৮. বহুকারসুত্তৰণ্ণনা

১০৭. অট্ঠমে ব্রাহ্মণগহপতিকাতি ব্রাহ্মণা চেৰ গহপতিকা চ. ঠপেত্ৰা ব্রাহ্মণে যে কেচি অগারং অজ্ঝাৰসন্তা ইধ গহপতিকাতি ৰেদিতব্বা. যেতি অনিযমতো নিদ্দিট্ঠপরামসনং. ৰোতি উপযোগবহুৰচনং. অযঞ্হেত্থ সঙ্খেপত্থো – ভিক্খৰে, তুম্হাকং বহূপকারা ব্রাহ্মণগহপতিকা, যে ব্রাহ্মণা চেৰ সেসঅগারিকা চ ‘‘তুম্হে এৰ অম্হাকং পুঞ্ঞক্খেত্তং, যত্থ মযং উদ্ধগ্গিকং দক্খিণং পতিট্ঠাপেম সোৰগ্গিকং সুখৰিপাকং সগ্গসংৰত্তনিক’’ন্তি চীৰরাদীহি পচ্চযেহি পতিউপট্ঠিতাতি.

এৰং ‘‘আমিসদানেন আমিসসংৰিভাগেন আমিসানুগ্গহেন গহট্ঠা ভিক্খূনং উপকারৰন্তো’’তি দস্সেত্ৰা ইদানি ধম্মদানেন ধম্মসংৰিভাগেন ধম্মানুগ্গহেন ভিক্খূনম্পি তেসং উপকারৰন্ততং দস্সেতুং ‘‘তুম্হেপি, ভিক্খৰে,’’তিআদি ৰুত্তং, তং ৰুত্তনযমেৰ.

ইমিনা কিং কথিতং? পিণ্ডাপচাযনং নাম কথিতং. অযঞ্হেত্থ অধিপ্পাযো – ভিক্খৰে, যস্মা ইমে ব্রাহ্মণগহপতিকা নেৰ তুম্হাকং ঞাতকা, ন মিত্তা, ন ইণং ৰা ধারেন্তি, অথ খো ‘‘ইমে সমণা সম্মগ্গতা সম্মা পটিপন্না, এত্থ নো কারা মহপ্ফলা ভৰিস্সন্তি মহানিসংসা’’তি ফলৰিসেসং আকঙ্খন্তা তুম্হে চীৰরাদীহি উপট্ঠহন্তি. তস্মা তং তেসং অধিপ্পাযং পরিপূরেন্তা অপ্পমাদেন সম্পাদেথ, ধম্মদেসনাপি ৰো কারকানংযেৰ সোভতি, আদেয্যা চ হোতি, ন ইতরেসন্তি এৰং সম্মাপটিপত্তিযং অপ্পমাদো করণীযোতি.

এৰমিদং, ভিক্খৰেতিআদীসু অযং সঙ্খেপত্থো – ভিক্খৰে, এৰং ইমিনা ৰুত্তপ্পকারেন গহট্ঠপব্বজিতেহি আমিসদানধম্মদানৰসেন অঞ্ঞমঞ্ঞং সন্নিস্সায কামাদিৰসেন চতুব্বিধস্সপি ওঘস্স নিত্থরণত্থায সকলস্সপি ৰট্টদুক্খস্স সম্মদেৰ পরিযোসানকরণায উপোসথসীলনিযমাদিৰসেন চতুপারিসুদ্ধিসীলাদিৰসেন ৰা ইদং সাসনব্রহ্মচরিযং মগ্গব্রহ্মচরিযঞ্চ ৰুস্সতি চরীযতীতি.

গাথাসু সাগারাতি গহট্ঠা. অনগারাতি পরিচ্চত্তঅগারা পব্বজিতা. উভো অঞ্ঞোঞ্ঞনিস্সিতাতি তে উভোপি অঞ্ঞমঞ্ঞসন্নিস্সিতা. সাগারা হি অনগারানং ধম্মদানসন্নিস্সিতা, অনগারা চ সাগারানং পচ্চযদানসন্নিস্সিতা. আরাধযন্তীতি সাধেন্তি সম্পাদেন্তি. সদ্ধম্মন্তি পটিপত্তিসদ্ধম্মং পটিৰেধসদ্ধম্মঞ্চ. তত্থ যং উত্তমং, তং দস্সেন্তো আহ ‘‘যোগক্খেমং অনুত্তর’’ন্তি অরহত্তং নিব্বানঞ্চ. সাগারেসূতি সাগারেহি, নিস্সক্কে ইদং ভুম্মৰচনং, সাগারানং ৰা সন্তিকে. পচ্চযন্তি ৰুত্তাৰসেসং দুৰিধং পচ্চযং পিণ্ডপাতং ভেসজ্জঞ্চ. পরিস্সযৰিনোদনন্তি উতুপরিস্সযাদিপরিস্সযহরণং ৰিহারাদিআৰসথং. সুগতন্তি সম্মা পটিপন্নং কল্যাণপুথুজ্জনেন সদ্ধিং অট্ঠৰিধং অরিযপুগ্গলং. সাৰকো হি ইধ সুগতোতি অধিপ্পেতো. ঘরমেসিনোতি ঘরং এসিনো, গেহে ঠত্ৰা ঘরাৰাসং ৰসন্তা ভোগূপকরণানি চেৰ গহট্ঠসীলাদীনি চ এসনসীলাতি অত্থো. সদ্দহানো অরহতন্তি অরহন্তানং অরিযানং ৰচনং, তেসং ৰা সম্মাপটিপত্তিং সদ্দহন্তা. ‘‘অদ্ধা ইমে সম্মা পটিপন্না, যথা ইমে কথেন্তি, তথা পটিপজ্জন্তানং সা পটিপত্তি সগ্গমোক্খসম্পত্তিযা সংৰত্ততী’’তি অভিসদ্দহন্তাতি অত্থো. ‘‘সদ্দহন্তা’’তিপি পাঠো. অরিযপঞ্ঞাযাতি সুৰিসুদ্ধপঞ্ঞায. ঝাযিনোতি আরম্মণলক্খণূপনিজ্ঝানৰসেন দুৰিধেনপি ঝানেন ঝাযিনো.

ইধ ধম্মং চরিত্ৰানাতি ইমস্মিং অত্তভাৰে, ইমস্মিং ৰা সাসনে লোকিযলোকুত্তরসুখস্স মগ্গভূতং সীলাদিধম্মং পটিপজ্জিত্ৰা যাৰ পরিনিব্বানং ন পাপুণন্তি, তাৰদেৰ সুগতিগামিনো. নন্দিনোতি পীতিসোমনস্সযোগেন নন্দনসীলা. কেচি পন ‘‘ধম্মং চরিত্ৰান মগ্গন্তি সোতাপত্তিমগ্গং পাপুণিত্ৰা’’তি ৰদন্তি. দেৰলোকস্মিন্তি ছব্বিধেপি কামাৰচরদেৰলোকে. মোদন্তি কামকামিনোতি যথিচ্ছিতৰত্থুনিপ্ফত্তিতো কামকামিনো কামৰন্তো হুত্ৰা পমোদন্তীতি.

অট্ঠমসুত্তৰণ্ণনা নিট্ঠিতা.