সুভদ্দপরিব্বাজকৰত্থুৰণ্ণনা

২১২. সুভদ্দো নাম পরিব্বাজকোতি উদিচ্চব্রাহ্মণমহাসালকুলা পব্বজিতো ছন্নপরিব্বাজকো. কঙ্খাধম্মোতি ৰিমতিধম্মো. কস্মা পনস্স অজ্জ এৰং অহোসীতি? তথাৰিধউপনিস্সযত্তা. পুব্বে কির পুঞ্ঞকরণকালে দ্ৰে ভাতরো অহেসুং. তে একতোৰ সস্সং অকংসু. তত্থ জেট্ঠকস্স – ‘‘একস্মিং সস্সে নৰৰারে অগ্গসস্সদানং মযা দাতব্ব’’ন্তি অহোসি. সো ৰপ্পকালে বীজগ্গং নাম দত্ৰা গব্ভকালে কনিট্ঠেন সদ্ধিং মন্তেসি – ‘‘গব্ভকালে গব্ভং ফালেত্ৰা দস্সামা’’তি কনিট্ঠো – ‘‘তরুণসস্সং নাসেতুকামোসী’’তি আহ. জেট্ঠো কনিট্ঠস্স অননুৰত্তনভাৰং ঞত্ৰা খেত্তং ৰিভজিত্ৰা অত্তনো কোট্ঠাসতো গব্ভং ফালেত্ৰা খীরং নীহরিত্ৰা সপ্পিনৰনীতেন সংযোজেত্ৰা অদাসি, পুথুককালে পুথুকং কারেত্ৰা অদাসি, লাযনকালে লাযনগ্গং, ৰেণিকরণে ৰেণগ্গং, কলাপাদীসু কলাপগ্গং, খলগ্গং, খলভণ্ডগ্গং, কোট্ঠগ্গন্তি এৰং একসস্সে নৰৰারে অগ্গদানং অদাসি. কনিট্ঠো পন উদ্ধরিত্ৰা অদাসি.

তেসু জেট্ঠকো অঞ্ঞাসিকোণ্ডঞ্ঞত্থেরো জাতো. ভগৰা – ‘‘কস্স নু খো অহং পঠমং ধম্মং দেসেয্য’’ন্তি ওলোকেন্তো ‘‘অঞ্ঞাসিকোণ্ডঞ্ঞো একস্মিং সস্সে নৰ অগ্গদানানি অদাসি, ইমং অগ্গধম্মং তস্স দেসেস্সামী’’তি সব্বপঠমং ধম্মং দেসেসি. সো অট্ঠারসহি ব্রহ্মকোটীহি সদ্ধিং সোতাপত্তিফলে পতিট্ঠাসি. কনিট্ঠো পন ওহীযিত্ৰা পচ্ছা দানস্স দিন্নত্তা সত্থু পরিনিব্বানকালে এৰং চিন্তেত্ৰা সত্থারং দট্ঠুকামো অহোসি.

মা তথাগতং ৰিহেঠেসীতি থেরো কির – ‘‘এতে অঞ্ঞতিত্থিযা নাম অত্তনো গহণমেৰ গণ্হন্তি, তস্স ৰিস্সজ্জাপনত্থায ভগৰতো বহুং ভাসমানস্স কাযৰাচাৰিহেসা ভৰিস্সতি, পকতিযাপি চ কিলন্তোযেৰ ভগৰা’’তি মঞ্ঞমানো এৰমাহ. পরিব্বাজকো – ‘‘ন মে অযং ভিক্খু ওকাসং করোতি, অত্থিকেন পন অনুৰত্তিত্ৰা কারেতব্বো’’তি থেরং অনুৰত্তন্তো দুতিযম্পি ততিযম্পি আহ.

২১৩. অস্সোসি খোতি সাণিদ্ৰারে ঠিতস্স ভাসতো পকতিসোতেনেৰ অস্সোসি, সুত্ৰা চ পন সুভদ্দস্সেৰ অত্থায মহতা উস্সাহেন আগতত্তা অলং আনন্দাতিআদিমাহ. তত্থ অলন্তি পটিক্খেপত্থে নিপাতো. অঞ্ঞাপেক্খোৰাতি অঞ্ঞাতুকামোৰ হুত্ৰা. অব্ভঞ্ঞিংসূতি যথা তেসং পটিঞ্ঞা, তথেৰ জানিংসু. ইদং ৰুত্তং হোতি – সচে নেসং সা পটিঞ্ঞা নিয্যানিকা, সব্বে অব্ভঞ্ঞংসু, নো চে, ন অব্ভঞ্ঞংসু. তস্মা কিং তেসং পটিঞ্ঞা নিয্যানিকা, অনিয্যানিকাতি অযমেৰ তস্স পঞ্হস্স অত্থো. অথ ভগৰা তেসং অনিয্যানিকভাৰকথনেন অত্থাভাৰতো চেৰ ওকাসাভাৰতো চ ‘‘অল’’ন্তি পটিক্খিপিত্ৰা ধম্মমেৰ দেসেসি. পঠমযামস্মিঞ্হি মল্লানং ধম্মং দেসেত্ৰা মজ্ঝিমযামে সুভদ্দস্স, পচ্ছিমযামে ভিক্খুসঙ্ঘং ওৰদিত্ৰা বলৰপচ্চূসসমযে পরিনিব্বাযিস্সামিচ্চেৰ ভগৰা আগতো.

২১৪. সমণোপি তত্থ ন উপলব্ভতীতি পঠমো সোতাপন্নসমণোপি তত্থ নত্থি, দুতিযো সকদাগামিসমণোপি, ততিযো অনাগামিসমণোপি, চতুত্থো অরহত্তসমণোপি তত্থ নত্থীতি অত্থো. ‘‘ইমস্মিং খো’’তি পুরিমদেসনায অনিযমতো ৰত্ৰা ইদানি অত্তনো সাসনং নিযমেন্তো আহ. সুঞ্ঞা পরপ্পৰাদা সমণেভীতি চতুন্নং মগ্গানং অত্থায আরদ্ধৰিপস্সকেহি চতূহি, মগ্গট্ঠেহি চতূহি, ফলট্ঠেহি চতূহীতি দ্ৰাদসহি সমণেহি সুঞ্ঞা পরপ্পৰাদা তুচ্ছা রিত্তকা. ইমে চ সুভদ্দাতি ইমে দ্ৰাদস ভিক্খূ. সম্মা ৰিহরেয্যুন্তি এত্থ সোতাপন্নো অত্তনো অধিগতট্ঠানং অঞ্ঞস্স কথেত্ৰা তং সোতাপন্নং করোন্তো সম্মা ৰিহরতি নাম. এস নযো সকদাগামিআদীসু. সোতাপত্তিমগ্গট্ঠো অঞ্ঞম্পি সোতাপত্তিমগ্গট্ঠং করোন্তো সম্মা ৰিহরতি নাম. এস নযো সেসমগ্গট্ঠেসু. সোতাপত্তিমগ্গত্থায আরদ্ধৰিপস্সকো অত্তনো পগুণং কম্মট্ঠানং কথেত্ৰা অঞ্ঞম্পি সোতাপত্তিমগ্গত্থায আরদ্ধৰিপস্সকং করোন্তো সম্মা ৰিহরতি নাম. এস নযো সেসমগ্গত্থায আরদ্ধৰিপস্সকেসু. ইদং সন্ধাযাহ – ‘‘সম্মা ৰিহরেয্যু’’ন্তি. অসুঞ্ঞো লোকো অরহন্তেহি অস্সাতি নল়ৰনং সরৰনং ৰিয নিরন্তরো অস্স.

একূনতিংসো ৰযসাতি ৰযেন একূনতিংসৰস্সো হুত্ৰা. যং পব্বজিন্তি এত্থ যন্তি নিপাতমত্তং. কিং কুসলানুএসীতি ‘‘কিং কুসল’’ন্তি অনুএসন্তো পরিযেসন্তো. তত্থ – ‘‘কিং কুসল’’ন্তি সব্বঞ্ঞুতঞ্ঞাণং অধিপ্পেতং, তং গৰেসন্তোতি অত্থো. যতো অহন্তি যতো পট্ঠায অহং পব্বজিতো, এত্থন্তরে সমধিকানি পঞ্ঞাস ৰস্সানি হোন্তীতি দস্সেতি. ঞাযস্স ধম্মস্সাতি অরিযমগ্গধম্মস্স. পদেসৰত্তীতি পদেসে ৰিপস্সনামগ্গে পৰত্তন্তো. ইতো বহিদ্ধাতি মম সাসনতো বহিদ্ধা. সমণোপি নত্থীতি পদেসৰত্তিৰিপস্সকোপি নত্থি, পঠমসমণো সোতাপন্নোপি নত্থীতি ৰুত্তং হোতি.

যে এত্থাতি যে তুম্হে এত্থ সাসনে সত্থারা সম্মুখা অন্তেৰাসিকাভিসেকেন অভিসিত্তা, তেসং ৰো লাভা তেসং ৰো সুলদ্ধন্তি. বাহিরসমযে কির যং অন্তেৰাসিকং আচরিযো – ‘‘ইমং পব্বাজেহি, ইমং ওৰদ, ইমং অনুসাসা’’তি ৰদতি, সো তেন অত্তনো ঠানে ঠপিতো হোতি, তস্মা তস্স – ‘‘ইমং পব্বজেহি, ইমং ওৰদ, ইমং অনুসাসা’’তি ইমে লাভা হোন্তি. থেরম্পি সুভদ্দো তমেৰ বাহিরসমযং গহেত্ৰা এৰমাহ.

অলত্থ খোতি কথং অলত্থ? থেরো কির নং একমন্তং নেত্ৰা উদকতুম্বতো পানীযেন সীসং তেমেত্ৰা তচপঞ্চককম্মট্ঠানং কথেত্ৰা কেসমস্সুং ওহারেত্ৰা কাসাযানি ৰত্থানি অচ্ছাদাপেত্ৰা সরণানি দত্ৰা ভগৰতো সন্তিকং আনেসি. ভগৰা উপসম্পাদেত্ৰা কম্মট্ঠানং আচিক্খি. সো তং গহেত্ৰা উয্যানস্স একমন্তে চঙ্কমং অধিট্ঠায ঘটেন্তো ৰাযমন্তো ৰিপস্সনং ৰড্ঢেন্তো সহ পটিসম্ভিদাহি অরহত্তং পত্ৰা আগম্ম ভগৰন্তং ৰন্দিত্ৰা নিসীদি. তং সন্ধায – ‘‘অচিরূপসম্পন্নো খো পনা’’তিআদি ৰুত্তং.

সো চ ভগৰতো পচ্ছিমো সক্খিসাৰকো অহোসীতি সঙ্গীতিকারকানং ৰচনং. তত্থ যো ভগৰতি ধরমানে পব্বজিত্ৰা অপরভাগে উপসম্পদং লভিত্ৰা কম্মট্ঠানং গহেত্ৰা অরহত্তং পাপুণাতি, উপসম্পদম্পি ৰা ধরমানেযেৰ লভিত্ৰা অপরভাগে কম্মট্ঠানং গহেত্ৰা অরহত্তং পাপুণাতি, কম্মট্ঠানম্পি ৰা ধরমানেযেৰ গহেত্ৰা অপরভাগে অরহত্তমেৰ পাপুণাতি, সব্বোপি সো পচ্ছিমো সক্খিসাৰকো. অযং পন ধরমানেযেৰ ভগৰতি পব্বজিতো চ উপসম্পন্নো চ কম্মট্ঠানঞ্চ গহেত্ৰা অরহত্তং পত্তোতি.

পঞ্চমভাণৰারৰণ্ণনা নিট্ঠিতা.