আনন্দঅচ্ছরিযধম্মৰণ্ণনা

২০৭. ৰিহারন্তি ইধ মণ্ডলমালো ৰিহারোতি অধিপ্পেতো, তং পৰিসিত্ৰা. কপিসীসন্তি দ্ৰারবাহকোটিযং ঠিতং অগ্গল়রুক্খং. রোদমানো অট্ঠাসীতি সো কিরাযস্মা চিন্তেসি – ‘‘সত্থারা মম সংৰেগজনকং ৰসনট্ঠানং কথিতং, চেতিযচারিকায সাত্থকভাৰো কথিতো, মাতুগামে পটিপজ্জিতব্বপঞ্হো ৰিস্সজ্জিতো, অত্তনো সরীরে পটিপত্তি অক্খাতা, চত্তারো থূপারহা কথিতা, ধুৰং অজ্জ ভগৰা পরিনিব্বাযিস্সতী’’তি, তস্সেৰং চিন্তযতো বলৰদোমনস্সং উপ্পজ্জি. অথস্স এতদহোসি – ‘‘ভগৰতো সন্তিকে রোদনং নাম অফাসুকং, একমন্তং গন্ত্ৰা সোকং তনুকং করিস্সামী’’তি, সো তথা অকাসি. তেন ৰুত্তং – ‘‘রোদমানো অট্ঠাসী’’তি.

অহঞ্চ ৰতম্হীতি অহঞ্চ ৰত অম্হি, অহং ৰতম্হীতিপি পাঠো. যো মম অনুকম্পকোতি যো মং অনুকম্পতি অনুসাসতি, স্ৰে দানি পট্ঠায কস্স মুখধোৰনং দস্সামি, কস্স পাদে ধোৰিস্সামি, কস্স সেনাসনং পটিজগ্গিস্সামি, কস্স পত্তচীৰরং গহেত্ৰা ৰিচরিস্সামীতি বহুং ৰিলপি. আমন্তেসীতি ভিক্খুসঙ্ঘস্স অন্তরে থেরং অদিস্ৰা আমন্তেসি.

মেত্তেন কাযকম্মেনাতি মেত্তচিত্তৰসেন পৰত্তিতেন মুখধোৰনদানাদিকাযকম্মেন. হিতেনাতি হিতৰুদ্ধিযা কতেন. সুখেনাতি সুখসোমনস্সেনেৰ কতেন, ন দুক্খিনা দুম্মনেন হুত্ৰাতি অত্থো. অদ্ৰযেনাতি দ্ৰে কোট্ঠাসে কত্ৰা অকতেন. যথা হি একো সম্মুখাৰ করোতি ন পরম্মুখা, একো পরম্মুখাৰ করোতি ন সম্মুখা এৰং ৰিভাগং অকত্ৰা কতেনাতি ৰুত্তং হোতি. অপ্পমাণেনাতি পমাণৰিরহিতেন. চক্কৰাল়ম্পি হি অতিসম্বাধং, ভৰগ্গম্পি অতিনীচং, তযা কতং কাযকম্মমেৰ বহুন্তি দস্সেতি.

মেত্তেন ৰচীকম্মেনাতি মেত্তচিত্তৰসেন পৰত্তিতেন মুখধোৰনকালারোচনাদিনা ৰচীকম্মেন. অপি চ ওৰাদং সুত্ৰা – ‘‘সাধু, ভন্তে’’তি ৰচনম্পি মেত্তং ৰচীকম্মমেৰ. মেত্তেন মনোকম্মেনাতি কালস্সেৰ সরীরপটিজগ্গনং কত্ৰা ৰিৰিত্তাসনে নিসীদিত্ৰা – ‘‘সত্থা অরোগো হোতু, অব্যাপজ্জো সুখী’’তি এৰং পৰত্তিতেন মনোকম্মেন. কতপুঞ্ঞোসীতি কপ্পসতসহস্সং অভিনীহারসম্পন্নোসীতি দস্সেতি. কতপুঞ্ঞোসীতি চ এত্তাৰতা ৰিস্সত্থো মা পমাদমাপজ্জি, অথ খো পধানমনুযুঞ্জ. এৰঞ্হি অনুযুত্তো খিপ্পং হোহিসি অনাসৰো, ধম্মসঙ্গীতিকালে অরহত্তং পাপুণিস্সসি. ন হি মাদিসস্স কতপারিচরিযা নিপ্ফলা নাম হোতীতি দস্সেতি.

২০৮. এৰঞ্চ পন ৰত্ৰা মহাপথৰিং পত্থরন্তো ৰিয আকাসং ৰিত্থারেন্তো ৰিয চক্কৰাল়গিরিং ওসারেন্তো ৰিয সিনেরুং উক্খিপেন্তো ৰিয মহাজম্বুং খন্ধে গহেত্ৰা চালেন্তো ৰিয আযস্মতো আনন্দস্স গুণকথং আরভন্তো অথ খো ভগৰা ভিক্খূ আমন্তেসি. তত্থ ‘‘যেপি তে, ভিক্খৰে, এতরহী’’তি কস্মা ন ৰুত্তং? অঞ্ঞস্স বুদ্ধস্স নত্থিতায. এতেনেৰ চেতং ৰেদিতব্বং – ‘‘যথা চক্কৰাল়ন্তরেপি অঞ্ঞো বুদ্ধো নত্থী’’তি. পণ্ডিতোতি ব্যত্তো. মেধাৰীতি খন্ধধাতুআযতনাদীসু কুসলো.

২০৯. ভিক্খুপরিসা আনন্দং দস্সনাযাতি যে ভগৰন্তং পস্সিতুকামা থেরং উপসঙ্কমন্তি, যে চ ‘‘আযস্মা কিরানন্দো সমন্তপাসাদিকো অভিরূপো দস্সনীযো বহুস্সুতো সঙ্ঘসোভনো’’তি থেরস্স গুণে সুত্ৰা আগচ্ছন্তি, তে সন্ধায ‘‘ভিক্খুপরিসা আনন্দং দস্সনায উপসঙ্কমন্তী’’তি ৰুত্তং. এস নযো সব্বত্থ. অত্তমনাতি সৰনেন নো দস্সনং সমেতীতি সকমনা তুট্ঠচিত্তা. ধম্মন্তি ‘‘কচ্চি, আৰুসো, খমনীযং, কচ্চি যাপনীযং, কচ্চি যোনিসো মনসিকারেন কম্মং করোথ, আচরিযুপজ্ঝাযে ৰত্তং পূরেথা’’তি এৰরূপং পটিসন্থারধম্মং. তত্থ ভিক্খুনীসু – ‘‘কচ্চি, ভগিনিযো, অট্ঠ গরুধম্মে সমাদায ৰত্তথা’’তি ইদম্পি নানাকরণং হোতি. উপাসকেসু আগতেসু ‘‘উপাসক, ন তে কচ্চি সীসং ৰা অঙ্গং ৰা রুজ্জতি, অরোগা তে পুত্তভাতরো’’তি ন এৰং পটিসন্থারং করোতি. এৰং পন করোতি – ‘‘কথং উপাসকা তীণি সরণানি পঞ্চ সীলানি রক্খথ, মাসস্স অট্ঠ উপোসথে করোথ, মাতাপিতূনং উপট্ঠানৰত্তং পূরেথ, ধম্মিকসমণব্রাহ্মণে পটিজগ্গথা’’তি. উপাসিকাসুপি এসেৰ নযো.

ইদানি আনন্দত্থেরস্স চক্কৰত্তিনা সদ্ধিং উপমং করোন্তো চত্তারোমে ভিক্খৰেতিআদিমাহ. তত্থ খত্তিযাতি অভিসিত্তা চ অনভিসিত্তা চ খত্তিযজাতিকা. তে কির – ‘‘রাজা চক্কৰত্তী নাম অভিরূপো দস্সনীযো পাসাদিকো আকাসেন ৰিচরন্তো রজ্জং অনুসাসতি ধম্মিকো ধম্মরাজা’’তি তস্স গুণকথং সুত্ৰা ‘‘সৰনেন দস্সনম্পি সম’’ন্তি অত্তমনা হোন্তি. ভাসতীতি কথেন্তো – ‘‘কথং, তাতা, রাজধম্মং পূরেথ, পৰেণিং রক্খথা’’তি পটিসন্থারং করোতি. ব্রাহ্মণেসু পন – ‘‘কথং আচরিযা মন্তে ৰাচেথ, কথং অন্তেৰাসিকা মন্তে গণ্হন্তি, দক্খিণং ৰা ৰত্থানি ৰা কপিলং ৰা অলত্থা’’তি পটিসন্থারং করোতি. গহপতীসু – ‘‘কথং তাতা, ন ৰো রাজকুলতো দণ্ডেন ৰা বলিনা ৰা পীল়া অত্থি, সম্মা দেৰো ধারং অনুপৰেচ্ছতি, সস্সানি সম্পজ্জন্তী’’তি এৰং পটিসন্থারং করোতি. সমণেসু – ‘‘কথং, ভন্তে, পব্বজিতপরিক্খারা সুলভা, সমণধম্মে ন পমজ্জথা’’তি এৰং পটিসন্থারং করোতি.