১০. ধাতুৰিৰণ্ণপেতৰত্থুৰণ্ণনা

অন্তলিক্খস্মিং তিট্ঠন্তোতি ইদং ধাতুৰিৰণ্ণপেতৰত্থু. ভগৰতি কুসিনারাযং উপৰত্তনে মল্লানং সালৰনে যমকসালানমন্তরে পরিনিব্বুতে ধাতুৰিভাগে চ কতে রাজা অজাতসত্তু অত্তনা লদ্ধধাতুভাগং গহেত্ৰা সত্ত ৰস্সানি সত্ত চ মাসে সত্ত চ দিৰসে বুদ্ধগুণে অনুস্সরন্তো উল়ারপূজং পৰত্তেসি. তত্থ অসঙ্খেয্যা অপ্পমেয্যা মনুস্সা চিত্তানি পসাদেত্ৰা সগ্গূপগা অহেসুং, ছল়াসীতিমত্তানি পন পুরিসসহস্সানি চিরকালভাৰিতেন অস্সদ্ধিযেন মিচ্ছাদস্সনেন চ ৰিপল্লত্থচিত্তা পসাদনীযেপি ঠানে অত্তনো চিত্তানি পদোসেত্ৰা পেতেসু উপ্পজ্জিংসু. তস্মিংযেৰ রাজগহে অঞ্ঞতরস্স ৰিভৰসম্পন্নস্স কুটুম্বিকস্স ভরিযা ধীতা সুণিসা চ পসন্নচিত্তা ‘‘ধাতুপূজং করিস্সামা’’তি গন্ধপুপ্ফাদীনি গহেত্ৰা ধাতুট্ঠানং গন্তুং আরদ্ধা. সো কুটুম্বিকো ‘‘কিং অট্ঠিকানং পূজনেনা’’তি তা পরিভাসেত্ৰা ধাতুপূজং ৰিৰণ্ণেসি. তাপি তস্স ৰচনং অনাদিযিত্ৰা তত্থ গন্ত্ৰা ধাতুপূজং কত্ৰা গেহং আগতা তাদিসেন রোগেন অভিভূতা নচিরস্সেৰ কালং কত্ৰা দেৰলোকে নিব্বত্তিংসু. সো পন কোধেন অভিভূতো নচিরস্সেৰ কালং কত্ৰা তেন পাপকম্মেন পেতেসু নিব্বত্তি.

অথেকদিৰসং আযস্মা মহাকস্সপো সত্তেসু অনুকম্পায তথারূপং ইদ্ধাভিসঙ্খারং অভিসঙ্খাসি, যথা মনুস্সা তে পেতে তা চ দেৰতাযো পস্সন্তি. তথা পন কত্ৰা চেতিযঙ্গণে ঠিতো তং ধাতুৰিৰণ্ণকং পেতং তীহি গাথাহি পুচ্ছি. তস্স সো পেতো ব্যাকাসি –

৫০৭. ‘‘অন্তলিক্খস্মিং তিট্ঠন্তো, দুগ্গন্ধো পূতি ৰাযসি;

মুখঞ্চ তে কিমযো পূতিগন্ধং, খাদন্তি কিং কম্মমকাসি পুব্বে.

৫০৮. ‘‘ততো সত্থং গহেত্ৰান, ওক্কন্তন্তি পুনপ্পুনং;

খারেন পরিপ্ফোসিত্ৰা, ওক্কন্তন্তি পুনপ্পুনং.

৫০৯. ‘‘কিং নু কাযেন ৰাচায, মনসা দুক্কটং কতং;

কিস্সকম্মৰিপাকেন, ইদং দুক্খং নিগচ্ছসী’’তি.

৫১০. ‘‘অহং রাজগহে রম্মে, রমণীযে গিরিব্বজে;

ইস্সরো ধনধঞ্ঞস্স, সুপহূতস্স মারিস.

৫১১. ‘‘তস্সাযং মে ভরিযা চ, ধীতা চ সুণিসা চ মে;

তা মালং উপ্পলঞ্চাপি, পচ্চগ্ঘঞ্চ ৰিলেপনং;

থূপং হরন্তিযো ৰারেসিং, তং পাপং পকতং মযা.

৫১২. ‘‘ছল়াসীতিসহস্সানি, মযং পচ্চত্তৰেদনা;

থূপপূজং ৰিৰণ্ণেত্ৰা, পচ্চাম নিরযে ভুসং.

৫১৩. ‘‘যে চ খো থূপপূজায, ৰত্তন্তে অরহতো মহে;

আদীনৰং পকাসেন্তি, ৰিৰেচযেথ নে ততো.

৫১৪. ‘‘ইমা চ পস্স অযন্তিযো, মালধারী অলঙ্কতা;

মালাৰিপাকংনুভোন্তিযো, সমিদ্ধা চ তা যসস্সিনিযো.

৫১৫. ‘‘তঞ্চ দিস্ৰান অচ্ছেরং, অব্ভুতং লোমহংসনং;

নমো করোন্তি সপ্পঞ্ঞা, ৰন্দন্তি তং মহামুনিং.

৫১৬. ‘‘সোহং নূন ইতো গন্ত্ৰা, যোনিং লদ্ধান মানুসিং;

থূপপূজং করিস্সামি, অপ্পমত্তো পুনপ্পুন’’ন্তি.

৫০৭-৮. তত্থ দুগ্গন্ধোতি অনিট্ঠগন্ধো, কুণপগন্ধগন্ধীতি অত্থো. তেনাহ ‘‘পূতি ৰাযসী’’তি. ততোতি দুগ্গন্ধৰাযনতো কিমীহি খাযিতব্বতো চ উপরি. সত্তং গহেত্ৰান, ওক্কন্তন্তি পুনপ্পুনন্তি কম্মসঞ্চোদিতা সত্তা নিসিতধারং সত্থং গহেত্ৰা পুনপ্পুনং তং ৰণমুখং অৰকন্তন্তি. খারেন পরিপ্ফোসিত্ৰা, ওক্কন্তন্তি পুনপ্পুনন্তি অৰকন্তিতট্ঠানে খারোদকেন আসিঞ্চিত্ৰা পুনপ্পুনম্পি অৰকন্তন্তি.

৫১০. ইস্সরো ধনধঞ্ঞস্স, সুপহূতস্সাতি অতিৰিয পহূতস্স ধনস্স ধঞ্ঞস্স চ ইস্সরো সামী, অড্ঢো মহদ্ধনোতি অত্থো.

৫১১. তস্সাযং মে ভরিযা চ, ধীতা চ সুণিসা চাতি তস্স ময্হং অযং পুরিমত্তভাৰে ভরিযা, অযং ধীতা, অযং সুণিসা. তা দেৰভূতা আকাসে ঠিতাতি দস্সেন্তো ৰদতি. পচ্চগ্ঘন্তি অভিনৰং. থূপং হরন্তিযো ৰারেসিন্তি থূপং পূজেতুং উপনেন্তিযো ধাতুং ৰিৰণ্ণেন্তো পটিক্খিপিং. তং পাপং পকতং মযাতি তং ধাতুৰিৰণ্ণনপাপং কতং সমাচরিতং মযাতি ৰিপ্পটিসারপ্পত্তো ৰদতি.

৫১২. ছল়াসীতিসহস্সানীতি ছসহস্সাধিকা অসীতিসহস্সমত্তা. মযন্তি তে পেতে অত্তনা সদ্ধিং সঙ্গহেত্ৰা ৰদতি. পচ্চত্তৰেদনাতি ৰিসুং ৰিসুং অনুভুয্যমানদুক্খৰেদনা. নিরযেতি বলদুক্খতায পেত্তিৰিসযং নিরযসদিসং কত্ৰা আহ.

৫১৩. যে চ খো থূপপূজায, ৰত্তন্তে অরহতো মহেতি অরহতো সম্মাসম্বুদ্ধস্স থূপং উদ্দিস্স পূজামহে পৰত্তমানে অহং ৰিয যে থূপপূজায আদীনৰং দোসং পকাসেন্তি. তে পুগ্গলে ততো পুঞ্ঞতো ৰিৰেচযেথ ৰিৰেচাপযেথ, পরিবাহিরে জনযেথাতি অঞ্ঞাপদেসেন অত্তনো মহাজানিযতং ৰিভাৰেতি.

৫১৪. আযন্তিযোতি আকাসেন আগচ্ছন্তিযো. মালাৰিপাকন্তি থূপে কতমালাপূজায ৰিপাকং ফলং. সমিদ্ধাতি দিব্বসম্পত্তিযা সমিদ্ধা. তা যসস্সিনিযোতি তা পরিৰারৰন্তিযো.

৫১৫. তঞ্চ দিস্ৰানাতি তস্স অতিপরিত্তস্স পূজাপুঞ্ঞস্স অচ্ছরিযং অব্ভুতং লোমহংসনং অতিউল়ারং ৰিপাকৰিসেসং দিস্ৰা. নমো করোন্তি সপ্পঞ্ঞা, ৰন্দন্তি তং মহামুনিন্তি, ভন্তে কস্সপ, ইমা ইত্থিযো তং উত্তমপুঞ্ঞক্খেত্তভূতং ৰন্দন্তি অভিৰাদেন্তি, নমো করোন্তি নমক্কারঞ্চ করোন্তীতি অত্থো.

৫১৬. অথ সো পেতো সংৰিগ্গমানসো সংৰেগানুরূপং আযতিং অত্তনা কাতব্বং দস্সেন্তো ‘‘সোহং নূনা’’তি গাথমাহ. তং উত্তানত্থমেৰ.

এৰং পেতেন ৰুত্তো মহাকস্সপো তং অট্ঠুপ্পত্তিং কত্ৰা সম্পত্তপরিসায ধম্মং দেসেসি.

ধাতুৰিৰণ্ণপেতৰত্থুৰণ্ণনা নিট্ঠিতা.

ইতি খুদ্দক-অট্ঠকথায পেতৰত্থুস্মিং

দসৰত্থুপটিমণ্ডিতস্স

ততিযস্স চূল়ৰগ্গস্স অত্থসংৰণ্ণনা নিট্ঠিতা.