগরন্তি ইদং সত্থা জেতৰনে ৰিহরন্তো দ্ৰে পেতে আরব্ভ কথেসি. সাৰত্থিযং কির কোসলরঞ্ঞো দ্ৰে পুত্তা পাসাদিকা পঠমৰযে ঠিতা যোব্বনমদমত্তা পরদারকম্মং কত্ৰা কালং কত্ৰা পরিখাপিট্ঠে পেতা হুত্ৰা নিব্বত্তিংসু. তে রত্তিযং ভেরৰেন সদ্দেন পরিদেৰিংসু. মনুস্সা তং সুত্ৰা ভীততসিতা ‘‘এৰং কতে ইদং অৰমঙ্গলং ৰূপসম্মতী’’তি বুদ্ধপ্পমুখস্স ভিক্খুসঙ্ঘস্স মহাদানং দত্ৰা তং পৰত্তিং ভগৰতো আরোচেসুং. ভগৰা ‘‘উপাসকা তস্স সদ্দস্স সৰনেন তুম্হাকং ন কোচি অন্তরাযো’’তি ৰত্ৰা তস্স কারণং আচিক্খিত্ৰা তেসং ধম্মং দেসেতুং –

৭৪৬. ‘‘সাৰত্থি নাম নগরং, হিমৰন্তস্স পস্সতো;

তত্থ আসুং দ্ৰে কুমারা, রাজপুত্তাতি মে সুতং.

৭৪৭. ‘‘সম্মত্তা রজনীযেসু, কামস্সাদাভিনন্দিনো;

পচ্চুপ্পন্নসুখে গিদ্ধা, ন তে পস্সিংসুনাগতং.

৭৪৮. ‘‘তে চুতা চ মনুস্সত্তা, পরলোকং ইতো গতা;

তেধ ঘোসেন্ত্যদিস্সন্তা, পুব্বে দুক্কটমত্তনো.

৭৪৯. ‘‘বহূসু ৰত সন্তেসু, দেয্যধম্মে উপট্ঠিতে;

নাসক্খিম্হা চ অত্তানং, পরিত্তং কাতুং সুখাৰহং.

৭৫০. ‘‘কিং ততো পাপকং অস্স, যং নো রাজকুলা চুতা;

উপপন্না পেত্তিৰিসযং, খুপ্পিপাসসমপ্পিতা.

৭৫১. ‘‘সামিনো ইধ হুত্ৰান, হোন্তি অসামিনো তহিং;

ভমন্তি খুপ্পিপাসায, মনুস্সা উন্নতোনতা.

৭৫২. ‘‘এতমাদীনৰং ঞত্ৰা, ইস্সরমদসম্ভৰং;

পহায ইস্সরমদং, ভৰে সগ্গগতো নরো;

কাযস্স ভেদা সপ্পঞ্ঞো, সগ্গং সো উপপজ্জতী’’তি – গাথা অভাসি;

৭৪৬. তত্থ ইতি মে সুতন্তি ন কেৰলং অত্তনো ঞাণেন দিট্ঠমেৰ, অথ খো লোকে পাকটভাৰেন এৰং মযা সুতন্তি অত্থো.

৭৪৭. কামস্সাদাভিনন্দিনোতি কামগুণেসু অস্সাদৰসেন অভিনন্দনসীলা. পচ্চুপ্পন্নসুখে গিদ্ধাতি ৰত্তমানসুখমত্তে গিদ্ধা গথিতা হুত্ৰা. ন তে পস্সিংসুনাগতন্তি দুচ্চরিতং পহায সুচরিতং চরিত্ৰা অনাগতং আযতিং দেৰমনুস্সেসু লদ্ধব্বং সুখং তে ন চিন্তেসুং.

৭৪৮. তেধ ঘোসেন্ত্যদিস্সন্তাতি তে পুব্বে রাজপুত্তভূতা পেতা ইধ সাৰত্থিযা সমীপে অদিস্সমানরূপা ঘোসেন্তি কন্দন্তি. কিং কন্দন্তীতি আহ ‘‘পুব্বে দুক্কটমত্তনো’’তি.

৭৪৯. ইদানি তেসং কন্দনস্স কারণং হেতুতো চ ফলতো চ ৰিভজিত্ৰা দস্সেতুং ‘‘বহূসু ৰত সন্তেসূ’’তিআদি ৰুত্তং.

তত্থ বহূসু ৰত সন্তেসূতি অনেকেসু দক্খিণেয্যেসু ৰিজ্জমানেসু. দেয্যধম্মে উপট্ঠিতেতি অত্তনো সন্তকে দাতব্বদেয্যধম্মেপি সমীপে ঠিতে, লব্ভমানেতি অত্থো. পরিত্তং সুখাৰহন্তি অপ্পমত্তকম্পি আযতিং সুখাৰহং পুঞ্ঞং কত্ৰা অত্তানং সোত্থিং নিরুপদ্দৰং কাতুং নাসক্খিম্হা ৰতাতি যোজনা.

৭৫০. কিং ততো পাপকং অস্সাতি ততো পাপকং লামকং নাম কিং অঞ্ঞং অস্স সিযা. যং নো রাজকুলা চুতাতি যেন পাপকম্মেন মযং রাজকুলতো চুতা ইধ পেত্তিৰিসযং উপপন্না পেতেসু নিব্বত্তা খুপ্পিপাসসমপ্পিতা ৰিচরামাতি অত্থো.

৭৫১. সামিনো ইধ হুত্ৰানাতি ইধ ইমস্মিং লোকে যস্মিংযেৰ ঠানে পুব্বে সামিনো হুত্ৰা ৰিচরন্তি, তহিং তস্মিংযেৰ ঠানে হোন্তি অস্সামিনো. মনুস্সা উন্নতোনতাতি মনুস্সকালে সামিনো হুত্ৰা কালকতা কম্মৰসেন ওনতা ভমন্তি খুপ্পিপাসায, পস্স সংসারপকতিন্তি দস্সেতি.

৭৫২. এতমাদীনৰং ঞত্ৰা, ইস্সরমদসম্ভৰন্তি এতং ইস্সরিযমদৰসেন সম্ভূতং অপাযূপপত্তিসঙ্খাতং আদীনৰং দোসং ঞত্ৰা পহায ইস্সরিযমদং পুঞ্ঞপ্পসুতো হুত্ৰা. ভৰে সগ্গগতো নরোতি সগ্গং দেৰলোকং গতোযেৰ ভৰেয্য.

ইতি সত্থা তেসং পেতানং পৰত্তিং কথেত্ৰা তেহি মনুস্সেহি কতং দানং তেসং পেতানং উদ্দিসাপেত্ৰা সম্পত্তপরিসায অজ্ঝাসযানুরূপং ধম্মং দেসেসি. সা দেসনা মহাজনস্স সাত্থিকা অহোসীতি.

কুমারপেতৰত্থুৰণ্ণনা নিট্ঠিতা.