২. পুগ্গলৰিসেসনিদ্দেসৰণ্ণনা

৮. দ্ৰে পুগ্গলাতিআদীহি পটিসম্ভিদপ্পত্তপুগ্গলৰিসেসপটিপাটিং দস্সেতি. তত্থ পুব্বযোগোতি অতীতজাতীসু পটিসম্ভিদপ্পত্তিহেতুভূতো পুঞ্ঞপযোগো. তেনাতি তেন পুব্বযোগকারণেন. এৰং সেসেসুপি. অতিরেকো হোতীতি অতিরিত্তো হোতি, অতিরেকযোগতো ৰা ‘‘অতিরেকো’’তি ৰুত্তো. অধিকো হোতীতি অগ্গো হোতি. ৰিসেসো হোতীতি ৰিসিট্ঠো হোতি, ৰিসেসযোগতো ৰা ৰিসেসো. ঞাণং পভিজ্জতীতি পটিসম্ভিদাঞাণপ্পভেদং পাপুণাতি.

বহুস্সুতোতি বুদ্ধৰচনৰসেন. দেসনাবহুলোতি ধম্মদেসনাৰসেন. গরূপনিস্সিতোতি পঞ্ঞায অধিকং গরুং উপনিস্সিতো. ৰিহারবহুলোতি ৰিপস্সনাৰিহারবহুলো, ফলসমাপত্তিৰিহারবহুলো ৰা. পচ্চৰেক্খণাবহুলোতি ৰিপস্সনাৰিহারে সতি ৰিপস্সনাপচ্চৰেক্খণাবহুলো, ফলসমাপত্তিৰিহারে সতি ফলসমাপত্তিপচ্চৰেক্খণাবহুলো. সেখপটিসম্ভিদপ্পত্তোতি সেখো হুত্ৰা পটিসম্ভিদপ্পত্তো. এৰং অসেখপটিসম্ভিদপ্পত্তো. সাৰকপারমিপ্পত্তোতি এত্থ মহাপঞ্ঞানং অগ্গস্স মহাসাৰকস্স সত্তসট্ঠিযা সাৰকঞাণানং পারগমনং পারমী, সাৰকস্স পারমী সাৰকপারমী, তং সাৰকপারমিং পত্তোতি সাৰকপারমিপ্পত্তো. সাৰকপারমিতাপ্পত্তোতি ৰা পাঠো. সত্তসট্ঠিযা সাৰকঞাণানং পালকো পূরকো চ সো মহাসাৰকো পরমো, তস্স পরমস্স অযং সত্তসট্ঠিভেদা ঞাণকিরিযা পরমস্স ভাৰো, কম্মং ৰাতি পারমী, তস্স সাৰকস্স পারমী সাৰকপারমী, তং পত্তোতি সাৰকপারমিপ্পত্তো. সাৰকপারমিপ্পত্তোতি মহামোগ্গল্লানত্থেরাদিকো যো কোচি সাৰকো. সাৰকপারমিপ্পত্তসাৰকতো অতিরেকস্স অঞ্ঞস্স সাৰকস্স অভাৰা একো পচ্চেকসম্বুদ্ধোতি আহ. পুন পঞ্ঞাপভেদকুসলোতিআদীহি ৰুত্তত্থমেৰ নিগমেত্ৰা দস্সেসীতি. ঞাণকথায যেভুয্যেন অনেকানি ঞাণানি নিদ্দিট্ঠানি. পঞ্ঞাকথায যেভুয্যেন একাপি পঞ্ঞা নানাকারৰসেন নানাকত্ৰা ৰুত্তাতি অযং ৰিসেসো.

মহাপঞ্ঞাকথাৰণ্ণনা নিট্ঠিতা.