২৯-৩১. ঞাণত্তযনিদ্দেসৰণ্ণনা

৭৮. ঞাণত্তযনিদ্দেসে নিমিত্তন্তি সঙ্খারনিমিত্তং. অনিমিত্তেতি সঙ্খারনিমিত্তপটিপক্খে নিব্বানে. অধিমুত্তত্তাতি তন্নিন্নভাৰেন চিত্তস্স ৰিস্সট্ঠত্তা. ফুস্স ফুস্স ৰযং পস্সতীতি সঙ্খারনিমিত্তং ঞাণেন ফুসিত্ৰা ফুসিত্ৰা তস্স ভঙ্গং ৰিপস্সনাঞাণেনেৰ পস্সতি. এতেন ভঙ্গানুপস্সনা সিদ্ধা. সা অনিচ্চানুপস্সনং সাধেতি, অনিচ্চস্স দুক্খত্তা সা দুক্খানুপস্সনং, দুক্খস্স অনত্তত্তা সা অনত্তানুপস্সনন্তি এৰমেত্থ তিস্সো অনুপস্সনা ৰুত্তা হোন্তি. অনিমিত্তো ৰিহারোতি নিমিত্তং ভযতো দিট্ঠত্তা সো ৰিপস্সনত্তযৰিহারো অনিমিত্তৰিহারো নাম হোতি. পণিধিন্তি তণ্হং. অপ্পণিহিতেতি তণ্হাপটিপক্খে নিব্বানে. অভিনিৰেসন্তি অত্তাভিনিৰেসং. সুঞ্ঞতেতি অত্তৰিরহিতে নিব্বানে. সুঞ্ঞতোতি সুঞ্ঞংযেৰ সুঞ্ঞতো. পৰত্তং অজ্ঝুপেক্খিত্ৰাতি ৰিপাকপ্পৰত্তং সঙ্খারুপেক্খায অজ্ঝুপেক্খিত্ৰা. সুগতিসঙ্খাতৰিপাকপ্পৰত্তাভিনন্দিনো হি সত্তা. অযং পন ফলসমাপত্তিং সমাপজ্জিতুকামো তং পৰত্তং, সব্বঞ্চ সঙ্খারগতং অনিচ্চাদিতো পস্সিত্ৰা অজ্ঝুপেক্খতিযেৰ. এৰঞ্হি দিট্ঠে ফলসমাপত্তিং সমাপজ্জিতুং সক্কোতি, ন অঞ্ঞথা. আৰজ্জিত্ৰাতি আৰজ্জনেন আৰজ্জিত্ৰা. সমাপজ্জতীতি ফলসমাপত্তিং পটিপজ্জতি. অনিমিত্তা সমাপত্তীতি নিমিত্তং ভযতো দিস্ৰা সমাপন্নত্তা অনিমিত্তা সমাপত্তি নাম. অনিমিত্তৰিহারসমাপত্তীতি ৰিপস্সনাৰিহারৰসেন চ ফলসমাপত্তিৰসেন চ তদুভযং নাম হোতি.

৭৯. ইদানি সঙ্খারনিমিত্তমেৰ ৰিভজিত্ৰা দস্সেন্তো রূপনিমিত্তন্তিআদিমাহ. জরামরণগ্গহণে ৰত্তব্বং পুব্বে ৰুত্তমেৰ. ‘‘অঞ্ঞো অনিমিত্তৰিহারো’’তিআদীহি ৰুত্তেযেৰ নিগমেত্ৰা দস্সেতি. সঙ্খেপেন ৰিহারট্ঠে ঞাণং নাম ফলসমাপত্তিযা পুব্বভাগে সঙ্খারুপেক্খাঞাণে ঠিতস্স ৰিপস্সনাৰিহারনানত্তে ঞাণং সমাপত্তট্ঠে ঞাণং নাম ফলসমাপত্তিনানত্তে ঞাণং. ৰিহারসমাপত্তট্ঠে ঞাণং নাম তদুভযনানত্তে ঞাণং. ৰিপস্সনাৰিহারেনেৰ ৰীতিনামেতুকামো ৰিপস্সনাৰিহারমেৰ পৰত্তেতি, ফলসমাপত্তিৰিহারেনেৰ ৰীতিনামেতুকামো ৰিপস্সনাপটিপাটিযা উস্সক্কিত্ৰা ফলসমাপত্তিৰিহারমেৰ পৰত্তেতি, তদুভযেন ৰীতিনামেতুকামো তদুভযং পৰত্তেতি. এৰং পুগ্গলাধিপ্পাযৰসেন তিৰিধং জাতং. সেসমেত্থ ৰত্তব্বং সঙ্খারুপেক্খাঞাণৰণ্ণনাযং ৰুত্তমেৰ.

ঞাণত্তযনিদ্দেসৰণ্ণনা নিট্ঠিতা.