মহাসুদস্সনসুত্তদেসনাৰণ্ণনা

২১০. খুদ্দকনগরকেতি নগরপতিরূপকে সম্বাধে খুদ্দকনগরকে. উজ্জঙ্গলনগরকেতি ৰিসমনগরকে. সাখানগরকেতি যথা রুক্খানং সাখা নাম খুদ্দকা হোন্তি, এৰমেৰ অঞ্ঞেসং মহানগরানং সাখাসদিসে খুদ্দকনগরকে. খত্তিযমহাসালাতি খত্তিযমহাসারপ্পত্তা মহাখত্তিযা. এস নযো সব্বত্থ.

তেসু খত্তিযমহাসালা নাম যেসং কোটিসতম্পি কোটিসহস্সম্পি ধনং নিখণিত্ৰা ঠপিতং, দিৰসপরিব্বযো একং কহাপণসকটং নিগচ্ছতি, সাযং দ্ৰে পৰিসন্তি. ব্রাহ্মণমহাসালা নাম যেসং অসীতিকোটিধনং নিহিতং হোতি, দিৰসপরিব্বযো একো কহাপণকুম্ভো নিগচ্ছতি, সাযং একসকটং পৰিসতি. গহপতিমহাসালা নাম যেসং চত্তালীসকোটিধনং নিহিতং হোতি, দিৰসপরিব্বযো পঞ্চ কহাপণম্বণানি নিগচ্ছন্তি, সাযং কুম্ভো পৰিসতি.

মা হেৰং, আনন্দ, অৰচাতি আনন্দ, মা এৰং অৰচ, ন ইমং ‘‘খুদ্দকনগর’’ন্তি ৰত্তব্বং. অহঞ্হি ইমস্সেৰ নগরস্স সম্পত্তিং কথেতুং – ‘‘অনেকৰারং তিট্ঠং নিসীদং মহন্তেন উস্সাহেন, মহন্তেন পরক্কমেন ইধাগতো’’তি ৰত্ৰা ভূতপুব্বন্তিআদিমাহ. সুভিক্খাতি খজ্জভোজ্জসম্পন্না. হত্থিসদ্দেনাতি একস্মিং হত্থিম্হি সদ্দং করোন্তে চতুরাসীতিহত্থিসহস্সানি সদ্দং করোন্তি, ইতি হত্থিসদ্দেন অৰিৰিত্তা, হোতি, তথা অস্সসদ্দেন. পুঞ্ঞৰন্তো পনেত্থ সত্তা চতুসিন্ধৰযুত্তেহি রথেহি অঞ্ঞমঞ্ঞং অনুবন্ধমানা অন্তরৰীথীসু ৰিচরন্তি, ইতি রথসদ্দেন অৰিৰিত্তা হোতি. নিচ্চং পযোজিতানেৰ পনেত্থ ভেরিআদীনি তূরিযানি, ইতি ভেরিসদ্দাদীহিপি অৰিৰিত্তা হোতি. তত্থ সম্মসদ্দোতি কংসতাল়সদ্দো. পাণিতাল়সদ্দোতি পাণিনা চতুরস্সঅম্বণতাল়সদ্দো. কুটভেরিসদ্দোতিপি ৰদন্তি.

অস্নাথ পিৰথ খাদথাতি অস্নাথ পিৰথ খাদথ. অযং পনেত্থ সঙ্খেপো, ভুঞ্জথ ভোতি ইমিনা দসমেন সদ্দেন অৰিৰিত্তা হোতি অনুপচ্ছিন্নসদ্দা. যথা পন অঞ্ঞেসু নগরেসু ‘‘কচৰরং ছড্ডেথ, কুদালং গণ্হথ, পচ্ছিং গণ্হথ, পৰাসং গমিস্সাম, তণ্ডুলপুটং গণ্হথ, ভত্তপুটং গণ্হথ, ফলকাৰুধাদীনি সজ্জানি করোথা’’তি এৰরূপা সদ্দা হোন্তি, ন যিধ এৰং অহোসীতি দস্সেতি.

‘‘দসমেন সদ্দেনা’’তি চ ৰত্ৰা ‘‘কুসাৰতী, আনন্দ, রাজধানী সত্তহি পাকারেহি পরিক্খিত্তা অহোসী’’তি সব্বং মহাসুদস্সনসুত্তং নিট্ঠাপেত্ৰা গচ্ছ ত্ৰং আনন্দাতিআদিমাহ. তত্থ অভিক্কমথাতি অভিমুখা কমথ, আগচ্ছথাতি অত্থো. কিং পন তে ভগৰতো আগতভাৰং ন জানন্তীতি? জানন্তি. বুদ্ধানং গতগতট্ঠানং নাম মহন্তং কোলাহলং হোতি, কেনচিদেৰ করণীযেন নিসিন্নত্তা ন আগতা. ‘‘তে আগন্ত্ৰা ভিক্খুসঙ্ঘস্স ঠাননিসজ্জোকাসং সংৰিদহিত্ৰা দস্সন্তী’’তি তেসং সন্তিকে অৰেলাযম্পি ভগৰা পেসেসি.