নিরোধসচ্চনিদ্দেসৰণ্ণনা

৩৫. নিরোধসচ্চনিদ্দেসে যো তস্সাযেৰ তণ্হাযাতি এত্থ ‘‘যো তস্সেৰ দুক্খস্সা’’তি ৰত্তব্বে যস্মা সমুদযনিরোধেনেৰ দুক্খং নিরুজ্ঝতি, নো অঞ্ঞথা. যথাহ –

‘‘যথাপি মূলে অনুপদ্দৰে দল়্হে, ছিন্নোপি রুক্খো পুনরেৰ রূহতি;

এৰম্পি তণ্হানুসযে অনূহতে, নিব্বত্ততী দুক্খমিদং পুনপ্পুন’’ন্তি. (ধ. প. ৩৩৮);

তস্মা তং দুক্খনিরোধং দস্সেন্তো সমুদযনিরোধেন দস্সেতুং এৰমাহ. সীহসমানৰুত্তিনো হি তথাগতা, তে দুক্খং নিরোধেন্তা দুক্খনিরোধঞ্চ দস্সেন্তা হেতুম্হি পটিপজ্জন্তি, ন ফলে. সুৰানৰুত্তিনো পন অঞ্ঞতিত্থিযা, তে দুক্খং নিরোধেন্তা দুক্খনিরোধঞ্চ দস্সেন্তা অত্তকিলমথানুযোগেন চেৰ তস্সেৰ চ দেসনায ফলে পটিপজ্জন্তি, ন হেতুম্হীতি. সীহসমানৰুত্তিতায সত্থা হেতুম্হি পটিপজ্জন্তো ‘‘যো তস্সাযেৰা’’তিআদিমাহ. ধম্মসেনাপতিপি সত্থারা ৰুত্তক্কমেনেৰাহ.

তত্থ তস্সাযেৰ তণ্হাযাতি যা সা তণ্হা ‘‘পোনোভৰিকা’’তি ৰত্ৰা কামতণ্হাদিৰসেন ৰিভত্তা উপ্পত্তিনিৰেসনৰসেন চ হেট্ঠা পকাসিতা, তস্সাযেৰ তণ্হায. অসেসৰিরাগনিরোধোতি ৰিরাগো ৰুচ্চতি মগ্গো, ‘‘ৰিরাগা ৰিমুচ্চতী’’তি (ম. নি. ১.২৪৫; সং. নি. ৩.১২; মহাৰ. ২৩) হি ৰুত্তং. ৰিরাগেন নিরোধো ৰিরাগনিরোধো, অনুসযসমুগ্ঘাততো অসেসো ৰিরাগনিরোধো অসেসৰিরাগনিরোধো. অথ ৰা ৰিরাগোতি হি পহানং ৰুচ্চতি, তস্মা অসেসো ৰিরাগো অসেসো নিরোধোতি এৰম্পেত্থ যোজনা দট্ঠব্বা. অত্থতো পন সব্বানেৰ পনেতানি অসেসৰিরাগনিরোধোতিআদীনি নিব্বানস্সেৰ ৰেৰচনানি. পরমত্থতো হি দুক্খনিরোধং অরিযসচ্চন্তি নিব্বানং ৰুচ্চতি. যস্মা পন তং আগম্ম তণ্হা অসেসা ৰিরজ্জতি নিরুজ্ঝতি, তস্মা তং ‘‘তস্সাযেৰ তণ্হায অসেসৰিরাগনিরোধো’’তি ৰুচ্চতি. নিব্বানঞ্চ আগম্ম তণ্হা চজীযতি পটিনিস্সজ্জীযতি মুচ্চতি ন অল্লীযতি, কামগুণালযেসু চেত্থ একোপি আলযো নত্থি, তস্মা নিব্বানং চাগো পটিনিস্সগ্গো মুত্তি অনালযোতি ৰুচ্চতি. একমেৰ হি নিব্বানং, নামানি পনস্স সব্বসঙ্খতানং নামপটিপক্খৰসেন অনেকানি হোন্তি. সেয্যথিদং – অসেসৰিরাগো অসেসনিরোধো চাগো পটিনিস্সগ্গো মুত্তি অনালযো রাগক্খযো দোসক্খযো মোহক্খযো তণ্হাক্খযো অনুপ্পাদো অপ্পৰত্তং অনিমিত্তং অপ্পণিহিতং অনাযূহনং অপ্পটিসন্ধি অনুপপত্তি অগতি অজাতং অজরং অব্যাধি অমতং অসোকং অপরিদেৰং অনুপাযাসং অসংকিলিট্ঠন্তিআদীনি.

ইদানি মগ্গেন ছিন্নায নিব্বানং আগম্ম অপ্পৰত্তিপ্পত্তাযপি চ তণ্হায যেসু ৰত্থূসু তস্সা উপ্পত্তি দস্সিতা, তত্থেৰ অভাৰং দস্সেতুং সা খো পনেসাতিআদিমাহ. তত্থ যথা পুরিসো খেত্তে জাতং তিত্তকালাবুৰল্লিং দিস্ৰা অগ্গতো পট্ঠায মূলং পরিযেসিত্ৰা ছিন্দেয্য, সা অনুপুব্বেন মিলাযিত্ৰা অপ্পঞ্ঞত্তিং গচ্ছেয্য, ততো তস্মিং খেত্তে তিত্তকালাবু নিরুদ্ধা পহীনাতি ৰুচ্চেয্য, এৰমেৰ খেত্তে তিত্তকালাবু ৰিয চক্খাদীসু তণ্হা. সা অরিযমগ্গেন মূলচ্ছিন্না নিব্বানং আগম্ম অপ্পৰত্তিং গচ্ছতি. এৰং গতা পন তেসু ৰত্থূসু খেত্তে তিত্তকালাবু ৰিয ন পঞ্ঞাযতি. যথা চ অটৰিতো চোরে আনেত্ৰা নগরস্স দক্খিণদ্ৰারে ঘাতেয্যুং, ততো অটৰিযং চোরা মতাতি ৰা মারিতাতি ৰা ৰুচ্চেয্যুং, এৰমেৰ অটৰিযং চোরা ৰিয যা চক্খাদীসু তণ্হা, সা দক্খিণদ্ৰারে চোরা ৰিয নিব্বানং আগম্ম নিরুদ্ধত্তা নিব্বানে নিরুদ্ধা. এৰং নিরুদ্ধা পন তেসু ৰত্থূসু অটৰিযং চোরা ৰিয ন পঞ্ঞাযতি. তেনস্সা তত্থেৰ নিরোধং দস্সেন্তো ‘‘চক্খু লোকে পিযরূপং সাতরূপং, এত্থেসা তণ্হা পহীযমানা পহীযতী’’তিআদিমাহ. অথ ৰা তণ্হুপ্পাদৰত্থুস্স পরিঞ্ঞাতত্তা পরিঞ্ঞাতৰত্থুস্মিং পুন ন উপ্পজ্জনতো অনুপ্পাদনিরোধৰসেন তণ্হুপ্পাদৰত্থুস্মিংযেৰ নিরুজ্ঝতীতি ৰুচ্চতি. এত্থ চ উপ্পজ্জনপটিপক্খৰসেন পহীযতীতি ৰুত্তং, নিৰিসনপটিপক্খৰসেন নিরুজ্ঝতীতি.

নিরোধসচ্চনিদ্দেসৰণ্ণনা নিট্ঠিতা.