পরিনিব্বুতকথাৰণ্ণনা

২১৯. ইতো পরং যং পরিনিব্বানপরিকম্মং কত্ৰা ভগৰা পরিনিব্বুতো, তং দস্সেতুং অথ খো ভগৰা পঠমং ঝানন্তিআদি ৰুত্তং. তত্থ পরিনিব্বুতো ভন্তেতি নিরোধং সমাপন্নস্স ভগৰতো অস্সাসপস্সাসানং অভাৰং দিস্ৰা পুচ্ছতি. ন আৰুসোতি থেরো কথং জানাতি? থেরো কির সত্থারা সদ্ধিংযেৰ তং তং সমাপত্তিং সমাপজ্জন্তো যাৰ নেৰসঞ্ঞানাসঞ্ঞাযতনা ৰুট্ঠানং, তাৰ গন্ত্ৰা ইদানি ভগৰা নিরোধং সমাপন্নো, অন্তোনিরোধে চ কালঙ্কিরিযা নাম নত্থীতি জানাতি.

অথ খো ভগৰা সঞ্ঞাৰেদযিতনিরোধসমাপত্তিযা ৰুট্ঠহিত্ৰা নেৰসঞ্ঞানাসঞ্ঞাযতনং সমাপজ্জি…পে… ততিযজ্ঝানা ৰুট্ঠহিত্ৰা চতুত্থজ্ঝানং সমাপজ্জীতি এত্থ ভগৰা চতুৰীসতিযা ঠানেসু পঠমজ্ঝানং সমাপজ্জি, তেরসসু ঠানেসু দুতিযজ্ঝানং, তথা ততিযজ্ঝানং, পন্নরসসু ঠানেসু চতুত্থজ্ঝানং সমাপজ্জি. কথং? দসসু অসুভেসু, দ্ৰত্তিংসাকারে অট্ঠসু কসিণেসু, মেত্তাকরুণামুদিতাসু, আনাপানে, পরিচ্ছেদাকাসেতি ইমেসু তাৰ চতুৰীসতিযা ঠানেসু পঠমজ্ঝানং সমাপজ্জি. ঠপেত্ৰা পন দ্ৰত্তিংসাকারঞ্চ দস অসুভানি চ সেসেসু তেরসসু দুতিযজ্ঝানং, তেসুযেৰ চ ততিযজ্ঝানং সমাপজ্জি. অট্ঠসু পন কসিণেসু, উপেক্খাব্রহ্মৰিহারে, আনাপানে, পরিচ্ছেদাকাসে, চতূসু অরূপেসূতি ইমেসু পন্নরসসু ঠানেসু চতুত্থজ্ঝানং সমাপজ্জি. অযম্পি চ সঙ্খেপকথাৰ. নিব্বানপুরং পৰিসন্তো পন ভগৰা ধম্মস্সামী সব্বাপি চতুৰীসতিকোটিসতসহস্সসঙ্খ্যা সমাপত্তিযো পৰিসিত্ৰা ৰিদেসং গচ্ছন্তো ঞাতিজনং আলিঙ্গেত্ৰা ৰিয সব্বসমাপত্তিসুখং অনুভৰিত্ৰা পৰিট্ঠো.

চতুত্থজ্ঝানা ৰুট্ঠহিত্ৰা সমনন্তরা ভগৰা পরিনিব্বাযীতি এত্থ ঝানসমনন্তরং, পচ্চৰেক্খণাসমনন্তরন্তি দ্ৰে সমনন্তরানি. তত্থ ঝানা ৰুট্ঠায ভৰঙ্গং ওতিণ্ণস্স তত্থেৰ পরিনিব্বানং ঝানসমনন্তরং নাম. ঝানা ৰুট্ঠহিত্ৰা পুন ঝানঙ্গানি পচ্চৰেক্খিত্ৰা ভৰঙ্গং ওতিণ্ণস্স তত্থেৰ পরিনিব্বানং পচ্চৰেক্খণাসমনন্তরং নাম. ইমানিপি দ্ৰে সমনন্তরানেৰ. ভগৰা পন ঝানং সমাপজ্জিত্ৰা ঝানা ৰুট্ঠায ঝানঙ্গানি পচ্চৰেক্খিত্ৰা ভৰঙ্গচিত্তেন অব্যাকতেন দুক্খসচ্চেন পরিনিব্বাযি. যে হি কেচি বুদ্ধা ৰা পচ্চেকবুদ্ধা ৰা অরিযসাৰকা ৰা অন্তমসো কুন্থকিপিল্লিকং উপাদায সব্বে ভৰঙ্গচিত্তেনেৰ অব্যাকতেন দুক্খসচ্চেন কালঙ্করোন্তীতি. মহাভূমিচালাদীনি ৰুত্তনযানেৰাতি.

২২০. ভূতাতি সত্তা. অপ্পটিপুগ্গলোতি পটিভাগপুগ্গলৰিরহিতো. বলপ্পত্তোতি দসৰিধঞাণবলং পত্তো.

২২১. উপ্পাদৰযধম্মিনোতি উপ্পাদৰযসভাৰা. তেসং ৰূপসমোতি তেসং সঙ্খারানং ৰূপসমো, অসঙ্খতং নিব্বানমেৰ সুখন্তি অত্থো.

২২২. নাহু অস্সাসপস্সাসোতি ন জাতো অস্সাসপস্সাসো. অনেজোতি তণ্হাসঙ্খাতায এজায অভাৰেন অনেজো. সন্তিমারব্ভাতি অনুপাদিসেসং নিব্বানং আরব্ভ পটিচ্চ সন্ধায. যং কালমকরীতি যো কালং অকরি. ইদং ৰুত্তং হোতি – ‘‘আৰুসো, যো মম সত্থা বুদ্ধমুনি সন্তিং গমিস্সামীতি, সন্তিং আরব্ভ কালমকরি, তস্স ঠিতচিত্তস্স তাদিনো ইদানি অস্সাসপস্সাসো ন জাতো, নত্থি, নপ্পৰত্ততী’’তি.

অসল্লীনেনাতি অলীনেন অসঙ্কুটিতেন সুৰিকসিতেনেৰ চিত্তেন. ৰেদনং অজ্ঝৰাসযীতি ৰেদনং অধিৰাসেসি, ন ৰেদনানুৰত্তী হুত্ৰা ইতো চিতো চ সম্পরিৰত্তি. ৰিমোক্খোতি কেনচি ধম্মেন অনাৰরণৰিমোক্খো সব্বসো অপঞ্ঞত্তিভাৰূপগমো পজ্জোতনিব্বানসদিসো জাতো.

২২৩. তদাসীতি ‘‘সহ পরিনিব্বানা মহাভূমিচালো’’তি এৰং হেট্ঠা ৰুত্তং ভূমিচালমেৰ সন্ধাযাহ. তঞ্হি লোমহংসনঞ্চ ভিংসনকঞ্চ আসি. সব্বাকারৰরূপেতেতি সব্বৰরকারণূপেতে.

২২৪. অৰীতরাগাতি পুথুজ্জনা চেৰ সোতাপন্নসকদাগামিনো চ. তেসঞ্হি দোমনস্সং অপ্পহীনং. তস্মা তেপি বাহা পগ্গয্হ কন্দন্তি. উভোপি হত্থে সীসে ঠপেত্ৰা রোদন্তীতি সব্বং পুরিমনযেনেৰ ৰেদিতব্বং.

২২৫. উজ্ঝাযন্তীতি ‘‘অয্যা অত্তনাপি অধিৰাসেতুং ন সক্কোন্তি, সেসজনং কথং সমস্সাসেস্সন্তী’’তি ৰদন্তিযো উজ্ঝাযন্তি. কথংভূতা পন ভন্তে আযস্মা অনুরুদ্ধো দেৰতা মনসিকরোতীতি দেৰতা, ভন্তে, কথংভূতা আযস্মা অনুরুদ্ধো সল্লক্খেতি, কিং তা সত্থু পরিনিব্বানং অধিৰাসেন্তীতি?

অথ তাসং পৰত্তিদস্সনত্থং থেরো সন্তাৰুসোতিআদিমাহ. তং ৰুত্তত্থমেৰ. রত্তাৰসেসন্তি বলৰপচ্চূসে পরিনিব্বুতত্তা রত্তিযা অৰসেসং চুল্লকদ্ধানং. ধম্মিযা কথাযাতি অঞ্ঞা পাটিযেক্কা ধম্মকথা নাম নত্থি, ‘‘আৰুসো সদেৰকে নাম লোকে অপ্পটিপুগ্গলস্স সত্থুনো অযং মচ্চুরাজা ন লজ্জতি, কিমঙ্গং পন লোকিযমহাজনস্স লজ্জিস্সতী’’তি এৰরূপায পন মরণপটিসংযুত্তায কথায ৰীতিনামেসুং. তেসঞ্হি তং কথং কথেন্তানং মুহুত্তেনেৰ অরুণং উগ্গচ্ছি.

২২৬. অথ খোতি অরুণুগ্গং দিস্ৰাৰ থেরো থেরং এতদৰোচ. তেনেৰ করণীযেনাতি কীদিসেন নু খো পরিনিব্বানট্ঠানে মালাগন্ধাদিসক্কারেন ভৰিতব্বং, কীদিসেন ভিক্খুসঙ্ঘস্স নিসজ্জট্ঠানেন ভৰিতব্বং, কীদিসেন খাদনীযভোজনীযেন ভৰিতব্বন্তি, এৰং যং ভগৰতো পরিনিব্বুতভাৰং সুত্ৰা কত্তব্বং তেনেৰ করণীযেন.