৭. কামযোগসুত্তৰণ্ণনা

৯৬. সত্তমে কামযোগযুত্তোতি পঞ্চকামগুণিকো রাগো কামযোগো, তেন যুত্তো কামযোগযুত্তো, অসমুচ্ছিন্নকামরাগস্সেতং অধিৰচনং. রূপারূপভৰেসু ছন্দরাগো ভৰযোগো, তথা ঝাননিকন্তি সস্সতদিট্ঠিসহগতো চ রাগো, তেন যুত্তো ভৰযোগযুত্তো, অপ্পহীনভৰরাগোতি অত্থো. আগামীতি ব্রহ্মলোকে ঠিতোপি পটিসন্ধিগ্গহণৰসেন ইমং মনুস্সলোকং আগমনসীলো. তেনেৰাহ ‘‘আগন্তা ইত্থত্ত’’ন্তি. মনুস্সত্তভাৰসঙ্খাতং ইত্থভাৰং আগমনধম্মো, মনুস্সেসু উপপজ্জনসীলোতি অত্থো. কামঞ্চেত্থ কামযোগো ইত্থত্তং আগমনস্স কারণং. যো পন কামযোগযুত্তো, সো একন্তেন ভৰযোগযুত্তোপি হোতীতি দস্সনত্থং ‘‘কামযোগযুত্তো, ভিক্খৰে, ভৰযোগযুত্তো’’তি উভযম্পি একজ্ঝং কত্ৰা ৰুত্তং.

কামযোগৰিসংযুত্তোতি এত্থ অসুভজ্ঝানম্পি কামযোগৰিসংযোগো, তং পাদকং কত্ৰা অধিগতো অনাগামিমগ্গো একন্তেনেৰ কামযোগৰিসংযোগো নাম, তস্মা ততিযমগ্গফলে ঠিতো অরিযপুগ্গলো ‘‘কামযোগৰিসংযুত্তো’’তি ৰুত্তো. যস্মা পন রূপারূপভৰেসু ছন্দরাগো অনাগামিমগ্গেন ন পহীযতি, তস্মা সো অপ্পহীনভৰযোগত্তা ‘‘ভৰযোগযুত্তো’’তি ৰুত্তো. অনাগামীতি কামলোকং পটিসন্ধিগ্গহণৰসেন অনাগমনতো অনাগামী. কামযোগৰিসংযোগৰসেনেৰ হি সদ্ধিং অনৰসেসওরম্ভাগিযসংযোজনসমুগ্ঘাতেন অজ্ঝত্তসংযোজনাভাৰসিদ্ধিতো ইত্থত্তং অনাগন্ত্ৰা হোতি, তত্থ পরিনিব্বাযী অনাৰত্তিধম্মো. যস্স পন অনৰসেসং ভৰযোগো পহীনো, তস্স অৰিজ্জাযোগাদিঅৰসিট্ঠকিলেসাপি তদেকট্ঠভাৰতো পহীনা এৰ হোন্তীতি, সো পরিক্খীণভৰসংযোজনো ‘‘অরহং খীণাসৰো’’তি ৰুচ্চতি. তেন ৰুত্তং ‘‘কামযোগৰিসংযুত্তো, ভিক্খৰে, ভৰযোগৰিসংযুত্তো অরহং হোতি খীণাসৰো’’তি. এত্থ চ কামযোগৰিসংযোগো অনাগামী চতুত্থজ্ঝানস্স সুখদুক্খসোমনস্সদোমনস্সপ্পহানং ৰিয, ততিযমগ্গস্স দিট্ঠিৰিচিকিচ্ছাসীলব্বতপরামাসসংযোজনপরিক্খযো ৰিয চ চতুত্থমগ্গস্স ৰণ্ণভণনত্থং ৰুত্তোতি দট্ঠব্বং. পঠমপদেন সোতাপন্নসকদাগামীহি সদ্ধিং সব্বো পুথুজ্জনো গহিতো, দুতিযপদেন পন সব্বো অনাগামী, ততিযপদেন অরহাতি অরহত্তনিকূটেন দেসনং নিট্ঠাপেসি.

গাথাসু উভযন্তি উভযেন, কামযোগেন, ভৰযোগেন চ সংযুত্তাতি অত্থো. সত্তা গচ্ছন্তি সংসারন্তি পুথুজ্জনা সোতাপন্না সকদাগামিনোতি ইমে তিৰিধা সত্তা কামযোগভৰযোগানং অপ্পহীনত্তা গচ্ছন্তি সংসারন্তি. ততো এৰ জাতিমরণগামিনো হোন্তি. এত্থ একবীজী, কোলংকোলো, সত্তক্খত্তুপরমোতি তীসু সোতাপন্নেসু সব্বমুদু সত্তক্খত্তুপরমো, সো অট্ঠমং ভৰং ন নিব্বত্তেতি, অত্তনো পরিচ্ছিন্নজাতিৰসেন পন সংসরতি, তথা ইতরেপি. সকদাগামীসুপি যো ইধ সকদাগামিমগ্গং পত্ৰা দেৰলোকে উপ্পজ্জিত্ৰা পুন ইধ নিব্বত্ততি, সো অত্তনো পরিচ্ছিন্নজাতিৰসেনেৰ সংসরতি. যে পন সকদাগামিনো ৰোমিস্সকনযেন ৰিনা তত্থ তত্থ দেৰেসুযেৰ মনুস্সেসুযেৰ ৰা নিব্বত্তন্তি, তে উপরিমগ্গাধিগমায যাৰ ইন্দ্রিযপরিপাকা পুনপ্পুনং উপ্পজ্জনতো সংসরন্তিযেৰ. পুথুজ্জনে পন ৰত্তব্বমেৰ নত্থি সব্বভৰসংযোজনানং অপরিক্খীণত্তা. তেন ৰুত্তং –

‘‘কামযোগেন সংযুত্তা, ভৰযোগেন চূভযং;

সত্তা গচ্ছন্তি সংসারং, জাতিমরণগামিনো’’তি.

কামে পহন্ত্ৰানাতি কামরাগসঙ্খাতে কিলেসকামে অনাগামিমগ্গেন পজহিত্ৰা. ছিন্নসংসযাতি সমুচ্ছিন্নকঙ্খা, তঞ্চ খো সোতাপত্তিমগ্গেনেৰ. ৰণ্ণভণনত্থং পন চতুত্থমগ্গস্স এৰং ৰুত্তং. অরহন্তো হি ইধ ‘‘ছিন্নসংসযা’’তি অধিপ্পেতা. তেনেৰাহ ‘‘খীণমানপুনব্ভৰা’’তি. সব্বসো খীণো নৰৰিধোপি মানো আযতিং পুনব্ভৰো চ এতেসন্তি খীণমানপুনব্ভৰা. মানগ্গহণেন চেত্থ তদেকট্ঠতায লক্খণৰসেন ৰা সব্বো চতুত্থমগ্গৰজ্ঝো কিলেসো গহিতোতি. খীণমানতায চ সউপাদিসেসা নিব্বানধাতু ৰুত্তা হোতি, খীণপুনব্ভৰতায অনুপাদিসেসা. সেসং সুৰিঞ্ঞেয্যমেৰ.

সত্তমসুত্তৰণ্ণনা নিট্ঠিতা.