৩৭. সল্লেখট্ঠঞাণনিদ্দেসৰণ্ণনা

৮৮. সল্লেখট্ঠঞাণনিদ্দেসে রাগো পুথূতি রাগো ৰিসুং, লোকুত্তরেহি অসম্মিস্সোতি অত্থো. এস নযো সেসেসু. রাগোতি রঞ্জনট্ঠেন. দোসোতি দুস্সনট্ঠেন. মোহোতি মুয্হনট্ঠেন. রঞ্জনলক্খণো রাগো, দুস্সনলক্খণো দোসো, মুয্হনলক্খণো মোহোতি ইমে তযো সীসকিলেসে ৰত্ৰা ইদানি পভেদতো দস্সেন্তো কোধোতিআদিমাহ. তত্থ কুজ্ঝনলক্খণো কোধোতি ইধ সত্তৰত্থুকো অধিপ্পেতো. উপনন্ধনলক্খণো উপনাহো, দল়্হভাৰপ্পত্তো কোধোযেৰ. পরগুণমক্খনলক্খণো মক্খো, পরগুণপুঞ্ছনন্তি অত্থো. যুগগ্গাহলক্খণো পল়াসো, যুগগ্গাহৰসেন পরগুণদস্সনন্তি অত্থো. পরসম্পত্তিখীযনলক্খণা ইস্সা, উসূযনাতি অত্থো. অত্তসম্পত্তিনিগূহনলক্খণং মচ্ছরিযং, ‘‘ময্হং অচ্ছরিযং মা পরস্স হোতূ’’তি অত্থো. অত্তনা কতপাপপটিচ্ছাদনলক্খণা মাযা, পটিচ্ছাদনট্ঠেন মাযা ৰিযাতি অত্থো. অত্তনো অৰিজ্জমানগুণপ্পকাসনলক্খণং সাঠেয্যং, সঠভাৰোতি অত্থো. চিত্তস্স উদ্ধুমাতভাৰলক্খণো থম্ভো, থদ্ধভাৰোতি অত্থো. করণুত্তরিযলক্খণো সারম্ভো. উন্নতিলক্খণো মানো. অব্ভুন্নতিলক্খণো অতিমানো. মত্তভাৰলক্খণো মদো. পঞ্চসু কামগুণেসু চিত্তৰোসগ্গলক্খণো পমাদো.

এৰং ৰিসুং ৰিসুং কিলেসৰসেন পুথূ দস্সেত্ৰা ৰুত্তকিলেসে চ অৰুত্তে চ অঞ্ঞে সব্বসঙ্গাহিকৰসেন দস্সেতুং সব্বে কিলেসাতিআদিমাহ. তত্থ দিট্ঠধম্মসম্পরাযেসু সত্তে কিলেসেন্তি উপতাপেন্তি ৰিবাধেন্তীতি কিলেসা. অকুসলকম্মপথসঙ্গহিতা চ অসঙ্গহিতা চ. দুট্ঠু চরিতা, দুট্ঠা ৰা চরিতাতি দুচ্চরিতা. তে পন কাযদুচ্চরিতং ৰচীদুচ্চরিতং মনোদুচ্চরিতন্তি তিপ্পকারা. ৰিপাকং অভিসঙ্খরোন্তীতি অভিসঙ্খারা. তেপি পুঞ্ঞাভিসঙ্খারো অপুঞ্ঞাভিসঙ্খারো আনেঞ্জাভিসঙ্খারোতি তিপ্পকারা. ৰিপাকৰসেন ভৰং গচ্ছন্তীতিভৰগামিনো, ভৰগামিনো কম্মা ভৰগামিকম্মা. ইমিনা অভিসঙ্খারভাৰেপি সতি অৰেদনীযানি কম্মানি পটিক্খিত্তানি হোন্তীতি অযং ৰিসেসো. ‘‘দুচ্চরিতা’’তি চ ‘‘কম্মা’’তি চ লিঙ্গৰিপল্লাসো কতো. নানত্তেকত্তন্তি এত্থ উদ্দেসে একত্তসদ্দস্স অভাৰেপি নানত্তেকত্তানং অঞ্ঞমঞ্ঞাপেক্খত্তা একত্তম্পি নিদ্দিসিতুকামেন ‘‘নানত্তেকত্ত’’ন্তি উদ্দেসো কতো. নানত্তসল্লেখকে একত্তে দস্সিতে সল্লেখঞাণং সুখেন দস্সীযতীতি. নানত্তন্তি অনৰট্ঠিতত্তা সপরিপ্ফন্দত্তা চ নানাসভাৰো. একত্তন্তি অৰট্ঠিতত্তা অপরিপ্ফন্দত্তা চ একসভাৰো.

চরণতেজোতি চরন্তি তেন অগতং দিসং নিব্বানং গচ্ছন্তীতি চরণং. কিং তং? সীলং. তদেৰ পটিপক্খতাপনট্ঠেন তেজো. গুণতেজোতি সীলেন লদ্ধপতিট্ঠো সমাধিতেজো. পঞ্ঞাতেজোতি সমাধিনা লদ্ধপতিট্ঠো ৰিপস্সনাতেজো. পুঞ্ঞতেজোতি ৰিপস্সনাহি লদ্ধপতিট্ঠো অরিযমগ্গকুসলতেজো. ধম্মতেজোতি চতুন্নং তেজানং পতিট্ঠাভূতো বুদ্ধৰচনতেজো. চরণতেজেন তেজিতত্তাতি সীলতেজেন তিখিণীকতত্তা. দুস্সীল্যতেজন্তি দুস্সীলভাৰসঙ্খাতং তেজং. তম্পি হি সন্তানং তাপনতো তেজো নাম. পরিযাদিযতীতি খেপেতি. অগুণতেজন্তি সমাধিস্স পটিপক্খং ৰিক্খেপতেজং. দুপ্পঞ্ঞতেজন্তি ৰিপস্সনাঞাণপটিপক্খং মোহতেজং. অপুঞ্ঞতেজন্তি তংতংমগ্গৰজ্ঝকিলেসপ্পহানেন কিলেসসহাযং অকুসলকম্মতেজং. ন কেৰলঞ্হেতং অপুঞ্ঞমেৰ খেপেতি, ‘‘অত্থি, ভিক্খৰে, কম্মং অকণ্হং অসুক্কং অকণ্হঅসুক্কৰিপাকং কম্মং কম্মক্খযায সংৰত্ততী’’তি (অ. নি. ৪.২৩৩; দী. নি. ৩.৩১২; ম. নি. ২.১৮) ৰচনতো কুসলকম্মম্পি খেপেতিযেৰ. পুঞ্ঞতেজপটিপক্খৰসেন অপুঞ্ঞতেজমেৰ ৰুত্তং. অধম্মতেজন্তি নানাতিত্থিযানং সমযৰচনতেজং. ইমস্স ঞাণস্স উদ্দেসৰণ্ণনাযং ৰুত্তে দুতিযে অত্থৰিকপ্পে রাগাদযো একূনৰীসতি পুথু দুস্সীল্যতেজা হোন্তি. ‘‘অভিসঙ্খারা, ভৰগামিকম্মা’’তি এত্থ অপুঞ্ঞাভিসঙ্খারা অকুসলকম্মঞ্চ অপুঞ্ঞতেজা হোন্তি, আনেঞ্জাভিসঙ্খারানি লোকিযকুসলকম্মানি পুঞ্ঞতেজেনেৰ খেপনীযতো অপুঞ্ঞতেজপক্খিকাৰ হোন্তি. কামচ্ছন্দাদযো পঞ্চদস নানত্তা অগুণতেজা হোন্তি, নিচ্চসঞ্ঞাদযো অট্ঠারস নানত্তা দুপ্পঞ্ঞতেজা হোন্তি, চতুমগ্গৰজ্ঝা চত্তারো নানত্তা অপুঞ্ঞতেজা হোন্তি. সোতাপত্তিমগ্গৰজ্ঝনানত্তেন অধম্মতেজো সঙ্গহেতব্বো.

নিদ্দেসে সল্লেখপটিপক্খেন অসল্লেখেন সল্লেখং দস্সেতুকামেন অসল্লেখপুব্বকো সল্লেখো নিদ্দিট্ঠো. নেক্খম্মাদযো সত্ততিংস একত্তধম্মাৰ পচ্চনীকানং সল্লিখনতো ‘‘সল্লেখো’’তি ৰুত্তা. তস্মিং নেক্খম্মাদিকে সত্ততিংসপভেদে সল্লেখে ঞাণং সল্লেখট্ঠে ঞাণন্তি.

সল্লেখট্ঠঞাণনিদ্দেসৰণ্ণনা নিট্ঠিতা.