৮. দুতিযমিগলুদ্দকপেতৰত্থুৰণ্ণনা

কূটাগারে চ পাসাদেতি ইদং ভগৰতি ৰেল়ুৰনে ৰিহরন্তে অপরং মিগলুদ্দকপেতং আরব্ভ ৰুত্তং. রাজগহে কির অঞ্ঞতরো মাগৰিকো মাণৰো ৰিভৰসম্পন্নোপি সমানো ভোগসুখং পহায রত্তিন্দিৰং মিগে হনন্তো ৰিচরতি. তস্স সহাযভূতো একো উপাসকো অনুদ্দযং পটিচ্চ – ‘‘সাধু, সম্ম, পাণাতিপাততো ৰিরমাহি, মা তে অহোসি দীঘরত্তং অহিতায দুক্খাযা’’তি ওৰাদং অদাসি. সো তং অনাদিযি. অথ সো উপাসকো অঞ্ঞতরং অত্তনো মনোভাৰনীযং খীণাসৰত্থেরং যাচি – ‘‘সাধু, ভন্তে, অসুকপুরিসস্স তথা ধম্মং দেসেথ, যথা সো পাণাতিপাততো ৰিরমেয্যা’’তি.

অথেকদিৰসং সো থেরো রাজগহে পিণ্ডায চরন্তো তস্স গেহদ্ৰারে অট্ঠাসি. তং দিস্ৰা সো মাগৰিকো সঞ্জাতবহুমানো পচ্চুগ্গন্ত্ৰা গেহং পৰেসেত্ৰা আসনং পঞ্ঞাপেত্ৰা অদাসি. নিসীদি থেরো পঞ্ঞত্তে আসনে, সোপি থেরং উপসঙ্কমিত্ৰা নিসীদি. তস্স থেরো পাণাতিপাতে আদীনৰং, ততো ৰিরতিযা আনিসংসঞ্চ পকাসেসি. সো তং সুত্ৰাপি ততো ৰিরমিতুং ন ইচ্ছি. অথ নং থেরো আহ – ‘‘সচে, ত্ৰং আৰুসো, সব্বেন সব্বং ৰিরমিতুং ন সক্কোসি, রত্তিম্পি তাৰ ৰিরমস্সূ’’তি, সো ‘‘সাধু, ভন্তে, ৰিরমামি রত্তি’’ন্তি ততো ৰিরমি. সেসং অনন্তরৰত্থুসদিসং. গাথাসু পন –

৪৮৮. ‘‘কূটাগারে চ পাসাদে, পল্লঙ্কে গোনকত্থতে;

পঞ্চঙ্গিকেন তুরিযেন, রমসি সুপ্পৰাদিতে.

৪৮৯. ‘‘ততো রত্যা ৰিৰসানে, সূরিযুগ্গমনং পতি;

অপৰিদ্ধো সুসানস্মিং, বহুদুক্খং নিগচ্ছসি.

৪৯০. ‘‘কিং নু কাযেন ৰাচায, মনসা দুক্কটং কতং;

কিস্সকম্মৰিপাকেন, ইদং দুক্খং নিগচ্ছসী’’তি. –

তীহি গাথাহি নারদত্থেরো নং পটিপুচ্ছি. অথস্স পেতো –

৪৯১. ‘‘অহং রাজগহে রম্মে, রমণীযে গিরিব্বজে;

মিগলুদ্দো পুরে আসিং, লুদ্দো চাসিমসঞ্ঞতো.

৪৯২. ‘‘তস্স মে সহাযো সুহদযো, সদ্ধো আসি উপাসকো;

তস্স কুলূপকো ভিক্খু, আসি গোতমসাৰকো;

সোপি মং অনুকম্পন্তো, নিৰারেসি পুনপ্পুনং.

৪৯৩. ‘‘‘মাকাসি পাপকং কম্মং, মা তাত দুগ্গতিং অগা;

সচে ইচ্ছসি পেচ্চ সুখং, ৰিরম পাণৰধা অসংযমা’.

৪৯৪. ‘‘তস্সাহং ৰচনং সুত্ৰা, সুখকামস্স হিতানুকম্পিনো;

নাকাসিং সকলানুসাসনিং, চিরপাপাভিরতো অবুদ্ধিমা.

৪৯৫. ‘‘সো মং পুন ভূরিসুমেধসো, অনুকম্পায সংযমে নিৰেসযি;

‘সচে দিৰা হনসি পাণিনো, অথ তে রত্তিং ভৰতু সংযমো’.

৪৯৬. ‘‘স্ৰাহং দিৰা হনিত্ৰা পাণিনো, ৰিরতো রত্তিমহোসি সঞ্ঞতো;

রত্তাহং পরিচারেমি, দিৰা খজ্জামি দুগ্গতো.

৪৯৭. ‘‘তস্স কম্মস্স কুসলস্স, অনুভোমি রত্তিং অমানুসিং;

দিৰা পটিহতাৰ কুক্কুরা, উপধাৰন্তি সমন্তা খাদিতুং.

৪৯৮. ‘‘যে চ তে সততানুযোগিনো, ধুৰং পযুত্তা সুগতস্স সাসনে;

মঞ্ঞামি তে অমতমেৰ কেৰলং, অধিগচ্ছন্তি পদং অসঙ্খত’’ন্তি. –

তমত্থং আচিক্খি. তাসং অত্থো হেট্ঠা ৰুত্তনযোৰ.

দুতিযমিগলুদ্দকপেতৰত্থুৰণ্ণনা নিট্ঠিতা.