নাগাপলোকিতৰণ্ণনা

১৮৬. নাগাপলোকিতন্তি যথা হি মহাজনস্স অট্ঠীনি কোটিযা কোটিং আহচ্চ ঠিতানি পচ্চেকবুদ্ধানং, অঙ্কুসকলগ্গানি ৰিয, ন এৰং বুদ্ধানং. বুদ্ধানং পন সঙ্খলিকানি ৰিয একাবদ্ধানি হুত্ৰা ঠিতানি, তস্মা পচ্ছতো অপলোকনকালে ন সক্কা হোতি গীৰং পরিৰত্তেতুং. যথা পন হত্থিনাগো পচ্ছাভাগং অপলোকেতুকামো সকলসরীরেনেৰ পরিৰত্ততি, এৰং পরিৰত্তিতব্বং হোতি. ভগৰতো পন নগরদ্ৰারে ঠত্ৰা – ‘‘ৰেসালিং অপলোকেস্সামী’’তি চিত্তে উপ্পন্নমত্তে – ‘‘ভগৰা অনেকানি কপ্পকোটিসহস্সানি পারমিযো পূরেন্তেহি তুম্হেহি ন গীৰং পরিৰত্তেত্ৰা অপলোকনকম্মং কত’’ন্তি অযং পথৰী কুলালচক্কং ৰিয পরিৰত্তেত্ৰা ভগৰন্তং ৰেসালিনগরাভিমুখং অকাসি. তং সন্ধাযেতং ৰুত্তং.

ননু চ ন কেৰলং ৰেসালিযাৰ, সাৰত্থিরাজগহনাল়ন্দপাটলিগামকোটিগামনাতিকগামকেসুপি ততো ততো নিক্খন্তকালে তং তং সব্বং পচ্ছিমদস্সনমেৰ, তত্থ তত্থ কস্মা নাগাপলোকিতং নাপলোকেসীতি? অনচ্ছরিযত্তা. তত্থ তত্থ হি নিৰত্তেত্ৰা অপলোকেন্তস্সেতং ন অচ্ছরিযং হোতি, তস্মা নাপলোকেসি. অপি চ ৰেসালিরাজানো আসন্নৰিনাসা, তিণ্ণং ৰস্সানং উপরি ৰিনস্সিস্সন্তি. তে তং নগরদ্ৰারে নাগাপলোকিতং নাম চেতিযং কত্ৰা গন্ধমালাদীহি পূজেস্সন্তি, তং নেসং দীঘরত্তং হিতায সুখায ভৰিস্সতীতি তেসং অনুকম্পায অপলোকেসি.

দুক্খস্সন্তকরোতি ৰট্টদুক্খস্স অন্তকরো. চক্খুমাতি পঞ্চহি চক্খূহি চক্খুমা. পরিনিব্বুতোতি কিলেসপরিনিব্বানেন পরিনিব্বুতো.