সমুদযসচ্চনিদ্দেসৰণ্ণনা

৩৪. সমুদযসচ্চনিদ্দেসে যাযং তণ্হাতি যা অযং তণ্হা. পোনোভৰিকাতি পুনব্ভৰকরণং পুনোভৰো, পুনোভৰো সীলমস্সাতি পোনোভৰিকা. অপিচ পুনব্ভৰং দেতি, পুনব্ভৰায সংৰত্ততি, পুনপ্পুনং ভৰে নিব্বত্তেতীতি পোনোভৰিকা. সা পনেসা পুনব্ভৰস্স দাযিকাপি অত্থি অদাযিকাপি, পুনব্ভৰায সংৰত্তনিকাপি অত্থি অসংৰত্তনিকাপি, দিন্নায পটিসন্ধিযা উপধিৰেপক্কমত্তাপি. সা তিপ্পকারাপি পোনোভৰিকাতি নামং লভতি. পোনব্ভৰিকাতিপি পাঠো, সোযেৰত্থো. অভিনন্দনসঙ্খাতেন নন্দিরাগেন সহ গতাতি নন্দিরাগসহগতা. নন্দিরাগেন সদ্ধিং অত্থতো একত্তমেৰ গতাতি ৰুত্তং হোতি. তত্র তত্রাভিনন্দিনীতি যত্র যত্র অত্তভাৰো নিব্বত্ততি, তত্র তত্র অভিনন্দিনী. রূপাদীসু ৰা আরম্মণেসু তত্র তত্রাভিনন্দিনী, রূপাভিনন্দিনী সদ্দগন্ধরসফোট্ঠব্বধম্মাভিনন্দিনীতি অত্থো. তত্র তত্রাভিনন্দীতিপি পাঠো, তত্র তত্র অভিনন্দযতীতি অত্থো. সেয্যথিদন্তি নিপাতো, তস্স সা কতমা ইতি চেতি অত্থো. কামতণ্হাতি কামে তণ্হা, পঞ্চকামগুণিকরাগস্সেতং অধিৰচনং. ভৰতণ্হাতি ভৰে তণ্হা. ভৰপত্থনাৰসেন উপ্পন্নস্স সস্সতদিট্ঠিসহগতস্স রাগস্স রূপারূপভৰরাগস্স চ ঝাননিকন্তিযা চ এতং অধিৰচনং. ৰিভৰতণ্হাতি ৰিভৰে তণ্হা. উচ্ছেদদিট্ঠিসহগতরাগস্সেতং অধিৰচনং.

ইদানি তস্সা তণ্হায ৰত্থুং ৰিত্থারতো দস্সেতুং সা খো পনেসাতিআদিমাহ. তত্থ উপ্পজ্জতীতি জাযতি. নিৰিসতীতি পুনপ্পুনং পৰত্তিৰসেন পতিট্ঠাতি. উপ্পজ্জমানা কত্থ উপ্পজ্জতি, নিৰিসমানা কত্থ নিৰিসতীতি সম্বন্ধো. যং লোকে পিযরূপং সাতরূপন্তি যং লোকস্মিং পিযসভাৰঞ্চেৰ মধুরসভাৰঞ্চ. চক্খু লোকেতিআদীসু লোকস্মিঞ্হি চক্খুআদীসু মমত্তেন অভিনিৰিট্ঠা সত্তা সম্পত্তিযং পতিট্ঠিতা অত্তনো চক্খুং আদাসাদীসু নিমিত্তগ্গহণানুসারেন ৰিপ্পসন্নং পঞ্চপসাদং সুৰণ্ণৰিমানে উগ্ঘাটিতমণিসীহপঞ্জরং ৰিয মঞ্ঞন্তি, সোতং রজতপনাল়িকং ৰিয পামঙ্গসুত্তকং ৰিয চ মঞ্ঞন্তি, তুঙ্গনাসাতি লদ্ধৰোহারং ঘানং ৰট্টেত্ৰা ঠপিতহরিতালৰট্টিং ৰিয মঞ্ঞন্তি, জিৰ্হং রত্তকম্বলপটলং ৰিয মুদুসিনিদ্ধমধুররসদং মঞ্ঞন্তি, কাযং সাললট্ঠিং ৰিয সুৰণ্ণতোরণং ৰিয চ মঞ্ঞন্তি, মনং অঞ্ঞেসং মনেন অসদিসং উল়ারং মঞ্ঞন্তি, রূপং সুৰণ্ণকণিকারপুপ্ফাদিৰণ্ণং ৰিয, সদ্দং মত্তকরৰীককোকিলমন্দধমিতমণিৰংসনিগ্ঘোসং ৰিয, অত্তনা পটিলদ্ধানি চতুসমুট্ঠানিকগন্ধারম্মণাদীনি ‘‘কস্সঞ্ঞস্স এৰরূপানি অত্থী’’তি মঞ্ঞন্তি, তেসং এৰং মঞ্ঞমানানং তানি চক্খাদীনি পিযরূপানি চেৰ সাতরূপানি চ হোন্তি. অথ নেসং তত্থ অনুপ্পন্না চেৰ তণ্হা উপ্পজ্জতি, উপ্পন্না চ পুনপ্পুনং পৰত্তিৰসেন নিৰিসতি. তস্মা থেরো ‘‘চক্খু লোকে পিযরূপং সাতরূপং, এত্থেসা তণ্হা উপ্পজ্জমানা উপ্পজ্জতী’’তিআদিমাহ. তত্থ উপ্পজ্জমানাতি যদা উপ্পজ্জতি, তদা এত্থ উপ্পজ্জতীতি অত্থো.

সমুদযসচ্চনিদ্দেসৰণ্ণনা নিট্ঠিতা.