১৬. গোচরনানত্তঞাণনিদ্দেসৰণ্ণনা

৬৭. গোচরনানত্তঞাণনিদ্দেসে রূপে বহিদ্ধা ৰৰত্থেতীতি অজ্ঝত্ততো বহিদ্ধাভূতে রূপাযতনধম্মে ৰৰত্থপেতীতি অত্থো. অৰিজ্জাসম্ভূতাতিআদি অত্তভাৰপরিযাপন্নকম্মজরূপত্তা ৰুত্তং. আহারোপি হি কম্মজরূপস্স উপত্থম্ভকপচ্চযো হোতি. সদ্দস্স পন উতুচিত্তসমুট্ঠানত্তা অৰিজ্জাসম্ভূতাদিচতুক্কং ন ৰুত্তং. ফোট্ঠব্বানং সযং মহাভূতত্তা ‘‘চতুন্নং মহাভূতানং উপাদাযা’’তি ন ৰুত্তং. ধম্মাতি চেত্থ ভৰঙ্গমনোসম্পযুত্তা তযো অরূপিনো খন্ধা, ধম্মাযতনপরিযাপন্নানি সুখুমরূপানি চ কম্মসমুট্ঠানানি, সব্বানিপি রূপাদীনি চ. অপিচ যানি যানি যেন যেন সমুট্ঠহন্তি, তানি তানি তেন তেন ৰেদিতব্বানি. ইতরথা হি সকসন্তানপরিযাপন্নাপি রূপাদযো ধম্মা সব্বে ন সঙ্গণ্হেয্যুং. যস্মা অনিন্দ্রিযবদ্ধরূপাদযোপি ৰিপস্সনূপগা, তস্মা তেসং কম্মসম্ভূতপদেন সঙ্গহো ৰেদিতব্বো. তেপি হি সব্বসত্তসাধারণকম্মপচ্চযউতুসমুট্ঠানা. অঞ্ঞে পন ‘‘অনিন্দ্রিযবদ্ধা রূপাদযো অৰিপস্সনূপগা’’তি ৰদন্তি. তং পন –

‘‘সব্বে সঙ্খারা অনিচ্চাতি, যদা পঞ্ঞায পস্সতি;

অথ নিব্বিন্দতি দুক্খে, এস মগ্গো ৰিসুদ্ধিযা’’তি. (ধ. প. ২৭৭) –

আদিকায পাল়িযা ৰিরুজ্ঝতি. ৰুত্তঞ্চ ৰিসুদ্ধিমগ্গে – ‘‘ইধেকচ্চো আদিতোৰ অজ্ঝত্তসঙ্খারে অভিনিৰিসিত্ৰা ৰিপস্সতি, যস্মা পন ন সুদ্ধঅজ্ঝত্তদস্সনমত্তেনেৰ মগ্গৰুট্ঠানং হোতি, বহিদ্ধাপি দট্ঠব্বমেৰ, তস্মা পরস্স খন্ধেপি অনুপাদিন্নসঙ্খারেপি অনিচ্চং দুক্খমনত্তাতি ৰিপস্সতী’’তি (ৰিসুদ্ধি. ২.৭৮৪). তস্মা পরেসং চক্খাদিৰৰত্থানম্পি অনিন্দ্রিযবদ্ধরূপাদিৰৰত্থানম্পি ইচ্ছিতব্বমেৰ, তস্মা তেভূমকসঙ্খারা অৰিপস্সনূপগা নাম নত্থি.

গোচরনানত্তঞাণনিদ্দেসৰণ্ণনা নিট্ঠিতা.