বুদ্ধসরীরপূজাৰণ্ণনা

২২৭. সব্বঞ্চ তাল়াৰচরন্তি সব্বং তূরিযভণ্ডং. সন্নিপাতেথাতি ভেরিং চরাপেত্ৰা সমাহরথ. তে তথেৰ অকংসু. মণ্ডলমাল়েতি দুস্সমণ্ডলমাল়ে. পটিযাদেন্তাতি সজ্জেন্তা.

দক্খিণেন দক্খিণন্তি নগরস্স দক্খিণদিসাভাগেনেৰ দক্খিণদিসাভাগং. বাহিরেন বাহিরন্তি অন্তোনগরং অপ্পৰেসেত্ৰা বাহিরেনেৰ নগরস্স বাহিরপস্সং হরিত্ৰা. দক্খিণতো নগরস্সাতি অনুরাধপুরস্স দক্খিণদ্ৰারসদিসে ঠানে ঠপেত্ৰা সক্কারসম্মানং কত্ৰা জেতৰনসদিসে ঠানে ঝাপেস্সামাতি অত্থো.

২২৮. অট্ঠ মল্লপামোক্খাতি মজ্ঝিমৰযা থামসম্পন্না অট্ঠমল্লরাজানো. সীসং ন্হাতাতি সীসং ধোৰিত্ৰা নহাতা. আযস্মন্তং অনুরুদ্ধন্তি থেরোৰ দিব্বচক্খুকোতি পাকটো, তস্মা তে সন্তেসুপি অঞ্ঞেসু মহাথেরেসু – ‘‘অযং নো পাকটং কত্ৰা কথেস্সতী’’তি থেরং পুচ্ছিংসু. কথং পন, ভন্তে, দেৰতানং অধিপ্পাযোতি ভন্তে, অম্হাকং তাৰ অধিপ্পাযং জানাম. দেৰতানং কথং অধিপ্পাযোতি পুচ্ছন্তি. থেরো পঠমং তেসং অধিপ্পাযং দস্সেন্তো তুম্হাকং খোতিআদিমাহ. মকুটবন্ধনং নাম মল্লানং চেতিযন্তি মল্লরাজূনং পসাধনমঙ্গলসালায এতং নামং. চিত্তীকতট্ঠেন পনেসা ‘‘চেতিয’’ন্তি ৰুচ্চতি.

২২৯. যাৰ সন্ধিসমলসঙ্কটীরাতি এত্থ সন্ধি নাম ঘরসন্ধি. সমলং নাম গূথরাসিনিদ্ধমনপনাল়ি. সঙ্কটীরং নাম সঙ্কারট্ঠানং. দিব্বেহি চ মানুসকেহি চ নচ্চেহীতি উপরি দেৰতানং নচ্চানি হোন্তি, হেট্ঠা মনুস্সানং. এস নযো গীতাদীসু. অপিচ দেৰতানং অন্তরে মনুস্সা, মনুস্সানং অন্তরে দেৰতাতি এৰম্পি সক্করোন্তা পূজেন্তা অগমংসু. মজ্ঝেন মজ্ঝং নগরস্স হরিত্ৰাতি এৰং হরিযমানে ভগৰতো সরীরে বন্ধুলমল্লসেনাপতিভরিযা মল্লিকা নাম – ‘‘ভগৰতো সরীরং আহরন্তী’’তি সুত্ৰা অত্তনো সামিকস্স কালং কিরিযতো পট্ঠায অপরিভুঞ্জিত্ৰা ঠপিতং ৰিসাখায পসাধনসদিসং মহালতাপসাধনং নীহরাপেত্ৰা – ‘‘ইমিনা সত্থারং পূজেস্সামী’’তি তং মজ্জাপেত্ৰা গন্ধোদকেন ধোৰিত্ৰা দ্ৰারে ঠিতা.

তং কির পসাধনং তাসঞ্চ দ্ৰিন্নং ইত্থীনং, দেৰদানিযচোরস্স গেহেতি তীসুযেৰ ঠানেসু অহোসি. সা চ সত্থু সরীরে দ্ৰারং সম্পত্তে – ‘‘ওতারেথ, তাতা, সত্থুসরীর’’ন্তি ৰত্ৰা তং পসাধনং সত্থুসরীরে পটিমুঞ্চি. তং সীসতো পট্ঠায পটিমুক্কং যাৰপাদতলাগতং. সুৰণ্ণৰণ্ণং ভগৰতো সরীরং সত্তরতনমযেন মহাপসাধনেন পসাধিতং অতিৰিয ৰিরোচিত্থ. তং সা দিস্ৰা পসন্নচিত্তা পত্থনং অকাসি – ‘‘ভগৰা যাৰ ৰট্টে সংসরিস্সামি, তাৰ মে পাটিযেক্কং পসাধনকিচ্চং মা হোতু, নিচ্চং পটিমুক্কপসাধনসদিসমেৰ সরীরং হোতূ’’তি.

অথ ভগৰন্তং সত্তরতনমযেন মহাপসাধনেন উক্খিপিত্ৰা পুরত্থিমেন দ্ৰারেন নীহরিত্ৰা পুরত্থিমেন নগরস্স মকুটবন্ধনং মল্লানং চেতিযং, এত্থ ভগৰতো সরীরং নিক্খিপিংসু.