৪৪-৪৯. ৰিৰট্টঞাণছক্কনিদ্দেসৰণ্ণনা

৯৫. ৰিৰট্টঞাণছক্কনিদ্দেসে নেক্খম্মাধিপতত্তা পঞ্ঞাতি নেক্খম্মং অধিকং কত্ৰা নেক্খম্মাধিকভাৰেন পৰত্তা পঞ্ঞা. কামচ্ছন্দতো সঞ্ঞায ৰিৰট্টতীতি নেক্খম্মাধিপতিকতপঞ্ঞাসম্পযুত্তসঞ্ঞায হেতুভূতায, করণভূতায ৰা কামচ্ছন্দতো ৰিৰট্টতি পরাৰত্ততি, পরম্মুখী হোতীতি অত্থো. এস নযো সেসেসু.

৯৬. কামচ্ছন্দো নানত্তন্তি কামচ্ছন্দো সন্তৰুত্তিতায অভাৰতো ন একসভাৰো. নেক্খম্মং একত্তন্তি নেক্খম্মং সন্তৰুত্তিভাৰতো একসভাৰো. নেক্খম্মেকত্তং চেতযতোতি কামচ্ছন্দে আদীনৰদস্সনেন নেক্খম্মং পৰত্তযতো. কামচ্ছন্দতো চিত্তং ৰিৰট্টতীতি দিট্ঠাদীনৰতো কামচ্ছন্দতো নেক্খম্মক্খণে চিত্তং ৰিৰট্টতি. এস নযো সেসেসু.

৯৭. কামচ্ছন্দং পজহন্তোতি নেক্খম্মপৰত্তিক্খণে কামচ্ছন্দং ৰিক্খম্ভনপ্পহানেন পজহন্তো. নেক্খম্মৰসেন চিত্তং অধিট্ঠাতীতি পটিলদ্ধস্স নেক্খম্মস্স ৰসেন তংসম্পযুত্তচিত্তং অধিতিট্ঠতি অধিকং করোন্তো তিট্ঠতি, পৰত্তেতীতি অত্থো. এস নযো সেসেসু.

৯৮. চক্খু সুঞ্ঞং অত্তেন ৰাতি বালজনপরিকপ্পিতস্স কারকৰেদকসঙ্খাতস্স অত্তনো অভাৰা চক্খু অত্তেন চ সুঞ্ঞং. যঞ্হি যত্থ ন হোতি, তেন তং সুঞ্ঞং নাম হোতি. অত্তনিযেন ৰাতি অত্তনো অভাৰেনেৰ অত্তনো সন্তকস্সপি অভাৰা অত্তনো সন্তকেন চ সুঞ্ঞং. লোকস্স অত্তাতি চ অত্তনিযন্তি চ উভযথা গাহসম্ভৰতো তদুভযগাহপটিসেধনত্থং অত্তাভাৰো চ অত্তনিযাভাৰো চ ৰুত্তো. নিচ্চেন ৰাতি ভঙ্গং অতিক্কমিত্ৰা তিট্ঠন্তস্স কস্সচি অভাৰতো নিচ্চেন চ সুঞ্ঞং. ধুৰেন ৰাতি পৰত্তিক্খণেপি থিরস্স কস্সচি অভাৰতো ধুৰেন চ সুঞ্ঞং. সস্সতেন ৰাতি সব্বকালেপি ৰিজ্জমানস্স কস্সচি অভাৰতো সস্সতেন চ সুঞ্ঞং. অৰিপরিণামধম্মেন ৰাতি জরাভঙ্গৰসেন দ্ৰিধা অপরিৰত্তমানপকতিকস্স কস্সচি অভাৰতো অৰিপরিণামধম্মেন চ সুঞ্ঞং. অথ ৰা নিচ্চভাৰেন চ ধুৰভাৰেন চ সস্সতভাৰেন চ অৰিপরিণামধম্মভাৰেন চ সুঞ্ঞন্তি অত্থো. সমুচ্চযত্থো ৰা-সদ্দো. যথাভূতং জানতো পস্সতোতি ইচ্চেৰং অনত্তানুপস্সনাঞাণেন যথাসভাৰেন জানন্তস্স চক্খুনা ৰিয চ পস্সন্তস্স. চক্খাভিনিৰেসতো ঞাণং ৰিৰট্টতীতি চক্খু অত্তাতি ৰা অত্তনিযন্তি ৰা পৰত্তমানতো দিট্ঠাভিনিৰেসতো তদঙ্গপ্পহানৰসেন ঞাণং ৰিৰট্টতি. এস নযো সেসেসু.

৯৯. নেক্খম্মেন কামচ্ছন্দং ৰোসজ্জতীতি নেক্খম্মলাভী পুগ্গলো নেক্খম্মেন তপ্পটিপক্খং কামচ্ছন্দং পরিচ্চজতি. ৰোসগ্গে পঞ্ঞাতি কামচ্ছন্দস্স ৰোসগ্গভূতে নেক্খম্মে তংসম্পযুত্তা পঞ্ঞা. এস নযো সেসেসু. পীল়নট্ঠাদযো হেট্ঠা ৰুত্তত্থা এৰ. পরিজানন্তো ৰিৰট্টতীতি পুগ্গলাধিট্ঠানা দেসনা, মগ্গসমঙ্গীপুগ্গলো দুক্খস্স চতুব্বিধং অত্থং কিচ্চৰসেন পরিজানন্তো দুভতো ৰুট্ঠানৰসেন ৰিৰট্টতি, ঞাণৰিৰট্টনেপি ঞাণসমঙ্গী ৰিৰট্টতীতি ৰুত্তো.

১০০. তথট্ঠে পঞ্ঞাতি এতস্স পুগ্গলস্সেৰ তথট্ঠে ৰিৰট্টনা পঞ্ঞা. এস নযো সেসেসু. ইদানি মগ্গক্খণে এৰ কিচ্চৰসেন আকারনানত্ততো ছ ৰিৰট্টঞাণানি দস্সেতুং সঞ্ঞাৰিৰট্টোতিআদিমাতিকং ঠপেত্ৰা তং অত্থতো ৰিভজন্তো সঞ্জানন্তো ৰিৰট্টতীতিআদিমাহ. তত্থ সঞ্জানন্তো ৰিৰট্টতীতি সঞ্ঞাৰিৰট্টোতি যস্মা পুব্বভাগে নেক্খম্মাদিং অধিপতিতো সঞ্জানন্তো যোগী পচ্ছা নেক্খম্মসম্পযুত্তঞাণেন কামচ্ছন্দাদিতো ৰিৰট্টতি, তস্মা তং ঞাণং সঞ্ঞাৰিৰট্টো নামাতি অত্থো. চেতযন্তো ৰিৰট্টতীতি চেতোৰিৰট্টোতি যস্মা যোগী নেক্খম্মেকত্তাদীনি চেতযন্তো সম্পযুত্তঞাণেন কামচ্ছন্দাদিতো ৰিৰট্টতি, তস্মা তং ঞাণং চেতোৰিৰট্টো নামাতি অত্থো. ৰিজানন্তো ৰিৰট্টতীতি চিত্তৰিৰট্টোতি যস্মা যোগী নেক্খম্মাদিৰসেন চিত্তাধিট্ঠানেন ৰিজানন্তো তংসম্পযুত্তঞাণেন কামচ্ছন্দাদিতো ৰিৰট্টতি, তস্মা তং ঞাণং চিত্তৰিৰট্টো নামাতি অত্থো. ঞাণং করোন্তো ৰিৰট্টতীতি ঞাণৰিৰট্টোতি যস্মা যোগী ছব্বিধং অজ্ঝত্তিকাযতনং অনত্তানুপস্সনাঞাণেন সুঞ্ঞতো ৰিদিতং করোন্তো তেনেৰ ঞাণেন দিট্ঠাভিনিৰেসতো ৰিৰট্টতি, তস্মা তং ঞাণং ঞাণৰিৰট্টো নামাতি অত্থো. ৰোসজ্জন্তো ৰিৰট্টতীতি ৰিমোক্খৰিৰট্টোতি যস্মা যোগী নেক্খম্মাদীহি কামচ্ছন্দাদীনি ৰোসজ্জন্তো তংসম্পযুত্তঞাণেন কামচ্ছন্দাদিতো ৰিৰট্টতি, তস্মা তং ঞাণং ৰিমোক্খৰিৰট্টো নামাতি অত্থো. তথট্ঠে ৰিৰট্টতীতি সচ্চৰিৰট্টোতি যস্মা যোগী চতুব্বিধে তথট্ঠে দুভতো ৰুট্ঠানৰসেন ৰিৰট্টতি, তস্মা মগ্গঞাণং সচ্চৰিৰট্টো নামাতি অত্থো. মগ্গঞাণমেৰ ৰা তথট্ঠে দুভতো ৰুট্ঠানভাৰেন ৰিৰট্টতীতি সচ্চৰিৰট্টোতি অত্থো.

যত্থ সঞ্ঞাৰিৰট্টোতিআদি সচ্চৰিৰট্টঞাণনিদ্দেসে ৰুত্তত্তা সচ্চৰিৰট্টঞাণক্খণমেৰ সন্ধায ৰুত্তন্তি ৰেদিতব্বং. মগ্গক্খণেযেৰ হি সব্বানি যুজ্জন্তি. কথং? ঞাণৰিৰট্টে ঞাণঞ্হি ৰজ্জেত্ৰা সেসেসু অরিযমগ্গো সরূপেনেৰ আগতো. ৰিপস্সনাকিচ্চস্স পন মগ্গেনেৰ সিজ্ঝনতো ৰিপস্সনাকিচ্চসিদ্ধিৰসেন ঞাণৰিৰট্টঞাণম্পি মগ্গক্খণে যুজ্জতি. মগ্গঞাণেনেৰ ৰা ‘‘চক্খু সুঞ্ঞ’’ন্তিআদি কিচ্চৰসেন পটিৰিদ্ধমেৰ হোতীতি মগ্গক্খণে তং ঞাণং ৰত্তুং যুজ্জতিযেৰ. অত্থযোজনা পনেত্থ ‘‘যত্থ মগ্গক্খণে সঞ্ঞাৰিৰট্টো, তত্থ চেতোৰিৰট্টো. যত্থ মগ্গক্খণে চেতোৰিৰট্টো, তত্থ সঞ্ঞাৰিৰট্টো’’তি এৰমাদিনা নযেন সব্বসংসন্দনেসু যোজনা কাতব্বা. অথ ৰা সঞ্ঞাৰিৰট্টচেতোৰিৰট্টচিত্তৰিৰট্টৰিমোক্খৰিৰট্টেসু চতুন্নং অরিযমগ্গানং আগতত্তা সচ্চৰিৰট্টো আগতোযেৰ হোতি. ঞাণৰিৰট্টো চ সচ্চৰিৰট্টেনেৰ কিচ্চৰসেন সিদ্ধো হোতি. সঞ্ঞাচেতোচিত্তৰিমোক্খৰিৰট্টেস্ৰেৰ চ পেয্যালে ৰিত্থারিযমানে ‘‘অনত্তানুপস্সনাধিপতত্তা পঞ্ঞা অভিনিৰেসতো সঞ্ঞায ৰিৰট্টতীতি অধিপতত্তা পঞ্ঞা সঞ্ঞাৰিৰট্টে ঞাণ’’ন্তি চ, ‘‘অভিনিৰেসো নানত্তং, অনত্তানুপস্সনা একত্তং. অনত্তানুপস্সনেকত্তং চেতযতো অভিনিৰেসতো চিত্তং ৰিৰট্টতীতি নানত্তে পঞ্ঞা চেতোৰিৰট্টে ঞাণ’’ন্তি চ, ‘‘অভিনিৰেসং পজহন্তো অনত্তানুপস্সনাৰসেন চিত্তং অধিট্ঠাতীতি অধিট্ঠানে পঞ্ঞা চিত্তৰিৰট্টে ঞাণ’’ন্তি চ, ‘‘অনত্তানুপস্সনায অভিনিৰেসং ৰোসজ্জতীতি ৰোসগ্গে পঞ্ঞা ৰিমোক্খৰিৰট্টে ঞাণ’’ন্তি চ পাঠসম্ভৰতো ঞাণৰিৰট্টে ঞাণম্পি তেসু আগতমেৰ হোতি. ঞাণৰিৰট্টে চ অনত্তানুপস্সনায ৰুট্ঠায অরিযমগ্গং পটিলদ্ধস্স কিচ্চৰসেন ‘‘চক্খু সুঞ্ঞং অত্তেন ৰা অত্তনিযেন ৰা’’তিআদিযুজ্জনতো সচ্চৰিৰট্টো লব্ভতি, তস্মা একেকস্মিং ৰিৰট্টে সেসা পঞ্চ পঞ্চ ৰিৰট্টা লব্ভন্তি. তস্মা এৰং ‘‘যত্থ সঞ্ঞাৰিৰট্টো, তত্থ চেতোৰিৰট্টো’’তিআদিকানি সংসন্দনানি ৰুত্তানীতি ৰেদিতব্বং.

ৰিৰট্টঞাণছক্কনিদ্দেসৰণ্ণনা নিট্ঠিতা.