১৪. অধিট্ঠানহারসম্পাতৰণ্ণনা

৭৬. অধিট্ঠানহারসম্পাতে সম্মাদিট্ঠি নাম যং দুক্খে ঞাণন্তিআদিনা চতুসচ্চহেতুহেতুসমুপ্পন্নপচ্চযপচ্চযুপ্পন্নসঙ্খাতস্স ৰিসযস্স ৰসেন ৰেমত্ততং দস্সেত্ৰা পুন যং তত্থ তত্থ যথাভূতং ঞাণদস্সনন্তি পাল়িপাল়িঅত্থানং অৰসিট্ঠৰিসযৰসেনেৰ ৰেমত্ততং দীপেতি. তত্থ যং সচ্চাগমনন্তি যং সচ্চতো অৰিপরীততো ৰিসযস্স আগমনং, অধিগমোতি অত্থো. ‘‘যং পচ্চাগমন’’ন্তিপি পাঠো, তস্স যং পটিপাটিৰিসযস্স আগমনং, তংতংৰিসযাধিগমোতি অত্থো. সেসমেত্থ পরিক্খারসমারোপনহারসম্পাতেসু যং ৰত্তব্বং, তং পুব্বে ৰুত্তনযত্তা উত্তানমেৰ.

অধিট্ঠানহারসম্পাতৰণ্ণনা নিট্ঠিতা.

মিস্সকহারসম্পাতৰণ্ণনা

অপি চেত্থ হারসম্পাতনিদ্দেসো ইমিনাপি নযেন ৰেদিতব্বো –

‘‘মনোপুব্বঙ্গমা ধম্মা, মনোসেট্ঠা মনোমযা;

মনসা চে পসন্নেন, ভাসতি ৰা করোতি ৰা;

ততো নং সুখমন্ৰেতি, ছাযাৰ অনপাযিনী’’তি. (ধ. প. ২);

তত্থ কতমো দেসনাহারসম্পাতো? মনোপুব্বঙ্গমা ধম্মাতি মনোতি খন্ধৰৰত্থানেন ৰিঞ্ঞাণক্খন্ধং দেসেতি. আযতনৰৰত্থানেন মনাযতনং, ধাতুৰৰত্থানেন ৰিঞ্ঞাণধাতুং, ইন্দ্রিযৰৰত্থানেন মনিন্দ্রিযং. কতমে ধম্মা পুব্বঙ্গমা? ছ ধম্মা পুব্বঙ্গমা, কুসলানং কুসলমূলানি, অকুসলানং অকুসলমূলানি, সাধিপতিকানং অধিপতি, সব্বচিত্তুপ্পাদানং ইন্দ্রিযানি. অপি চ ইমস্মিং সুত্তে মনো অধিপ্পেতো. যথা বলগ্গস্স রাজা পুব্বঙ্গমো, এৰমেৰং ধম্মানং মনো পুব্বঙ্গমো. তত্থ তিৰিধেন মনো পুব্বঙ্গমো নেক্খম্মছন্দেন অব্যাপাদছন্দেন অৰিহিংসাছন্দেন. তত্থ অলোভস্স নেক্খম্মছন্দেন মনোপুব্বঙ্গমং, অদোসস্স অব্যাপাদছন্দেন মনোপুব্বঙ্গমং, অমোহস্স অৰিহিংসাছন্দেন মনোপুব্বঙ্গমং.

মনোসেট্ঠাতি মনো তেসং ধম্মানং সেট্ঠং ৰিসিট্ঠং উত্তমং পৰরং মূলং পমুখং পামোক্খং, তেন ৰুচ্চতি ‘‘মনোসেট্ঠা’’তি. মনোমযাতি মনেন কতা, মনেন নিম্মিতা, মনেন নিব্বত্তা, মনো তেসং পচ্চযো, তেন ৰুচ্চতি ‘‘মনোমযা’’তি. তে পন ধম্মা ছন্দসমুদানিতা অনাৰিলসঙ্কপ্পসমুট্ঠানা ফস্সসমোধানা ৰেদনাক্খন্ধো সঞ্ঞাক্খন্ধো সঙ্খারক্খন্ধো. মনসা চে পসন্নেনাতি যা সদ্ধা সদ্দহনা ওকপ্পনা অভিপ্পসাদো. ইতি ইমিনা পসাদেন উপেতো সমুপেতো উপগতো সমুপগতো সম্পন্নো সমন্নাগতো, তেন ৰুচ্চতি ‘‘পসন্নেনা’’তি ইদং মনোকম্মং. ভাসতি ৰাতি ৰচীকম্মং. করোতি ৰাতি কাযকম্মং. ইতি দসকুসলকম্মপথা দস্সিতা.

ততোতি দসৰিধস্স কুসলকম্মস্স কতত্তা উপচিতত্তা. নন্তি যো সো কতপুঞ্ঞো কতকুসলো কতভীরুত্তাণো, তং পুগ্গলং. সুখন্তি দুৰিধং সুখং কাযিকং চেতসিকঞ্চ. অন্ৰেতীতি অনুগচ্ছতি.

ইধস্সু পুরিসো অপ্পহীনানুসযো সংযোজনিযেসু ধম্মেসু অস্সাদং অনুপস্সতি, সো সংযোজনিযেসু ধম্মেসু অস্সাদং অনুপস্সন্তো যথাদিট্ঠং যথাসুতং সম্পত্তিভৰং পত্থেতি. ইচ্চস্স অৰিজ্জা চ ভৰতণ্হা চ অনুবদ্ধা হোন্তি, সো যথাদিট্ঠং যথাসুতং সম্পত্তিভৰং পত্থেন্তো পসাদনীযৰত্থুস্মিং চিত্তং পসাদেতি সদ্দহতি ওকপ্পেতি. সো পসন্নচিত্তো তিৰিধং পুঞ্ঞকিরিযৰত্থুং অনুতিট্ঠতি দানমযং সীলমযং ভাৰনামযং কাযেন ৰাচায মনসা. সো তস্স ৰিপাকং পচ্চনুভোতি দিট্ঠেৰ ধম্মে উপপজ্জে ৰা অপরাপরে ৰা পরিযাযে. ইতি খো পনস্স অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপং, নামরূপপচ্চযা সল়াযতনং, সল়াযতনপচ্চযা সুখৰেদনীযো ফস্সো, ফস্সপচ্চযা ৰেদনাতি এৰং সন্তং তং সুখমন্ৰেতি. তস্সেৰং ৰেদনায অপরাপরং পরিৰত্তমানায উপ্পজ্জতি তণ্হা. তণ্হাপচ্চযা উপাদানং…পে… সমুদযো হোতীতি.

তত্থ যং মনো, যে চ মনোপুব্বঙ্গমা ধম্মা, যঞ্চ সুখং, ইমে ৰুচ্চন্তি পঞ্চক্খন্ধা, তে দুক্খসচ্চং. তেসং পুরিমকারণভূতা অৰিজ্জা ভৰতণ্হা চ সমুদযসচ্চং. তেসং পরিঞ্ঞায পহানায ভগৰা ধম্মং দেসেতি, দুক্খস্স পরিঞ্ঞায সমুদযস্স পহানায. যেন পরিজানাতি, যেন পজহতি, অযং মগ্গো. যত্থ চ মগ্গো পৰত্ততি, অযং নিরোধো. ইমানি চত্তারি সচ্চানি এৰং আযতনধাতুইন্দ্রিযমুখেনাপি নিদ্ধারেতব্বানি. তত্থ সমুদযেন অস্সাদো, দুক্খেন আদীনৰো, মগ্গনিরোধেহি নিস্সরণং, সুখস্স অন্ৰযো ফলং, মনসা পসন্নেন কাযৰচীসমীহা উপাযো, মনোপুব্বঙ্গমত্তা ধম্মানং অত্তনো সুখকামেন পসন্নেন মনসা ৰচীকম্মং কাযকম্মঞ্চ পৰত্তেতব্বন্তি অযং ভগৰতো আণত্তি. অযং দেসনাহারসম্পাতো.

তত্থ কতমো ৰিচযহারসম্পাতো? মননতো আরম্মণৰিজাননতো মনো. মননলক্খণে সম্পযুত্তেসু আধিপচ্চকরণতো পুব্বঙ্গমো ঈহাভাৰতো নিস্সত্তনিজ্জীৰট্ঠেন ধম্মা. গামেসু গামণি ৰিয পধানট্ঠেন মনো সেট্ঠো এতেসন্তি মনোসেট্ঠা. সহজাতাদিপচ্চযভূতেন মনসা নিব্বত্তাতি মনোমযা. অকালুস্সিযতো, আরম্মণস্স ওকপ্পনতো চ পসন্নেন ৰচীৰিঞ্ঞত্তিৰিপ্ফারতো তথা সাদিযনতো চ ভাসতি. চোপনকাযৰিপ্ফারতো তথা সাদিযনতো চ করোতি. তথা পসুতত্তা অনঞ্ঞত্তা চ ‘‘ততো’’তি ৰুত্তং. সুখনতো সাতভাৰতো ইট্ঠভাৰতো চ ‘‘সুখ’’ন্তি ৰুত্তং. কতূপচিতত্তা অৰিপক্কৰিপাকত্তা চ ‘‘অন্ৰেতী’’তি ৰুত্তং. কারণাযত্তৰুত্তিতো অসঙ্কন্তিতো চ ‘‘ছাযাৰ অনপাযিনী’’তি ৰুত্তং. অযং অনুপদৰিচযতো ৰিচযহারসম্পাতো.

তত্থ কতমো যুত্তিহারসম্পাতো? মনস্স ধম্মানং আধিপচ্চযোগতো পুব্বঙ্গমতা যুজ্জতি. ততো এৰ তেসং মনস্স অনুৰত্তনতো ধম্মানং মনোসেট্ঠতা যুজ্জতি. সহজাতাদিপচ্চযৰসেন মনসা নিব্বত্তত্তা ধম্মানং মনোমযতা যুজ্জতি. মনসা পসন্নেন সমুট্ঠানানং কাযৰচীকম্মানং কুসলভাৰো যুজ্জতি. যেন কুসলকম্মং উপচিতং, তং ছাযা ৰিয সুখং অন্ৰেতীতি যুজ্জতি. অযং যুত্তিহারসম্পাতো.

তত্থ কতমো পদট্ঠানো হারসম্পাতো? মনো মনোপৰিচারানং পদট্ঠানং. মনোপুব্বঙ্গমা ধম্মা সব্বস্স কুসলপক্খস্স পদট্ঠানং. ‘‘ভাসতী’’তি সম্মাৰাচা, ‘‘করোতী’’তি সম্মাকম্মন্তো, তে সম্মাআজীৰস্স পদট্ঠানং. সম্মাআজীৰো সম্মাৰাযামস্স পদট্ঠানং. সম্মাৰাযামো সম্মাসতিযা পদট্ঠানং. সম্মাসতি সম্মাসমাধিস্স পদট্ঠানং. ‘‘মনসা পসন্নেনা’’তি এত্থ পসাদো সদ্ধিন্দ্রিযং, তং সীলস্স পদট্ঠানং. সীলং সমাধিস্স পদট্ঠানং. সমাধি পঞ্ঞাযাতি যাৰ ৰিমুত্তিঞাণদস্সনা যোজেতব্বং. অযং পদট্ঠানহারসম্পাতো.

তত্থ কতমো লক্খণো হারসম্পাতো? ‘‘মনোপুব্বঙ্গমা ধম্মা’’তি মনোপুব্বঙ্গমতাৰচনেন ধম্মানং ছন্দপুব্বঙ্গমতাপি ৰীরিযপুব্বঙ্গমতাপি ৰীমংসাপুব্বঙ্গমতাপি ৰুত্তা হোতি আধিপতেয্যলক্খণেন ছন্দাদীনং মনসা একলক্খণত্তা. তথা নেসং সদ্ধাদিপুব্বঙ্গমতাপি ৰুত্তা হোতি ইন্দ্রিযলক্খণেন সদ্ধাদীনং মনসা একলক্খণত্তা. ‘‘মনসা চে পসন্নেনা’’তি যথা মনস্স পসাদসমন্নাগমো তংসমুট্ঠানানং কাযৰচীকম্মানং অনৰজ্জভাৰলক্খণং. এৰং চিত্তস্স সতিআদিসমন্নাগমোপি নেসং অনৰজ্জভাৰলক্খণং যোনিসোমনসিকারসমুট্ঠানভাৰেন একলক্খণত্তা. ‘‘সুখমন্ৰেতী’’তি সুখানুগমনৰচনেন সুখস্স পচ্চযভূতানং মনাপিযরূপাদীনং অনুগমো ৰুত্তো হোতি তেসম্পি কম্মপচ্চযতায একলক্খণত্তাতি. অযং লক্খণহারসম্পাতো.

তত্থ কতমো চতুব্যূহো হারসম্পাতো? ‘‘মনোপুব্বঙ্গমা’’তিআদীসু ‘‘মনো’’তিআদীনং পদানং নিব্বচনং নিরুত্তং, তং পদত্থনিদ্দেসৰসেন ৰেদিতব্বং. পদত্থো চ ৰুত্তনযেন সুৰিঞ্ঞেয্যোৰ. যে সুখেন অত্থিকা, তেহি পসন্নেন মনসা কাযৰচীমনোকম্মানি পৰত্তেতব্বানীতি অযমেত্থ ভগৰতো অধিপ্পাযো. পুঞ্ঞকিরিযায অঞ্ঞেসম্পি পুব্বঙ্গমা হুত্ৰা তত্থ তেসং সম্মা উপনেতারো ইমিস্সা দেসনায নিদানং. ‘‘ছদ্ৰারাধিপতী রাজা (ধ. প. অট্ঠ. ২.১৮১ এরকপত্তনাগরাজৰত্থু), চিত্তানুপরিৰত্তিনো ধম্মা (ধ. স. দুকমাতিকা ৬২; ১২০৫-১২০৬), চিত্তস্স একধম্মস্স, সব্বেৰ ৰসমন্ৰগূ’’তি (সং. নি. ১.৬২) এৰমাদিসমানযনেন ইমিস্সা দেসনায সংসন্দনা দেসনানুসন্ধি. পদানুসন্ধিযো পন সুৰিঞ্ঞেয্যাৰাতি. অযং চতুব্যূহো হারসম্পাতো.

তত্থ কতমো আৰট্টো হারসম্পাতো? ‘‘মনোপুব্বঙ্গমা ধম্মা’’তি তত্থ যানি তীণি কুসলমূলানি, তানি অট্ঠন্নং সম্মত্তানং হেতু. যে সম্মত্তা, অযং অট্ঠঙ্গিকো মগ্গো. যং মনোসহজনামরূপং, ইদং দুক্খং. অসমুচ্ছিন্না পুরিমনিপ্ফন্না অৰিজ্জা ভৰতণ্হা, অযং সমুদযো. যত্থ তেসং পহানং, অযং নিরোধোতি ইমানি চত্তারি সচ্চানি. অযং আৰট্টো হারসম্পাতো.

তত্থ কতমো ৰিভত্তিহারসম্পাতো? ‘‘মনোপুব্বঙ্গমা ধম্মা, মনসা চে পসন্নেন, ততো নং সুখমন্ৰেতী’’তি নযিদং যথারুতৰসেন গহেতব্বং. যো হি সমণো ৰা ব্রাহ্মণো ৰা পাণাতিপাতিম্হি মিচ্ছাদিট্ঠিকে মিচ্ছাপটিপন্নে সকং চিত্তং পসাদেতি, পসন্নেন চ চিত্তেন অভূতগুণাভিত্থৰনৰসেন ভাসতি ৰা নিপচ্চকারং ৰাস্স যং করোতি, ন ততো নং সুখমন্ৰেতি. দুক্খমেৰ পন তং ততো চক্কংৰ ৰহতো পদমন্ৰেতি. ইতি হি ইদং ৰিভজ্জব্যাকরণীযং. যং মনসা চে পসন্নেন ভাসতি ৰা করোতি ৰা, তঞ্চে ৰচীকম্মং কাযকম্মঞ্চ সুখৰেদনীযন্তি. তং কিস্স হেতু? সম্মত্তগতেহি সুখৰেদনীযং মিচ্ছাগতেহি দুক্খৰেদনীযন্তি. কথং পনাযং পসাদো দট্ঠব্বো? নাযং পসাদো, পসাদপতিরূপকো পন মিচ্ছাধিমোক্খোতি ৰদামি. অযং ৰিভত্তিহারসম্পাতো.

তত্থ কতমো পরিৰত্তনো হারসম্পাতো? মনোপুব্বঙ্গমাতিআদি. যং মনসা পদুট্ঠেন ভাসতি ৰা করোতি ৰা দুক্খস্সানুগামী. ইদঞ্হি সুত্তং এতস্স উজুপটিপক্খো. অযং পরিৰত্তনো হারসম্পাতো.

তত্থ কতমো ৰেৰচনো হারসম্পাতো? ‘‘মনোপুব্বঙ্গমা’’তি মনো চিত্তং মনাযতনং মনিন্দ্রিযং মনোৰিঞ্ঞাণং মনোৰিঞ্ঞাণধাতূতি পরিযাযৰচনং. পুব্বঙ্গমা পুরেচারিনো পুরেগামিনোতি পরিযাযৰচনং. ধম্মা অত্তা সভাৰাতি পরিযাযৰচনং. সেট্ঠং পধানং পৰরন্তি পরিযাযৰচনং. মনোমযা মনোনিব্বত্তা মনোসম্ভূতাতি পরিযাযৰচনং. পসন্নেন সদ্দহন্তেন ওকপ্পেন্তেনাতি পরিযাযৰচনং. সুখং সাতং ৰেদযিতন্তি পরিযাযৰচনং. অন্ৰেতি অনুগচ্ছতি অনুবন্ধতীতি পরিযাযৰচনং. অযং ৰেৰচনো হারসম্পাতো.

তত্থ কতমো পঞ্ঞত্তিহারসম্পাতো? মনোপুব্বঙ্গমাতি অযং মনসো কিচ্চপঞ্ঞত্তি. ধম্মাতি সভাৰপঞ্ঞত্তি, কুসলকম্মপথপঞ্ঞত্তি. মনোসেট্ঠাতি পধানপঞ্ঞত্তি. মনোমযাতি সহজাতপঞ্ঞত্তি. পসন্নেনাতি সদ্ধিন্দ্রিযেন সমন্নাগতপঞ্ঞত্তি, অস্সদ্ধিযস্স পটিক্খেপপঞ্ঞত্তি. ভাসতি ৰা করোতি ৰাতি সম্মাৰাচাসম্মাকম্মন্তানং নিক্খেপপঞ্ঞত্তি. ততো নং সুখমন্ৰেতীতি কম্মস্স ফলানুবন্ধপঞ্ঞত্তি, কম্মস্স অৰিনাসপঞ্ঞত্তীতি. অযং পঞ্ঞত্তিহারসম্পাতো.

তত্থ কতমো ওতরণো হারসম্পাতো? মনোতি ৰিঞ্ঞাণক্খন্ধো. ধম্মাতি ৰেদনাসঞ্ঞাসঙ্খারক্খন্ধা. ভাসতি ৰা করোতি ৰাতি কাযৰচীৰিঞ্ঞত্তিযো. তাসং নিস্সযা চত্তারো মহাভূতাতি রূপক্খন্ধোতি অযং খন্ধেহি ওতরণো. মনোতি অভিসঙ্খারৰিঞ্ঞাণন্তি মনোগ্গহণেন অৰিজ্জাপচ্চযা সঙ্খারা গহিতাতি. সঙ্খারপচ্চযা ৰিঞ্ঞাণং…পে… সমুদযো হোতীতি অযং পটিচ্চসমুপ্পাদেন ওতরণোতি. অযং ওতরণো হারসম্পাতো.

তত্থ কতমো সোধনো হারসম্পাতো? মনোতি আরম্ভো নেৰ পদসুদ্ধি, ন আরম্ভসুদ্ধি. মনোপুব্বঙ্গমাতি পদসুদ্ধি, ন আরম্ভসুদ্ধি. তথা ধম্মাতি যাৰ সুখন্তি পদসুদ্ধি, ন আরম্ভসুদ্ধি. সুখমন্ৰেতীতি পন পদসুদ্ধি চেৰ আরম্ভসুদ্ধি চাতি. অযং সোধনো হারসম্পাতো.

তত্থ কতমো অধিট্ঠানো হারসম্পাতো? মনোপুব্বঙ্গমা ধম্মা, মনোসেট্ঠা মনোমযাতি একত্ততা. মনসা চে পসন্নেনাতি ৰেমত্ততা, তথা মনসা চে পসন্নেনাতি একত্ততা. ভাসতি ৰা করোতি ৰাতি ৰেমত্ততা, তথা মনসা চে পসন্নেনাতি একত্ততা. সো পসাদো দুৰিধো অজ্ঝত্তঞ্চ ব্যাপাদৰিক্খম্ভনতো, বহিদ্ধা চ ওকপ্পনতো. তথা সম্পত্তিভৰহেতুভূতোপি ৰড্ঢিহেতুভূতোৰাতি অযং ৰেমত্ততা. তযিদং সুত্তং দ্ৰীহি আকারেহি অধিট্ঠাতব্বং হেতুনা চ যো পসন্নমানসো, ৰিপাকেন চ যো সুখৰেদনীযোতি. অযং অধিট্ঠানো হারসম্পাতো.

তত্থ কতমো পরিক্খারো হারসম্পাতো? মনোপুব্বঙ্গমাতি এত্থ মনোতি কুসলৰিঞ্ঞাণং. তস্স চ ঞাণসম্পযুত্তস্স অলোভো অদোসো অমোহোতি তযো সম্পযুত্তা হেতূ, ঞাণৰিপ্পযুত্তস্স অলোভো অদোসোতি দ্ৰে সম্পযুত্তা হেতূ. সব্বেসং অৰিসেসেন যোনিসোমনসিকারো হেতু, চত্তারি সম্পত্তিচক্কানি পচ্চযো. তথা সদ্ধম্মস্সৰনং, তস্স চ দানাদিৰসেন পৰত্তমানস্স দেয্যধম্মাদযো পচ্চযো. ধম্মাতি চেত্থ ৰেদনাদীনং ইট্ঠারম্মণাদযো. তথা তযো ৰিঞ্ঞাণস্স, ৰেদনাদযো পসাদস্স, সদ্ধেয্যৰত্থুকুসলাভিসঙ্খারো ৰিপাকসুখস্স পচ্চযোতি. অযং পরিক্খারো হারসম্পাতো.

তত্থ কতমো সমারোপনো হারসম্পাতো? মনোপুব্বঙ্গমা ধম্মাতি মনোতি পুঞ্ঞচিত্তং, তং তিৰিধং – দানমযং, সীলমযং, ভাৰনামযন্তি. তত্থ দানমযস্স অলোভো পদট্ঠানং, সীলমযস্স অদোসো পদট্ঠানং, ভাৰনামযস্স অমোহো পদট্ঠানং. সব্বেসং অভিপ্পসাদো পদট্ঠানং, ‘‘সদ্ধাজাতো উপসঙ্কমতি, উপসঙ্কমন্তো পযিরুপাসতী’’তি (ম. নি. ২.১৮৩) সুত্তং ৰিত্থারেতব্বং. কুসলচিত্তং সুখস্স ইট্ঠৰিপাকস্স পদট্ঠানং. যোনিসোমনসিকারো কুসলচিত্তস্স পদট্ঠানং. যোনিসো হি মনসি করোন্তো কুসলচিত্তং অধিট্ঠাতি কুসলচিত্তং ভাৰেতি, সো অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি, উপ্পন্নানং কুসলানং ধম্মানং…পে… পদহতি. তস্সেৰং চতূসু সম্মপ্পধানেসু ভাৰিযমানেসু চত্তারো সতিপট্ঠানা যাৰ অরিযো অট্ঠঙ্গিকো মগ্গো ভাৰনাপারিপূরিং গচ্ছতীতি অযং ভাৰনায সমারোপনা. সতি চ ভাৰনায পহানঞ্চ সিদ্ধমেৰাতি. অযং সমারোপনো হারসম্পাতো.

তথা –

‘‘দদতো পুঞ্ঞং পৰড্ঢতি, সংযমতো ৰেরং ন চীযতি;

কুসলো চ জহাতি পাপকং, রাগদোসমোহক্খযা স নিব্বুতো’’তি. (দী. নি. ২.১৯৭; উদা. ৭৫; পেটকো. ১৬);

তত্থ দদতো পুঞ্ঞং পৰড্ঢতীতি দানমযং পুঞ্ঞকিরিযৰত্থু ৰুত্তং. সংযমতো ৰেরং ন চীযতীতি সীলমযং পুঞ্ঞকিরিযৰত্থু ৰুত্তং. কুসলো চ জহাতি পাপকন্তি লোভস্স চ দোসস্স চ মোহস্স চ পহানমাহ. তেন ভাৰনামযং পুঞ্ঞকিরিযৰত্থু ৰুত্তং. রাগদোসমোহক্খযা স নিব্বুতোতি অনুপাদাপরিনিব্বানমাহ.

দদতো পুঞ্ঞং পৰড্ঢতীতি অলোভো কুসলমূলং. সংযমতো ৰেরং ন চীযতীতি অদোসো কুসলমূলং. কুসলো চ জহাতি পাপকন্তি অমোহো কুসলমূলং. রাগদোসমোহক্খযা স নিব্বুতোতি তেসং নিস্সরণং ৰুত্তং.

দদতো পুঞ্ঞং পৰড্ঢতীতি সীলক্খন্ধস্স পদট্ঠানং. সংযমতো ৰেরং ন চীযতীতি সমাধিক্খন্ধস্স পদট্ঠানং. কুসলো চ জহাতি পাপকন্তি পঞ্ঞাক্খন্ধস্স ৰিমুত্তিক্খন্ধস্স পদট্ঠানং. দানেন ওল়ারিকানং কিলেসানং পহানং, সীলেন মজ্ঝিমানং, পঞ্ঞায সুখুমানং. রাগদোসমোহক্খযা স নিব্বুতোতি কতাৰীভূমিং দস্সেতি.

দদতো পুঞ্ঞং…পে… জহাতি পাপকন্তি সেক্খভূমি দস্সিতা. রাগদোসমোহক্খযা স নিব্বুতোতি অগ্গফলং ৰুত্তং.

তথা দদতো পুঞ্ঞং…পে… ন চীযতীতি লোকিযকুসলমূলং ৰুত্তং. কুসলো চ জহাতি পাপকন্তি লোকুত্তরকুসলমূলং ৰুত্তং. রাগদোসমোহক্খযা স নিব্বুতোতি লোকুত্তরস্স কুসলমূলস্স ফলং ৰুত্তং.

দদতো…পে… ন চীযতীতি পুথুজ্জনভূমি দস্সিতা. কুসলো চ জহাতি পাপকন্তি সেক্খভূমি দস্সিতা. রাগদোসমোহক্খযা স নিব্বুতোতি অসেক্খভূমি দস্সিতা.

দদতো …পে… ন চীযতীতি সগ্গগামিনী পটিপদা ৰুত্তা. কুসলো চ জহাতি পাপকন্তি সেক্খৰিমুত্তি. রাগদোসমোহক্খযা স নিব্বুতোতি অসেক্খৰিমুত্তি ৰুত্তা.

দদতো…পে… ন চীযতীতি দানকথং সীলকথং সগ্গকথং লোকিযানং ধম্মানং দেসনমাহ. কুসলো চ জহাতি পাপকন্তি লোকে আদীনৰানুপস্সনায সদ্ধিং সামুক্কংসিকং ধম্মদেসনমাহ. রাগদোসমোহক্খযা স নিব্বুতোতি তস্সা দেসনায ফলমাহ.

দদতো পুঞ্ঞং পৰড্ঢতীতি ধম্মদানং আমিসদানঞ্চ ৰদতি. সংযমতো ৰেরং ন চীযতীতি পাণাতিপাতা ৰেরমণিযা সত্তানং অভযদানং ৰদতি. এৰং সব্বানিপি সিক্খাপদানি ৰিত্থারেতব্বানি. তেন চ সীলসংযমেন সীলে পতিট্ঠিতো চিত্তং সংযমেতি, তস্স সমথো পারিপূরিং গচ্ছতি. এৰং সো সমথে ঠিতো ৰিপস্সনাকোসল্লযোগতো কুসলো চ জহাতি পাপকং রাগং জহাতি, দোসং জহাতি, মোহং জহাতি, অরিযমগ্গেন সব্বেপি পাপকে অকুসলে ধম্মে জহাতি. এৰং পটিপন্নো চ রাগদোসমোহক্খযা স নিব্বুতোতি রাগাদীনং পরিক্খযা দ্ৰেপি ৰিমুত্তিযো অধিগচ্ছতীতি অযং সুত্তনিদ্দেসো.

তত্থ কতমো দেসনাহারসম্পাতো? ইমস্মিং সুত্তে কিং দেসিতং? দ্ৰে সুগতিযো দেৰা চ মনুস্সা চ, দিব্বা চ পঞ্চ কামগুণা, মানুসকা চ পঞ্চ কামগুণা, দিব্বা চ পঞ্চুপাদানক্খন্ধা, মানুসকা চ পঞ্চুপাদানক্খন্ধা. ইদং ৰুচ্চতি দুক্খং অরিযসচ্চং. তস্স কারণভাৰেন পুরিমপুরিমনিপ্ফন্না তণ্হা সমুদযো অরিযসচ্চং. তযিদং ৰুচ্চতি অস্সাদো চ আদীনৰো চ. সব্বস্স পুরিমেহি দ্ৰীহি পদেহি নিদ্দেসো ‘‘দদতো…পে… ন চীযতী’’তি. কুসলো চ জহাতি পাপকন্তি মগ্গো ৰুত্তো. রাগদোসমোহক্খযা স নিব্বুতোতি দ্ৰে নিব্বানধাতুযো সউপাদিসেসা চ অনুপাদিসেসা চ. ইদং নিস্সরণং. ফলাদীনি পন যথারহং ৰেদিতব্বানীতি. অযং দেসনাহারসম্পাতো.

ৰিচযোতি ‘‘দদতো পুঞ্ঞং পৰড্ঢতী’’তি ইমিনা পঠমেন পদেন তিৰিধম্পি দানমযং সীলমযং ভাৰনামযং পুঞ্ঞকিরিযৰত্থু ৰুত্তং. দসৰিধস্সপি দেয্যধম্মস্স পরিচ্চাগো ৰুত্তো. তথা ছব্বিধস্সপি রূপাদিআরম্মণস্স. ‘‘সংযমতো ৰেরং ন চীযতী’’তি দুতিযেন পদেন অৰেরা অসপত্তা অব্যাপাদা চ পটিপদা ৰুত্তা. ‘‘কুসলো চ জহাতি পাপক’’ন্তি ততিযেন পদেন ঞাণুপ্পাদো অঞ্ঞাণনিরোধো সব্বোপি অরিযো অট্ঠঙ্গিকো মগ্গো সব্বেপি বোধিপক্খিযা ধম্মা ৰুত্তা. ‘‘রাগদোসমোহক্খযা স নিব্বুতো’’তি রাগক্খযেন রাগৰিরাগা চেতোৰিমুত্তি, মোহক্খযেন অৰিজ্জাৰিরাগা পঞ্ঞাৰিমুত্তি ৰুত্তাতি. অযং ৰিচযো হারসম্পাতো.

যুত্তীতি দানে ঠিতো উভযং পরিপূরেতি মচ্ছরিযপ্পহানঞ্চ পুঞ্ঞাভিসন্দঞ্চাতি অত্থেসা যুত্তি. সীলসংযমে ঠিতো উভযং পরিপূরেতি উপচারসমাধিং অপ্পনাসমাধিঞ্চাতি অত্থেসা যুত্তি. পাপকে ধম্মে পজহন্তো দুক্খং পরিজানাতি, নিরোধং সচ্ছিকরোতি, মগ্গং ভাৰেতীতি অত্থেসা যুত্তি. রাগদোসমোহেসু সব্বসো পরিক্খীণেসু অনুপাদিসেসায নিব্বানধাতুযা পরিনিব্বাযতীতি অত্থেসা যুত্তীতি. অযং যুত্তিহারসম্পাতো.

পদট্ঠানন্তি দদতো পুঞ্ঞং পৰড্ঢতীতি চাগাধিট্ঠানস্স পদট্ঠানং. সংযমতো ৰেরং ন চীযতীতি সচ্চাধিট্ঠানস্স পদট্ঠানং. কুসলো চ জহাতি পাপকন্তি পঞ্ঞাধিট্ঠানস্স পদট্ঠানং. রাগদোসমোহক্খযা স নিব্বুতোতি উপসমাধিট্ঠানস্স পদট্ঠানন্তি. অযং পদট্ঠানো হারসম্পাতো.

লক্খণোতি ‘‘দদতো’’তি এতেন পেয্যৰজ্জং অত্থচরিযং সমানত্ততা চ দস্সিতাতি ৰেদিতব্বা সঙ্গহৰত্থুভাৰেন একলক্খণত্তা. ‘‘সংযমতো’’তি এতেন খন্তিমেত্তাঅৰিহিংসাঅনুদ্দযাদযো দস্সিতাতি ৰেদিতব্বা ৰেরানুপ্পাদনলক্খণেন একলক্খণত্তা. ‘‘ৰেরং ন চীযতী’’তি এতেন হিরীওত্তপ্পঅপ্পিচ্ছতাসন্তুট্ঠিতাদযো দস্সিতা ৰেরাৰড্ঢনেন একলক্খণত্তা. তথা অহিরীকানোত্তপ্পাদযো অচেতব্বভাৰেন একলক্খণত্তা. ‘‘কুসলো’’তি এতেন কোসল্লদীপনেন সম্মাসঙ্কপ্পাদযো দস্সিতা মগ্গঙ্গাদিভাৰেন একলক্খণত্তা. ‘‘জহাতি পাপক’’ন্তি এতেন পরিঞ্ঞাভিসমযাদযোপি দস্সিতা অভিসমযলক্খণেন একলক্খণত্তা. ‘‘রাগদোসমোহক্খযা’’তি এতেন অৰসিট্ঠকিলেসাদীনম্পি খযা দস্সিতা খেপেতব্বভাৰেন একলক্খণত্তাতি অযং লক্খণো.

চতুব্যূহোতি দদতোতি গাথাযং ভগৰতো কো অধিপ্পাযো? যে মহাভোগতং পত্থযিস্সন্তি, তে দানং দস্সন্তি দালিদ্দিযপ্পহানায. যে অৰেরতং ইচ্ছন্তি, তে পঞ্চ ৰেরানি পজহিস্সন্তি. যে কুসলধম্মেহি ছন্দকামা, তে অট্ঠঙ্গিকং মগ্গং ভাৰেস্সন্তি. যে নিব্বাযিতুকামা, তে রাগদোসমোহং পজহিস্সন্তীতি অযমেত্থ ভগৰতো অধিপ্পাযো. এৰং নিব্বচননিদানসন্ধযো ৰত্তব্বাতি. অযং চতুব্যূহো.

আৰট্টোতি যঞ্চ অদদতো মচ্ছরিযং, যঞ্চ অসংযমতো ৰেরং, যঞ্চ অকুসলস্স পাপস্স অপ্পহানং, অযং পটিপক্খনিদ্দেসেন সমুদযো. তস্স অলোভেন চ অদোসেন চ অমোহেন চ দানাদীহি পহানং, ইমানি তীণি কুসলমূলানি. তেসং পচ্চযো অট্ঠ সম্মত্তানি, অযং মগ্গো. যো রাগদোসমোহানং খযো, অযং নিরোধোতি. অযং আৰট্টো.

ৰিভত্তীতি দদতো পুঞ্ঞং পৰড্ঢতীতি একংসেন যো ভযহেতু দেতি, রাগহেতু দেতি, আমিসকিঞ্চিক্খহেতু দেতি, ন তস্স পুঞ্ঞং ৰড্ঢতি. যঞ্চ দণ্ডদানং সত্থদানং পরৰিহেঠনত্থং অপুঞ্ঞং অস্স পৰড্ঢতি. যং পন কুসলেন চিত্তেন অনুকম্পন্তো ৰা অপচাযমানো ৰা অন্নং দেতি, পানং ৰত্থং যানং মালাগন্ধৰিলেপনং সেয্যাৰসথং পদীপেয্যং দেতি, সব্বসত্তানং ৰা অভযদানং দেতি, মেত্তচিত্তো হিতজ্ঝাসযো নিস্সরণসঞ্ঞী ধম্মং দেসেতি. সংযমতো ৰেরং ন চীযতীতি একংসেন অভযূপরতস্স চীযতি, কিংকারণং? যং অসমত্থো, ভযূপরতো দিট্ঠধম্মিকস্স ভাযতি ‘‘মা মং রাজানো গহেত্ৰা হত্থং ৰা ছিন্দেয্যুং…পে… জীৰন্তম্পি সূলে উত্তাসেয্যু’’ন্তি, তেন সংযমেন অৰেরং চীযতি. যো পন এৰং সমানো ৰেরং ন চীযতি. যো পন এৰং সমাদিযতি, পাণাতিপাতস্স পাপকো ৰিপাকো দিট্ঠে চেৰ ধম্মে অভিসম্পরাযে চ, এৰং সব্বস্স অকুসলস্স, সো ততো আরমতি, ইমিনা সংযমেন ৰেরং ন চীযতি. সংযমো নাম সীলং. তং চতুব্বিধং চেতনা সীলং, চেতসিকং সীলং, সংৰরো সীলং, অৰীতিক্কমো সীলন্তি. কুসলো চ জহাতি পাপকন্তি পাপপহাযকা সত্তত্তিংস বোধিপক্খিযা ধম্মা ৰত্তব্বাতি. অযং ৰিভত্তি.

পরিৰত্তনোতি দদতো পুঞ্ঞং পৰড্ঢতি, অদদতোপি পুঞ্ঞং পৰড্ঢতি, ন দানমযিকং. সংযমতো ৰেরং ন চীযতি অসংযমতোপি ৰেরং ন চীযতি, যং দানেন পটিসঙ্খানবলেন ভাৰনাবলেন. কুসলো চ জহাতি পাপকং, অকুসলো পন ন জহাতি. রাগদোসমোহক্খযা স নিব্বুতো, তেসং অপরিক্খযা নত্থি নিব্বুতীতি. অযং পরিৰত্তনো.

ৰেৰচনোতি দদতো পুঞ্ঞং পৰড্ঢতি. পরিচ্চাগতো কুসলং উপচীযতি. অনুমোদতোপি পুঞ্ঞং পৰড্ঢতি চিত্তপ্পসাদতোপি ৰেয্যাৰচ্চকিরিযাযপি. সংযমতোতি সীলসংৰরতো সোরচ্চতো. ৰেরং ন চীযতীতি পাপং ন ৰড্ঢতি, অকুসলং ন ৰড্ঢতি. কুসলোতি পণ্ডিতো নিপুণো মেধাৰী পরিক্খকো. জহাতীতি সমুচ্ছিন্দতি সমুগ্ঘাটেতি. অযং ৰেৰচনো.

পঞ্ঞত্তীতি দদতো পুঞ্ঞং পৰড্ঢতীতি লোভস্স পটিনিস্সগ্গপঞ্ঞত্তি, অলোভস্স নিক্খেপপঞ্ঞত্তি. সংযমতো ৰেরং ন চীযতীতি দোসস্স ৰিক্খম্ভনপঞ্ঞত্তি, অদোসস্স নিক্খেপপঞ্ঞত্তি. কুসলো চ জহাতি পাপকন্তি মোহস্স সমুগ্ঘাতপঞ্ঞত্তি, অমোহস্স ভাৰনাপঞ্ঞত্তি. রাগদোসমোহস্স পহানপঞ্ঞত্তি, অলোভাদোসামোহস্স ভাৰনাপঞ্ঞত্তি. রাগদোসমোহক্খযা স নিব্বুতোতি কিলেসানং পটিপ্পস্সদ্ধিপঞ্ঞত্তি, নিব্বানস্স সচ্ছিকিরিযপঞ্ঞত্তীতি. অযং পঞ্ঞত্তি.

ওতরণোতি দদতো পুঞ্ঞং পৰড্ঢতীতি দানং নাম সদ্ধাদীহি ইন্দ্রিযেহি হোতীতি অযং ইন্দ্রিযেহি ওতরণো. সংযমতো ৰেরং ন চীযতীতি সংযমো নাম সীলক্খন্ধোতি অযং খন্ধেহি ওতরণো. কুসলো চ জহাতি পাপকন্তি পাপপ্পহানং নাম তীহি ৰিমোক্খেহি হোতি. তেসং উপাযভূতানি তীণি ৰিমোক্খমুখানীতি অযং ৰিমোক্খমুখেহি ওতরণো. রাগদোসমোহক্খযা স নিব্বুতোতি ৰিমুত্তিক্খন্ধো. সো চ ধম্মধাতু ধম্মাযতনঞ্চাতি অযং ধাতূহি চ আযতনেহি চ ওতরণোতি. অযং ওতরণো.

সোধনোতি দদতোতিআদিকা পদসুদ্ধি, নো আরম্ভসুদ্ধি. রাগদোসমোহক্খযা স নিব্বুতোতি অযং পদসুদ্ধি চ আরম্ভসুদ্ধি চাতি. অযং সোধনো.

অধিট্ঠানোতি দদতোতি অযং একত্ততা, চাগো পরিচ্চাগো ধম্মদানং আমিসদানং অভযদানং, অট্ঠ দানানি ৰিত্থারেতব্বানি. অযং ৰেমত্ততা. সংযমোতি অযং একত্ততা. পাতিমোক্খসংৰরো সতিসংৰরোতি অযং ৰেমত্ততা. কুসলো চ জহাতি পাপকন্তি অযং একত্ততা. সক্কাযদিট্ঠিং পজহতি ৰিচিকিচ্ছং পজহতীতিআদিকা অযং ৰেমত্ততা. রাগদোসমোহক্খযা স নিব্বুতোতি অযং একত্ততা. সউপাদিসেসা নিব্বানধাতু অনুপাদিসেসা নিব্বানধাতূতি অযং ৰেমত্ততাতি. অযং অধিট্ঠানো.

পরিক্খারোতি দানস্স পামোজ্জং পচ্চযো. অলোভো হেতু, সংযমস্স হিরোত্তপ্পাদযো পচ্চযো. যোনিসোমনসিকারো অদোসো চ হেতু, পাপপ্পহানস্স সমাধি যথাভূতঞাণদস্সনঞ্চ পচ্চযো. তিস্সো অনুপস্সনা হেতু, নিব্বুতিযা মগ্গসম্মাদিট্ঠি হেতু, সম্মাসঙ্কপ্পাদযো পচ্চযোতি. অযং পরিক্খারো.

সমারোপনো হারসম্পাতোতি দদতো পুঞ্ঞং পৰড্ঢতীতি দানমযং পুঞ্ঞকিরিযৰত্থু, তং সীলস্স পদট্ঠানং. সংযমতো ৰেরং ন চীযতীতি সীলমযং পুঞ্ঞকিরিযৰত্থু, তং সমাধিস্স পদট্ঠানং. সীলেন হি ঝানেনপি রাগাদিকিলেসা ন চীযন্তি. যেপিস্স তপ্পচ্চযা উপ্পজ্জেয্যুং আসৰা ৰিঘাতপরিল়াহা, তেপিস্স ন হোন্তি. কুসলো চ জহাতি পাপকন্তি পহানপরিঞ্ঞা, তং ভাৰনামযং পুঞ্ঞকিরিযৰত্থু. রাগদোসমোহক্খযা স নিব্বুতোতি রাগস্সপি খযা দোসস্সপি খযা মোহস্সপি খযা. তত্থ রাগোতি যো রাগো সারাগো চেতসো সারজ্জনা লোভো লুব্ভনা লুব্ভিতত্তং অভিজ্ঝা লোভো অকুসলমূলং. দোসোতি যো দোসো দুস্সনা দুস্সিতত্তং ব্যাপাদো চেতসো ব্যাপজ্জনা দোসো অকুসলমূলং. মোহোতি যং অঞ্ঞাণং অদস্সনং অনভিসমযো অসম্বোধো অপ্পটিৰেধো দুম্মেজ্ঝং বাল্যং অসম্পজঞ্ঞং মোহো অকুসলমূলং. ইতি ইমেসং রাগাদীনং খযো নিরোধো পটিনিস্সগ্গো নিব্বুতি নিব্বাযনা পরিনিব্বানং সউপাদিসেসা নিব্বানধাতু অনুপাদিসেসা নিব্বানধাতূতি. অযং সমারোপনো হারসম্পাতো.

মিস্সকহারসম্পাতৰণ্ণনা নিট্ঠিতা.