১০. গণপেতৰত্থুৰণ্ণনা

নগ্গা দুব্বণ্ণরূপাত্থাতি ইদং সত্থরি জেতৰনে ৰিহরন্তে সম্বহুলে পেতে আরব্ভ ৰুত্তং. সাৰত্থিযং কির সম্বহুলা মনুস্সা গণভূতা অস্সদ্ধা অপ্পসন্না মচ্ছেরমলপরিযুট্ঠিতচিত্তা দানাদিসুচরিতৰিমুখা হুত্ৰা চিরং জীৰিত্ৰা কাযস্স ভেদা নগরস্স সমীপে পেতযোনিযং নিব্বত্তিংসু. অথেকদিৰসং আযস্মা মহামোগ্গল্লানো সাৰত্থিযং পিণ্ডায গচ্ছন্তো অন্তরামগ্গে পেতে দিস্ৰা –

৭৮২. ‘‘নগ্গা দুব্বণরূপাত্থ, কিসা ধমনিসন্থতা;

উপ্ফাসুলিকা কিসিকা, কে নু তুম্হেত্থ মারিসা’’তি. –

গাথায পুচ্ছি. তত্থ দুব্বণ্ণরূপাত্থাতি দুব্বণ্ণসরীরা হোথ. কে নু তুম্হেত্থাতি তুম্হে কে নু নাম ভৰথ. মারিসাতি তে অত্তনো সারুপ্পৰসেন আলপতি.

তং সুত্ৰা পেতা –

৭৮৩. ‘‘মযং ভদন্তে পেতম্হা, দুগ্গতা যমলোকিকা;

পাপকম্মং করিত্ৰান, পেতলোকং ইতো গতা’’তি. –

গাথায অত্তনো পেতভাৰং পকাসেত্ৰা পুন থেরেন –

৭৮৪. ‘‘কিং নু কাযেন ৰাচায, মনসা দুক্কটং কতং;

কিস্সকম্মৰিপাকেন, পেতলোকং ইতো গতা’’তি. –

গাথায কতকম্মং পুচ্ছিতা –

৭৮৫. ‘‘অনাৰটেসু তিত্থেসু, ৰিচিনিম্হদ্ধমাসকং;

সন্তেসু দেয্যধম্মেসু, দীপং নাকম্হ অত্তনো.

৭৮৬. ‘‘নদিং উপেম তসিতা, রিত্তকা পরিৰত্ততি;

ছাযং উপেম উণ্হেসু, আতপো পরিৰত্ততি.

৭৮৭. ‘‘অগ্গিৰণ্ণো চ নো ৰাতো, ডহন্তো উপৰাযতি;

এতঞ্চ ভন্তে অরহাম, অঞ্ঞঞ্চ পাপকং ততো.

৭৮৮. ‘‘অপি যোজনানি গচ্ছাম, ছাতা আহারগেধিনো;

অলদ্ধাৰ নিৰত্তাম, অহো নো অপ্পপুঞ্ঞতা.

৭৮৯. ‘‘ছাতা পমুচ্ছিতা ভন্তা, ভূমিযং পটিসুম্ভিতা;

উত্তানা পটিকিরাম, অৰকুজ্জা পতামসে.

৭৯০. ‘‘তে চ তত্থেৰ পতিতা, ভূমিযং পটিসুম্ভিতা;

উরং সীসঞ্চ ঘট্টেম, অহো নো অপ্পপুঞ্ঞতা.

৭৯১. ‘‘এতঞ্চ ভন্তে অরহাম, অঞ্ঞঞ্চ পাপকং ততো;

সন্তেসু দেয্যধম্মেসু, দীপং নাকম্হ অত্তনো.

৭৯২. ‘‘তে হি নূন ইতো গন্ত্ৰা, যোনিং লদ্ধান মানুসিং;

ৰদঞ্ঞূ সীলসম্পন্না, কাহাম কুসলং বহু’’ন্তি. –

অত্তনা কতকম্মং কথেসুং.

৭৮৮. তত্থ অপি যোজনানি গচ্ছামাতি অনেকানিপি যোজনানি গচ্ছাম. কথং? ছাতা আহারগেধিনোতি, চিরকালং জিঘচ্ছায জিঘচ্ছিতা আহারে গিদ্ধা অভিগিজ্ঝন্তা হুত্ৰা, এৰং গন্ত্ৰাপি কিঞ্চি আহারং অলদ্ধাযেৰ নিৰত্তাম. অপ্পপুঞ্ঞতাতি অপুঞ্ঞতা অকতকল্যাণতা.

৭৮৯. উত্তানা পটিকিরামাতি কদাচি উত্তানা হুত্ৰা ৰিকিরিযমানঙ্গপচ্চঙ্গা ৰিয ৰত্তাম. অৰকুজ্জা পতামসেতি কদাচি অৰকুজ্জা হুত্ৰা পতাম.

৭৯০. তে চাতি তে মযং. উরং সীসঞ্চ ঘট্টেমাতি অৰকুজ্জা হুত্ৰা পতিতা উট্ঠাতুং অসক্কোন্তা ৰেধন্তা ৰেদনাপ্পত্তা অত্তনো অত্তনো উরং সীসঞ্চ পটিঘংসাম. সেসং হেট্ঠা ৰুত্তনযমেৰ.

থেরো তং পৰত্তিং ভগৰতো আরোচেসি. ভগৰা তমত্থং অট্ঠুপ্পত্তিং কত্ৰা সম্পত্তপরিসায ধম্মং দেসেসি. তং সুত্ৰা মহাজনো মচ্ছেরমলং পহায দানাদিসুচরিতনিরতো অহোসীতি.

গণপেতৰত্থুৰণ্ণনা নিট্ঠিতা.