সরণগমনকথা

ইদানি তেসু সরণগমনেসু কোসল্লত্থং সরণং, সরণগমনং, যো চ সরণং গচ্ছতি, সরণগমনপ্পভেদো, সরণগমনফলং, সঙ্কিলেসো, ভেদোতি, অযং ৰিধি ৰেদিতব্বো. সেয্যথিদং – সরণত্থতো তাৰ হিংসতীতি সরণং. সরণগতানং তেনেৰ সরণগমনেন ভযং সন্তাসং দুক্খং দুগ্গতিপরিকিলেসং হনতি ৰিনাসেতীতি অত্থো, রতনত্তযস্সেৰেতং অধিৰচনং.

অথ ৰা হিতে পৰত্তনেন অহিতা চ নিৰত্তনেন সত্তানং ভযং হিংসতি বুদ্ধো. ভৰকন্তারা উত্তারণেন অস্সাসদানেন চ ধম্মো; অপ্পকানম্পি কারানং ৰিপুলফলপটিলাভকরণেন সঙ্ঘো. তস্মা ইমিনাপি পরিযাযেন রতনত্তযং সরণং. তপ্পসাদতগ্গরুতাহি ৰিহতকিলেসো তপ্পরাযণতাকারপ্পৰত্তো চিত্তুপ্পাদো সরণগমনং. তং সমঙ্গীসত্তো সরণং গচ্ছতি. ৰুত্তপ্পকারেন চিত্তুপ্পাদেন এতানি মে তীণি রতনানি সরণং, এতানি পরাযণন্তি এৰং উপেতীতি অত্থো. এৰং তাৰ সরণং, সরণগমনং, যো চ সরণং গচ্ছতি, ইদং তযং ৰেদিতব্বং.

সরণগমনপ্পভেদে পন দুৰিধং সরণগমনং – লোকুত্তরং লোকিযঞ্চ. তত্থ লোকুত্তরং দিট্ঠসচ্চানং মগ্গক্খণে সরণগমনুপক্কিলেসসমুচ্ছেদেন আরম্মণতো নিব্বানারম্মণং হুত্ৰা কিচ্চতো সকলেপি রতনত্তযে ইজ্ঝতি. লোকিযং পুথুজ্জনানং সরণগমনুপক্কিলেসৰিক্খম্ভনেন আরম্মণতো বুদ্ধাদিগুণারম্মণং হুত্ৰা ইজ্ঝতি. তং অত্থতো বুদ্ধাদীসু ৰত্থূসু সদ্ধাপটিলাভো সদ্ধামূলিকা চ সম্মাদিট্ঠি দসসু পুঞ্ঞকিরিযৰত্থূসু দিট্ঠিজুকম্মন্তি ৰুচ্চতি. তযিদং চতুধা ৰত্ততি – অত্তসন্নিয্যাতনেন, তপ্পরাযণতায, সিস্সভাৰূপগমনেন, পণিপাতেনাতি.

তত্থ অত্তসন্নিয্যাতনং নাম – ‘‘অজ্জাদিং কত্ৰা অহং অত্তানং বুদ্ধস্স নিয্যাতেমি, ধম্মস্স, সঙ্ঘস্সা’’তি এৰং বুদ্ধাদীনং অত্তপরিচ্চজনং. তপ্পরাযণতা নাম ‘‘অজ্জাদিং কত্ৰা ‘অহং বুদ্ধপরাযণো, ধম্মপরাযণো, সঙ্ঘপরাযণো’তি. মং ধারেথা’’তি এৰং তপ্পরাযণভাৰো. সিস্সভাৰূপগমনং নাম – ‘‘অজ্জাদিং কত্ৰা – ‘অহং বুদ্ধস্স অন্তেৰাসিকো, ধম্মস্স, সঙ্ঘস্স অন্তেৰাসিকো’তি মং ধারেথা’’তি এৰং সিস্সভাৰূপগমো. পণিপাতো নাম – ‘‘অজ্জাদিং কত্ৰা অহং অভিৰাদনপচ্চুট্ঠানঅঞ্জলিকম্মসামীচিকম্মং বুদ্ধাদীনংযেৰ তিণ্ণং ৰত্থূনং করোমী’তি মং ধারেথা’’তি এৰং বুদ্ধাদীসু পরমনিপচ্চাকারো. ইমেসঞ্হি চতুন্নং আকারানং অঞ্ঞতরম্পি করোন্তেন গহিতংযেৰ হোতি সরণং.

অপি চ ভগৰতো অত্তানং পরিচ্চজামি, ধম্মস্স, সঙ্ঘস্স, অত্তানং পরিচ্চজামি, জীৰিতং পরিচ্চজামি, পরিচ্চত্তোযেৰ মে অত্তা, পরিচ্চত্তংযেৰ জীৰিতং, জীৰিতপরিযন্তিকং বুদ্ধং সরণং গচ্ছামি, বুদ্ধো মে সরণং লেণং তাণন্তি; এৰম্পি অত্তসন্নিয্যাতনং ৰেদিতব্বং. ‘‘সত্থারঞ্চ ৰতাহং পস্সেয্যং, ভগৰন্তমেৰ পস্সেয্যং, সুগতঞ্চ ৰতাহং পস্সেয্যং, ভগৰন্তমেৰ পস্সেয্যং, সম্মাসম্বুদ্ধঞ্চ ৰতাহং পস্সেয্যং, ভগৰন্তমেৰ পস্সেয্য’’ন্তি (সং. নি. ২.১৫৪). এৰম্পি মহাকস্সপস্স সরণগমনং ৰিয সিস্সভাৰূপগমনং ৰেদিতব্বং.

‘‘সো অহং ৰিচরিস্সামি, গামা গামং পুরা পুরং;

নমস্সমানো সম্বুদ্ধং, ধম্মস্স চ সুধম্মত’’ন্তি. (সু. নি. ১৯৪);

এৰম্পি আল়ৰকাদীনং সরণগমনং ৰিয তপ্পরাযণতা ৰেদিতব্বা. অথ খো ব্রহ্মাযু ব্রাহ্মণো উট্ঠাযাসনা একংসং উত্তরাসঙ্গং করিত্ৰা ভগৰতো পাদেসু সিরসা নিপতিত্ৰা ভগৰতো পাদানি মুখেন চ পরিচুম্বতি, পাণীহি চ পরিসম্বাহতি, নামঞ্চ সাৰেতি – ‘‘ব্রহ্মাযু অহং, ভো গোতম ব্রাহ্মণো, ব্রহ্মাযু অহং, ভো গোতম ব্রাহ্মণো’’তি (ম. নি. ২.৩৯৪) এৰম্পি পণিপাতো দট্ঠব্বো.

সো পনেস ঞাতিভযাচরিযদক্খিণেয্যৰসেন চতুব্বিধো হোতি. তত্থ দক্খিণেয্যপণিপাতেন সরণগমনং হোতি, ন ইতরেহি. সেট্ঠৰসেনেৰ হি সরণং গণ্হাতি, সেট্ঠৰসেন চ ভিজ্জতি. তস্মা যো সাকিযো ৰা কোলিযো ৰা – ‘‘বুদ্ধো অম্হাকং ঞাতকো’’তি ৰন্দতি, অগ্গহিতমেৰ হোতি সরণং. যো ৰা – ‘‘সমণো গোতমো রাজপূজিতো মহানুভাৰো অৰন্দীযমানো অনত্থম্পি করেয্যা’’তি ভযেন ৰন্দতি, অগ্গহিতমেৰ হোতি সরণং. যো ৰা বোধিসত্তকালে ভগৰতো সন্তিকে কিঞ্চি উগ্গহিতং সরমানো বুদ্ধকালে ৰা –

‘‘চতুধা ৰিভজে ভোগে, পণ্ডিতো ঘরমাৰসং;

একেন ভোগং ভুঞ্জেয্য, দ্ৰীহি কম্মং পযোজযে;

চতুত্থঞ্চ নিধাপেয্য, আপদাসু ভৰিস্সতী’’তি. (দী. নি. ৩.২৬৫);

এৰরূপং অনুসাসনিং উগ্গহেত্ৰা – ‘‘আচরিযো মে’’তি ৰন্দতি, অগ্গহিতমেৰ হোতি সরণং. যো পন – ‘‘অযং লোকে অগ্গদক্খিণেয্যো’’তি ৰন্দতি, তেনেৰ গহিতং হোতি সরণং.

এৰং গহিতসরণস্স চ উপাসকস্স ৰা উপাসিকায ৰা অঞ্ঞতিত্থিযেসু পব্বজিতম্পি ঞাতিং – ‘‘ঞাতকো মে অয’’ন্তি ৰন্দতো সরণগমনং ন ভিজ্জতি, পগেৰ অপব্বজিতং. তথা রাজানং ভযৰসেন ৰন্দতো. সো হি রট্ঠপূজিতত্তা অৰন্দীযমানো অনত্থম্পি করেয্যাতি. তথা যং কিঞ্চি সিপ্পং সিক্খাপকং তিত্থিযম্পি – ‘‘আচরিযো মে অয’’ন্তি ৰন্দতোপি ন ভিজ্জতি, এৰং সরণগমনপ্পভেদো ৰেদিতব্বো.

এত্থ চ লোকুত্তরস্স সরণগমনস্স চত্তারি সামঞ্ঞফলানি ৰিপাকফলং, সব্বদুক্খক্খযো আনিসংসফলং. ৰুত্তঞ্হেতং –

‘‘যো চ বুদ্ধঞ্চ ধম্মঞ্চ, সঙ্ঘঞ্চ সরণং গতো;

চত্তারি অরিযসচ্চানি, সম্মপ্পঞ্ঞায পস্সতি.

দুক্খং দুক্খসমুপ্পাদং, দুক্খস্স চ অতিক্কমং;

অরিযং অট্ঠঙ্গিকং মগ্গং, দুক্খূপসমগামিনং.

এতং খো সরণং খেমং, এতং সরণমুত্তমং;

এতং সরণমাগম্ম, সব্বদুক্খা পমুচ্চতী’’তি. (ধ. প. ১৯২);

অপি চ নিচ্চাদিতো অনুপগমনাদিৰসেন পেতস্স আনিসংসফলং ৰেদিতব্বং. ৰুত্তঞ্হেতং – ‘‘অট্ঠানমেতং অনৰকাসো, যং দিট্ঠিসম্পন্নো পুগ্গলো কঞ্চি সঙ্খারং নিচ্চতো উপগচ্ছেয্য…পে… কঞ্চি সঙ্খারং সুখতো…পে… কঞ্চি ধম্মং অত্ততো উপগচ্ছেয্য…পে… মাতরং জীৰিতা ৰোরোপেয্য…পে… পিতরং…পে… অরহন্তং…পে… পদুট্ঠচিত্তো তথাগতস্স লোহিতং উপ্পাদেয্য…পে…. সঙ্ঘং ভিন্দেয্য…পে… অঞ্ঞং সত্থারং উদ্দিসেয্য, নেতং ঠানং ৰিজ্জতী’’তি (অ. নি. ১.২৯০). লোকিযস্স পন সরণগমনস্স ভৰসম্পদাপি ভোগসম্পদাপি ফলমেৰ. ৰুত্তঞ্হেতং –

‘‘যে কেচি বুদ্ধং সরণং গতাসে, ন তে গমিস্সন্তি অপাযভূমিং;

পহায মানুসং দেহং, দেৰকাযং পরিপূরেস্সন্তী’’তি. (সং. নি. ১.৩৭);

অপরম্পি ৰুত্তং – ‘‘অথ খো সক্কো দেৰানমিন্দো অসীতিযা দেৰতাসহস্সেহি সদ্ধিং যেনাযস্মা মহামোগ্গল্লানো তেনুপসঙ্কমি…পে… একমন্তং ঠিতং খো সক্কং দেৰানমিন্দং আযস্মা মহামোগ্গল্লানো এতদৰোচ – ‘‘সাধু খো, দেৰানমিন্দ, বুদ্ধং সরণগমনং হোতি. বুদ্ধং সরণগমনহেতু খো, দেৰানমিন্দ, এৰমিধেকচ্চে সত্তা কাযস্স ভেদা পরং মরণা সুগতিং সগ্গং লোকং উপপজ্জন্তি…পে… তে অঞ্ঞে দেৰে দসহি ঠানেহি অধিগণ্হন্তি – দিব্বেন আযুনা, দিব্বেন ৰণ্ণেন, দিব্বেন সুখেন, দিব্বেন যসেন, দিব্বেন আধিপতেয্যেন, দিব্বেহি রূপেহি সদ্দেহি গন্ধেহি রসেহি ফোট্ঠব্বেহী’’তি (সং. নি. ৪.৩৪১). এস নযো ধম্মে চ সঙ্ঘে চ. অপি চ ৰেলামসুত্তাদীনং ৰসেনাপি সরণগমনস্স ফলৰিসেসো ৰেদিতব্বো. এৰং সরণগমনস্স ফলং ৰেদিতব্বং.

তত্থ চ লোকিযসরণগমনং তীসু ৰত্থূসু অঞ্ঞাণসংসযমিচ্ছাঞাণাদীহি সংকিলিস্সতি, ন মহাজুতিকং হোতি, ন মহাৰিপ্ফারং. লোকুত্তরস্স নত্থি সংকিলেসো. লোকিযস্স চ সরণগমনস্স দুৰিধো ভেদো – সাৰজ্জো চ অনৰজ্জো চ. তত্থ সাৰজ্জো অঞ্ঞসত্থারাদীসু অত্তসন্নিয্যাতনাদীহি হোতি, সো চ অনিট্ঠফলো হোতি. অনৰজ্জো কালকিরিযায হোতি, সো অৰিপাকত্তা অফলো. লোকুত্তরস্স পন নেৰত্থি ভেদো. ভৰন্তরেপি হি অরিযসাৰকো অঞ্ঞং সত্থারং ন উদ্দিসতীতি. এৰং সরণগমনস্স সংকিলেসো চ ভেদো চ ৰেদিতব্বোতি.

উপাসকং মং ভন্তে ভগৰা ধারেতূতি মং ভগৰা ‘‘উপাসকো অয’’ন্তি এৰং ধারেতু, জানাতূতি অত্থো. উপাসকৰিধিকোসল্লত্থং পনেত্থ – কো উপাসকো? কস্মা উপাসকোতি ৰুচ্চতি? কিমস্স সীলং? কো আজীৰো? কা ৰিপত্তি? কা সম্পত্তীতি? ইদং পকিণ্ণকং ৰেদিতব্বং.

তত্থ কো উপাসকোতি যো কোচি সরণগতো গহট্ঠো. ৰুত্তঞ্হেতং – ‘‘যতো খো, মহানাম, বুদ্ধং সরণং গতো হোতি, ধম্মং সরণং গতো হোতি, সঙ্ঘং সরণং গতো হোতি. এত্তাৰতা খো, মহানাম, উপাসকো হোতী’’তি (সং. নি. ৫.১০৩৩).

কস্মা উপাসকোতি রতনত্তযং উপাসনতো. সো হি বুদ্ধং উপাসতীতি উপাসকো, তথা ধম্মং সংঘং.

কিমস্স সীলন্তি পঞ্চ ৰেরমণিযো. যথাহ – ‘‘যতো খো, মহানাম, উপাসকো পাণাতিপাতা পটিৰিরতো হোতি, অদিন্নাদানা… কামেসুমিচ্ছাচারা… মুসাৰাদা… সুরামেরযমজ্জপমাদট্ঠানা পটিৰিরতো হোতি, এত্তাৰতা খো, মহানাম, উপাসকো সীলৰা হোতী’’তি (সং. নি. ৫.১০৩৩).

কো আজীৰোতি পঞ্চ মিচ্ছাৰণিজ্জা পহায ধম্মেন সমেন জীৰিতকপ্পনং. ৰুত্তঞ্হেতং – ‘‘পঞ্চিমা, ভিক্খৰে, ৰণিজ্জা উপাসকেন অকরণীযা. কতমা পঞ্চ? সত্থৰণিজ্জা, সত্তৰণিজ্জা, মংসৰণিজ্জা, মজ্জৰণিজ্জা, ৰিসৰণিজ্জা. ইমা খো, ভিক্খৰে, পঞ্চ ৰণিজ্জা উপাসকেন অকরণীযা’’তি (অ. নি. ৫.১৭৭).

কা ৰিপত্তীতি যা তস্সেৰ সীলস্স চ আজীৰস্স চ ৰিপত্তি, অযমস্স ৰিপত্তি. অপি চ যায এস চণ্ডালো চেৰ হোতি, মলঞ্চ পতিকুট্ঠো চ, সাপিস্স ৰিপত্তীতি ৰেদিতব্বা. তে চ অত্থতো অস্সদ্ধিযাদযো পঞ্চ ধম্মা হোন্তি. যথাহ – ‘‘পঞ্চহি, ভিক্খৰে, ধম্মেহি সমন্নাগতো উপাসকো উপাসকচণ্ডালো চ হোতি, উপাসকমলঞ্চ, উপাসকপতিকুট্ঠো চ. কতমেহি পঞ্চহি? অস্সদ্ধো হোতি, দুস্সীলো হোতি, কোতূহলমঙ্গলিকো হোতি, মঙ্গলং পচ্চেতি, নো কম্মং, ইতো চ বহিদ্ধা দক্খিণেয্যং পরিযেসতি, তত্থ চ পুব্বকারং করোতী’’তি (অ. নি. ৫.১৭৫).

কা সম্পত্তীতি যা চস্স সীলসম্পদা চেৰ আজীৰসম্পদা চ, সা সম্পত্তি; যে চস্স রতনভাৰাদিকরা সদ্ধাদযো পঞ্চ ধম্মা. যথাহ – ‘‘পঞ্চহি, ভিক্খৰে, ধম্মেহি সমন্নাগতো উপাসকো উপাসকরতনঞ্চ হোতি, উপাসকপদুমঞ্চ, উপাসকপুণ্ডরীকঞ্চ. কতমেহি পঞ্চহি? সদ্ধো হোতি, সীলৰা হোতি, ন কোতূহলমঙ্গলিকো হোতি, কম্মং পচ্চেতি, নো মঙ্গলং, ন ইতো বহিদ্ধা দক্খিণেয্যং গৰেসতি, ইধ চ পুব্বকারং করোতী’’তি (অ. নি. ৫.১৭৫).

অজ্জতগ্গেতি এত্থাযং অগ্গসদ্দো আদিকোটিকোট্ঠাসসেট্ঠেসু দিস্সতি. ‘‘অজ্জতগ্গে, সম্ম দোৰারিক, আৰরামি দ্ৰারং নিগণ্ঠানং নিগণ্ঠীন’’ন্তিআদীসু (ম. নি. ২.৭০) হি আদিম্হি দিস্সতি. ‘‘তেনেৰ অঙ্গুলগ্গেন তং অঙ্গুলগ্গং পরামসেয্য. উচ্ছগ্গং ৰেল়গ্গ’’ন্তিআদীসু (কথা. ২৮১) কোটিযং. ‘‘অম্বিলগ্গং ৰা মধুরগ্গং ৰা তিত্তকগ্গং ৰা ৰিহারগ্গেন ৰা পরিৰেণগ্গেন ৰা ভাজেতু’’ন্তিআদীসু (চূল়ৰ. ৩১৭) কোট্ঠাসে. ‘‘যাৰতা, ভিক্খৰে, সত্তা অপদা ৰা…পে… তথাগতো তেসং অগ্গমক্খাযতী’’তিআদীসু (অ. নি. ৪.৩৪) সেট্ঠে. ইধ পনাযং আদিম্হি দট্ঠব্বো. তস্মা অজ্জতগ্গেতি অজ্জতং আদিং কত্ৰাতি এৰমেত্থত্থো ৰেদিতব্বো. অজ্জতন্তি অজ্জভাৰং. অজ্জদগ্গেতি ৰা পাঠো, দকারো পদসন্ধিকরো. অজ্জ অগ্গন্তি অত্থো.

পাণুপেতন্তি পাণেহি উপেতং. যাৰ মে জীৰিতং পৰত্ততি, তাৰ উপেতং অনঞ্ঞসত্থুকং তীহি সরণগমনেহি সরণং গতং উপাসকং কপ্পিযকারকং মং ভগৰা ধারেতু জানাতু. অহঞ্হি সচেপি মে তিখিণেন অসিনা সীসং ছিন্দেয্য, নেৰ বুদ্ধং ‘‘ন বুদ্ধো’’তি ৰা, ধম্মং ‘‘ন ধম্মো’’তি ৰা, সঙ্ঘং ‘‘ন সঙ্ঘো’’তি ৰা ৰদেয্যন্তি.

এৰং অত্তসন্নিয্যাতনেন সরণং গন্ত্ৰা অত্তনা কতং অপরাধং পকাসেন্তো অচ্চযো মং, ভন্তেতিআদিমাহ. তত্থ অচ্চযোতি অপরাধো. মং অচ্চগমাতি মং অতিক্কম্ম অভিভৰিত্ৰা পৰত্তো. ধম্মিকং ধম্মরাজানন্তি এত্থ ধম্মং চরতীতি ধম্মিকো. ধম্মেনেৰ রাজা জাতো, ন পিতুঘাতনাদিনা অধম্মেনাতি ধম্মরাজা. জীৰিতা ৰোরোপেসিন্তি জীৰিতা ৰিযোজেসিং. পটিগ্গণ্হাতূতি খমতু. আযতিং সংৰরাযাতি অনাগতে সংৰরত্থায. পুন এৰরূপস্স অপরাধস্স দোসস্স খলিতস্স অকরণত্থায.

২৫১. তগ্ঘাতি একংসে নিপাতো. যথা ধম্মং পটিকরোসীতি যথা ধম্মো ঠিতো তথেৰ করোসি, খমাপেসীতি ৰুত্তং হোতি. তং তে মযং পটিগ্গণ্হামাতি তং তৰ অপরাধং মযং খমাম. ৰুড্ঢিহেসা, মহারাজ অরিযস্স ৰিনযেতি এসা, মহারাজ, অরিযস্স ৰিনযে বুদ্ধস্স ভগৰতো সাসনে ৰুড্ঢি নাম. কতমা? যাযং অচ্চযং অচ্চযতো দিস্ৰা যথাধম্মং পটিকরিত্ৰা আযতিং সংৰরাপজ্জনা, দেসনং পন পুগ্গলাধিট্ঠানং করোন্তো – ‘‘যো অচ্চযং অচ্চযতো দিস্ৰা যথাধম্মং পটিকরোতি, আযতিং সংৰরং আপজ্জতী’’তি আহ.

২৫২. এৰং ৰুত্তেতি এৰং ভগৰতা ৰুত্তে. হন্দ চ দানি মযং ভন্তেতি এত্থ হন্দাতি ৰচসাযত্থে নিপাতো. সো হি গমনৰচসাযং কত্ৰা এৰমাহ. বহুকিচ্চাতি বলৰকিচ্চা. বহুকরণীযাতি তস্সেৰ ৰেৰচনং. যস্সদানি ত্ৰন্তি যস্স ইদানি ত্ৰং মহারাজ গমনস্স কালং মঞ্ঞসি জানাসি, তস্স কালং ত্ৰমেৰ জানাসীতি ৰুত্তং হোতি. পদক্খিণং কত্ৰা পক্কামীতি তিক্খত্তুং পদক্খিণং কত্ৰা দসনখসমোধানসমুজ্জলং অঞ্জলিং সিরসি পতিট্ঠপেত্ৰা যাৰ দস্সনৰিসযং ভগৰতো অভিমুখোৰ পটিক্কমিত্ৰা দস্সনৰিজহনট্ঠানভূমিযং পঞ্চপতিট্ঠিতেন ৰন্দিত্ৰা পক্কামি.

২৫৩. খতাযং, ভিক্খৰে, রাজাতি খতো অযং, ভিক্খৰে, রাজা. উপহতাযন্তি উপহতো অযং. ইদং ৰুত্তং হোতি – অযং, ভিক্খৰে, রাজা খতো উপহতো ভিন্নপতিট্ঠো জাতো, তথানেন অত্তনাৰ অত্তা খতো, যথা অত্তনো পতিট্ঠা ন জাতাতি. ৰিরজন্তি রাগরজাদিৰিরহিতং. রাগমলাদীনংযেৰ ৰিগতত্তা ৰীতমলং. ধম্মচক্খুন্তি ধম্মেসু ৰা চক্খুং, ধম্মমযং ৰা চক্খুং, অঞ্ঞেসু ঠানেসু তিণ্ণং মগ্গানমেতং অধিৰচনং. ইধ পন সোতাপত্তিমগ্গস্সেৰ. ইদং ৰুত্তং হোতি – সচে ইমিনা পিতা ঘাতিতো নাভৰিস্স, ইদানি ইধেৰাসনে নিসিন্নো সোতাপত্তিমগ্গং পত্তো অভৰিস্স, পাপমিত্তসংসগ্গেন পনস্স অন্তরাযো জাতো. এৰং সন্তেপি যস্মা অযং তথাগতং উপসঙ্কমিত্ৰা রতনত্তযং সরণং গতো, তস্মা মম সাসনমহন্ততায যথা নাম কোচি পুরিসস্স ৰধং কত্ৰা পুপ্ফমুট্ঠিমত্তেন দণ্ডেন মুচ্চেয্য, এৰমেৰ লোহকুম্ভিযং নিব্বত্তিত্ৰা তিংসৰস্সসহস্সানি অধো পতন্তো হেট্ঠিমতলং পত্ৰা তিংসৰস্সসহস্সানি উদ্ধং গচ্ছন্তো পুনপি উপরিমতলং পাপুণিত্ৰা মুচ্চিস্সতীতি ইদম্পি কির ভগৰতা ৰুত্তমেৰ, পাল়িযং পন ন আরূল়্হং.

ইদং পন সুত্তং সুত্ৰা রঞ্ঞা কোচি আনিসংসো লদ্ধোতি? মহাআনিসংসো লদ্ধো. অযঞ্হি পিতু মারিতকালতো পট্ঠায নেৰ রত্তিং ন দিৰা নিদ্দং লভতি, সত্থারং পন উপসঙ্কমিত্ৰা ইমায মধুরায ওজৰন্তিযা ধম্মদেসনায সুতকালতো পট্ঠায নিদ্দং লভি. তিণ্ণং রতনানং মহাসক্কারং অকাসি. পোথুজ্জনিকায সদ্ধায সমন্নাগতো নাম ইমিনা রঞ্ঞা সদিসো নাহোসি. অনাগতে পন ৰিজিতাৰী নাম পচ্চেকবুদ্ধো হুত্ৰা পরিনিব্বাযিস্সতীতি. ইদমৰোচ ভগৰা. অত্তমনা তে ভিক্খূ ভগৰতো ভাসিতং অভিনন্দুন্তি.

ইতি সুমঙ্গলৰিলাসিনিযা দীঘনিকাযট্ঠকথাযং

সামঞ্ঞফলসুত্তৰণ্ণনা নিট্ঠিতা.