১২. অম্বৰনপেতৰত্থুৰণ্ণনা

অযঞ্চ তে পোক্খরণী সুরম্মাতি ইদং সত্থরি সাৰত্থিযং ৰিহরন্তে অম্বপেতং আরব্ভ ৰুত্তং. সাৰত্থিযং কির অঞ্ঞতরো গহপতি পরিক্খীণভোগো অহোসি. তস্স ভরিযা কালমকাসি, একা ধীতাযেৰ হোতি. সো তং অত্তনো মিত্তস্স গেহে ঠপেত্ৰা ইণৰসেন গহিতেন কহাপণসতেন ভণ্ডং গহেত্ৰা সত্থেন সদ্ধিং ৰণিজ্জায গতো, ন চিরেনেৰ মূলেন সহ উদযভূতানি পঞ্চ কহাপণসতানি লভিত্ৰা সত্থেন সহ পটিনিৰত্তি. অন্তরামগ্গে চোরা পরিযুট্ঠায সত্থং পাপুণিংসু, সত্থিকা ইতো চিতো চ পলাযিংসু. সো পন গহপতি অঞ্ঞতরস্মিং গচ্ছে কহাপণে নিক্খিপিত্ৰা অৰিদূরে নিলীযি. চোরা তং গহেত্ৰা জীৰিতা ৰোরোপেসুং. সো ধনলোভেন তত্থেৰ পেতো হুত্ৰা নিব্বত্তি.

ৰাণিজা সাৰত্থিং গন্ত্ৰা তস্স ধীতুযা তং পৰত্তিং আরোচেসুং. সা পিতু মরণেন আজীৰিকাভযেন চ অতিৰিয সঞ্জাতদোমনস্সা বাল়্হং পরিদেৰি. অথ নং সো পিতু সহাযো কুটুম্বিকো ‘‘যথা নাম কুলালভাজনং সব্বং ভেদনপরিযন্তং, এৰমেৰ সত্তানং জীৰিতং ভেদনপরিযন্তং. মরণং নাম সব্বসাধারণং অপ্পটিকারঞ্চ, তস্মা মা ত্ৰং পিতরি অতিবাল়্হং সোচি, মা পরিদেৰি, অহং তে পিতা, ত্ৰং ময্হং ধীতা, অহং তৰ পিতু কিচ্চং করোমি, ত্ৰং পিতুনো গেহে ৰিয ইমস্মিং গেহে অৰিমনা অভিরমস্সূ’’তি ৰত্ৰা সমস্সাসেসি. সা তস্স ৰচনেন পটিপ্পস্সদ্ধসোকা পিতরি ৰিয তস্মিং সঞ্জাতগারৰবহুমানা অত্তনো কপণভাৰেন তস্স ৰেয্যাৰচ্চকারিনী হুত্ৰা ৰত্তমানা পিতরং উদ্দিস্স মতকিচ্চং কাতুকামা যাগুং পচিত্ৰা মনোসিলাৰণ্ণানি সুপরিপক্কানি মধুরানি অম্বফলানি কংসপাতিযং ঠপেত্ৰা যাগুং অম্বফলানি চ দাসিযা গাহাপেত্ৰা ৰিহারং গন্ত্ৰা সত্থারং ৰন্দিত্ৰা এৰমাহ – ‘‘ভগৰা ময্হং দক্খিণায পটিগ্গহণেন অনুগ্গহং করোথা’’তি. সত্থা মহাকরুণায সঞ্চোদিতমানসো তস্সা মনোরথং পূরেন্তো নিসজ্জাকারং দস্সেসি. সা হট্ঠতুট্ঠা পঞ্ঞত্তৰরবুদ্ধাসনে অত্তনা উপনীতং সুৰিসুদ্ধৰত্থং অত্থরিত্ৰা অদাসি, নিসীদি ভগৰা পঞ্ঞত্তে আসনে.

অথ সা ভগৰতো যাগুং উপনামেসি, পটিগ্গহেসি ভগৰা যাগুং. অথ সঙ্ঘং উদ্দিস্স ভিক্খূনম্পি যাগুং দত্ৰা পুন ধোতহত্থা অম্বফলানি ভগৰতো উপনামেসি, ভগৰা তানি পরিভুঞ্জি. সা ভগৰন্তং ৰন্দিত্ৰা এৰমাহ – ‘‘যা মে, ভন্তে, পচ্চত্থরণযাগুঅম্বফলদানৰসেন পৰত্তা দক্খিণা, সা মে পিতরং পাপুণাতূ’’তি. ভগৰা ‘‘এৰং হোতূ’’তি ৰত্ৰা অনুমোদনং অকাসি. সা ভগৰন্তং ৰন্দিত্ৰা পদক্খিণং কত্ৰা পক্কামি. তায দক্খিণায সমুদ্দিট্ঠমত্তায সো পেতো অম্বৰনউয্যানৰিমানকপ্পরুক্খপোক্খরণিযো মহতিঞ্চ দিব্বসম্পত্তিং পটিলভি.

অথ তে ৰাণিজা অপরেন সমযেন ৰণিজ্জায গচ্ছন্তা তমেৰ মগ্গং পটিপন্না পুব্বে ৰসিতট্ঠানে একরত্তিং ৰাসং কপ্পেসুং. তে দিস্ৰা সো ৰিমানপেতো উয্যানৰিমানাদীহি সদ্ধিং তেসং অত্তানং দস্সেসি. তে ৰাণিজা তং দিস্ৰা তেন লদ্ধসম্পত্তিং পুচ্ছন্তা –

৭৯৬. ‘‘অযঞ্চ তে পোক্খরণী সুরম্মা, সমা সুতিত্থা চ মহোদকা চ;

সুপুপ্ফিতা ভমরগণানুকিণ্ণা, কথং তযা লদ্ধা অযং মনুঞ্ঞা.

৭৯৭. ‘‘ইদঞ্চ তে অম্বৰনং সুরম্মং, সব্বোতুকং ধারযতে ফলানি;

সুপুপ্ফিতং ভমরগণানুকিণ্ণং, কথং তযা লদ্ধমিদং ৰিমান’’ন্তি. –

ইমা দ্ৰে গাথা অৰোচুং.

৭৯৬. তত্থ সুরম্মাতি সুট্ঠু রমণীযা. সমাতি সমতলা. সুতিত্থাতি রতনমযসোপানতায সুন্দরতিত্থা. মহোদকাতি বহুজলা.

৭৯৭. সব্বোতুকন্তি পুপ্ফূপগফলূপগরুক্খাদীহি সব্বেসু উতূসু সুখাৰহং. তেনাহ ‘‘ধারযতে ফলানী’’তি. সুপুপ্ফিতন্তি নিচ্চং সুপুপ্ফিতং.

তং সুত্ৰা পেতো পোক্খরণিআদীনং পটিলাভকারণং আচিক্খন্তো –

৭৯৮. ‘‘অম্বপক্কং দকং যাগু, সীতচ্ছাযা মনোরমা;

ধীতায দিন্নদানেন, তেন মে ইধ লব্ভতী’’তি. –

গাথমাহ. তত্থ তেন মে ইধ লব্ভতীতি যং তং ভগৰতো ভিক্খূনঞ্চ অম্বপক্কং উদকং যাগুঞ্চ মমং উদ্দিস্স দেন্তিযা ময্হং ধীতায দিন্নং দানং, তেন মে ধীতায দিন্নদানেন ইধ ইমস্মিং দিব্বে অম্বৰনে সব্বোতুকং অম্বপক্কং, ইমিস্সা দিব্বায মনুঞ্ঞায পোক্খরণিযা দিব্বং উদকং, যাগুযা অত্থরণস্স চ দানেন উয্যানৰিমানকপ্পরুক্খাদীসু সীতচ্ছাযা মনোরমা ইধ লব্ভতি, সমিজ্ঝতীতি অত্থো.

এৰঞ্চ পন ৰত্ৰা সো পেতো তে ৰাণিজে নেত্ৰা তানি পঞ্চ কহাপণসতানি দস্সেত্ৰা ‘‘ইতো উপড্ঢং তুম্হে গণ্হথ, উপড্ঢং মযা গহিতং ইণং সোধেত্ৰা সুখেন জীৰতূতি ময্হং ধীতায দেথা’’তি আহ. ৰাণিজা অনুক্কমেন সাৰত্থিং পত্ৰা তস্স ধীতায কথেত্ৰা তেন অত্তনো দিন্নভাগম্পি তস্সা এৰ অদংসু. সা কহাপণসতং ধনিকানং দত্ৰা ইতরং অত্তনো পিতু সহাযস্স তস্স কুটুম্বিকস্স দত্ৰা সযং ৰেয্যাৰচ্চং করোন্তি নিৰসতি. সো ‘‘ইদং সব্বং তুয্হংযেৰ হোতূ’’তি তস্সাযেৰ পটিদত্ৰা তং অত্তনো জেট্ঠপুত্তস্স ঘরসামিনিং অকাসি.

সা গচ্ছন্তে কালে একং পুত্তং লভিত্ৰা তং উপলালেন্তী –

৭৯৯. ‘‘সন্দিট্ঠিকং কম্মং এৰং পস্সথ, দানস্স দমস্স সংযমস্স ৰিপাকং;

দাসী অহং অয্যকুলেসু হুত্ৰা, সুণিসা হোমি অগারস্স ইস্সরা’’তি. –

ইমং গাথং ৰদতি.

অথেকদিৰসং সত্থা তস্সা ঞাণপরিপাকং ওলোকেত্ৰা ওভাসং ফরিত্ৰা সম্মুখে ঠিতো ৰিয অত্তানং দস্সেত্ৰা –

‘‘অসাতং সাতরূপেন, পিযরূপেন অপ্পিযং;

দুক্খং সুখস্স রূপেন, পমত্তং অতিৰত্ততী’’তি. (উদা. ১৮; জা. ১.১.১০০) –

ইমং গাথমাহ. সা গাথাপরিযোসানে সোতাপত্তিফলে পতিট্ঠিতা. সা দুতিযদিৰসে বুদ্ধপ্পমুখস্স ভিক্খুসঙ্ঘস্স দানং দত্ৰা তং পৰত্তিং ভগৰতো আরোচেসি. ভগৰা তমত্থং অট্ঠুপ্পত্তিং কত্ৰা সম্পত্তপরিসায ধম্মং দেসেসি. সা দেসনা মহাজনস্স সাত্থিকা অহোসীতি.

অম্বৰনপেতৰত্থুৰণ্ণনা নিট্ঠিতা.