১৫. সেট্ঠিপুত্তপেতৰত্থুৰণ্ণনা

সট্ঠিৰস্সসহস্সানীতি ইদং সেট্ঠিপুত্তপেতৰত্থু. তস্স কা উপ্পত্তি? ভগৰা সাৰত্থিযং ৰিহরতি জেতৰনে. তেন খো পন সমযেন রাজা পসেনদি কোসলো অলঙ্কতপ্পটিযত্তো হত্থিক্খন্ধৰরগতো মহতিযা রাজিদ্ধিযা মহন্তেন রাজানুভাৰেন নগরং অনুসঞ্চরন্তো অঞ্ঞতরস্মিং গেহে উপরিপাসাদে ৰাতপানং ৰিৰরিত্ৰা তং রাজৰিভূতিং ওলোকেন্তিং রূপসম্পত্তিযা দেৰচ্ছরাপটিভাগং একং ইত্থিং দিস্ৰা অদিট্ঠপুব্বে আরম্মণে সহসা সমুপ্পন্নেন কিলেসসমুদাচারেন পরিযুট্ঠিতচিত্তো সতিপি কুলরূপাচারাদিগুণৰিসেসসম্পন্নে অন্তেপুরজনে সভাৰলহুকস্স পন দুদ্দমস্স চিত্তস্স ৰসেন তস্সং ইত্থিযং পটিবদ্ধমানসো হুত্ৰা পচ্ছাসনে নিসিন্নস্স পুরিসস্স ‘‘ইমং পাসাদং ইমঞ্চ ইত্থিং উপধারেহী’’তি সঞ্ঞং দত্ৰা রাজগেহং পৰিট্ঠো. অঞ্ঞং সব্বং অম্বসক্করপেতৰত্থুম্হি আগতনযেনেৰ ৰেদিতব্বং.

অযং পন ৰিসেসো – ইধ পুরিসো সূরিযে অনত্থঙ্গতেযেৰ আগন্ত্ৰা নগরদ্ৰারে থকিতে অত্তনা আনীতং অরুণৰণ্ণমত্তিকং উপ্পলানি চ নগরদ্ৰারকৰাটে লগ্গেত্ৰা নিপজ্জিতুং জেতৰনং অগমাসি. রাজা পন সিরিসযনে ৰাসূপগতো মজ্ঝিমযামে স-ইতি ন-ইতি দু-ইতি সো-ইতি চ ইমানি চত্তারি অক্খরানি মহতা কণ্ঠেন উচ্চারিতানি ৰিয ৰিস্সরৰসেন অস্সোসি. তানি কির অতীতে কালে সাৰত্থিৰাসীহি চতূহি সেট্ঠিপুত্তেহি ভোগমদমত্তেহি যোব্বনকালে পারদারিককম্মৰসেন বহুং অপুঞ্ঞং পসৰেত্ৰা অপরভাগে কালং কত্ৰা তস্সেৰ নগরস্স সমীপে লোহকুম্ভিযং নিব্বত্তিত্ৰা পচ্চমানেহি লোহকুম্ভিযা মুখৰট্টিং পত্ৰা একেকং গাথং ৰত্থুকামেহি উচ্চারিতানং তাসং গাথানং আদিঅক্খরানি, তে পঠমক্খরমেৰ ৰত্ৰা ৰেদনাপ্পত্তা হুত্ৰা লোহকুম্ভিং ওতরিংসু.

রাজা পন তং সদ্দং সুত্ৰা ভীততসিতো সংৰিগ্গো লোমহট্ঠজাতো তং রত্তাৰসেসং দুক্খেন ৰীতিনামেত্ৰা ৰিভাতায রত্তিযা পুরোহিতং পক্কোসাপেত্ৰা তং পৰত্তিং কথেসি. পুরোহিতো রাজানং ভীততসিতং ঞত্ৰা লাভগিদ্ধো ‘‘উপ্পন্নো খো অযং ময্হং ব্রাহ্মণানঞ্চ লাভুপ্পাদনুপাযো’’তি চিন্তেত্ৰা ‘‘মহারাজ, মহা ৰতাযং উপদ্দৰো উপ্পন্নো, সব্বচতুক্কং যঞ্ঞং যজাহী’’তি আহ. রাজা তস্স ৰচনং সুত্ৰা অমচ্চে আণাপেসি ‘‘সব্বচতুক্কযঞ্ঞস্স উপকরণানি সজ্জেথা’’তি. তং সুত্ৰা মল্লিকা দেৰী রাজানং এৰমাহ – ‘‘কস্মা, মহারাজ, ব্রাহ্মণস্স ৰচনং সুত্ৰা অনেকপাণৰধহিংসনককিচ্চং কাতুকামোসি, ননু সব্বত্থ অপ্পটিহতঞাণচারো ভগৰা পুচ্ছিতব্বো? যথা চ তে ভগৰা ব্যাকরিস্সতি, তথা পটিপজ্জিতব্ব’’ন্তি. রাজা তস্সা ৰচনং সুত্ৰা সত্থু সন্তিকং গন্ত্ৰা তং পৰত্তিং ভগৰতো আরোচেসি. ভগৰা ‘‘ন, মহারাজ, ততোনিদানং তুয্হং কোচি অন্তরাযো’’তি ৰত্ৰা আদিতো পট্ঠায তেসং লোহকুম্ভিনিরযে নিব্বত্তসত্তানং পৰত্তিং কথেত্ৰা তেহি পচ্চেকং উচ্চারেতুং আরদ্ধগাথাযো –

৮০২. ‘‘সট্ঠিৰস্সসহস্সানি, পরিপুণ্ণানি সব্বসো;

নিরযে পচ্চমানানং, কদা অন্তো ভৰিস্সতি.

৮০৩. ‘‘নত্থি অন্তো কুতো অন্তো, ন অন্তো পটিদিস্সতি;

তথা হি পকতং পাপং, তুয্হং ময্হঞ্চ মারিসা.

৮০৪. ‘‘দুজ্জীৰিতমজীৰিম্হ, যে সন্তে ন দদম্হসে;

সন্তেসু দেয্যধম্মেসু, দীপং নাকম্হ অত্তনো.

৮০৫. ‘‘সোহং নূন ইতো গন্ত্ৰা, যোনিং লদ্ধান মানুসিং;

ৰদঞ্ঞূ সীলসম্পন্নো, কাহামি কুসলং বহু’’ন্তি. –

পরিপুণ্ণং কত্ৰা কথেসি.

৮০২. তত্থ সট্ঠিৰস্সসহস্সানীতি ৰস্সানং সট্ঠিসহস্সানি. তস্মিং কির লোহকুম্ভিনিরযে নিব্বত্তসত্তো অধো ওগচ্ছন্তো তিংসায ৰস্সসহস্সেহি হেট্ঠিমতলং পাপুণাতি, ততো উদ্ধং উগ্গচ্ছন্তোপি তিংসায এৰ ৰস্সসহস্সেহি মুখৰট্টিপদেসং পাপুণাতি, তায সঞ্ঞায সো ‘‘সট্ঠিৰস্সসহস্সানি, পরিপুণ্ণানি সব্বসো’’তি গাথং ৰত্তুকামো স-ইতি ৰত্ৰা অধিমত্তৰেদনাপ্পত্তো হুত্ৰা অধোমুখো পতি. ভগৰা পন তং রঞ্ঞো পরিপুণ্ণং কত্ৰা কথেসি. এস নযো সেসগাথাসুপি. তত্থ কদা অন্তো ভৰিস্সতীতি লোহকুম্ভিনিরযে পচ্চমানানং অম্হাকং কদা নু খো ইমস্স দুক্খস্স অন্তো পরিযোসানং ভৰিস্সতি.

৮০৩. তথা হীতি যথা তুয্হং ময্হঞ্চ ইমস্স দুক্খস্স নত্থি অন্তো, ন অন্তো পটিদিস্সতি, তথা তেন পকারেন পাপকং কম্মং পকতং তযা মযা চাতি ৰিভত্তিং ৰিপরিণামেত্ৰা ৰত্তব্বং.

৮০৪. দুজ্জীৰিতন্তি ৰিঞ্ঞূহি গরহিতব্বং জীৰিতং. যে সন্তেতি যে মযং সন্তে ৰিজ্জমানে দেয্যধম্মে. ন দদম্হসেতি ন অদম্হ. ৰুত্তমেৰত্থং পাকটতরং কাতুং ‘‘সন্তেসু দেয্যধম্মেসু, দীপং নাকম্হ অত্তনো’’তি ৰুত্তং.

৮০৫. সোহন্তি সো অহং. নূনাতি পরিৰিতক্কে নিপাতো. ইতোতি ইমস্মা লোহকুম্ভিনিরযা. গন্ত্ৰাতি অপগন্ত্ৰা. যোনিং লদ্ধান মানুসিন্তি মনুস্সযোনিং মনুস্সত্তভাৰং লভিত্ৰা. ৰদঞ্ঞূতি পরিচ্চাগসীলো, যাচকানং ৰা ৰচনঞ্ঞূ. সীলসম্পন্নোতি সীলাচারসম্পন্নো. কাহামি কুসলং বহুন্তি পুব্বে ৰিয পমাদং অনাপজ্জিত্ৰা বহুং পহূতং কুসলং পুঞ্ঞকম্মং করিস্সামি, উপচিনিস্সামীতি অত্থো.

সত্থা ইমা গাথাযো ৰত্ৰা ৰিত্থারেন ধম্মং দেসেসি, দেসনাপরিযোসানে মত্তিকারত্তুপ্পলহারকো পুরিসো সোতাপত্তিফলে পতিট্ঠহি. রাজা সঞ্জাতসংৰেগো পরপরিগ্গহে অভিজ্ঝং পহায সদারসন্তুট্ঠো অহোসীতি.

সেট্ঠিপুত্তপেতৰত্থুৰণ্ণনা নিট্ঠিতা.