চতুসংৰেজনীযঠানৰণ্ণনা

২০২. ৰস্সংৰুট্ঠাতি বুদ্ধকালে কির দ্ৰীসু কালেসু ভিক্খূ সন্নিপতন্তি উপকট্ঠায ৰস্সূপনাযিকায কম্মট্ঠানগ্গহণত্থং, ৰুট্ঠৰস্সা চ গহিতকম্মট্ঠানানুযোগেন নিব্বত্তিতৰিসেসারোচনত্থং. যথা চ বুদ্ধকালে, এৰং তম্বপণ্ণিদীপেপি অপারগঙ্গায ভিক্খূ লোহপাসাদে সন্নিপতিংসু, পারগঙ্গায ভিক্খূ তিস্সমহাৰিহারে. তেসু অপারগঙ্গায ভিক্খূ সঙ্কারছড্ডকসম্মজ্জনিযো গহেত্ৰা আগন্ত্ৰা মহাৰিহারে সন্নিপতিত্ৰা চেতিযে সুধাকম্মং কত্ৰা – ‘‘ৰুট্ঠৰস্সা আগন্ত্ৰা লোহপাসাদে সন্নিপতথা’’তি ৰত্তং কত্ৰা ফাসুকট্ঠানেসু ৰসিত্ৰা ৰুট্ঠৰস্সা আগন্ত্ৰা লোহপাসাদে পঞ্চনিকাযমণ্ডলে, যেসং পাল়ি পগুণা, তে পাল়িং সজ্ঝাযন্তি. যেসং অট্ঠকথা পগুণা, তে অট্ঠকথং সজ্ঝাযন্তি. যো পাল়িং ৰা অট্ঠকথং ৰা ৰিরাধেতি, তং – ‘‘কস্স সন্তিকে তযা গহিত’’ন্তি ৰিচারেত্ৰা উজুং কত্ৰা গাহাপেন্তি. পারগঙ্গাৰাসিনোপি তিস্সমহাৰিহারে এৰমেৰ করোন্তি. এৰং দ্ৰীসু কালেসু সন্নিপতিতেসু ভিক্খূসু যে পুরে ৰস্সূপনাযিকায কম্মট্ঠানং গহেত্ৰা গতা ৰিসেসারোচনত্থং আগচ্ছন্তি, এৰরূপে সন্ধায ‘‘পুব্বে ভন্তে ৰস্সংৰুট্ঠা’’তিআদিমাহ.

মনোভাৰনীযেতি মনসা ভাৰিতে সম্ভাৰিতে. যে ৰা মনো মনং ভাৰেন্তি ৰড্ঢেন্তি রাগরজাদীনি পৰাহেন্তি, এৰরূপেতি অত্থো. থেরো কির ৰত্তসম্পন্নো মহল্লকং ভিক্খুং দিস্ৰা থদ্ধো হুত্ৰা ন নিসীদতি, পচ্চুগ্গমনং কত্ৰা হত্থতো ছত্তঞ্চ পত্তচীৰরঞ্চ গহেত্ৰা পীঠং পপ্ফোটেত্ৰা দেতি, তত্থ নিসিন্নস্স ৰত্তং কত্ৰা সেনাসনং পটিজগ্গিত্ৰা দেতি. নৰকং ভিক্খুং দিস্ৰা তুণ্হীভূতো ন নিসীদতি, সমীপে ঠত্ৰা ৰত্তং করোতি. সো তায ৰত্তপটিপত্তিযা অপরিহানিং পত্থযমানো এৰমাহ.

অথ ভগৰা – ‘‘আনন্দো মনোভাৰনীযানং দস্সনং ন লভিস্সামী’’তি চিন্তেতি, হন্দস্স, মনোভাৰনীযানং দস্সনট্ঠানং আচিক্খিস্সামি, যত্থ ৰসন্তো ইতো চিতো চ অনাহিণ্ডিত্ৰাৰ লচ্ছতি মনোভাৰনীযে ভিক্খূ দস্সনাযাতি চিন্তেত্ৰা চত্তারিমানীতিআদিমাহ.

তত্থ সদ্ধস্সাতি বুদ্ধাদীসু পসন্নচিত্তস্স ৰত্তসম্পন্নস্স, যস্স পাতো পট্ঠায চেতিযঙ্গণৰত্তাদীনি সব্বৰত্তানি কতানেৰ পঞ্ঞাযন্তি. দস্সনীযানীতি দস্সনারহানি দস্সনত্থায গন্তব্বানি. সংৰেজনীযানীতি সংৰেগজনকানি. ঠানানীতি কারণানি, পদেসঠানানেৰ ৰা.

যে হি কেচীতি ইদং চেতিযচারিকায সত্থকভাৰদস্সনত্থং ৰুত্তং. তত্থ চেতিযচারিকং আহিণ্ডন্তাতি যে চ তাৰ তত্থ তত্থ চেতিযঙ্গণং সম্মজ্জন্তা, আসনানি ধোৰন্তা বোধিম্হি উদকং সিঞ্চন্তা আহিণ্ডন্তি, তেসু ৰত্তব্বমেৰ নত্থি অসুকৰিহারে ‘‘চেতিযং ৰন্দিস্সামা’’তি নিক্খমিত্ৰা পসন্নচিত্তা অন্তরা কালঙ্করোন্তাপি অনন্তরাযেন সগ্গে পতিট্ঠহিস্সন্তি যেৰাতি দস্সেতি.