যমকসালাৰণ্ণনা

১৯৮. মহতা ভিক্খুসঙ্ঘেন সদ্ধিন্তি ইধ ভিক্খূনং গণনপরিচ্ছেদো নত্থি. ৰেল়ুৰগামে ৰেদনাৰিক্খম্ভনতো পট্ঠায হি – ‘‘ন চিরেন ভগৰা পরিনিব্বাযিস্সতী’’তি সুত্ৰা ততো ততো আগতেসু ভিক্খূসু একভিক্খুপি পক্কন্তো নাম নত্থি. তস্মা গণনৰীতিৰত্তো সঙ্ঘো অহোসি. উপৰত্তনং মল্লানং সালৰনন্তি যথেৰ হি কলম্বনদীতীরতো রাজমাতুৰিহারদ্ৰারেন থূপারামং গন্তব্বং হোতি, এৰং হিরঞ্ঞৰতিযা পারিমতীরতো সালৰনুয্যানং, যথা অনুরাধপুরস্স থূপারামো, এৰং তং কুসিনারাযং হোতি. যথা থূপারামতো দক্খিণদ্ৰারেন নগরং পৰিসনমগ্গো পাচীনমুখো গন্ত্ৰা উত্তরেন নিৰত্তো, এৰং উয্যানতো সালৰনং পাচীনমুখং গন্ত্ৰা উত্তরেন নিৰত্তং. তস্মা তং – ‘‘উপৰত্তন’’ন্তি ৰুচ্চতি. অন্তরেন যমকসালানং উত্তরসীসকন্তি তস্স কির মঞ্চকস্স একা সালপন্তি সীসভাগে হোতি, একা পাদভাগে. তত্রাপি একো তরুণসালো সীসভাগস্স আসন্নো হোতি, একো পাদভাগস্স. অপি চ যমকসালা নাম মূলখন্ধৰিটপপত্তেহি অঞ্ঞমঞ্ঞং সংসিব্বিত্ৰা ঠিতসালাতি ৰুত্তং. মঞ্চকং পঞ্ঞপেহীতি তস্মিং কির উয্যানে রাজকুলস্স সযনমঞ্চো অত্থি, তং সন্ধায পঞ্ঞপেহীতি আহ. থেরোপি তংযেৰ পঞ্ঞপেত্ৰা অদাসি.

কিলন্তোস্মি, আনন্দ, নিপজ্জিস্সামীতি তথাগতস্স হি –

‘‘গোচরি কল়াপো গঙ্গেয্যো, পিঙ্গলো পব্বতেয্যকো;

হেমৰতো চ তম্বো চ, মন্দাকিনি উপোসথো;

ছদ্দন্তোযেৰ দসমো, এতে নাগানমুত্তমা’’তি. –

এত্থ যং দসন্নং গোচরিসঙ্খাতানং পকতিহত্থীনং বলং, তং একস্স কল়াপস্সাতি. এৰং দসগুণৰড্ঢিতায গণনায পকতিহত্থীনং কোটিসহস্সবলপ্পমাণং বলং, তং সব্বম্পি চুন্দস্স পিণ্ডপাতং পরিভুত্তকালতো পট্ঠায চঙ্গৰারে পক্খিত্তউদকং ৰিয পরিক্খযং গতং. পাৰানগরতো তীণি গাৰুতানি কুসিনারানগরং, এতস্মিং অন্তরে পঞ্চৰীসতিযা ঠানেসু নিসীদিত্ৰা মহতা উস্সাহেন আগচ্ছন্তোপি সূরিযস্স অত্থঙ্গমিতৰেলাযং সঞ্ঝাসমযে ভগৰা সালৰনং পৰিট্ঠো. এৰং রোগো সব্বং আরোগ্যং মদ্দন্তো আগচ্ছতি. এতমত্থং দস্সেন্তো ৰিয সব্বলোকস্স সংৰেগকরং ৰাচং ভাসন্তো – ‘‘কিলন্তোস্মি, আনন্দ, নিপজ্জিস্সামী’’তি আহ.

কস্মা পন ভগৰা এৰং মহন্তেন উস্সাহেন ইধাগতো, কিং অঞ্ঞত্থ ন সক্কা পরিনিব্বাযিতুন্তি? পরিনিব্বাযিতুং নাম ন কত্থচি ন সক্কা, তীহি পন কারণেহি ইধাগতো, ইদঞ্হি ভগৰা এৰং পস্সতি – ‘‘মযি অঞ্ঞত্থ পরিনিব্বাযন্তে মহাসুদস্সনসুত্তস্স অত্থুপ্পত্তি ন ভৰিস্সতি, কুসিনারাযং পন পরিনিব্বাযন্তে যমহং দেৰলোকে অনুভৰিতব্বং সম্পত্তিং মনুস্সলোকেযেৰ অনুভৰিং, তং দ্ৰীহি ভাণৰারেহি মণ্ডেত্ৰা দেসেস্সামি, তং মে সুত্ৰা বহূ জনা কুসলং কাতব্বং মঞ্ঞিস্সন্তী’’তি.

অপরম্পি পস্সতি – ‘‘মং অঞ্ঞত্থ পরিনিব্বাযন্তং সুভদ্দো ন পস্সিস্সতি, সো চ বুদ্ধৰেনেয্যো, ন সাৰকৰেনেয্যো; ন তং সাৰকা ৰিনেতুং সক্কোন্তি. কুসিনারাযং পরিনিব্বাযন্তং পন মং সো উপসঙ্কমিত্ৰা পঞ্হং পুচ্ছিস্সতি, পঞ্হাৰিস্সজ্জনপরিযোসানে চ সরণেসু পতিট্ঠায মম সন্তিকে পব্বজ্জঞ্চ উপসম্পদঞ্চ লভিত্ৰা কম্মট্ঠানং গহেত্ৰা মযি ধরমানেযেৰ অরহত্তং পত্ৰা পচ্ছিমসাৰকো ভৰিস্সতী’’তি.

অপরম্পি পস্সতি – ‘‘মযি অঞ্ঞত্থ পরিনিব্বাযন্তে ধাতুভাজনীযে মহাকলহো ভৰিস্সতি, লোহিতং নদী ৰিয সন্দিস্সতি. কুসিনারাযং পরিনিব্বুতে দোণব্রাহ্মণো তং ৰিৰাদং ৰূপসমেত্ৰা ধাতুযো ৰিভজিস্সতী’’তি. ইমেহি তীহি কারণেহি ভগৰা এৰং মহন্তেন উস্সাহেন ইধাগতোতি ৰেদিতব্বো.

সীহসেয্যন্তি এত্থ কামভোগীসেয্যা, পেতসেয্যা, সীহসেয্যা, তথাগতসেয্যাতি চতস্সো সেয্যা.

তত্থ – ‘‘যেভুয্যেন, ভিক্খৰে, কামভোগী সত্তা ৰামেন পস্সেন সেন্তী’’তি অযং কামভোগীসেয্যা. তেসু হি যেভুয্যেন দক্খিণেন পস্সেন সযন্তা নাম নত্থি.

‘‘যেভুয্যেন, ভিক্খৰে, পেতা উত্তানা সেন্তী’’তি অযং পেতসেয্যা. অপ্পমংসলোহিতত্তা হি পেতা অট্ঠিসঙ্ঘাটজটিতা একেন পস্সেন সযিতুং ন সক্কোন্তি, উত্তানাৰ সেন্তি.

‘‘সীহো, ভিক্খৰে, মিগরাজা দক্খিণেন পস্সেন সেয্যং কপ্পেতি…পে… অত্তমনো হোতী’’তি (অ. নি. ৪.২৪৬) অযং সীহসেয্যা. তেজুস্সদত্তা হি সীহো মিগরাজা দ্ৰে পুরিমপাদে একস্মিং ঠানে, পচ্ছিমপাদে একস্মিং ঠানে ঠপেত্ৰা নঙ্গুট্ঠং অন্তরসত্থিম্হি পক্খিপিত্ৰা পুরিমপাদপচ্ছিমপাদনঙ্গুট্ঠানং ঠিতোকাসং সল্লক্খেত্ৰা দ্ৰিন্নং পুরিমপাদানং মত্থকে সীসং ঠপেত্ৰা সযতি. দিৰসং সযিত্ৰাপি পবুজ্ঝমানো ন উত্রসন্তো পবুজ্ঝতি, সীসং পন উক্খিপিত্ৰা পুরিমপাদাদীনং ঠিতোকাসং সল্লক্খেতি. সচে কিঞ্চি ঠানং ৰিজহিত্ৰা ঠিতং হোতি – ‘‘ন যিদং তুয্হং জাতিযা সূরভাৰস্স চ অনুরূপ’’ন্তি অনত্তমনো হুত্ৰা তত্থেৰ সযতি, ন গোচরায পক্কমতি. অৰিজহিত্ৰা ঠিতে পন – ‘‘তুয্হং জাতিযা চ সূরভাৰস্স চ অনুরূপমিদ’’ন্তি হট্ঠতুট্ঠো উট্ঠায সীহৰিজম্ভিতং ৰিজম্ভিত্ৰা কেসরভারং ৰিধুনিত্ৰা তিক্খত্তুং সীহনাদং নদিত্ৰা গোচরায পক্কমতি.

‘‘চতুত্থজ্ঝানসেয্যা পন তথাগতস্স সেয্যাতি ৰুচ্চতি’’ (অ. নি. ৪.২৪৬). তাসু ইধ সীহসেয্যা আগতা. অযঞ্হি তেজুস্সদইরিযাপথত্তা উত্তমসেয্যা নাম.

পাদে পাদন্তি দক্খিণপাদে ৰামপাদং. অচ্চাধাযাতি অতিআধায, ঈসকং অতিক্কম্ম ঠপেত্ৰা. গোপ্ফকেন হি গোপ্ফকে, জাণুনা ৰা জাণুম্হি সঙ্ঘট্টিযমানে অভিণ্হং ৰেদনা উপ্পজ্জতি, চিত্তং একগ্গং ন হোতি, সেয্যা অফাসুকা হোতি. যথা পন ন সঙ্ঘট্টেতি, এৰং অতিক্কম্ম ঠপিতে ৰেদনা নুপ্পজ্জতি, চিত্তং একগ্গং হোতি, সেয্যা ফাসু হোতি. তস্মা এৰং নিপজ্জি. অনুট্ঠানসেয্যং উপগতত্তা পনেত্থ – ‘‘উট্ঠানসঞ্ঞং মনসি করিত্ৰা’’তি ন ৰুত্তং. কাযৰসেন চেত্থ অনুট্ঠানং ৰেদিতব্বং, নিদ্দাৰসেন পন তং রত্তিং ভগৰতো ভৰঙ্গস্স ওকাসোযেৰ নাহোসি. পঠমযামস্মিঞ্হি মল্লানং ধম্মদেসনা অহোসি, মজ্ঝিমযামে সুভদ্দস্স পচ্ছিমযামে ভিক্খুসঙ্ঘং ওৰদি, বলৰপচ্চূসে পরিনিব্বাযি.

সব্বফালিফুল্লাতি সব্বে সমন্ততো পুপ্ফিতা মূলতো পট্ঠায যাৰ অগ্গা একচ্ছন্না অহেসুং, ন কেৰলঞ্চ যমকসালাযেৰ, সব্বেপি রুক্খা সব্বপালিফুল্লাৰ অহেসুং. ন কেৰলঞ্হি তস্মিংযেৰ উয্যানে, সকলঞ্হিপি দসসহস্সচক্কৰাল়ে পুপ্ফূপগা পুপ্ফং গণ্হিংসু, ফলূপগা ফলং গণ্হিংসু, সব্বরুক্খানং খন্ধেসু খন্ধপদুমানি, সাখাসু সাখাপদুমানি, ৰল্লীসু ৰল্লিপদুমানি, আকাসেসু আকাসপদুমানি পথৰীতলং ভিন্দিত্ৰা দণ্ডপদুমানি পুপ্ফিংসু. সব্বো মহাসমুদ্দো পঞ্চৰণ্ণপদুমসঞ্ছন্নো অহোসি. তিযোজনসহস্সৰিত্থতো হিমৰা ঘনবদ্ধমোরপিঞ্ছকলাপো ৰিয, নিরন্তরং মালাদামগৰচ্ছিকো ৰিয, সুট্ঠু পীল়েত্ৰা আবদ্ধপুপ্ফৰটংসকো ৰিয, সুপূরিতং পুপ্ফচঙ্কোটকং ৰিয চ অতিরমণীযো অহোসি.

তে তথাগতস্স সরীরং ওকিরন্তীতি তে যমকসালা ভুম্মদেৰতাহি সঞ্চলিতখন্ধসাখৰিটপা তথাগতস্স সরীরং অৰকিরন্তি, সরীরস্স উপরি পুপ্ফানি ৰিকিরন্তীতি অত্থো. অজ্ঝোকিরন্তীতি অজ্ঝোত্থরন্তা ৰিয কিরন্তি. অভিপ্পকিরন্তীতি অভিণ্হং পুনপ্পুনং পকিরন্তিযেৰ. দিব্বানীতি দেৰলোকে নন্দপোক্খরণীসম্ভৰানি, তানি হোন্তি সুৰণ্ণৰণ্ণানি পণ্ণচ্ছত্তপ্পমাণপত্তানি, মহাতুম্বমত্তং রেণুং গণ্হন্তি. ন কেৰলঞ্চ মন্দারৰপুপ্ফানেৰ, অঞ্ঞানিপি পন দিব্বানি পারিচ্ছত্তককোৰিল়ারপুপ্ফাদীনি সুৰণ্ণচঙ্কোটকানি পূরেত্ৰা চক্কৰাল়মুখৰট্টিযম্পি তিদসপুরেপি ব্রহ্মলোকেপি ঠিতাহি দেৰতাহি পৰিট্ঠানি, অন্তলিক্খা পতন্তি. তথাগতস্স সরীরন্তি অন্তরা অৰিকিণ্ণানেৰ আগন্ত্ৰা পত্তকিঞ্জক্খরেণুচুণ্ণেহি তথাগতস্স সরীরমেৰ ওকিরন্তি.

দিব্বানিপি চন্দনচুণ্ণানীতি দেৰতানং উপকপ্পনচন্দনচুণ্ণানি. ন কেৰলঞ্চ দেৰতানংযেৰ, নাগসুপণ্ণমনুস্সানম্পি উপকপ্পনচন্দনচুণ্ণানি. ন কেৰলঞ্চ চন্দনচুণ্ণানেৰ, কাল়ানুসারিকলোহিতচন্দনাদিসব্বদিব্বগন্ধজালচুণ্ণানি, হরিতালঅঞ্জনসুৰণ্ণরজতচুণ্ণানি সব্বদিব্বগন্ধৰাসৰিকতিযো সুৰণ্ণরজতাদিসমুগ্গে পূরেত্ৰা চক্কৰাল়মুখৰট্টিআদীসু ঠিতাহি দেৰতাহি পৰিট্ঠানি অন্তরা অৰিপ্পকিরিত্ৰা তথাগতস্সেৰ সরীরং ওকিরন্তি.

দিব্বানিপি তূরিযানীতি দেৰতানং উপকপ্পনতূরিযানি. ন কেৰলঞ্চ তানিযেৰ, সব্বানিপি তন্তিবদ্ধচম্মপরিযোনদ্ধঘনসুসিরভেদানি দসসহস্সচক্কৰাল়েসু দেৰনাগসুপণ্ণমনুস্সানং তূরিযানি একচক্কৰাল়ে সন্নিপতিত্ৰা অন্তলিক্খে ৰজ্জন্তীতি ৰেদিতব্বানি.

দিব্বানিপি সঙ্গীতানীতি ৰরুণৰারণদেৰতা কির নামেতা দীঘাযুকা দেৰতা – ‘‘মহাপুরিসো মনুস্সপথে নিব্বত্তিত্ৰা বুদ্ধো ভৰিস্সতী’’তি সুত্ৰা ‘‘পটিসন্ধিগ্গহণদিৰসে নং গহেত্ৰা গমিস্সামা’’তি মালং গন্থেতুমারভিংসু. তা গন্থমানাৰ – ‘‘মহাপুরিসো মাতুকুচ্ছিযং নিব্বত্তো’’তি সুত্ৰা ‘‘তুম্হে কস্স গন্থথা’’তি ৰুত্তা ‘‘ন তাৰ নিট্ঠাতি, কুচ্ছিতো নিক্খমনদিৰসে গণ্হিত্ৰা গমিস্সামা’’তি আহংসু. পুনপি ‘‘নিক্খন্তো’’তি সুত্ৰা ‘‘মহাভিনিক্খমনদিৰসে গমিস্সামা’’তি. একূনতিংসৰস্সানি ঘরে ৰসিত্ৰা ‘‘অজ্জ মহাভিনিক্খমনং নিক্খন্তো’’তিপি সুত্ৰা ‘‘অভিসম্বোধিদিৰসে গমিস্সামা’’তি. ছব্বস্সানি পধানং কত্ৰা ‘‘অজ্জ অভিসম্বুদ্ধো’’তিপি সুত্ৰা ‘‘ধম্মচক্কপ্পৰত্তনদিৰসে গমিস্সামা’’তি. ‘‘সত্তসত্তাহানি বোধিমণ্ডে ৰীতিনামেত্ৰা ইসিপতনং গন্ত্ৰা ধম্মচক্কং পৰত্তিত’’ন্তিপি সুত্ৰা ‘‘যমকপাটিহারিযদিৰসে গমিস্সামা’’তি. ‘‘অজ্জ যমকপাটিহারিযং করী’’তিপি সুত্ৰা ‘‘দেৰোরোহণদিৰসে গমিস্সামা’’তি. ‘‘অজ্জ দেৰোরোহণং করী’’তিপি সুত্ৰা ‘‘আযুসঙ্খারোস্সজ্জনে গমিস্সামা’’তি. ‘‘অজ্জ আযুসঙ্খারং ওস্সজী’’তিপি সুত্ৰা ‘‘ন তাৰ নিট্ঠাতি, পরিনিব্বানদিৰসে গমিস্সামা’’তি. ‘‘অজ্জ ভগৰা যমকসালানমন্তরে দক্খিণেন পস্সেন সতো সম্পজানো সীহসেয্যং উপগতো বলৰপচ্চূসসমযে পরিনিব্বাযিস্সতি. তুম্হে কস্স গন্থথা’’তি সুত্ৰা পন – ‘‘কিন্নামেতং, ‘অজ্জেৰ মাতুকুচ্ছিযং পটিসন্ধিং গণ্হি, অজ্জেৰ মাতুকুচ্ছিতো নিক্খমি, অজ্জেৰ মহাভিনিক্খমনং নিক্খমি, অজ্জেৰ বুদ্ধো অহোসি, অজ্জেৰ ধম্মচক্কং পৰত্তযি, অজ্জেৰ যমকপাটিহারিযং অকাসি, অজ্জেৰ দেৰলোকা ওতিণ্ণো, অজ্জেৰ আযুসঙ্খারং ওস্সজি, অজ্জেৰ কির পরিনিব্বাযিস্সতী’তি. ননু নাম দুতিযদিৰসে যাগুপানকালমত্তম্পি ঠাতব্বং অস্স. দস পারমিযো পূরেত্ৰা বুদ্ধত্তং পত্তস্স নাম অননুচ্ছৰিকমেত’’ন্তি অপরিনিট্ঠিতাৰ মালাযো গহেত্ৰা আগম্ম অন্তো চক্কৰাল়ে ওকাসং অলভমানা চক্কৰাল়মুখৰট্টিযং লম্বিত্ৰা চক্কৰাল়মুখৰট্টিযাৰ আধাৰন্তিযো হত্থেন হত্থং গীৰায গীৰং গহেত্ৰা তীণি রতনানি আরব্ভ দ্ৰত্তিংস মহাপুরিসলক্খণানি ছব্বণ্ণরস্মিযো দস পারমিযো অড্ঢছট্ঠানি জাতকসতানি চুদ্দস বুদ্ধঞাণানি আরব্ভ গাযিত্ৰা তস্স তস্স অৰসানে ‘‘মহাযসো, মহাযসো’’তি ৰদন্তি. ইদমেতং পটিচ্চ ৰুত্তং – ‘‘দিব্বানিপি সঙ্গীতানি অন্তলিক্খে ৰত্তন্তি তথাগতস্স পূজাযা’’তি.

১৯৯. ভগৰা পন যমকসালানং অন্তরা দক্খিণেন পস্সেন নিপন্নোযেৰ পথৰীতলতো যাৰ চক্কৰাল়মুখৰট্টিযা, চক্কৰাল়মুখৰট্টিতো চ যাৰ ব্রহ্মলোকা সন্নিপতিতায পরিসায মহন্তং উস্সাহং দিস্ৰা আযস্মতো আনন্দস্স আরোচেসি. তেন ৰুত্তং – ‘‘অথ খো ভগৰা আযস্মন্তং আনন্দং…পে… তথাগতস্স পূজাযা’’তি. এৰং মহাসক্কারং দস্সেত্ৰা তেনাপি অত্তনো অসক্কতভাৰমেৰ দস্সন্তো ন খো, আনন্দ, এত্তাৰতাতিআদিমাহ.

ইদং ৰুত্তং হোতি – ‘‘আনন্দ, মযা দীপঙ্করপাদমূলে নিপন্নেন অট্ঠ ধম্মে সমোধানেত্ৰা অভিনীহারং করোন্তেন ন মালাগন্ধতূরিযসঙ্গীতানং অত্থায অভিনীহারো কতো, ন এতদত্থায পারমিযো পূরিতা. তস্মা ন খো অহং এতায পূজায পূজিতো নাম হোমী’’তি.

কস্মা পন ভগৰা অঞ্ঞত্থ একং উমাপুপ্ফমত্তম্পি গহেত্ৰা বুদ্ধগুণে আৰজ্জেত্ৰা কতায পূজায বুদ্ধঞাণেনাপি অপরিচ্ছিন্নং ৰিপাকং ৰণ্ণেত্ৰা ইধ এৰং মহন্তং পূজং পটিক্খিপতীতি? পরিসানুগ্গহেন চেৰ সাসনস্স চ চিরট্ঠিতিকামতায. সচে হি ভগৰা এৰং ন পটিক্খিপেয্য, অনাগতে সীলস্স আগতট্ঠানে সীলং ন পরিপূরেস্সন্তি, সমাধিস্স আগতট্ঠানে সমাধিং ন পরিপূরেস্সন্তি, ৰিপস্সনায আগতট্ঠানে ৰিপস্সনাগব্ভং ন গাহাপেস্সন্তি. উপট্ঠাকে সমাদপেত্ৰা পূজংযেৰ কারেন্তা ৰিহরিস্সন্তি. আমিসপূজা চ নামেসা সাসনং একদিৰসম্পি একযাগুপানকালমত্তম্পি সন্ধারেতুং ন সক্কোতি. মহাৰিহারসদিসঞ্হি ৰিহারসহস্সং মহাচেতিযসদিসঞ্চ চেতিযসহস্সম্পি সাসনং ধারেতুং ন সক্কোন্তি. যেন কম্মং কতং, তস্সেৰ হোতি. সম্মাপটিপত্তি পন তথাগতস্স অনুচ্ছৰিকা পূজা. সা হি তেন পত্থিতা চেৰ, সক্কোতি সাসনঞ্চ সন্ধারেতুং, তস্মা তং দস্সেন্তো যো খো আনন্দাতিআদিমাহ.

তত্থ ধম্মানুধম্মপ্পটিপন্নোতি নৰৰিধস্স লোকুত্তরধম্মস্স অনুধম্মং পুব্বভাগপটিপদং পটিপন্নো. সাযেৰ পন পটিপদা অনুচ্ছৰিকত্তা ‘‘সামীচী’’তি ৰুচ্চতি. তং সামীচিং পটিপন্নোতি সামীচিপ্পটিপন্নো. তমেৰ পুব্বভাগপটিপদাসঙ্খাতং অনুধম্মং চরতি পূরেতীতি অনুধম্মচারী.

পুব্বভাগপটিপদাতি চ সীলং আচারপঞ্ঞত্তি ধুতঙ্গসমাদানং যাৰ গোত্রভুতো সম্মাপটিপদা ৰেদিতব্বা. তস্মা যো ভিক্খু ছসু অগারৰেসু পতিট্ঠায পঞ্ঞত্তিং অতিক্কমতি, অনেসনায জীৰিকং কপ্পেতি, অযং ন ধম্মানুধম্মপ্পটিপন্নো. যো পন সব্বং অত্তনো পঞ্ঞত্তং সিক্খাপদং জিনৰেলং জিনমরিযাদং জিনকাল়সুত্তং অণুমত্তম্পি ন ৰীতিক্কমতি, অযং ধম্মানুধম্মপ্পটিপন্নো নাম. ভিক্খুনিযাপি এসেৰ নযো. যো উপাসকো পঞ্চ ৰেরানি দস অকুসলকম্মপথে সমাদায ৰত্ততি অপ্পেতি, অযং ন ধম্মানুধম্মপ্পটিপন্নো. যো পন তীসু সরণেসু, পঞ্চসুপি সীলেসু, দসসু সীলেসু পরিপূরকারী হোতি, মাসস্স অট্ঠ উপোসথে করোতি, দানং দেতি, গন্ধপূজং মালাপূজং করোতি, মাতরং পিতরং উপট্ঠাতি, ধম্মিকে সমণব্রাহ্মণে উপট্ঠাতি, অযং ধম্মানুধম্মপ্পটিপন্নো নাম. উপাসিকাযপি এসেৰ নযো.

পরমায পূজাযাতি উত্তমায পূজায. অযঞ্হি নিরামিসপূজা নাম সক্কোতি মম সাসনং সন্ধারেতুং. যাৰ হি ইমা চতস্সো পরিসা মং ইমায পূজেস্সন্তি, তাৰ মম সাসনং মজ্ঝে নভস্স পুণ্ণচন্দো ৰিয ৰিরোচিস্সতীতি দস্সেতি.