১৪. বহুপুত্তিকত্থেরীৰত্থু
যো চ ৰস্সসতং জীৰেতি ইমং ধম্মদেসনং সত্থা জেতৰনে ৰিহরন্তো বহুপুত্তিকং থেরিং আরব্ভ কথেসি.
সাৰত্থিযং কিরেকস্মিং কুলে সত্ত পুত্তা সত্ত চ ধীতরো অহেসুং. তে সব্বেপি ৰযপ্পত্তা গেহে পতিট্ঠহিত্ৰা অত্তনো ধম্মতায সুখপ্পত্তা অহেসুং. তেসং অপরেন সমযেন পিতা কালমকাসি. মহাউপাসিকা সামিকে নট্ঠেপি ন তাৰ কুটুম্বং ৰিভজতি. অথ নং পুত্তা আহংসু – ‘‘অম্ম, অম্হাকং পিতরি নট্ঠে তুয্হং কো অত্থো কুটুম্বেন, কিং মযং তং উপট্ঠাতুং ন সক্কোমা’’তি. সা তেসং কথং সুত্ৰা তুণ্হী হুত্ৰা পুনপ্পুনং তেহি ৰুচ্চমানা ‘‘পুত্তা মং পটিজগ্গিস্সন্তি, কিং মে ৰিসুং কুটুম্বেনা’’তি সব্বং সাপতেয্যং মজ্ঝে ভিন্দিত্ৰা অদাসি. অথ নং কতিপাহচ্চযেন জেট্ঠপুত্তস্স ভরিযা ‘‘অহো অম্হাকং, অয্যা, ‘জেট্ঠপুত্তো মে’তি দ্ৰে কোট্ঠাসে দত্ৰা ৰিয ইমমেৰ গেহং আগচ্ছতী’’তি আহ. সেসপুত্তানং ভরিযাপি এৰমেৰ ৰদিংসু. জেট্ঠধীতরং আদিং কত্ৰা তাসং গেহং গতকালেপি নং এৰমেৰ ৰদিংসু. সা অৰমানপ্পত্তা হুত্ৰা ‘‘কিং ইমেসং সন্তিকে ৰুট্ঠেন, ভিক্খুনী হুত্ৰা জীৰিস্সামী’’তি ভিক্খুনীউপস্সযং গন্ত্ৰা পব্বজ্জং যাচি. তা নং পব্বাজেসুং. সা লদ্ধূপসম্পদা হুত্ৰা বহুপুত্তিকত্থেরীতি পঞ্ঞাযি. সা ‘‘অহং মহল্লককালে পব্বজিতা, অপ্পমত্তায মে ভৰিতব্ব’’ন্তি ভিক্খুনীনং ৰত্তপটিৰত্তং করোন্তী ‘‘সব্বরত্তিং সমণধম্মং করিস্সামী’’তি হেট্ঠাপাসাদে একং থম্ভং হত্থেন গহেত্ৰা তং আৰিঞ্ছমানাৰ সমণধম্মং করোতি, চঙ্কমমানাপি ‘‘অন্ধকারট্ঠানে মে রুক্খে ৰা কত্থচি ৰা সীসং পটিহঞ্ঞেয্যা’’তি তং রুক্খং হত্থেন গহেত্ৰা তং আৰিঞ্ছমানাৰ সমণধম্মং করোতি, ‘‘সত্থারা দেসিতধম্মমেৰ করিস্সামী’’তি ধম্মং আৰজ্জেত্ৰা ধম্মং অনুস্সরমানাৰ সমণধম্মং করোতি. অথ সত্থা গন্ধকুটিযং নিসিন্নোৰ ওভাসং ফরিত্ৰা সম্মুখে নিসিন্নো ৰিয তায সদ্ধিং কথেন্তো ‘‘বহুপুত্তিকে মযা দেসিতং ধম্মং অনাৰজ্জেন্তস্স অপস্সন্তস্স ৰস্সসতং জীৰনতো মযা দেসিতং ধম্মং পস্সন্তস্স মুহুত্তম্পি জীৰিতং সেয্যো’’তি ৰত্ৰা অনুসন্ধিং ঘটেত্ৰা ধম্মং দেসেন্তো ইমং গাথমাহ –
১১৫. ‘‘যো চ ৰস্সসতং জীৰে, অপস্সং ধম্মমুত্তমং;
একাহং জীৰিতং সেয্যো, পস্সতো ধম্মমুত্তম’’ন্তি.
তত্থ ধম্মমুত্তমন্তি নৰৰিধং লোকুত্তরধম্মং. সো হি উত্তমো ধম্মো নাম. যো হি তং ন পস্সতি, তস্স ৰস্সসতম্পি জীৰনতো তং ধম্মং পস্সন্তস্স পটিৰিজ্ঝন্তস্স একাহম্পি একক্খণম্পি জীৰিতং সেয্যোতি.
গাথাপরিযোসানে বহুপুত্তিকত্থেরী সহ পটিসম্ভিদাহি অরহত্তে পতিট্ঠহীতি.
বহুপুত্তিকত্থেরীৰত্থু চুদ্দসমং.
সহস্সৰগ্গৰণ্ণনা নিট্ঠিতা.
অট্ঠমো ৰগ্গো.
নমো তস্স ভগৰতো অরহতো সম্মাসম্বুদ্ধস্স