পুক্কুসমল্লপুত্তৰত্থুৰণ্ণনা

১৯২. পুক্কুসোতি তস্স নামং. মল্লপুত্তোতি মল্লরাজপুত্তো. মল্লা কির ৰারেন রজ্জং কারেন্তি. যাৰ নেসং ৰারো ন পাপুণাতি, তাৰ ৰণিজ্জং করোন্তি. অযম্পি ৰণিজ্জমেৰ করোন্তো পঞ্চ সকটসতানি যোজাপেত্ৰা ধুরৰাতে ৰাযন্তে পুরতো গচ্ছতি, পচ্ছা ৰাতে ৰাযন্তে সত্থৰাহং পুরতো পেসেত্ৰা সযং পচ্ছা গচ্ছতি. তদা পন পচ্ছা ৰাতো ৰাযি, তস্মা এস পুরতো সত্থৰাহং পেসেত্ৰা সব্বরতনযানে নিসীদিত্ৰা কুসিনারতো নিক্খমিত্ৰা ‘‘পাৰং গমিস্সামী’’তি মগ্গং পটিপজ্জি. তেন ৰুত্তং – ‘‘কুসিনারায পাৰং অদ্ধানমগ্গপ্পটিপন্নো হোতী’’তি.

আল়ারোতি তস্স নামং. দীঘপিঙ্গলো কিরেসো, তেনস্স আল়ারোতি নামং অহোসি. কালামোতি গোত্তং. যত্র হি নামাতি যো নাম. নেৰ দক্খতীতি ন অদ্দস. যত্রসদ্দযুত্তত্তা পনেতং অনাগতৰসেন ৰুত্তং. এৰরূপঞ্হি ঈদিসেসু ঠানেসু সদ্দলক্খণং.

১৯৩. নিচ্ছরন্তীসূতি ৰিচরন্তীসু. অসনিযা ফলন্তিযাতি নৰৰিধায অসনিযা ভিজ্জমানায ৰিয মহারৰং রৰন্তিযা. নৰৰিধা হি অসনিযো – অসঞ্ঞা, ৰিচক্কা, সতেরা, গগ্গরা, কপিসীসা, মচ্ছৰিলোলিকা, কুক্কুটকা, দণ্ডমণিকা, সুক্খাসনীতি. তত্থ অসঞ্ঞা অসঞ্ঞং করোতি. ৰিচক্কা একং চক্কং করোতি. সতেরা সতেরসদিসা হুত্ৰা পততি. গগ্গরা গগ্গরাযমানা পততি. কপিসীসা ভমুকং উক্খিপেন্তো মক্কটো ৰিয হোতি. মচ্ছৰিলোলিকা ৰিলোলিতমচ্ছো ৰিয হোতি. কুক্কুটকা কুক্কুটসদিসা হুত্ৰা পততি. দণ্ডমণিকা নঙ্গলসদিসা হুত্ৰা পততি. সুক্খাসনী পতিতট্ঠানং সমুগ্ঘাটেতি.

দেৰে ৰস্সন্তেতি সুক্খগজ্জিতং গজ্জিত্ৰা অন্তরন্তরা ৰস্সন্তে. আতুমাযন্তি আতুমং নিস্সায ৰিহরামি. ভুসাগারেতি খলসালাযং. এত্থেসোতি এতস্মিং কারণে এসো মহাজনকাযো সন্নিপতিতো. ক্ৰ অহোসীতি কুহিং অহোসি. সো তং ভন্তেতি সো ত্ৰং ভন্তে.

১৯৪. সিঙ্গীৰণ্ণন্তি সিঙ্গীসুৰণ্ণৰণ্ণং. যুগমট্ঠন্তি মট্ঠযুগং, সণ্হসাটকযুগল়ন্তি অত্থো. ধারণীযন্তি অন্তরন্তরা মযা ধারেতব্বং, পরিদহিতব্বন্তি অত্থো. তং কির সো তথারূপে ছণদিৰসেযেৰ ধারেত্ৰা সেসকালে নিক্খিপতি. এৰং উত্তমং মঙ্গলৰত্থযুগং সন্ধাযাহ. অনুকম্পং উপাদাযাতি মযি অনুকম্পং পটিচ্চ. অচ্ছাদেহীতি উপচারৰচনমেতং – একং ময্হং দেহি, একং আনন্দস্সাতি অত্থো. কিং পন থেরো তং গণ্হীতি? আম গণ্হি. কস্মা? মত্থকপ্পত্তকিচ্চত্তা. কিঞ্চাপি হেস এৰরূপং লাভং পটিক্খিপিত্ৰা উপট্ঠাকট্ঠানং পটিপন্নো. তং পনস্স উপট্ঠাককিচ্চং মত্থকং পত্তং. তস্মা অগ্গহেসি. যে চাপি এৰং ৰদেয্যুং – ‘‘অনারাধকো মঞ্ঞে আনন্দো পঞ্চৰীসতি ৰস্সানি উপট্ঠহন্তেন ন কিঞ্চি ভগৰতো সন্তিকা তেন লদ্ধপুব্ব’’ন্তি. তেসং ৰচনোকাসচ্ছেদনত্থম্পি অগ্গহেসি. অপি চ জানাতি ভগৰা – ‘‘আনন্দো গহেত্ৰাপি অত্তনা ন ধারেস্সতি, ময্হংযেৰ পূজং করিস্সতি. মল্লপুত্তেন পন আনন্দং পূজেন্তেন সঙ্ঘোপি পূজিতো ভৰিস্সতি, এৰমস্স মহাপুঞ্ঞরাসি ভৰিস্সতী’’তি থেরস্স একং দাপেসি. থেরোপি তেনেৰ কারণেন অগ্গহেসীতি. ধম্মিযা কথাযাতি ৰত্থানুমোদনকথায.

১৯৫. ভগৰতো কাযং উপনামিতন্তি নিৰাসনপারুপনৰসেন অল্লীযাপিতং. ভগৰাপি ততো একং নিৰাসেসি, একং পারুপি. হতচ্চিকং ৰিযাতি যথা হতচ্চিকো অঙ্গারো অন্তন্তেনেৰ জোততি, বহি পনস্স পভা নত্থি, এৰং বহি পটিচ্ছন্নপ্পভং হুত্ৰা খাযতীতি অত্থো.

ইমেসু খো, আনন্দ, দ্ৰীসুপি কালেসূতি কস্মা ইমেসু দ্ৰীসু কালেসু এৰং হোতি? আহারৰিসেসেন চেৰ বলৰসোমনস্সেন চ. এতেসু হি দ্ৰীসু কালেসু সকলচক্কৰাল়ে দেৰতা আহারে ওজং পক্খিপন্তি, তং পণীতভোজনং কুচ্ছিং পৰিসিত্ৰা পসন্নরূপং সমুট্ঠাপেতি. আহারসমুট্ঠানরূপস্স পসন্নত্তা মনচ্ছট্ঠানি ইন্দ্রিযানি অতিৰিয ৰিরোচন্তি. সম্বোধিদিৰসে চস্স – ‘‘অনেককপ্পকোটিসতসহস্সসঞ্চিতো ৰত মে কিলেসরাসি অজ্জ পহীনো’’তি আৰজ্জন্তস্স বলৰসোমনস্সং উপ্পজ্জতি, চিত্তং পসীদতি, চিত্তে পসন্নে লোহিতং পসীদতি, লোহিতে পসন্নে মনচ্ছট্ঠানি ইন্দ্রিযানি অতিৰিয ৰিরোচন্তি. পরিনিব্বানদিৰসেপি – ‘‘অজ্জ, দানাহং, অনেকেহি বুদ্ধসতসহস্সেহি পৰিট্ঠং অমতমহানিব্বানং নাম নগরং পৰিসিস্সামী’’তি আৰজ্জন্তস্স বলৰসোমনস্সং উপ্পজ্জতি, চিত্তং পসীদতি, চিত্তে পসন্নে লোহিতং পসীদতি, লোহিতে পসন্নে মনচ্ছট্ঠানি ইন্দ্রিযানি অতিৰিয ৰিরোচন্তি. ইতি আহারৰিসেসেন চেৰ বলৰসোমনস্সেন চ ইমেসু দ্ৰীসু কালেসু এৰং হোতীতি ৰেদিতব্বং. উপৰত্তনেতি পাচীনতো নিৰত্তনসালৰনে. অন্তরেন যমকসালানন্তি যমকসালরুক্খানং মজ্ঝে.

সিঙ্গীৰণ্ণন্তি গাথা সঙ্গীতিকালে ঠপিতা.

১৯৬. ন্হত্ৰা চ পিৰিত্ৰা চাতি এত্থ তদা কির ভগৰতি নহাযন্তে অন্তোনদিযং মচ্ছকচ্ছপা চ উভতোতীরেসু ৰনসণ্ডো চ সব্বং সুৰণ্ণৰণ্ণমেৰ হোতি. অম্বৰনন্তি তস্সাযেৰ নদিযা তীরে অম্বৰনং. আযস্মন্তং চুন্দকন্তি তস্মিং কির খণে আনন্দত্থেরো উদকসাটকং পীল়েন্তো ওহীযি, চুন্দত্থেরো সমীপে অহোসি. তং ভগৰা আমন্তেসি.

গন্ত্ৰান বুদ্ধো নদিকং ককুধন্তি ইমাপি গাথা সঙ্গীতিকালেযেৰ ঠপিতা. তত্থ পৰত্তা ভগৰা ইধ ধম্মেতি ভগৰা ইধ সাসনে ধম্মে পৰত্তা, চতুরাসীতি ধম্মক্খন্ধসহস্সানি পৰত্তানীতি অত্থো. পমুখে নিসীদীতি সত্থু পুরতোৰ নিসীদি. এত্তাৰতা চ থেরো অনুপ্পত্তো. এৰং অনুপ্পত্তং অথ খো ভগৰা আযস্মন্তং আনন্দং আমন্তেসি.

১৯৭. অলাভাতি যে অঞ্ঞেসং দানানিসংসসঙ্খাতা লাভা হোন্তি, তে অলাভা. দুল্লদ্ধন্তি পুঞ্ঞৰিসেসেন লদ্ধম্পি মনুস্সত্তং দুল্লদ্ধং. যস্স তেতি যস্স তৰ. উত্তণ্ডুলং ৰা অতিকিলিন্নং ৰা কো জানাতি, কীদিসম্পি পচ্ছিমং পিণ্ডপাতং পরিভুঞ্জিত্ৰা তথাগতো পরিনিব্বুতো, অদ্ধা তে যং ৰা তং ৰা দিন্নং ভৰিস্সতীতি. লাভাতি দিট্ঠধম্মিকসম্পরাযিকদানানিসংসসঙ্খাতা লাভা. সুলদ্ধন্তি তুয্হং মনুস্সত্তং সুলদ্ধং. সমসমফলাতি সব্বাকারেন সমানফলা.

ননু চ যং সুজাতায দিন্নং পিণ্ডপাতং ভুঞ্জিত্ৰা তথাগতো অভিসম্বুদ্ধো, সো সরাগসদোসসমোহকালে পরিভুত্তো, অযং পন চুন্দেন দিন্নো ৰীতরাগৰীতদোসৰীতমোহকালে পরিভুত্তো, কস্মা এতে সমফলাতি? পরিনিব্বানসমতায চ সমাপত্তিসমতায চ অনুস্সরণসমতায চ. ভগৰা হি সুজাতায দিন্নং পিণ্ডপাতং পরিভুঞ্জিত্ৰা সউপাদিসেসায নিব্বানধাতুযা পরিনিব্বুতো, চুন্দেন দিন্নং পরিভুঞ্জিত্ৰা অনুপাদিসেসায নিব্বানধাতুযা পরিনিব্বুতোতি এৰং পরিনিব্বানসমতাযপি সমফলা. অভিসম্বুজ্ঝনদিৰসে চ চতুৰীসতিকোটিসতসহস্সসঙ্খ্যা সমাপত্তিযো সমাপজ্জি, পরিনিব্বানদিৰসেপি সব্বা তা সমাপজ্জীতি এৰং সমাপত্তিসমতাযপি সমফলা. সুজাতা চ অপরভাগে অস্সোসি – ‘‘ন কিরেসা রুক্খদেৰতা, বোধিসত্তো কিরেস, তং কির পিণ্ডপাতং পরিভুঞ্জিত্ৰা অনুত্তরং সম্মাসম্বোধিং অভিসম্বুদ্ধো, সত্তসত্তাহং কিরস্স তেন যাপনং অহোসী’’তি. তস্সা ইদং সুত্ৰা – ‘‘লাভা ৰত মে’’তি অনুস্সরন্তিযা বলৰপীতিসোমনস্সং উদপাদি. চুন্দস্সাপি অপরভাগে – ‘‘অৰসানপিণ্ডপাতো কির মযা দিন্নো, ধম্মসীসং কির মে গহিতং, ময্হং কির পিণ্ডপাতং পরিভুঞ্জিত্ৰা সত্থা অনুপাদিসেসায নিব্বানধাতুযা পরিনিব্বুতো’’তি সুত্ৰা ‘‘লাভা ৰত মে’’তি অনুস্সরতো বলৰসোমনস্সং উদপাদীতি এৰং অনুস্সরণসমতাযপি সমফলাতি ৰেদিতব্বা.

যসসংৰত্তনিকন্তি পরিৰারসংৰত্তনিকং. আধিপতেয্যসংৰত্তনিকন্তি জেট্ঠকভাৰসংৰত্তনিকং.

সংযমতোতি সীলসংযমেন সংযমন্তস্স, সংৰরে ঠিতস্সাতি অত্থো. ৰেরং ন চীযতীতি পঞ্চৰিধং ৰেরং ন ৰড্ঢতি. কুসলো চ জহাতি পাপকন্তি কুসলো পন ঞাণসম্পন্নো অরিযমগ্গেন অনৰসেসং পাপকং লামকং অকুসলং জহাতি. রাগদোসমোহক্খযা স নিব্বুতোতি সো ইমং পাপকং জহিত্ৰা রাগাদীনং খযা কিলেসনিব্বানেন নিব্বুতোতি. ইতি চুন্দস্স চ দক্খিণং, অত্তনো চ দক্খিণেয্যসম্পত্তিং সম্পস্সমানো উদানং উদানেসীতি.

চতুত্থভাণৰারৰণ্ণনা নিট্ঠিতা.