১৬. সট্ঠিকূটপেতৰত্থুৰণ্ণনা

কিং নু উম্মত্তরূপোৰাতি ইদং সত্থরি ৰেল়ুৰনে ৰিহরন্তে অঞ্ঞতরং পেতং আরব্ভ ৰুত্তং. অতীতে কির বারাণসিনগরে অঞ্ঞতরো পীঠসপ্পী সালিত্তকপযোগে কুসলো, তহিং সক্খরখিপনসিপ্পে নিপ্ফত্তিং গতো নগরদ্ৰারে নিগ্রোধরুক্খমূলে নিসীদিত্ৰা সক্খরপহারেহি হত্থিঅস্সমনুস্সরথকূটাগারধজপুণ্ণঘটাদিরূপানি নিগ্রোধপত্তেসু দস্সেতি. নগরদারকা অত্তনো কীল়নত্থায মাযকড্ঢমাসকাদীনি দত্ৰা যথারুচি তানি সিপ্পানি কারাপেন্তি.

অথেকদিৰসং বারাণসিরাজা নগরতো নিক্খমিত্ৰা তং নিগ্রোধমূলং উপগতো নিগ্রোধপত্তেসু হত্থিরূপাদিৰসেন নানাৰিধরূপৰিভত্তিযো অপ্পিতা দিস্ৰা মনুস্সে পুচ্ছি – ‘‘কেন নু খো ইমেসু নিগ্রোধপত্তেসু এৰং নানাৰিধরূপৰিভত্তিযো কতা’’তি? মনুস্সা তং পীঠসপ্পিং দস্সেসুং ‘‘দেৰ, ইমিনা কতা’’তি. রাজা তং পক্কোসাপেত্ৰা এৰমাহ – ‘‘সক্কা নু খো, ভণে, মযা দস্সিতস্স একস্স পুরিসস্স কথেন্তস্স অজানন্তস্সেৰ কুচ্ছিযং অজলণ্ডিকাহি পূরেতু’’ন্তি? ‘‘সক্কা, দেৰা’’তি. রাজা তং অত্তনো রাজভৰনং নেত্ৰা বহুভাণিকে পুরোহিতে নিব্বিন্নরূপো পুরোহিতং পক্কোসাপেত্ৰা তেন সহ ৰিৰিত্তে ওকাসে সাণিপাকারপরিক্খিত্তে নিসীদিত্ৰা মন্তযমানো পীঠসপ্পিং পক্কোসাপেসি. পীঠসপ্পী নাল়িমত্তা অজলণ্ডিকা আদাযাগন্ত্ৰা রঞ্ঞো আকারং ঞত্ৰা পুরোহিতাভিমুখো নিসিন্নো তেন মুখে ৰিৰটে সাণিপাকারৰিৰরেন একেকং অজলণ্ডিকং তস্স গলমূলে পতিট্ঠাপেসি. সো লজ্জায উগ্গিলিতুং অসক্কোন্তো সব্বা অজ্ঝোহরি. অথ নং রাজা অজলণ্ডিকাহি পূরিতোদরং ৰিস্সজ্জি – ‘‘গচ্ছ, ব্রাহ্মণ, লদ্ধং তযা বহুভাণিতায ফলং, মদ্দনফলপিযঙ্গুতচাদীহি অভিসঙ্খতং পানকং পিৰিত্ৰা উচ্ছড্ডেহি, এৰং তে সোত্থি ভৰিস্সতী’’তি. তস্স চ পীঠসপ্পিস্স তেন কম্মেন অত্তমনো হুত্ৰা চুদ্দস গামে অদাসি. সো গামে লভিত্ৰা অত্তানং সুখেন্তো পীণেন্তো পরিজনম্পি সুখেন্তো পীণেন্তো সমণব্রাহ্মণাদীনং যথারহং কিঞ্চি দেন্তো দিট্ঠধম্মিকং সম্পরাযিকঞ্চ অত্থং অহাপেন্তো সুখেনেৰ জীৰতি, অত্তনো সন্তিকং উপগতানং সিপ্পং সিক্খন্তানং ভত্তৰেতনং দেতি.

অথেকো পুরিসো তস্স সন্তিকং উপগন্ত্ৰা এৰমাহ – ‘‘সাধু, আচরিয, মম্পি এতং সিপ্পং সিক্খাপেহি, ময্হং পন অলং ভত্তৰেতনেনা’’তি. সো তং পুরিসং তং সিপ্পং সিক্খাপেসি. সো সিক্খিতসিপ্পো সিপ্পং ৰীমংসিতুকামো গন্ত্ৰা গঙ্গাতীরে নিসিন্নস্স সুনেত্তস্স নাম পচ্চেকবুদ্ধস্স সক্খরাভিঘাতেন সীসং ভিন্দি. পচ্চেকবুদ্ধো তত্থেৰ গঙ্গাতীরে পরিনিব্বাযি. মনুস্সা তং পৰত্তিং সুত্ৰা তং পুরিসং তত্থেৰ লেড্ডুদণ্ডাদীহি পহরিত্ৰা জীৰিতা ৰোরোপেসুং. সো কালকতো অৰীচিমহানিরযে নিব্বত্তিত্ৰা বহূনি ৰস্সসহস্সানি নিরযে পচ্চিত্ৰা তস্সেৰ কম্মস্স ৰিপাকাৰসেসেন ইমস্মিং বুদ্ধুপ্পাদে রাজগহনগরস্স অৰিদূরে পেতো হুত্ৰা নিব্বত্তি. তস্স কম্মস্স সরিক্খকেন ৰিপাকেন ভৰিতব্বন্তি কম্মৰেগুক্খিত্তানি পুব্বণ্হসমযং মজ্ঝন্হিকসমযং সাযন্হসমযঞ্চ সট্ঠি অযোকূটসহস্সানি মত্থকে নিপতন্তি. সো ছিন্নভিন্নসীসো অধিমত্তৰেদনাপ্পত্তো ভূমিযং নিপততি, অযোকূটেসু পন অপগতমত্তেসু পটিপাকতিকসিরো তিট্ঠতি.

অথেকদিৰসং আযস্মা মহামোগ্গল্লানো গিজ্ঝকূটপব্বতা ওতরন্তো তং দিস্ৰা –

৮০৬. ‘‘কিং নু উম্মত্তরূপোৰ, মিগো ভন্তোৰ ধাৰসি;

নিস্সংসযং পাপকম্মন্তো, কিং নু সদ্দাযসে তুৰ’’ন্তি. –

ইমায গাথায পটিপুচ্ছি. তত্থ উম্মত্তরূপোৰাতি উম্মত্তকসভাৰো ৰিয উম্মাদপ্পত্তো ৰিয. মিগো ভন্তোৰ ধাৰসীতি ভন্তমিগো ৰিয ইতো চিতো চ ধাৰসি. সো হি তেসু অযোকূটেসু নিপতন্তেসু পরিত্তাণং অপস্সন্তো ‘‘ন সিযা নু খো এৰং পহারো’’তি ইতোপি এত্তোপি পলাযতি. তে পন কম্মৰেগুক্খিত্তা যত্থ কত্থচি ঠিতস্স মত্থকেযেৰ নিপতন্তি. কিং নু সদ্দাযসে তুৰন্তি কিং নু খো তুৰং সদ্দং করোসি, অতিৰিয ৰিস্সরং করোন্তো ৰিচরসি.

তং সুত্ৰা পেতো –

৮০৭. ‘‘অহং ভদন্তে পেতোম্হি, দুগ্গতো যমলোকিকো;

পাপকম্মং করিত্ৰান, পেতলোকং ইতো গতো.

৮০৮. ‘‘সট্ঠি কূটসহস্সানি, পরিপুণ্ণানি সব্বসো;

সীসে ময্হং নিপতন্তি, তে ভিন্দন্তি চ মত্থক’’ন্তি. –

দ্ৰীহি গাথাহি পটিৰচনং অদাসি. তত্থ সট্ঠি কূটসহস্সানীতি সট্ঠিমত্তানি অযোকূটসহস্সানি. পরিপুণ্ণানীতি অনূনানি. সব্বসোতি সব্বভাগতো. তস্স কির সট্ঠিযা অযোকূটসহস্সানং পতনপ্পহোনকং মহন্তং পব্বতকূটপ্পমাণং সীসং নিব্বত্তি. তং তস্স ৰালগ্গকোটিনিতুদনমত্তম্পি ঠানং অসেসেত্ৰা তানি কূটানি পতন্তানি মত্থকং ভিন্দন্তি, তেন সো অট্টস্সরং করোতি. তেন ৰুত্তং ‘‘সব্বসো সীসে ময্হং নিপতন্তি, তে ভিন্দন্তি চ মত্থক’’ন্তি.

অথ নং থেরো কতকম্মং পুচ্ছন্তো –

৮০৯. ‘‘কিং নু কাযেন ৰাচায, মনসা দুক্কটং কতং;

কিস্স কম্মৰিপাকেন, ইদং দুক্খং নিগচ্ছসি.

৮১০. ‘‘সট্ঠি কূটসহস্সানি, পরিপুণ্ণানি সব্বসো;

সীসে তুয্হং নিপতন্তি, তে ভিন্দন্তি চ মত্থক’’ন্তি. –

দ্ৰে গাথা অভাসি.

তস্স পেতো অত্তনা কতকম্মং আচিক্খন্তো –

৮১১. ‘‘অথদ্দসাসিং সম্বুদ্ধং, সুনেত্তং ভাৰিতিন্দ্রিযং;

নিসিন্নং রুক্খমূলস্মিং, ঝাযন্তং অকুতোভযং.

৮১২. ‘‘সালিত্তকপ্পহারেন, ভিন্দিস্সং তস্স মত্থকং;

তস্সকম্মৰিপাকেন, ইদং দুক্খং নিগচ্ছিসং.

৮১৩. ‘‘সট্ঠি কূটসহস্সানি, পরিপুণ্ণানি সব্বসো;

সীসে ময্হং নিপতন্তি, তে ভিন্দন্তি চ মত্থক’’ন্তি. –

তিস্সো গাথাযো অভাসি.

৮১১. তত্থ সম্বুদ্ধন্তি পচ্চেকসম্বুদ্ধং. সুনেত্তন্তি এৰংনামকং. ভাৰিতিন্দ্রিযন্তি অরিযমগ্গভাৰনায ভাৰিতসদ্ধাদিইন্দ্রিযং.

৮১২-১৩. সালিত্তকপ্পহারেনাতি সালিত্তকং ৰুচ্চতি ধনুকেন, অঙ্গুলীহি এৰ ৰা সক্খরখিপনপযোগো. তথা হি সক্খরায পহারেনাতি ৰা পাঠো. ভিন্দিস্সন্তি ভিন্দিং.

তং সুত্ৰা থেরো ‘‘অত্তনো কতকম্মানুরূপমেৰ ইদানি পুরাণকম্মস্স ইদং ফলং পটিলভতী’’তি দস্সেন্তো –

৮১৪. ‘‘ধম্মেন তে কাপুরিস;

সট্ঠি কূটসহস্সানি, পরিপুণ্ণানি সব্বসো;

সীসে তুয্হং নিপতন্তি, তে ভিন্দন্তি চ মত্থক’’ন্তি. –

ওসানগাথমাহ. তত্থ ধম্মেনাতি অনুরূপকারণেন. তেতি তৰ, তস্মিং পচ্চেকবুদ্ধে অপরজ্ঝন্তেন তযা কতস্স পাপকম্মস্স অনুচ্ছৰিকমেৰেতং ফলং তুয্হং উপনীতং. তস্মা কেনচি দেৰেন ৰা মারেন ৰা ব্রহ্মুনা ৰা অপি সম্মাসম্বুদ্ধেনপি অপ্পটিবাহনীযমেতন্তি দস্সেতি.

এৰঞ্চ পন ৰত্ৰা ততো নগরে পিণ্ডায চরিত্ৰা কতভত্তকিচ্চো সাযন্হসমযে সত্থারং উপসঙ্কমিত্ৰা তং পৰত্তিং ভগৰতো আরোচেসি. ভগৰা তমত্থং অট্ঠুপ্পত্তিং কত্ৰা সম্পত্তপরিসায ধম্মং দেসেন্তো পচ্চেকবুদ্ধানং গুণানুভাৰং কম্মানঞ্চ অৰঞ্ঝতং পকাসেসি, মহাজনো সংৰেগজাতো হুত্ৰা পাপং পহায দানাদিপুঞ্ঞনিরতো অহোসীতি.

সট্ঠিকূটপেতৰত্থুৰণ্ণনা নিট্ঠিতা.

ইতি খুদ্দক-অট্ঠকথায পেতৰত্থুস্মিং

সোল়সৰত্থুপটিমণ্ডিতস্স

চতুত্থস্স মহাৰগ্গস্স অত্থসংৰণ্ণনা নিট্ঠিতা.

নিগমনকথা

এত্তাৰতা চ –

যে তে পেতেসু নিব্বত্তা, সত্তা দুক্কটকারিনো;

যেহি কম্মেহি তেসং তং, পাপকং কটুকপ্ফলং.

পচ্চক্খতো ৰিভাৰেন্তী, পুচ্ছাৰিস্সজ্জনেহি চ;

যা দেসনানিযামেন, সতং সংৰেগৰড্ঢনী.

যং কথাৰত্থুকুসলা, সুপরিঞ্ঞাতৰত্থুকা;

পেতৰত্থূতি নামেন, সঙ্গাযিংসু মহেসযো.

তস্স অত্থং পকাসেতুং, পোরাণট্ঠকথানযং;

নিস্সায যা সমারদ্ধা, অত্থসংৰণ্ণনা মযা.

যা তত্থ পরমত্থানং, তত্থ তত্থ যথারহং;

পকাসনা পরমত্থ-দীপনী নাম নামতো.

সম্পত্তা পরিনিট্ঠানং, অনাকুলৰিনিচ্ছযা;

সা পন্নরসমত্তায, পাল়িযা ভাণৰারতো.

ইতি তং সঙ্খরোন্তেন, যং তং অধিগতং মযা;

পুঞ্ঞং তস্সানুভাৰেন, লোকনাথস্স সাসনং.

ওগাহেত্ৰা ৰিসুদ্ধায, সীলাদিপটিপত্তিযা;

সব্বেপি দেহিনো হোন্তু, ৰিমুত্তিরসভাগিনো.

চিরং তিট্ঠতু লোকস্মিং, সম্মাসম্বুদ্ধসাসনং;

তস্মিং সগারৰা নিচ্চং, হোন্তু সব্বেপি পাণিনো.

সম্মা ৰস্সতু কালেন, দেৰোপি জগতীপতি;

সদ্ধম্মনিরতো লোকং, ধম্মেনেৰ পসাসতূতি.

ইতি বদরতিত্থৰিহারৰাসিনা মুনিৰরযতিনা

ভদন্তেন আচরিযধম্মপালেন কতা পেতৰত্থুঅত্থসংৰণ্ণনা নিট্ঠিতা.

পেতৰত্থু-অট্ঠকথা সমত্তা.