১১. জম্বুকত্থেরৰত্থু

মাসে মাসেতি ইমং ধম্মদেসনং সত্থা ৰেল়ুৰনে ৰিহরন্তো জম্বুকং আজীৰকং আরব্ভ কথেসি.

অতীতে কির কস্সপসম্মাসম্বুদ্ধকালে গামৰাসী একো কুটুম্বিকো একস্স থেরস্স ৰিহারং কত্ৰা তং তত্থ ৰিহরন্তং চতূহি পচ্চযেহি উপট্ঠহি. থেরো তস্স গেহে নিবদ্ধং ভুঞ্জতি. অথেকো খীণাসৰো ভিক্খু দিৰা পিণ্ডায চরন্তো তস্স গেহদ্ৰারং পাপুণি. কুটুম্বিকো তং দিস্ৰা তস্স ইরিযাপথে পসন্নো গেহং পৰেসেত্ৰা সক্কচ্চং পণীতেন ভোজনেন পরিৰিসিত্ৰা, ‘‘ভন্তে, ইমং সাটকং রজিত্ৰা নিৰাসেয্যাথা’’তি মহন্তং সাটকং দত্ৰা, ‘‘ভন্তে, কেসা ৰো দীঘা, তুম্হাকং কেসোরোপনত্থায ন্হাপিতং আনেস্সামি, সযনত্থায চ ৰো মঞ্চকং গাহাপেত্ৰা আগমিস্সামী’’তি আহ. নিবদ্ধং গেহে ভুঞ্জন্তো কুলূপকো ভিক্খু তং তস্স সক্কারং দিস্ৰা চিত্তং পসাদেতুং নাসক্খি, ‘‘অযং তং মুহুত্তং দিট্ঠকস্স এৰরূপং সক্কারং করোতি, নিবদ্ধং গেহে ভুঞ্জন্তস্স পন ময্হং ন করোতী’’তি চিন্তেত্ৰা ৰিহারং অগমাসি. ইতরোপি তেনেৰ সদ্ধিং গন্ত্ৰা কুটুম্বিকেন দিন্নসাটকং রজিত্ৰা নিৰাসেসি. কুটম্বিকোপি ন্হাপিতং আদায গন্ত্ৰা থেরস্স কেসে ওহারাপেত্ৰা মঞ্চকং অত্থরাপেত্ৰা, ‘‘ভন্তে, ইমস্মিংযেৰ মঞ্চকে সযথা’’তি ৰত্ৰা দ্ৰেপি থেরে স্ৰাতনায নিমন্তেত্ৰা পক্কামি.

নেৰাসিকো তস্স তং সক্কারং কযিরমানং অধিৰাসেতুং নাসক্খি. অথস্স সো সাযং থেরস্স নিপন্নট্ঠানং গন্ত্ৰা চতূহাকারেহি থেরং অক্কোসি, ‘‘আৰুসো, আগন্তুক কুটুম্বিকস্স তে গেহে ভত্তং ভুঞ্জনতো ৰরতরং মীল়্হং খাদিতুং, কুটুম্বিকেন আনীতন্হাপিতেন কেসোহারাপনতো ৰরতরং তালট্ঠিকেন কেসে লুঞ্চাপেতুং. কুটুম্বিকেন দিন্নসাটকনিৰাসনতো ৰরতরং নগ্গেন ৰিচরিতুং, কুটুম্বিকেন আভতমঞ্চকে নিপজ্জনতো ৰরতরং ভূমিযং নিপজ্জিতু’’ন্তি. থেরোপি ‘‘মা এস বালো মং নিস্সায নস্সী’’তি নিমন্তনং অনাদিযিত্ৰা পাতোৰ উট্ঠায যথাসুখং অগমাসি. নেৰাসিকোপি পাতোৰ ৰিহারে কত্তব্বৰত্তং কত্ৰা ভিক্খাচারৰেলায ‘‘ইদানিপি আগন্তুকো নিদ্দাযতি, ঘণ্ডিকসদ্দেন পবুজ্ঝেয্যা’’তি সঞ্ঞায নখপিট্ঠেনেৰ ঘণ্ডিং পহরিত্ৰা গামং পিণ্ডায পাৰিসি. কুটুম্বিকোপি সক্কারং কত্ৰা থেরানং আগমনমগ্গং ওলোকেন্তো নেৰাসিকং দিস্ৰা, ‘‘ভন্তে, থেরো কুহি’’ন্তি পুচ্ছি. অথ নং নেৰাসিকো ‘‘মা, আৰুসো, কিঞ্চি অৰচ, তুয্হং কুলূপকো হিয্যো, তৰ নিক্খন্তৰেলায ওৰরকং পৰিসিত্ৰা নিদ্দং ওক্কন্তো পাতোৰ উট্ঠায মম ৰিহারসম্মজ্জনসদ্দম্পি পানীযঘটপরিভোজনীযঘটেসু উদকসিঞ্চনসদ্দম্পি ঘণ্ডিকসদ্দম্পি করোন্তস্স ন জানাতী’’তি আহ. কুটুম্বিকো চিন্তেসি – ‘‘তাদিসায ইরিযাপথসম্পত্তিযা সমন্নাগতস্স মে অয্যস্স যাৰ ইমম্হা কালা নিদ্দাযনং নাম নত্থি, মং পন তস্স সক্কারং করোন্তং দিস্ৰা অদ্ধা ইমিনা ভদন্তেন কিঞ্চি ৰুত্তং ভৰিস্সতী’’তি. সো অত্তনো পণ্ডিতভাৰেন তং সক্কচ্চং ভোজেত্ৰা তস্স পত্তং সাধুকং ধোৰিত্ৰা নানগ্গরসভোজনস্স পূরেত্ৰা, ‘‘ভন্তে, সচে মে অয্যং পস্সেয্যাথ, ইমমস্স পিণ্ডপাতং দদেয্যাথা’’তি আহ.

ইতরো তং গহেত্ৰাৰ চিন্তেসি – ‘‘সচে সো এৰরূপং পিণ্ডপাতং ভুঞ্জিস্সতি, ইমস্মিংযেৰ ঠানে পলুদ্ধো ভৰিস্সতী’’তি অন্তরামগ্গে তং পিণ্ডপাতং ছড্ডেত্ৰা থেরস্স ৰসনট্ঠানং গন্ত্ৰা তং তত্থ ওলোকেন্তো ন অদ্দস. অথ নং এত্তকস্স কম্মস্স কতত্তা ৰীসতিৰস্সসহস্সানি কতোপি সমণধম্মো রক্খিতুং নাসক্খি. আযুপরিযোসানে পন কালং কত্ৰা অৰীচিম্হি নিব্বত্তিত্ৰা একং বুদ্ধন্তরং মহাদুক্খং অনুভৰিত্ৰা ইমস্মিং বুদ্ধুপ্পাদে রাজগহনগরে একস্মিং বহ্ৰন্নপানে কুলঘরে নিব্বত্তি. সো পদসা গমনকালতো পট্ঠায নেৰ সযনে সযিতুং, ন ভত্তং ভুঞ্জিতুং ইচ্ছতি, অত্তনো সরীরৰলঞ্জমেৰ খাদতি. ‘‘বালতায অজানন্তো করোতী’’তি তং পোসযিংসু. মহল্লককালেপি ৰত্থং নিৰাসেতুং ন ইচ্ছতি, নগ্গোৰ ৰিচরতি, ভূমিযং সযতি, অত্তনো সরীরৰলঞ্জমেৰ খাদতি. অথস্স মাতাপিতরো ‘‘নাযং কুলঘরস্স অনুচ্ছৰিকো, কেৰলং অলজ্জনকো আজীৰকানং এস অনুচ্ছৰিকো’’তি তেসং সন্তিকং নেত্ৰা ‘‘ইমং দারকং পব্বাজেথা’’তি অদংসু. অথ নং তে পব্বাজেসুং. পব্বাজেন্তা চ পন গলপ্পমাণে আৰাটে ঠপেত্ৰা দ্ৰিন্নং অংসকূটানং উপরিং পদরানি দত্ৰা তেসং উপরি নিসীদিত্ৰা তালট্ঠিখণ্ডেন কেসে লুঞ্চিংসু. অথ নে তস্স মাতাপিতরো স্ৰাতনায নিমন্তেত্ৰা পক্কমিংসু.

পুনদিৰসে আজীৰকা ‘‘এহি, গামং পৰিসিস্সামা’’তি তং ৰদিংসু. সো ‘‘গচ্ছথ তুম্হে, অহং ইধেৰ ভৰিস্সামী’’তি ন ইচ্ছি. অথ নং পুনপ্পুনং ৰত্ৰা অনিচ্ছমানং ওহায অগমংসু. সোপি তেসং গতভাৰং ঞত্ৰা ৰচ্চকুটিযা পদরং ৰিৰরিত্ৰা ওরুয্হ উভোহি হত্থেহি আলোপং আলোপং কত্ৰা গূথং খাদি. আজীৰকা তস্স অন্তোগামতো আহারং পহিণিংসু. তম্পি ন ইচ্ছি. পুনপ্পুনং ৰুচ্চমানোপি ‘‘ন মে ইমিনা অত্থো. লদ্ধো মে আহারো’’তি আহ. ‘‘কহং লদ্ধো’’তি? ‘‘ইধেৰ লদ্ধো’’তি. এৰং দুতিযে ততিযে চতুত্থেপি দিৰসে তেহি বহুম্পি ৰুচ্চমানো ‘‘অহং ইধেৰ ভৰিস্সামী’’তি গামং গন্তুং ন ইচ্ছি. আজীৰকা ‘‘অযং দিৰসে দিৰসে নেৰ গামং পৰিসিতুং ইচ্ছতি, ন অম্হেহি পহিতাহারং আহরিতুং ইচ্ছতি, ‘ইধেৰ মে লদ্ধো’তি ৰদতি, কিং নু খো করোতি, পরিগ্গণ্হিস্সাম ন’’ন্তি গামং পৰিসন্তা একং দ্ৰে জনে তস্স পরিগ্গণ্হনত্থং ওহায গমিংসু. তে পচ্ছতো গচ্ছন্তা ৰিয হুত্ৰা নিলীযিংসু. সোপি তেসং গতভাৰং ঞত্ৰা পুরিমনযেনেৰ ৰচ্চকুটিং ওরুয্হ গূথং খাদি.

ইতরে তস্স কিরিযং দিস্ৰা আজীৰকানং আরোচযিংসু. তং সুত্ৰা আজীৰকা ‘‘অহো ভারিযং কম্মং, সচে সমণস্স গোতমস্স সাৰকা জানেয্যুং, ‘আজীৰকা গূথং খাদমানা ৰিচরন্তী’তি অম্হাকং অকিত্তিং পকাসেয্যুং, নাযং অম্হাকং অনুচ্ছৰিকো’’তি তং অত্তনো সন্তিকা নীহরিংসু. সো তেহি নীহরিতো মহাজনস্স উচ্চারকরণট্ঠানে পত্থরিতো একো পিট্ঠিপাসাণো অত্থি. তস্মিং মহন্তং সোণ্ডি, পিট্ঠিপাসাণং নিস্সায মহাজনস্স উচ্চারকরণট্ঠানং. সো তত্থ গন্ত্ৰা রত্তিং গূথং খাদিত্ৰা মহাজনস্স সরীরৰলঞ্জনত্থায আগমনকালে একেন হত্থেন পাসাণস্স একং অন্তং ওলুব্ভ একং পাদং উক্খিপিত্ৰা জণ্ণুকে ঠপেত্ৰা উদ্ধংৰাতাভিমুখো মুখং ৰিৰরিত্ৰা তিট্ঠতি. মহাজনো তং দিস্ৰা উপসঙ্কমিত্ৰা ৰন্দিত্ৰা, ‘‘ভন্তে, কস্মা অয্যো মুখং ৰিৰরিত্ৰা ঠিতো’’তি পুচ্ছতি. ‘‘অহং ৰাতভক্খো, অঞ্ঞো মে আহারো নত্থী’’তি. অথ ‘‘কস্মা একং পাদং জণ্ণুকে কত্ৰা ঠিতোসি, ভন্তে’’তি? ‘‘অহং উগ্গতপো ঘোরতপো, মযা দ্ৰীহি পাদেহি অক্কন্তা পথৰী কম্পতি, তস্মা একং পাদং উক্খিপিত্ৰা জণ্ণুকে ঠপেত্ৰা ঠিতোম্হি. অহঞ্হি রত্তিন্দিৰং ঠিতকোৰ ৰীতিনামেমি, ন নিসীদামি, ন নিপজ্জামী’’তি. মনুস্সা নাম যেভুয্যেন ৰচনমত্তমেৰ সদ্দহন্তি, তস্মা ‘‘অহো অচ্ছরিযং, এৰরূপাপি নাম তপস্সিনো হোন্তি, ন নো এৰরূপা দিট্ঠপুব্বা’’তি যেভুয্যেন অঙ্গমগধৰাসিনো সঙ্খুভিত্ৰা উপসঙ্কমিত্ৰা মাসে মাসে মহন্তং সক্কারং অভিহরন্তি. সো ‘‘অহং ৰাতমেৰ ভক্খামি, ন অঞ্ঞং আহারং. অঞ্ঞঞ্হি মে খাদন্তস্স তপো নস্সতী’’তি তেহি অভিহটং ন কিঞ্চি ইচ্ছতি. মনুস্সা ‘‘মা নো, ভন্তে, নাসেথ, তুম্হাদিসেন ঘোরতপেন পরিভোগে কতে অম্হাকং দীঘরত্তং হিতায সুখায সংৰত্ততী’’তি পুনপ্পুনং যাচন্তি. তস্স অঞ্ঞো আহারো ন রুচ্চতি. মহাজনস্স পন যাচনায পীল়িতো তেহি আভতানি সপ্পিফাণিতাদীনি কুসগ্গেন জিৰ্হগ্গে ঠপেত্ৰা ‘‘গচ্ছথ, অলং ৰো এত্তকং হিতায সুখায চা’’তি উয্যোজেসি. এৰং সো পঞ্চপঞ্ঞাস ৰস্সানি নগ্গো গূথং খাদন্তো কেসে লুঞ্চন্তো ভূমিযং সযমানো ৰীতিনামেসি.

বুদ্ধানম্পি খো পচ্চূসকালে লোকৰোলোকনং অৰিজহিতমেৰ হোতি. তস্মা একদিৰসং ভগৰতো পচ্চূসসমযে লোকং ৰোলোকেন্তস্স অযং জম্বুকাজীৰকো ঞাণজালস্স অন্তো পঞ্ঞাযি. সত্থা ‘‘কিং নু খো ভৰিস্সতী’’তি আৰজ্জেত্ৰা তস্স সহ পটিসম্ভিদাহি অরহত্তস্সূপনিস্সযং দিস্ৰা ‘‘অহং এতং আদিং কত্ৰা একং গাথং ভাসিস্সামি, গাথাৰসানে চতুরাসীতিযা পাণসহস্সানং ধম্মাভিসমযো ভৰিস্সতি. ইমং কুলপুত্তং নিস্সায মহাজনো সোত্থিভাৰং পাপুণিস্সতী’’তি ঞত্ৰা পুনদিৰসে রাজগহে পিণ্ডায চরিত্ৰা পিণ্ডপাতপটিক্কন্তো আনন্দত্থেরং আমন্তেসি – ‘‘আনন্দ, জম্বুকাজীৰকস্স সন্তিকং গমিস্সামী’’তি. ‘‘ভন্তে, কিং তুম্হেযেৰ গমিস্সথা’’তি? ‘‘আম, অহমেৰা’’তি এৰং ৰত্ৰা সত্থা ৰড্ঢমানকচ্ছাযায তস্স সন্তিকং পাযাসি.

দেৰতা চিন্তযিংসু – ‘‘সত্থা সাযং জম্বুকাজীৰকস্স সন্তিকং গচ্ছতি, সো চ জেগুচ্ছে উচ্চারপস্সাৰদন্তকট্ঠকিলিট্ঠে পিট্ঠিপাসাণে ৰসতি, দেৰং ৰস্সাপেতুং ৰট্টতী’’তি অত্তনো আনুভাৰেন তং মুহুত্তংযেৰ দেৰং ৰস্সাপেসুং. পিট্ঠিপাসাণো সুচি নিম্মলো অহোসি. অথস্স উপরি পঞ্চৰণ্ণং পুপ্ফৰস্সং ৰস্সাপেসুং. সত্থা সাযং জম্বুকাজীৰকস্স সন্তিকং গন্ত্ৰা ‘‘জম্বুকা’’তি সদ্দমকাসি. জম্বুকো ‘‘কো নু খো এস, দুজ্জনো মং জম্বুকৰাদেন ৰদতী’’তি চিন্তেত্ৰা ‘‘কো এসো’’তি আহ. ‘‘অহং সমণো’’তি. ‘‘কিং মহাসমণা’’তি? ‘‘অজ্জ মে একরত্তিং ইধ ৰসনট্ঠানং দেহী’’তি. ‘‘নত্থি, মহাসমণ, ইমস্মিং ঠানে ৰসনট্ঠান’’ন্তি. ‘‘জম্বুক, মা এৰং করি, একরত্তিং মে ৰসনট্ঠানং দেহি, পব্বজিতা নাম পব্বজিতং পত্থেন্তি, মনুস্সা মনুস্সং, পসৰো পসৰ’’ন্তি. ‘‘কিং পন ত্ৰং পব্বজিতো’’তি? ‘‘আম, পব্বজিতোম্হী’’তি. ‘‘সচে ত্ৰং পব্বজিতো, কহং তে লাবুকং, কহং ধূমকটচ্ছুকো, কহং যঞ্ঞসুত্তক’’ন্তি? ‘‘‘অত্থেতং ময্হং, ৰিসুং ৰিসুং পন গহেত্ৰা ৰিচরণং দুক্খ’ন্তি অব্ভন্তরেনেৰ গহেত্ৰা চরামী’’তি. সো ‘‘চরিস্সসি ত্ৰং এতং অগ্গণ্হিত্ৰা’’তি কুজ্ঝি. অথ নং সত্থা আহ – ‘‘হোতু, জম্বুক, মা কুজ্ঝ, ৰসনট্ঠানং মে আচিক্খা’’তি. ‘‘নত্থি, মহাসমণ, এত্থ ৰসনট্ঠান’’ন্তি.

সত্থা তস্স ৰসনট্ঠানতো অৰিদূরে একং পব্ভারং অত্থি, তং নিদ্দিসন্তো ‘‘এতস্মিং পব্ভারে কো ৰসতী’’তি আহ. ‘‘নত্থি কোচি, মহাসমণা’’তি. ‘‘তেন হি এতং ময্হং দেহী’’তি. ‘‘ত্ৰঞ্ঞেৰ জান, মহাসমণা’’তি. সত্থা পব্ভারে নিসীদনং পঞ্ঞাপেত্ৰা নিসীদি. পঠমযামে চত্তারো মহারাজানো চতুদ্দিসং একোভাসং করোন্তা সত্থু উপট্ঠানং আগমিংসু. জম্বুকো ওভাসং দিস্ৰা ‘‘কো ওভাসো নামেসো’’তি চিন্তেসি. মজ্ঝিমযামে সক্কো দেৰরাজা আগমি. জম্বুকো তম্পি দিস্ৰা ‘‘কো নামেসো’’তি চিন্তেসি. পচ্ছিমযামে একায অঙ্গুলিযা একং, দ্ৰীহি দ্ৰে, দসহি দস চক্কৰাল়ানি ওভাসেতুং সমত্থো মহাব্রহ্মা সকলং অরঞ্ঞং একোভাসং করোন্তো আগমি. জম্বুকো তম্পি দিস্ৰা ‘‘কো নু খো এসো’’তি চিন্তেত্ৰা পাতোৰ সত্থু সন্তিকং গন্ত্ৰা পটিসন্থারং কত্ৰা একমন্তং ঠিতো সত্থারং পুচ্ছি – ‘‘মহাসমণ, তুম্হাকং সন্তিকং চতস্সো দিসা ওভাসেন্তো কে আগতা’’তি? ‘‘চত্তারো মহারাজানো’’তি. ‘‘কিং কারণা’’তি? ‘‘মং উপট্ঠাতু’’ন্তি. ‘‘কিং পন ত্ৰং চতূহি মহারাজেহি উত্তরিতরো’’তি? ‘‘আম, জম্বুক, মহারাজূনম্পি অতিরাজা’’তি. ‘‘মজ্ঝিমযামে পন কো আগতো’’তি? ‘‘সক্কো দেৰরাজা, জম্বুকা’’তি. ‘‘কিং কারণা’’তি? ‘‘মং উপট্ঠাতুমেৰা’’তি. ‘‘কিং পন ত্ৰং সক্কদেৰরাজতোপি উত্তরিতরো’’তি? ‘‘আম, জম্বুক, সক্কতোপি উত্তরিতরোম্হি, এসো পন ময্হং গিলানুপট্ঠাকো কপ্পিযকারকসামণেরসদিসো’’তি. ‘‘পচ্ছিমযামে সকলং অরঞ্ঞং ওভাসেত্ৰা কো আগতো’’তি? ‘‘যং লোকে ব্রাহ্মণাদযো খিপিত্ৰা পক্খলিত্ৰা ‘নমো মহাব্রহ্মুনো’তি ৰদন্তি, সো এৰ মহাব্রহ্মা’’তি. ‘‘কিং পন ত্ৰং মহাব্রহ্মতোপি উত্তরিতরো’’তি? ‘‘আম, জম্বুক, অহঞ্হি ব্রহ্মুনাপি অতিব্রহ্মা’’তি. ‘‘অচ্ছরিযোসি ত্ৰং, মহাসমণ, ময্হং পন পঞ্চ পঞ্ঞাস ৰস্সানি ইধ ৰসন্তস্স এতেসু একোপি মং উপট্ঠাতুং নাগতপুব্বো. অহঞ্হি এত্তকং অদ্ধানং ৰাতভক্খো হুত্ৰা ঠিতকোৰ ৰীতিনামেসিং, ন তাৰ তে ময্হং উপট্ঠানং আগতপুব্বা’’তি.

অথ নং সত্থা আহ – জম্বুক, ত্ৰং লোকস্মিং অন্ধবালং মহাজনং ৰঞ্চযমানো মম্পি ৰঞ্চেতুকামো জাতো, ননু ত্ৰং পঞ্চপঞ্ঞাস ৰস্সানি গূথমেৰ খাদি, ভূমিযংযেৰ নিপজ্জি, নগ্গো হুত্ৰা ৰিচরি, তালট্ঠিখণ্ডেন কেসে লুঞ্চি. অথ চ পন লোকং ৰঞ্চেন্তো ‘‘অহং ৰাতভক্খো, একপাদেন তিট্ঠামি, ন নিসীদামি, ন নিপজ্জামী’’তি ৰদেসি, ‘‘মমম্পি ৰঞ্চেতুকামোসি পুব্বেপি ত্ৰং পাপিকং লামিকং দিট্ঠিং নিস্সায এত্তকং কালং গূথভক্খো ভূমিসযো নগ্গো ৰিচরন্তো তালট্ঠিখণ্ডেন কেসলুঞ্চনং পত্তো, ইদানিপি পাপিকং লামিকং দিট্ঠিমেৰ গণ্হাসী’’তি. ‘‘কিং পন মযা কতং, মহাসমণা’’তি? অথস্স সত্থা পুব্বে কতকম্মং আচিক্খি. তস্স সত্থরি কথেন্তেযেৰ সংৰেগো উপ্পজ্জি, হিরোত্তপ্পং উপট্ঠিতং, সো উক্কুটিকো নিসীদি. অথস্স সত্থা উদকসাটিকং খিপিত্ৰা অদাসি. সো তং নিৰাসেত্ৰা সত্থারং ৰন্দিত্ৰা একমন্তং নিসীদি. সত্থাপিস্স অনুপুব্বিং কথং কথেত্ৰা ধম্মং দেসেসি. সো দেসনাৰসানে সহ পটিসম্ভিদাহি অরহত্তং পত্ৰা সত্থারং ৰন্দিত্ৰা উট্ঠাযাসনা পব্বজ্জঞ্চ উপসম্পদঞ্চ যাচি. এত্তাৰতা তস্স পুরিমকম্মং পরিক্খীণং. অযঞ্হি খীণাসৰমহাথেরং চতূহি অক্কোসেহি অক্কোসিত্ৰা যাৰাযং মহাপথৰী তিগাৰুতাধিকং যোজনং উস্সন্না, তাৰ অৰীচিম্হি পচ্চিত্ৰা তত্থ পক্কাৰসেসেন পঞ্চপঞ্ঞাস ৰস্সানি ইমং ৰিপ্পকারং পত্তো. তেনস্স তং কম্মং খীণং. ৰীসতি পন ৰস্সসহস্সানি ইমিনা কতস্স সমণধম্মস্স ফলং নাসেতুং ন সক্কা. তস্মা সত্থা দক্খিণহত্থং পসারেত্ৰা ‘‘এহি, ভিক্খু, চর ব্রহ্মচরিযং সম্মা দুক্খস্স অন্তকিরিযাযা’’তি আহ. তাৰদেৰস্স গিহিলিঙ্গং অন্তরধাযি অট্ঠপরিক্খারধরো সট্ঠিৰস্সিকমহাথেরো ৰিয অহোসি.

অঙ্গমগধৰাসীনং তস্স সক্কারং গহেত্ৰা আগতদিৰসো কিরেস, তস্মা উভযরট্ঠৰাসিনো সক্কারং গহেত্ৰা আগতা তথাগতং দিস্ৰা ‘‘কিং নু খো অম্হাকং অয্যো জম্বুকো মহা, উদাহু সমণো গোতমো’’তি চিন্তেত্ৰা ‘‘সচে সমণো গোতমো মহা ভৰেয্য, অযং সমণস্স গোতমস্স সন্তিকং গচ্ছেয্য, জম্বুকাজীৰকস্স পন মহন্ততায সমণো গোতমো ইমস্স সন্তিকং আগতো’’তি চিন্তযিংসু. সত্থা মহাজনস্স পরিৰিতক্কং ঞত্ৰা, ‘‘জম্বুক, তৰ উপট্ঠাকানং কঙ্খং ছিন্দাহী’’তি আহ, সো ‘‘অহম্পি, ভন্তে, এত্তকমেৰ পচ্চাসীসামী’’তি ৰত্ৰা চতুত্থজ্ঝানং সমাপজ্জিত্ৰা উট্ঠায তালপ্পমাণং ৰেহাসং অব্ভুগ্গন্ত্ৰা ‘‘সত্থা মে, ভন্তে ভগৰা, সাৰকোহমস্মী’’তি ৰত্ৰা ওরুয্হ ৰন্দিত্ৰা পুন দ্ৰিতালমত্তং তিতালমত্তন্তি এৰং সত্ততালমত্তং ৰেহাসং অব্ভুগ্গন্ত্ৰা ওরুয্হ অত্তনো সাৰকভাৰং জানাপেসি. তং দিস্ৰা মহাজনো ‘‘অহো বুদ্ধা নাম অচ্ছরিযা অনোপমগুণা’’তি চিন্তেসি. সত্থা মহাজনেন সদ্ধিং কথেন্তো এৰমাহ – ‘‘অযং এত্তকং কালং তুম্হেহি আভতং সক্কারং কুসগ্গেন জিৰ্হগ্গে ঠপেত্ৰা ‘তপচরণং পূরেমী’তি ইধ নিৰুট্ঠো, সচেপি ইমিনা উপাযেন ৰস্সসতং তপচরণং পূরেয্য, যা চস্স ইদানি কালং ৰা ভত্তং ৰা কুক্কুচ্চাযিত্ৰা অভুঞ্জন্তস্স ভত্তচ্ছেদনকুসলচেতনা, তস্সা তং তপচরণং সোল়সিং কলম্পি ন অগ্ঘতী’’তি অনুসন্ধিং ঘটেত্ৰা ধম্মং দেসেন্তো ইমং গাথমাহ –

৭০. ‘‘মাসে মাসে কুসগ্গেন, বালো ভুঞ্জেয্য ভোজনং;

ন সো সঙ্খাতধম্মানং, কলং অগ্ঘতি সোল়সি’’ন্তি.

তস্সত্থো – সচে বালো অপরিঞ্ঞাতধম্মো সীলাদিগুণা পরিবাহিরো তিত্থাযতনে পব্বজিতো ‘‘তপচরণং পূরেস্সামী’’তি মাসে মাসে পত্তে কুসগ্গেন ভোজনং ভুঞ্জন্তো ৰস্সসতং ভুঞ্জেয্য ভোজনং. ন সো সঙ্খাতধম্মানং, কলং অগ্ঘতি সোল়সিন্তি সঙ্খাতধম্মা ৰুচ্চন্তি ঞাতধম্মা তুলিতধম্মা. তেসু হেট্ঠিমকোটিযা সোতাপন্নো সঙ্খাতধম্মো, উপরিমকোটিযা খীণাসৰো. ইমেসং সঙ্খাতধম্মানং সো বালো কলং ন অগ্ঘতি সোল়সিন্তি পুগ্গলাধিট্ঠানা দেসনা. অযং পনেত্থ অত্থো – যা চস্স তথা তপচরণং পূরেন্তস্স ৰস্সসতং চেতনা যা চ সঙ্খাতধম্মানং কালং ৰা ভত্তং ৰা কুক্কুচ্চাযিত্ৰা অভুঞ্জন্তানং একা ভত্তচ্ছেদনকুসলচেতনা, তস্সা চেতনায সা তাৰ দীঘরত্তং পৰত্তচেতনা সোল়সিং কলং ন অগ্ঘতি. ইদং ৰুত্তং হোতি – যং তস্সা সঙ্খাতধম্মানং চেতনায ফলং, তং সোল়স কোট্ঠাসে কত্ৰা ততো একেকং পুন সোল়স সোল়স কোট্ঠাসে কত্ৰা ততো একস্স কোট্ঠাসস্স যং ফলং, তদেৰ তস্স বালস্স তপচরণতো মহপ্ফলতরন্তি.

দেসনাৰসানে চতুরাসীতিযা পাণসহস্সানং ধম্মাভিসমযো অহোসীতি.

জম্বুকত্থেরৰত্থু একাদসমং.