৯. কূটৰিনিচ্ছযিকপেতৰত্থুৰণ্ণনা

মালী কিরিটী কাযূরীতি ইদং সত্থরি ৰেল়ুৰনে ৰিহরন্তে কূটৰিনিচ্ছযিকপেতং আরব্ভ ৰুত্তং. তদা বিম্বিসারো রাজা মাসস্স ছসু দিৰসেসু উপোসথং উপৰসতি, তং অনুৰত্তন্তা বহূ মনুস্সা উপোসথং উপৰসন্তি. রাজা অত্তনো সন্তিকং আগতাগতে মনুস্সে পুচ্ছতি – ‘‘কিং তুম্হেহি উপোসথো উপৰুত্থো, উদাহু ন উপৰুত্থো’’তি? তত্রেকো অধিকরণে নিযুত্তকপুরিসো পিসুণৰাচো নেকতিকো লঞ্জগাহকো ‘‘ন উপৰুত্থোম্হী’’তি ৰত্তুং অসহন্তো ‘‘উপৰুত্থোম্হি, দেৰা’’তি আহ. অথ নং রাজসমীপতো নিক্খন্তং সহাযো আহ – ‘‘কিং, সম্ম, অজ্জ তযা উপৰুত্থো’’তি? ‘‘ভযেনাহং, সম্ম, রঞ্ঞো সম্মুখা এৰং অৰোচং, নাহং উপোসথিকো’’তি.

অথ নং সহাযো আহ – ‘‘যদি এৰং উপড্ঢুপোসথোপি তাৰ তে অজ্জ হোতু, উপোসথঙ্গানি সমাদিযাহী’’তি. সো তস্স ৰচনং ‘‘সাধূ’’তি সম্পটিচ্ছিত্ৰা গেহং গন্ত্ৰা অভুত্ৰাৰ মুখং ৰিক্খালেত্ৰা উপোসথং অধিট্ঠায রত্তিযং ৰাসূপগতো রিত্তাসযসম্ভূতেন বলৰৰাতহেতুকেন সূলেন উপচ্ছিন্নাযুসঙ্খারো চুতিঅনন্তরং পব্বতকুচ্ছিযং ৰেমানিকপেতো হুত্ৰা নিব্বত্তি. সো হি একরত্তিং উপোসথরক্খণমত্তেন ৰিমানং পটিলভি দসকঞ্ঞাসহস্সপরিৰারং মহতিঞ্চ দিব্বসম্পত্তিং. কূটৰিনিচ্ছযিকতায পন পেসুণিকতায চ অত্তনো পিট্ঠিমংসানি সযমেৰ ওক্কন্তিত্ৰা খাদতি. তং আযস্মা নারদো গিজ্জকূটতো ওতরন্তো দিস্ৰা –

৪৯৯. ‘‘মালী কিরিটী কাযূরী, গত্তা তে চন্দনুস্সদা;

পসন্নমুখৰণ্ণোসি, সূরিযৰণ্ণোৰ সোভসি.

৫০০. ‘‘অমানুসা পারিসজ্জা, যে তেমে পরিচারকা;

দস কঞ্ঞাসহস্সানি, যা তেমা পরিচারিকা;

তা কম্বুকাযূরধরা, কঞ্চনাৰেল়ভূসিতা.

৫০১. ‘‘মহানুভাৰোসি তুৰং, লোমহংসনরূপৰা;

পিট্ঠিমংসানি অত্তনো, সামং উক্কচ্চ খাদসি.

৫০২. ‘‘কিং নু কাযেন ৰাচায, মনসা দুক্কটং কতং;

কিস্সকম্মৰিপাকেন, পিট্ঠিমংসানি অত্তনো;

সামং উক্কচ্চ খাদসীতি.

৫০৩. ‘‘অত্তনোহং অনত্থায, জীৰলোকে অচারিসং;

পেসুঞ্ঞমুসাৰাদেন, নিকতিৰঞ্চনায চ.

৫০৪. ‘‘তত্থাহং পরিসং গন্ত্ৰা, সচ্চকালে উপট্ঠিতে;

অত্থং ধম্মং নিরাকত্ৰা, অধম্মমনুৰত্তিসং.

৫০৫. ‘‘এৰং সো খাদতত্তানং, যো হোতি পিট্ঠিমংসিকো;

যথাহং অজ্জ খাদামি, পিট্ঠিমংসানি অত্তনো.

৫০৬. ‘‘তযিদং তযা নারদ সামং দিট্ঠং, অনুকম্পকা যে কুসলা ৰদেয্যুং;

মা পেসুণং মা চ মুসা অভাণি, মা খোসি পিট্ঠিমংসিকো তুৰ’’ন্তি. –

থেরো চতূহি গাথাহি পুচ্ছি, সোপি তস্স চতূহি গাথাহি এতমত্থং ৰিস্সজ্জেসি.

৪৯৯. তত্থ মালীতি মালধারী, দিব্বপুপ্ফেহি পটিমণ্ডিতোতি অধিপ্পাযো. কিরিটীতি ৰেঠিতসীসো. কাযূরীতি কেযূরৰা, বাহালঙ্কারপটিমণ্ডিতোতি অত্থো. গত্তাতি সরীরাৰযৰা. চন্দনুস্সদাতি চন্দনসারানুলিত্তা. সূরিযৰণ্ণোৰ সোভসীতি বালসূরিযসদিসৰণ্ণো এৰ হুত্ৰা ৰিরোচসি. ‘‘অরণৰণ্ণী পভাসসী’’তিপি পাল়ি, অরণন্তি অরণিযেহি দেৰেহি সদিসৰণ্ণো অরিযাৰকাসোতি অত্থো.

৫০০. পারিসজ্জাতি পরিসপরিযাপন্না, উপট্ঠাকাতি অত্থো. তুৰন্তি ত্ৰং. লোমহংসনরূপৰাতি পস্সন্তানং লোমহংসজননরূপযুত্তো. মহানুভাৰতাসমঙ্গিতায হেতং ৰুত্তং. উক্কচ্চাতি উক্কন্তিত্ৰা, ছিন্দিত্ৰাতি অত্থো.

৫০৩. অচারিসন্তি অচরিং পটিপজ্জিং. পেসুঞ্ঞমুসাৰাদেনাতি পেসুঞ্ঞেন চেৰ মুসাৰাদেন চ. নিকতিৰঞ্চনায চাতি নিকতিযা ৰঞ্চনায চ পতিরূপদস্সনেন পরেসং ৰিকারেন ৰঞ্চনায চ.

৫০৪. সচ্চকালেতি সচ্চং ৰত্তুং যুত্তকালে. অত্থন্তি দিট্ঠধম্মিকাদিভেদং হিতং. ধম্মন্তি কারণং ঞাযং. নিরাকত্ৰাতি ছড্ডেত্ৰা পহায. সোতি যো পেসুঞ্ঞাদিং আচরতি, সো সত্তো. সেসং সব্বং হেট্ঠা ৰুত্তনযমেৰ.

কূটৰিনিচ্ছযিকপেতৰত্থুৰণ্ণনা নিট্ঠিতা.