৩৮. ৰীরিযারম্ভঞাণনিদ্দেসৰণ্ণনা

৮৯. ৰীরিযারম্ভঞাণনিদ্দেসে অনুপ্পন্নানন্তি একস্মিং অত্তভাৰে, একস্মিং ৰা আরম্মণে অনিব্বত্তানং. অনমতগ্গে হি সংসারে অনুপ্পন্না অকুসলা নাম নত্থি, কুসলা পন অত্থি. পাপকানন্তি লামকানং. অকুসলানং ধম্মানন্তি অকোসল্লসম্ভূতানং ধম্মানং. অনুপ্পাদাযাতি ন উপ্পাদনত্থায. উপ্পন্নানন্তি ইমস্মিং অত্তভাৰে নিব্বত্তানং. পহানাযাতি পজহনত্থায. অনুপ্পন্নানং কুসলানং ধম্মানন্তি ইমস্মিং অত্তভাৰে অনিব্বত্তপুব্বানং কোসল্লসম্ভূতানং ধম্মানং. উপ্পাদাযাতি উপ্পাদনত্থায. উপ্পন্নানন্তি ইমস্মিং অত্তভাৰে নিব্বত্তানং. ঠিতিযাতি ঠিতত্থায. অসম্মোসাযাতি অৰিনাসত্থায. ভিয্যোভাৰাযাতি পুনপ্পুনভাৰায. ৰেপুল্লাযাতি ৰিপুলভাৰায. ভাৰনাযাতি ৰড্ঢিযা. পারিপূরিযাতি পরিপূরণত্থায.

ইদানি অকুসলেসু কামচ্ছন্দং, কুসলেসু নেক্খম্মং ৰিসেসেত্ৰা দস্সেতুং অনুপ্পন্নস্স কামচ্ছন্দস্সাতিআদিমাহ. তত্থ কামচ্ছন্দোতি সমাধিপটিপক্খো কামরাগো. নেক্খম্মন্তি পঠমজ্ঝানসমাধি, পঠমজ্ঝানং ৰা, সব্বে এৰ ৰা কুসলা ধম্মা নেক্খম্মং.

ইদানি সব্বকিলেসানং সব্বকিলেসপটিপক্খস্স অরহত্তমগ্গস্স চ ৰসেন যোজেত্ৰা দস্সেতুং অনুপ্পন্নানং সব্বকিলেসানন্তিআদিমাহ. তত্থ উপ্পন্নস্স অরহত্তমগ্গস্স ঠিতিযাতিআদীসু উপ্পাদক্খণে উপ্পন্নস্স অরহত্তমগ্গস্স ঠিতিক্খণভঙ্গক্খণৰসেন ‘‘ঠিতিযা’’তিআদিযোজনা ৰেদিতব্বা. ৰিভঙ্গট্ঠকথাযম্পি ‘‘যা চস্স পৰত্তি, অযমেৰ ঠিতি নামা’’তি (ৰিভ. অট্ঠ. ৪০৬) ৰুত্তং. কেচি পন ‘‘অরহত্তমগ্গস্স পুব্বভাগমগ্গো দট্ঠব্বো’’তি ৰদন্তি.

ৰীরিযারম্ভঞাণনিদ্দেসৰণ্ণনা নিট্ঠিতা.