৯. কুহসুত্তৰণ্ণনা

১০৮. নৰমে কুহাতি সামন্তজপ্পনাদিনা কুহনৰত্থুনা কুহকা, অসন্তগুণসম্ভাৰনিচ্ছায কোহঞ্ঞং কত্ৰা পরেসং ৰিম্হাপকাতি অত্থো. থদ্ধাতি কোধেন চ মানেন চ থদ্ধমানসা. ‘‘কোধনো হোতি উপাযাসবহুলো, অপ্পম্পি ৰুত্তো সমানো অভিসজ্জতি কুপ্পতি ব্যাপজ্জতি পতিত্থীযতী’’তি (অ. নি. ৩.২৫; পু. প. ১০১) এৰং ৰুত্তেন কোধেন চ, ‘‘দুব্বচো হোতি দোৰচস্সকরণেহি ধম্মেহি সমন্নাগতো অক্খমো অপ্পদক্খিণগ্গাহী অনুসাসনি’’ন্তি (ম. নি. ১.১৮১) এৰং ৰুত্তেন দোৰচস্সেন চ, ‘‘জাতিমদো, গোত্তমদো, সিপ্পমদো, আরোগ্যমদো, যোব্বনমদো, জীৰিতমদো’’তি (ৰিভ. ৮৩২) এৰং ৰুত্তেন জাতিমদাদিভেদেন মদেন চ গরুকাতব্বেসু গরূসু পরমনিপচ্চকারং অকত্ৰা অযোসলাকং গিলিত্ৰা ঠিতা ৰিয অনোনতা হুত্ৰা ৰিচরণকা. লপাতি উপলাপকা মিচ্ছাজীৰৰসেন কুলসঙ্গাহকা পচ্চযত্থং পযুত্তৰাচাৰসেন নিপ্পেসিকতাৰসেন চ লপকাতি ৰা অত্থো.

সিঙ্গীতি ‘‘তত্থ কতমং সিঙ্গং? যং সিঙ্গং সিঙ্গারতা চাতুরতা চাতুরিযং পরিক্খত্ততা পারিক্খত্তিয’’ন্তি (ৰিভ. ৮৫২) এৰং ৰুত্তেহি সিঙ্গসদিসেহি পাকটকিলেসেহি সমন্নাগতা. উন্নল়াতি উগ্গতনল়া, নল়সদিসং তুচ্ছমানং উক্খিপিত্ৰা ৰিচরণকা. অসমাহিতাতি চিত্তেকগ্গতামত্তস্সাপি অলাভিনো. ন মে তে, ভিক্খৰে, ভিক্খূ মামকাতি তে ময্হং ভিক্খূ মম সন্তকা ন হোন্তি. মেতি ইদং পদং অত্তানং উদ্দিস্স পব্বজিতত্তা ভগৰতা ৰুত্তং. যস্মা পন তে কুহনাদিযোগতো ন সম্মা পটিপন্না, তস্মা ‘‘ন মামকা’’তি ৰুত্তা. অপগতাতি যদিপি তে মম সাসনে পব্বজিতা, যথানুসিট্ঠং পন অপ্পটিপজ্জনতো অপগতা এৰ ইমস্মা ধম্মৰিনযা, ইতো তে সুৰিদূরৰিদূরে ঠিতাতি দস্সেতি. ৰুত্তঞ্হেতং –

‘‘নভঞ্চ দূরে পথৰী চ দূরে,

পারং সমুদ্দস্স তদাহু দূরে;

ততো হৰে দূরতরং ৰদন্তি,

সতঞ্চ ধম্মং অসতঞ্চ রাজা’’তি. (অ. নি. ৪.৪৭; জা. ২.২১.৪১৪);

ৰুদ্ধিং ৰিরূল়্হিং ৰেপুল্লং আপজ্জন্তীতি সীলাদিগুণেহি ৰড্ঢনৰসেন ৰুদ্ধিং, তত্থ নিচ্চলভাৰেন ৰিরূল়্হিং, সব্বত্থ পত্থটভাৰেন সীলাদিধম্মক্খন্ধপারিপূরিযা ৰেপুল্লং. ন চ তে কুহাদিসভাৰা ভিক্খূ আপজ্জন্তি, ন চ পাপুণন্তীতি অত্থো. তে খো মে, ভিক্খৰে, ভিক্খূ মামকাতি ইধাপি মেতি অত্তানং উদ্দিস্স পব্বজিতত্তা ৰদতি, সম্মা পটিপন্নত্তা পন ‘‘মামকা’’তি আহ. ৰুত্তৰিপরিযাযেন সুক্কপক্খো ৰেদিতব্বো. তত্থ যাৰ অরহত্তমগ্গা ৰিরূহন্তি নাম, অরহত্তফলে পন সম্পত্তে ৰিরূল়্হিং ৰেপুল্লং আপন্না নাম. গাথা সুৰিঞ্ঞেয্যা এৰ.

নৰমসুত্তৰণ্ণনা নিট্ঠিতা.