৪. ভুসপেতৰত্থুৰণ্ণনা

ভুসানি একো সালিং পুনাপরোতি ইদং সত্থরি সাৰত্থিযং ৰিহরন্তে চত্তারো পেতে আরব্ভ ৰুত্তং. সাৰত্থিযা কির অৰিদূরে অঞ্ঞতরস্মিং গামকে একো কূটৰাণিজো কূটমানাদীহি জীৰিকং কপ্পেসি. সো সালিপলাপে গহেত্ৰা তম্বমত্তিকায পরিভাৰেত্ৰা গরুতরে কত্ৰা রত্তসালিহি সদ্ধিং মিস্সেত্ৰা ৰিক্কিণি. তস্স পুত্তো ‘‘ঘরং আগতানং মম মিত্তসুহজ্জানং সম্মানং ন করোতী’’তি কুপিতো যুগচম্মং গহেত্ৰা মাতুসীসে পহারমদাসি. তস্স সুণিসা সব্বেসং অত্থায ঠপিতমংসং চোরিকায খাদিত্ৰা পুন তেহি অনুযুঞ্জিযমানা ‘‘সচে মযা তং মংসং খাদিতং, ভৰে ভৰে অত্তনো পিট্ঠিমংসং কন্তিত্ৰা খাদেয্য’’ন্তি সপথমকাসি. ভরিযা পনস্স কিঞ্চিদেৰ উপকরণং যাচন্তানং ‘‘নত্থী’’তি ৰত্ৰা তেহি নিপ্পীল়িযমানা ‘‘সচে সন্তং নত্থীতি ৰদামি, জাতজাতট্ঠানে গূথভক্খা ভৰেয্য’’ন্তি মুসাৰাদেন সপথমকাসি.

তে চত্তারোপি জনা অপরেন সমযেন কালং কত্ৰা ৰিঞ্ঝাটৰিযং পেতা হুত্ৰা নিব্বত্তিংসু. তত্থ কূটৰাণিজো কম্মফলেন পজ্জলন্তং ভুসং উভোহি হত্থেহি গহেত্ৰা অত্তনো মত্থকে আকিরিত্ৰা মহাদুক্খং অনুভৰতি, তস্স পুত্তো অযোমযেহি মুগ্গরেহি সযমেৰ অত্তনো সীসং ভিন্দিত্ৰা অনপ্পকং দুক্খং পচ্চনুভোতি. তস্স সুণিসা কম্মফলেন সুনিসিতেহি অতিৰিয ৰিপুলাযতেহি নখেহি অত্তনো পিট্ঠিমংসানি কন্তিত্ৰা খাদন্তী অপরিমিতং দুক্খং অনুভৰতি, তস্স ভরিযায সুগন্ধং সুৰিসুদ্ধং অপগতকাল়কং সালিভত্তং উপনীতমত্তমেৰ নানাৰিধকিমিকুলাকুলং পরমদুগ্গন্ধজেগুচ্ছং গূথং সম্পজ্জতি, তং সা উভোহি হত্থেহি পরিগ্গহেত্ৰা ভুঞ্জন্তী মহাদুক্খং পটিসংৰেদেতি.

এৰং তেসু চতূসু জনেসু পেতেসু নিব্বত্তিত্ৰা মহাদুক্খং অনুভৰন্তেসু আযস্মা মহামোগ্গলানো পব্বতচারিকং চরন্তো একদিৰসং তং ঠানং গতো. তে পেতে দিস্ৰা –

৪৪৭. ‘‘ভুসানি একো সালিং পুনাপরো, অযঞ্চ নারী সকমংসলোহিতং;

তুৰঞ্চ গূথং অসুচিং অকন্তং, পরিভুঞ্জসি কিস্স অযং ৰিপাকো’’তি. –

ইমায গাথায তেহি কতকম্মং পুচ্ছি. তত্থ ভুসানীতি পলাপানি. একোতি এককো. সালিন্তি সালিনো. সামিঅত্থে হেতং উপযোগৰচনং, সালিনো পলাপানি পজ্জলন্তানি অত্তনো সীসে অৰকিরতীতি অধিপ্পাযো. পুনাপরোতি পুন অপরো. যো হি সো মাতুসীসং পহরি, সো অযোমুগ্গরেহি অত্তনো সীসং পহরিত্ৰা সীসভেদং পাপুণাতি, তং সন্ধায ৰদতি. সকমংসলোহিতন্তি অত্তনো পিট্ঠিমংসং লোহিতঞ্চ পরিভুঞ্জতীতি যোজনা. অকন্তন্তি অমনাপং জেগুচ্ছং. কিস্স অযং ৰিপাকোতি কতমস্স পাপকম্মস্স ইদং ফলং, যং ইদানি তুম্হেহি পচ্চনুভৰীযতীতি অত্থো.

এৰং থেরেন তেহি কতকম্মে পুচ্ছিতে কূটৰাণিজস্স ভরিযা সব্বেহি তেহি কতকম্মং আচিক্খন্তী –

৪৪৮. ‘‘অযং পুরে মাতরং হিংসতি, অযং পন কূটৰাণিজো;

অযং মংসানি খাদিত্ৰা, মুসাৰাদেন ৰঞ্চেতি.

৪৪৯. ‘‘অহং মনুস্সেসু মনুস্সভূতা, অগারিনী সব্বকুলস্স ইস্সরা;

সন্তেসু পরিগুহামি, মা চ কিঞ্চি ইতো অদং.

৪৫০. ‘‘মুসাৰাদেন ছাদেমি, নত্থি এতং মম গেহে;

সচে সন্তং নিগুহামি, গূথো মে হোতু ভোজনং.

৪৫১. ‘‘তস্স কম্মস্স ৰিপাকেন, মুসাৰাদস্স চূভযং;

সুগন্ধং সালিনো ভত্তং, গূথং মে পরিৰত্ততি.

৪৫২. ‘‘অৰঞ্ঝানি চ কম্মানি, ন হি কম্মং ৰিনস্সতি;

দুগ্গন্ধং কিমিনং মীল়্হং, ভুঞ্জামি চ পিৰামি চা’’তি. – গাথা অভাসি;

৪৪৮. তত্থ অযন্তি পুত্তং দস্সেন্তি ৰদতি. হিংসতীতি থামেন পরিবাধেতি, মুগ্গরেন পহরতীতি অত্থো. কূটৰাণিজোতি খলৰাণিজো, ৰঞ্চনায ৰণিজ্জকারকোতি অত্থো. মংসানি খাদিত্ৰাতি পরেহি সাধারণমংসং খাদিত্ৰা ‘‘ন খাদামী’’তি মুসাৰাদেন তে ৰঞ্চেতি.

৪৪৯-৫০. অগারিনীতি গেহসামিনী. সন্তেসূতি ৰিজ্জমানেস্ৰেৰ পরেহি যাচিতউপকরণেসু. পরিগুহামীতি পটিচ্ছাদেসিং. কালৰিপল্লাসেন হেতং ৰুত্তং. মা চ কিঞ্চি ইতো অদন্তি ইতো মম সন্তকতো কিঞ্চিমত্তম্পি অত্থিকস্স পরস্স ন অদাসিং. ছাদেমিতি ‘‘নত্থি এতং মম গেহে’’তি মুসাৰাদেন ছাদেসিং.

৪৫১-২. গূথং মে পরিৰত্ততীতি সুগন্ধং সালিভত্তং ময্হং কম্মৰসেন গূথভাৰেন পরিৰত্ততি পরিণমতি. অৰঞ্ঝানীতি অমোঘানি অনিপ্ফলানি. ন হি কম্মং ৰিনস্সতীতি যথূপচিতং কম্মং ফলং অদত্ৰা ন হি ৰিনস্সতি. কিমিনন্তি কিমিৰন্তং সঞ্জাতকিমিকুলং. মীল়্হন্তি গূথং. সেসং হেট্ঠা ৰুত্তনযত্তা উত্তানমেৰ.

এৰং থেরো তস্সা পেতিযা ৰচনং সুত্ৰা তং পৰত্তিং ভগৰতো আরোচেসি. ভগৰা তমত্থং অট্ঠুপ্পত্তিং কত্ৰা সম্পত্তপরিসায ধম্মং দেসেসি. সা দেসনা মহাজনস্স সাত্থিকা অহোসীতি.

ভুসপেতৰত্থুৰণ্ণনা নিট্ঠিতা.